Tasal 74
K’utb’esinb’il na’leb’ k’eeb’il re laj Jose Smith li Profeet, sa’ Condado Wayne, Nueva York, 1830. Naq toj maji’ nak’uub’aman li Iglees, ak ke’waklesiik li patz’om chirix chanru us xb’aanunkil li kub’iha’, ut li Profeet ki’ok chixsik’b’al xsumenkil ru li patz’om a’an. Lix tz’iib’anb’il esil laj Jose Smith naxye naq li k’utb’esinb’il na’leb’ a’in naxch’olob’ xyaalal 1 Korintios 7:14, li na’oksiman chaq kok’ aj xsa’ re xk’eeb’al xtiikilal li kub’iha’ choq’ reheb’ li k’uula’al.
1–5, Laj Pablo naxk’e xna’leb’ li Iglees sa’ lix kutan a’an naq ink’a’ te’xpaab’ lix chaq’rab’ laj Moises; 6–7, Eb’ li kok’al ka’ch’ineb’ xyu’am santob’resinb’ileb’ xb’aan lix tojb’al rix li maak.
1 Xb’aan naq li b’eelomej li ink’a’ napaab’an, santob’resinb’il xb’aan li ixaqilb’ej, ut li ixaqilb’ej li ink’a’ napaab’an santob’resinb’il xb’aan li b’eelomej; wi ta ink’a’ jo’kan, tz’ajaqeb’ raj ru lee ralal eek’ajol; a’ut anajwan santeb’.
2 Anajwan, sa’ xkutaneb’ li apostol li chaq’rab’ chirix xsetb’al xtz’uumal li tz’ejwalej natawman sa’ xyanq chixjunileb’ laj Judio li ink’a’ neke’paab’ank re lix evangelio li Jesukristo.
3 Ut kik’ulman naq kiwakli jun nimla wech’ok-ib’ sa’ xyanqeb’ li tenamit chirix li chaq’rab’ re xsetb’al xtz’uumal li tz’ejwalej, xb’aan naq li b’eelomej li ink’a’ napaab’an kiraj naq eb’ li ralal xk’ajol te’setmanq xtz’uumaleb’ lix tz’ejwal ut te’k’ehe’q rub’el xwankil lix chaq’rab’ laj Moises, ut a’ chaq’rab’ a’an ak tz’aqlojenaq ru.
4 Ut kik’ulman naq eb’ li alal k’ajolb’ej, rik’in naq k’iresinb’ileb’ rub’el xwankil lix chaq’rab’ laj Moises, ke’ab’in chiru li na’leb’ kanab’anb’il xb’aaneb’ lix yuwa’, ut moko ke’xpaab’ ta lix evangelio li Kristo, sa’ li ke’ok wi’ chi moko santeb’ ta.
5 Jo’kan ut, xb’aan li ajom a’in naq li apostol kitz’iib’ak choq’ re li iglees, ut kixk’e jun taqlahom reheb’, moko re ta li Qaawa’, re b’an a’an xjunes, naq jun aj paab’anel ink’a’ taajunajimanq rik’in jun li ink’a’ napaab’an, ka’ajwi’ wi taak’ehe’q xraqik lix chaq’rab’ laj Moises rik’ineb’;
6 Re naq te’kanaaq li ralal xk’ajol chi maak’a’ li setok xtz’uumal li tz’ejwalej; ut taak’ehe’q xraqik li na’leb’ kanab’anb’il, li nayehok re naq moko santeb’ ta li kok’al; xb’aan naq natawman a’an sa’ xyanqeb’ laj Judio.
7 A’b’anan eb’ li kok’al ka’ch’ineb’ xyu’am santeb’, rik’in naq santob’resinb’ileb’ xb’aan lix tojb’al rix li maak xb’aan li Jesukristo, ut a’in xyaalalil li loq’laj hu.