JSN, John 1:1–34. Fa to John 1:1–34 ho
Wɔakã Jesus Christ n’asɛmpa no fi ahyɛse no. John Onumanyi no nye Elias no a osiesie kwan ma Christ no, na Jesus Christ nye Elias no a ɔdze ndzɛmba nyina bɛsan ananmu aba na No mu na nkwagye dua ba.
1 Ahyɛse no nna wɔnam Ɔba no do kã asɛmpa no. Na asɛmpa no nye asɛm no, na asɛm no wɔ Ɔba no hɔ, na Ɔba no nye Nyankopɔn wɔ hɔ, na Ɔba no fi Nyankopɔn hɔ.
2 Ɔnoara na ahyɛse no ɔnye Nyankopɔn wɔ hɔ.
3 Wɔnam no do yɛɛ adze nyina na woennkwetsi no annyɛ biribiara a wɔyɛe.
4 No mu na asɛmpa no wɔ, na asɛmpa no nye nkwa no, na nkwa no nye nyimpa ne kan no;
5 Na kan no hyerɛɛn wɔ wiadze, na wiadze ennhu no.
6 Nyimpa bi bae a Nyankopɔn somaa no a ne dzin dze John.
7 Ɔnoara na ɔbaa wiadze dɛ ɔrebɛyɛ dasefo, dɛ oribedzi dase wɔ kan no ho, orubodua Ɔba no do agye asɛmpa no ho dase, akyerɛ hɔn nyinara, ama ɔnam no do nyimpa nyina aagye edzi.
8 Nnyɛ ɔno nye kan no, mbom ɔbae bedzii kan no ho dase,
9 Dza ɔyɛ nokwar kan no, a ɔhyerɛn nyimpa biara a ɔba wiadze mu no;
10 Nyankopɔn ne Ba no mpo. Ɔno a ɔbaa wiadze, na ɔno na ɔyɛɛ wiadze, na wiadze ennhu no.
11 Ɔbaa nankasa nedze hɔ, na hɔn a wɔyɛ nankasa nedze no anngye no.
12 Mbom dodow a wɔgyee no no, hɔn na ɔmaa hɔn tum dɛ wɔnyɛ Nyankopɔn ne mba; ɔdze ma hɔn a wɔgye ne dzin dzi no nko.
13 Wommfi bɔgya anaa honam ne pɛ anaa nyimpa ne pɛ na wɔwoo no, mbom ofi Nyankopɔn mu.
14 Na dɛm asɛm noara bɛyɛɛ honam, na ɔnye hɛn bɛtsenae, na yehun n’enyimnyam, n’enyimnyam dɛ nyia Egya no Woo no Kortoo no a, adom nye nokwar ahyɛ no mã.
15 John dzii no ho dase na ɔtsẽaa mu dɛ, Oyi nye nyia mekãa dɛ; Nyia odzi m’ekyir reba no, ɔsɛ enyidzi kyɛn me; osiandɛ odzii me kan.
16 Na ahyɛse no na Asɛm no wɔ hɔ, Ɔba no mpo, ɔno na ɔabɛyɛ honam na Egya no nam ne pɛ do somaa no ma ɔbaa hɛn hɔ. Na dodow a wɔgye ne dzin dzi no, hɔn na wobenya n’amãyɛ. Na n’amãyɛ no hɛn nyina enya bi, ɔnam n’adom do; bɛkyebo na onnyiewiei nkwa mpo.
17 Wɔnam Moses do dze mbra no mae, mbom nkwa nye nokwar dze ɔnam Jesus Christ do na ɔbae.
18 Na mbra no fa honam ahyɛdze ho, a ɔdze owu ba; mbom asɛmpa no fa nkwa a onnyi ewiei no tum ho, na ɔnam Jesus Christ do, Ɔba a Wɔwoo no Kortoo no, a ɔwɔ Egya no bo mu no do.
