1 Nim no tus Tswv uas yog Vajtswv tau ua rau txoj kev tshaib nqhis hnyav heev rau hauv thaj av Ules, npaum li uas kuv tus kwv Halas tau tuag, tiam sis kuv txiv Telas tseem nyob hauv Ules, ntawm teb chaws Khadees.

2 Thiab tau muaj tias kuv, Anplaham, tau coj Xalais los ua poj niam, thiab kuv tus kwv Nahaus tau coj Milekas, uas yog Halas tus ntxhais, los ua poj niam.

3 Nim no tus Tswv tau hais rau kuv tias: Anplaham, cia li khiav tawm ntawm koj lub teb chaws, thiab ntawm koj tej txheeb ze, thiab ntawm koj txiv tsev neeg mus, rau ib thaj av uas kuv yuav qhia rau koj.

4 Yog li ntawd kuv ncaim thaj av Ules, teb chaws Khadees mus, es mus rau tim thaj av Kana-as; thiab kuv coj Lauj, kuv tus kwv tus tub, thiab nws tus poj niam, thiab kuv tus poj niam Xalais; thiab kuv txiv kuj tau nrog kuv mus, mus txog thaj av uas peb tis npe ua Halas.

5 Thiab txoj kev tshaib nqhis tsis tshua hnyav lawm; thiab kuv txiv tau so hauv Halas thiab nyob ntawd, vim rau qhov muaj tej tsiaj nyeg coob nyob hauv Halas; thiab kuv txiv rov qab tig mus rau nws txoj kev pe mlom, yog li ntawd nws nyob hauv Halas mus ntxiv.

6 Tiam sis kuv, Anplaham, thiab Lauj, kuv tus kwv tus tub, tau thov tus Tswv, thiab tus Tswv tshwm sim los rau kuv, thiab hais rau kuv tias: Sawv, thiab coj Lauj nrog koj; vim kuv muaj hom phiaj yuav coj koj tawm hauv Halas no mus, thiab muab koj ua ib tug sawv cev ris kuv lub npe mus rau pej kum teb uas kuv yuav muab rau koj cov tub ki tom qab koj lub caij nyoog ua lawv tug kav ib txhis, thaum lawv mloog kuv lub suab.

7 Vim kuv yog tus Tswv koj tus Vajtswv; kuv nyob saum ntuj ceeb tsheej; lub ntiaj teb yog kuv rooj tiag taw; kuv xyab kuv txhais tes rau hauv hiav txwv, thiab cov dej ua raws li kuv lub suab; kuv ua kom tej cua thiab tej hluav taws ua kuv lub tsheb nees luag; kuv hais rau tej roob tias—Khiav ntawm no mus—ces saib seb, tej khaub zig cua muab tej roob nqa hlo mus, tam sim ntawd, tos nco xwb.

8 Kuv lub npe yog Yehauvas, thiab kuv paub qhov kawg txij thaum chiv keeb los; yog li ntawd kuv txhais tes yuav thaiv koj.

9 Thiab kuv yuav muab koj ua ib haiv neeg coob, thiab kuv yuav foom koob hmoov rau koj tshaj qhov ntsuas tau, thiab ua kom koj lub npe nto moo mus rau txhua haiv neeg, thiab koj yuav ua ib txoj koob hmoov rau koj cov tub ki tom qab koj lub caij nyoog, kom los ntawm lawv cov neeg lawv yuav coj txoj kev qhuab qhia thiab lub Pov Thawj Hwj no mus rau txhua haiv neeg;

10 Thiab kuv yuav foom koob hmoov rau lawv los ntawm koj lub npe; vim tag nrho cov uas yuav txais Txoj Moo Zoo no ces tus Tswv yuav hu lawv raws koj lub npe, thiab yuav suav lawv ua koj cov tub ki, thiab lawv yuav sawv ntsug thiab qhuas koj, ua lawv txiv;

11 Thiab kuv yuav foom koob hmoov rau cov uas foom koob hmoov rau koj, thiab foom tsis zoo rau cov uas foom tsis zoo rau koj; thiab los ntawm koj (uas yog, ntawm koj lub Pov Thawj Hwj) thiab koj cov tub ki (uas yog, koj lub Pov Thawj Hwj), vim kuv muab ib lo lus cog tseg rau koj tias txoj cai no yuav mus ntxiv los ntawm koj, thiab hauv koj cov tub ki tom qab koj (qhov ntawd yog hais tias, cov tub ki koj yug, los yog cov tub ki ntawm lub cev) tag nrho tej tsev neeg hauv ntiaj teb yuav tau koob hmoov, twb yog tej koob hmoov ntawm txoj Moo Zoo, uas yog tej koob hmoov ntawm txoj kev cawm seej, uas yog txoj sia nyob mus ib txhis.

