Tasal 7
K’utb’esinb’il na’leb’ k’eeb’il re laj Jose Smith li Profeet ut laj Oliver Cowdery, sa’ Harmony, Pennsylvania, Abril 1829, naq ke’patz’ok rik’in li Urim ut Tumim chirix laj Jwan, li raarookil tzolom, ma kikana sa’ li tz’ejwalej malaj kikam chaq. Li k’utb’esinb’il na’leb’ a’an jun esil li jaltesinb’il ru, li tz’iib’anb’il chaq chiru perel tz’uum xb’aan laj Jwan ut muqb’il chaq xb’aan a’an.
1–3, Laj Jwan li Raaro taawanq chi yo’yo toj reetal naq taachalq li Qaawa’; 4–8, Laj Pedro, laj Santiago ut laj Jwan wan xlaawil li evangelio rik’ineb’.
1 Ut li Qaawa’ kixye we: At Jwan, raarookat inb’aan, k’a’ru nakawaj? Xb’aan naq wi nakapatz’ k’a’ruhaq li nakawaj, taak’eemanq aawe.
2 Ut laa’in kinye re: At Qaawa’, k’e we wankilal sa’ xb’een li kamk, re taaruuq tinwanq chi yo’yo ut tink’ameb’ chaq li aamej aawik’in.
3 Ut li Qaawa’ kixye we: Chi yaal, chi yaal, ninye aawe, xb’aan naq kawaj a’in tatkanaaq toj reetal naq tink’ulunq sa’ inloq’al, ut tat-aatinaq jo’ profeet chiruheb’ li tenamit, junkab’al, aatinob’aal ut teepal.
4 Ut xb’aan a’in naq li Qaawa’ kixye re laj Pedro: Wi nawaj laa’in naq taakanaaq toj reetal tink’ulunq, k’a’ru taawaj wi’? Xb’aan naq a’an kiraj wik’in naq tixk’ameb’ chaq li aamej wik’in, a’b’anan laa’at kawaj naq chi seeb’ tatchalq wik’in sa’ lin awa’b’ejihom.
5 Ninye aawe, at Pedro, chaab’il ajom a’in; a’b’an li raaro inb’aan kiraj naq tixb’aanu k’a’ruhaq chik, malaj jun k’anjel li toj nim wi’chik sa’ xyanqeb’ li winq chiru li xb’aanuhom chaq junxil.
6 Relik chi yaal, a’an xk’am sa’ xb’een jun li k’anjel li nim wi’chik ru; jo’kan naq tink’e a’an choq’ xam naxamnak ut choq’ anjel aj k’anjelanel; a’an taak’anjelaq choq’ reheb’ li te’wanq choq’ aj eechanihom re li kolb’a-ib’, li wankeb’ sa’ li ruchich’och’.
7 Ut tatink’e laa’at chi k’anjelak choq’ re a’an ut re laa komon aj Santiago; ut eere oxib’al laa’ex tink’e li wankilal ut xlaawil li k’anjel a’in toj reetal naq tink’ulunq.
8 Chi yaal ninye eere, teek’ul eekab’ichal jo’ chanru lee rajom, xb’aan naq eekab’ichal nasaho’ eech’ool rik’in li k’a’ru keraj.