ក.យ.ស., ហេព្រើរ ៧:៣ (ចូរប្រៀបធៀបនឹងគម្ពីរហេព្រើរ ៧:៣)
(បព្វជិតភាពដ៏បរិសុទ្ធតាមរបៀបនៃព្រះរាជបុត្រានៃព្រះ គឺគ្មានមាតា ឬបិតាទេ ហើយគ្មានថ្ងៃចាប់ផ្ដើម ឬថ្ងៃបញ្ចប់ដែរ)។
៣ត្បិតលោកម៉ិលគីស្សាដែកត្រូវបានតែងតាំងឡើងឲ្យធ្វើជាសង្ឃ តាមរបៀបនៃព្រះរាជបុត្រានៃព្រះ ជារបៀបដែលគ្មានមាតា ឬបិតា គ្មានពង្សាវតារទេ ក៏គ្មានថ្ងៃចាប់ផ្ដើម ឬទីបញ្ចប់នៃជីវិតដែរ។ ហើយអស់អ្នកណាដែលត្រូវបានតែងតាំងឡើងចំពោះបព្វជិតភាពនេះ ក៏ត្រូវបានធ្វើឲ្យមានភាពដូចជាព្រះរាជបុត្រានៃព្រះ នៅជាសង្ឃជារៀងដរាបតទៅ។
ក.យ.ស., ហេព្រើរ ៧:២៥–២៦ (ចូរប្រៀបធៀបនឹងគម្ពីរហេព្រើរ ៧:២៦–២៧)
(តួនាទីរបស់ព្រះគ្រីស្ទជាអ្នកកណ្ដាលត្រូវបានពន្យល់ប្រាប់)។
២៥ត្បិតគួរឲ្យមានសម្ដេចសង្ឃយ៉ាងនោះសម្រាប់យើង ដែលទ្រង់បរិសុទ្ធ ឥតពុតមាយា ឥតសៅហ្មង ដែលបានញែកចេញពីមនុស្សបាប ហើយត្រូវបានធ្វើជាអ្នកត្រួតត្រាលើស្ថានសួគ៌
២៦ហើយពុំមែនដូចជាពួកសម្ដេចសង្ឃទាំងនោះ ដែលនឹងថ្វាយយញ្ញបូជាជារៀងរាល់ថ្ងៃ ដែលថ្វាយដោយព្រោះបាបខ្លួនជាមុនដំបូង រួចមកដោយព្រោះបាបរបស់ជនទាំងឡាយទេ ត្បិតទ្រង់មិនចាំបាច់នឹងថ្វាយយញ្ញបូជាដោយព្រោះបាបរបស់ទ្រង់នោះទេ ព្រោះទ្រង់មិនស្គាល់បាបឡើយ ប៉ុន្តែដោយព្រោះបាបរបស់ជនទាំងឡាយវិញ។ ហើយទ្រង់បានថ្វាយយញ្ញបូជានេះមួយដងជាសម្រេច គឺក្នុងកាលដែលទ្រង់ថ្វាយព្រះអង្គទ្រង់នោះឯង។