12 Nim no, tom qab tus Tswv tau tseg tsis hais lus rau kuv, thiab ncaim nws tus kheej ntawm kuv mus, kuv hais hauv kuv lub siab tias: Koj tus tub qhe tau mob siab nrhiav koj; nim no kuv nrhiav tau koj lawm;

13 Koj tau xa koj tus tim tswv los tso kuv dim ntawm Elakenas tej vaj tswv, thiab yuav zoo yog kuv mloog koj lub suab, yog li ntawd cia koj tus tub qhe sawv thiab mus nrog txoj kev kaj siab lug.

14 Ces kuv, Anplaham, tau mus raws li tus Tswv tau hais rau kuv, thiab Lauj nrog kuv; thiab kuv, Anplaham, muaj rau caum ob xyoos thaum kuv ncaim ntawm Halas mus.

15 Thiab kuv coj Xalais, tus kuv coj los ua poj niam thaum kuv tseem nyob tim Ules, hauv Khadees teb chaws, thiab kuv tus kwv tus tub Lauj, thiab tag nrho peb tej khoom uas peb tau sau ua ke, thiab cov neeg uas peb tau pab hloov siab nyob hauv Halas, thiab tawm tuaj mus rau teb chaws Kana-as, thiab nyob hauv tej tsev ntaub thaum peb taug kev mus;

16 Yog li ntawd, kev nyob mus ib txhis yog qhov uas thaiv peb thiab peb lub pob zeb thiab peb txoj kev cawm seej, thaum peb taug kev ntawm Halas los txog ntawm Yesoos, los mus rau teb chaws Kana-as.

17 Nim no, kuv, Anplaham, tsa ib lub thaj nyob hauv thaj av Yesoos, thiab ua ib txoj kev tiam rau tus Tswv, thiab thov kom muab txoj kev tshaib nqhis tshem ntawm kuv txiv tsev neeg mus, kom lawv yuav tsis piam sij.

18 Ces tom qab ntawd peb los dhau Yesoos los mus rau thaj av qhov chaw Sekhees; nyob hauv lub toj Maules, thiab peb twb los txog ntawm ciaj ciam teb ntawm cov Neeg Kana-as lawm, thiab kuv tau ua kev cai txi nyob rau ntawm lub toj Maules, thiab mob siab thov tus Tswv, vim peb twb los txog rau hauv thaj av ntawm haiv neeg pe dab pe mlom no lawm.

19 Thiab tus Tswv tshwm sim los rau kuv kom teb kuv tej lus thov Vajtswv, thiab hais rau kuv tias: Kuv yuav muab thaj av no rau koj cov tub ki.

20 Thiab kuv, Anplaham, txawm sawv ntawm thaj av ntawm lub thaj uas kuv tau ua rau tus Tswv, thiab khiav ntawm qhov chaw ntawd mus rau pem ib lub roob nyob sab hnub tuaj ntawm Npethees, thiab tsa kuv lub tsev ntaub rau ntawd, Npethees nyob sab hnub poob, thiab A-is nyob sab hnub tuaj; thiab nyob rau ntawd kuv ua dua ib lub thaj rau tus Tswv, thiab rov qab hu dua tus Tswv lub npe dua.

21 Thiab kuv, Anplaham, tau mus, tseem mus lawm nram sab qab teb; thiab tseem muaj txoj kev tshaib nqhis nyob hauv thaj av; thiab kuv, Anplaham, txiav txim siab mus lawm nram Iyiv teb chaws, mus nyob nrad ib ntus, vim txoj kev tshaib nqhis pib mob heev.

22 Thiab tau muaj tias thaum kuv los ze yuav nkag rau hauv Iyiv teb chaws, tus Tswv hais rau kuv tias: Saib seb, Xalais, koj tus poj niam, yog ib tug poj niam zoo nkauj heev;

23 Yog li ntawd yuav muaj tias, thaum cov Neeg Iyiv pom nws, lawv yuav hais tias—Xalais yog nws tus poj niam; thiab lawv yuav muab koj tua pov tseg, tiam sis lawv yuav tseg nws nyob; yog li ntawd koj yuav tsum ua raws li no:

24 Cia nws hais rau cov Neeg Iyiv tias, nws yog koj tus muam, ces koj thiaj yuav muaj sia nyob.

25 Thiab tau muaj tias kuv, Anplaham, qhia rau kuv tus poj niam Xalais, tag nrho tej uas tus Tswv tau hais rau kuv—Yog li ntawd kuv thov koj, cia li hais rau lawv tias koj yog kuv tus muam, kom yuav tsis ua li cas rau kuv pub rau koj, thiab kuv yuav muaj sia nyob vim yog koj.