¶ 1 BEA koe tabuaki eni, aia nae tabuaki‘i aki e Mosese koe tagata oe Otua ae fānau a Isileli i he teeki ai mate ia.

2 Bea naa ne behe eia, Nae haele mai a Jihova mei Sainai, bea tuu hake mei Seia kiate kinautolu; nae ulo mai eia mei he mouga ko Balani, bea nae haele mai ia moe gaahi toko mano oe kau maonioni; nae alu atu mei hono nima toomatau ae fono fakavela maa nautolu.

3 Io, naa ne ofa ki he kakai; ko ene kakai maonioni kotoabe nae i hono nima: bea naa nau nofo hifo ki hono va‘e; e ma‘u taki taha kotoabe a ene gaahi folofola.

4 Nae fekau eia ae fono kiate kitautolu, io koe tofia oe fakataha o Jekobe.

5 Bea koe tu‘i ia i Jesuluni, i he fakataha oe gaahi eiki oe kakai moe gaahi faahiga o Isileli.

¶ 6 Tuku ke moui a Lubeni, bea oua naa mate; bea oua naa toko jii hono kau tagata.

¶ 7 Bea koeuhi ko Juta: naa ne behe, E Jihova, ke ke fanogo ki he le‘o o Juta, bea omi ia ki hono kakai: tuku ke malohi hono nima kiate ia; bea ke ke iate ia koe tokoni mei hono gaahi fili.

¶ 8 Bea nae lea kia Livai, o behe, Ko ho Tumemi mo ho Ulimi ke i he toko taha maonioni, aia naa ke ahiahi‘i i Masa, moia naa mo fekuki foki, i he vai o Meliba;

9 Aia naa ne lea ki he ene tamai bea ki he ene fa‘e, Nae ikai teu mamata kiate ia; bea nae ikai te ne tui foki ki hono gaahi kaiga, be ilo‘i ene fānau aana: he kuo nau tokaga ki hoo folofola, bea tauhi hoo fuakava.

10 Te nau akonaki‘i a Jekobe i hoo gaahi fakamāu, mo Isileli i hoo fono: te nau ai ae mea namu kakala i ho ao, moe feilaulau tutu kotoa ki ho feilaulauaga.

11 E Jihova, ke ke tabuaki ene mea, mo ke ma‘u ae gaue a hono nima: ta ke aji i he fajiatua o kinautolu oku tuu hake kiate ia, bea mo kinautolu oku fehia kiate ia, ke oua naa nau toe tuu hake.

¶ 12 Bea nae lea ia kia Benijimani o behe, Koe ofeina ia JIHOVA, te na nonofo lelei mo ia; bea e malu‘i ia i he aho kotoa, bea e nofo ia i he vahaa o hono uma.

¶ 13 Bea nae lea ia kia Josefa, o behe, Ke monuia ia Jihova a hono fonua, i he gaahi mea maogooga oe lagi, bea i he hahau, bea i he loloto aia oku tokoto i lalo,

14 Bea i he gaahi fua maogooga oku laga‘i e he laa, bea i he gaahi mea maogooga oku fakatubu e he gaahi mahina,

15 Bea i he gaahi mea fugani lelei oe gaahi mouga i mua i mua, bea i he gaahi mea maogooga oe gaahi tafugofuga tologa mau be,

16 Bea i he gaahi mea maogooga oe fonua mo hono fonu o ia, bea i he finagalo lelei o ia nae nofo i he ulu akau: ke hoko ia ki he ulu o Josefa, bea ki he tumuaki oe ulu o ia nae fakamavae mei hono kaiga.

17 Koe lelei oona oku hage koe uluaki tubu o ene bulu, bea ko hono nifo oona oku hage koe nifo oe iunikoni: te ne teke‘i aki ia ae kakai fakataha o a‘u atu ki he gataaga o mamani: bea koe gaahi toko mano akinautolu o Ifalemi, bea koe gaahi toko mano akinautolu o Manase.

¶ 18 Bea nae lea ia kia Sebuloni, Ke ke fiefia, Sebuloni, i hoo alu atu; mo Isaka, i ho gaahi fale fehikitaki.

19 Te nau ui ae kakai ki he mouga; te nau atu i ai ae gaahi feilaulau oe maonioni: he te nau mimijii mai ae koloa oe tahi, bea moe gaahi koloa kuo fufu i he oneone.

¶ 20 Bea nae lea ia kia Kata, Ke hoko ae tabuaki kiate ia oku ne fakalahi a Kata: oku nofo ia o hage ha laione, bea oku ne haehae ae nima moe tumuaki oe ulu.

21 Bea oku ne tauhi ae uluaki vahe maana, koeuhi nae tuku ia i ai, i he tufakaga oe eiki fai fono; bea nae ha‘u ia moe gaahi eiki oe kakai, naa ne fai ae agatonu a Jihova, mo ene gaahi fakamāu mo Isileli.

¶ 22 Bea nae lea ia kia Tani, o behe, Koe uhiki laione a Tani: e hobo ia mei Besani.

¶ 23 Bea nae lea ia kia Nafitali, o behe, E Nafitali, akoe kuo fakafiemalie‘i i he ofa, bea fonu i he tabuaki a Jihova: ke ke ma‘u ekoe ae botu luluga moe toga.

¶ 24 Bea nae lea ia kia Aseli, Ke tabuaki aki a Aseli ae gaahi fānau, ke lelei ia ki hono gaahi kaiga, bea ke unu eia hono va‘e i he lolo.

25 E hoko ho tobuva‘e koe aione moe balasa; bea e tatau be ho malohi ki ho gaahi aho.

¶ 26 Oku ikai ha toko taha oku tatau moe Otua o Jesuluni, aia oku heka o haele i he gaahi lagi ko ho tokoni, bea i hono lelei lahi i he lagi.

27 Koe Otua taegata ko ho hufaga, bea oku i lalo iate koe ae nima tologa taegata, bea te ne teke‘i kituaa ae fili mei ho ao; o ne behe, Fakaauha akinautolu.

28 E toki nofo toko taha fiemalie ai be a Isileli: koe matavai o Jekobe e i he fonua oe uite moe uaine; bea e to hifo ae hahau o hono lagi foki.

29 Oku ke monuia koe, E Isileli: kohai oku tatau mo koe, koe kakai kuo fakamoui e Jihova, koe fakaū o ho tokoni, bea koe heleta foki o ho malohi! bea e ilo a ho gaahi fili koe kau loi kiate koe; bea te ke malaki a ho nau gaahi botu maoluga.