¶ 1 E HOKU foha, ke ke ma‘u eku gaahi lea, bea ke tanaki kiate koe a eku gaahi fekau.

2 Fai ki he eku gaahi fekau bea moui ai; bea tokaga‘i a eku fono o hage ko ho kano‘i mata.

3 Nonoo ia ki ho louhi‘i nima, tohi ia ki he kakano o ho loto.

4 Ke ke lea o behe ki he boto, Ko hoku tokoua koe; bea ke ui ae ilo ko ho kaiga fefine:

5 Koeuhi ke na fakamoui koe mei he fefine muli, mei he muli oku fakaoloolo aki ene gaahi lea.

¶ 6 He naaku jio atu mei he mataba o hoku fale mei he mataba jioata.

7 Bea naaku vakai ki he kakai vale, bea neu ilo‘i i he kau talavou ae tagata talavou oku majiva i he boto,

8 Nae alu atu i he hala o ofi ki hono abi; o ne alu i he hala ki hono fale,

9 I he efiafi bouli, i he bo uliuli mo fakabouli:

10 Bea vakai, nae fakafetaulaki mai kiate ia ae fefine oku kofu i he kofu oe faa feauaki, o loto kākā.

11 (Oku faa logoaa ia mo agamalohi; oku ikai nofo hono va‘e i hono fale:

12 Ko eni oku i tua, ko ena oku i he gaahi hala, oku ne nofo toitoi i he tuliki kotoabe.)

13 Bea naa ne buke ia, bea uma ki ai, bea i he mata fiematamua naa ne behe kiate ia,

14 Oku ou ma‘u ae gaahi foaki fakalelei; bea kuou fakamooni ki he eku gaahi fuakava i he aho ni.

15 Koia kuou ha‘u ai ke ta feilogaki mo koe, ke kumi i he feiga ki ho mata, bea koeni kuou ma‘u koe.

16 Kuou teuteu hoku mohega aki ae gaahi buibui matamata lelei, moe togi fakasanisani, moe tubenu lelei mei Ijibite.

17 Kuou fakanamu kakala a hoku mohega aki ae mula, moe alosi, bea moe sinamoni.

18 Ha‘u, ke ta fakafonu akitaua i he ofa o a‘u ki he abogibogi: ke ta fakafiemalie akitaua i he e ta fai ofa.

19 He oku ikai i abi ae tagata eiki, kuo alu ia o fonoga mamao:

20 Kuo ne ave mo ia ae kato baaga, bea e ikai ha‘u ia kae oua ke hokojia hono aho kuo ne lea ki ai.

21 Naa ne fakavaivai‘i ia aki a ene gaahi lea matamata lelei, o ne ma‘u ia i he fakaoloolo a hono gutu.

22 Koia naa ne alu muimui leva iate ia, o hage koe bulu ke tamate‘i, bea hage koe vale ki he tautea oe akau fakamau va‘e;

23 Kae oua ke aji ae gahau ki hono ate; io, o hage koe manu oku oho vave ki he tauhele, o ikai ke ne ilo koe mea ke oji ai ene moui.

¶ 24 E fānau, ke mou fanogo eni kiate au, bea mou tokaga ki he gaahi lea a hoku gutu.

25 Oua naa tuku ke alu atu ho loto ki hono hala, oua naa mou he i hono gaahi aluaga.

26 He kuo li hifo eia ae toko lahi kuo lavea; io, kuo tamate‘i eia ae kau tagata malohi toko lahi.

27 Ko hono fale koe hala ia ki heli, oku alu hifo ia ki he nofoaga oe mate.