19 Na obi nnhun Nyankopɔn pɛn, gyedɛ ɔagye Ɔba no ho dase; na wonnkotum agye obiara nkwa gyedɛ wɔnam no do.
20 Na iyi nye dase a John gyee, ber a Jewfo somaa asɔfo nye Levifo fii Jerusalem dɛ wonkebisa no dɛ; Woana nye wo?
21 Na ɔpaa mu kãe, na ɔannsan ekyir dɛ ɔno nye Elias; mbom ɔpae mu kãe see dɛ; Nnyɛ emi nye Christ no.
22 Na wobisaa no, see dɛ; osi dɛn mbɔ na ɔwo eyɛ Elias? Na ɔsee hɔn dɛ, Mennyɛ dɛm Elias no a ɔdze ndzɛmba nyiara bɛsan hɔn ananmu aba no. Na wobisaa no, see dɛ, Ana ɔwo nye dɛm nkɔnhyɛnyi no? Na obuaa dɛ, Oho.
23 Nna wɔsee no dɛ, Woana nye wo? Ama yeenya bi ekobua hɔn a wɔsomaa hɛn no. Ekã dɛn wɔ woho?
24 Ɔsee dɛ, Emi nye obi ne ndze a ɔretsẽa mu wɔ sar no do, Hom ntsen Ewuradze no kwan no, dɛ mbrɛ nkɔnhyɛnyi Isaiah kãe no.
25 Na hɔn a wɔsomaa hɔn no yɛ Phariseefo.
26 Na wobisaa no, na wɔsee no dɛ; Sɛ nnyɛ ɔwo nye Christ no anaa Elias no a ɔdze ndzɛmba nyinara bɛsan esi n’ananmu no, anaa dɛm nkɔnhyɛnyi no a, ebɛnadze ntsi na inuma yi?
27 John buaa hɔn, see dɛ, Emi medze nsu numa, mbom obi gyina hom finimfin a hom nnyim no.
28 Ɔno na megye no ho dase. Ɔno nye dɛm nkɔnhyɛnyi no, Elias mpo, ɔno, a odzi mekyir reba no, ɔsɛ enyidzi kyɛn me, na no nsokota ahoma mennsɛ dɛ mesan, anaa ne gyinabew murunntum nnhyɛ no mã; na ɔno ɔremmfa nsu nko nnuma, mbom ɔdze ogya, nye Sunsum Krɔnkrɔn no.
29 Adze kyee no, John hun Jesus dɛ ɔreba ne nkyɛn, na ɔsee dɛ; Hwɛ, Nyankopɔn Eguambaa a oyi wiadze bɔn kɔ!
30 Na John gyee no ho dase kyerɛɛ nyimpa dodow no, ɔsee dɛ, Oyi nye nyia mekãa dɛ; Ɔbarimba bi dzi m’ekyir reba a ɔsɛ enyidzi kyɛn me; osiandɛ odzii me kan, na minyim no, na dɛ wobeyi no akyerɛ Israel; ntsi na maba medze nsu runuma yi.
31 Na John gyee dase, see dɛ; Ber a munumaa no no, muhun Sunsum no dɛ ofi sor resian dɛ ebubur, na ɔbɛtsenaa no do.
32 Na muhun no; osiandɛ ɔno a ɔsomaa me dɛ memfa nsu nnuma no, ɔnoara na ɔsee me dɛ; Nyia ibohu dɛ Sunsum no resian, na ɔatsena no do no, ɔno nye nyia ɔdze Sunsum Krɔnkrɔn no bonuma.
33 Na mehu so, na midzi dase dɛ iyi nye Nyankopɔn Ba no.
34 Iyinom nyinara wɔyɛɛ no wɔ Bethabara, a ɔwɔ Jordan ekyir, bea a John runuma no.
JSN, John 1:42. Fa to John 1:42 ho
Cephas kyerɛ dɛ “adzehunyi” anaa “ɔbo.”
42 Na ɔdze no baa Jesus nkyɛn. Na aber a Jesus hwɛɛ no no, ɔsee dɛ, Ɔwo nye Simon, Jona ba no, wɔbɛfrɛ wo Cephas, a, ne nkyerɛase nye, adzehunyi anaa ɔbo. Na wɔyɛ apofo. Na ntsɛmara wɔdaan biribiara gyae na wɔbɛkaa Jesus do.