1 Kag ako, nga Ginuong Dios, naghambal kay Moises nga nagasiling: Inang Satanas, nga imo ginsugo nga magpalayo sa ngalan sang akon Bugtong nga Anak, amo man ang halin sa ginsuguran, kag nagkadto sia sa akon atubang nga nagasiling—Tan-awa, yari ako, ipadala ako, mangin anak mo ako kag tuboson ko ang tanan nga katawhan, nga wala sing bisan isa ka kalag nga madula, kag sigurado nga himuon ko ini; gani ihatag sa akon ang imo pagtahod.

2 Apang, tan-awa, ang akon Bugtong nga Anak, nga amo ang akon Hinigugma kag Pinili halin sa ginsuguran, nagsiling sa akon—Amay, ang imo pagbuot matuman, kag ang himaya mangin imo tubtob sa wala’y katapusan.

3 Gani, bangod inang si Satanas nagrebelde sa akon kag nagtinguha sa pagguba sang kahilwayan sa pagpili sang tawo, nga ginhatag ko, nga Ginuong Dios, sa iya, kag bangod man nga ginpangayo niya nga ihatag ko ang akon kaugalingon nga gahum sa iya; paagi sa gahum sang akon Bugtong nga Anak, ginsugo ko nga tabugon sia;

4 Kag sia nangin si Satanas, huo, nga amo ang yawa, ang amay sang tanan nga kabutigan, nga magpatalang kag magbulag sang mga tawo, kag dal-on sila sa pagkaulipon sa iya pagbuot, bisan pa ang tanan nga indi magpamati sa akon tingug.

5 Kag karon ang man-og labing tuso sangsa ano pa man nga sapat sang kapatagan nga ako, nga Ginuong Dios, naghimo.

6 Kag si Satanas nagpasulod sini sa tagipusuon sang man-og, (kay naganyat niya ang madamo nga magsunod sa iya,) kag gintinguhaan man niya nga sulayon si Eva, kay wala sia nakahibalo sang hunahuna sang Dios, gani gintinguhaan niya nga gub-on ang kalibutan.

7 Kag nagsiling sia sa babayi: Huo, nagsiling bala ang Dios—Indi kamo magkaon halin sa tagsa ka kahoy sang hardin? (Kag naghambal sia paagi sa baba sang man-og.)

8 Kag ang babayi nagsiling sa man-og: Mahimo kami magkaon sang bunga sang mga kahoy sang hardin;

9 Apang sang bunga sang kahoy nga makita mo sa tunga sang hardin, ang Dios nagsiling—Indi kamo magkaon sina, ukon magtandog sina, agud indi kamo mapatay.

10 Kag ang man-og nagsiling sa babayi: Sigurado nga indi kamo mapatay;

11 Kay nakahibalo ang Dios nga sa adlaw nga magkaon kamo sina, mabuksan ang inyo mga mata, kag mangin pareho kamo sa mga dios, nga nakahibalo sang maayo kag malain.

12 Kag sang nakita sang babayi nga ang kahoy maayo nga kalan-on, kag nangin makagalanyat sa mata, kag isa ka kahoy nga halandumon sa pagpaalam sa iya, nagkuha sia sang bunga sini, kag nagkaon, kag ginhatagan man ang iya bana nga kaupod niya, kag nagkaon sia.

13 Kag nabuksan ang mga mata nila nga duha, kag nahibaloan nila nga hublas sila. Kag nagtahi sila sing tambi-tambi sang mga dahon sang higera kag naghimo sang mga tampi para sa ila mga kaugalingon.

14 Kag nabatian nila ang tingug sang Ginuong Dios, sang nagalakat sila sa hardin, sa kabugnaw sang kaadlawon; kag si Adan kag iya asawa nagpanago halin sa presensya sang Ginuong Dios sa tunga sang mga kakahuyan sang hardin.

15 Kag ako, nga Ginuong Dios, nagpanawag kay Adan kag nagsiling sa iya: Diin ka makadto?

16 Kag nagsiling sia: Nabatian ko ang imo tingug sa hardin, kag ginhadlokan ako, bangod nakita ko nga hublas ako, kag nagpanago ako.

17 Kag ako, nga Ginuong Dios, nagsiling kay Adan: Sin-o ang nagsugid sa imo nga hublas ka? Nakakaon ka bala halin sa kahoy nga ginsugo ko sa imo nga indi mo pagkaunon, kay kon amo, sigurado nga mapatay ka?

18 Kag ang lalaki nagsiling: Ang babayi nga ginhatag mo sa akon kag ginsugo nga mangin kaupod ko, ginhatagan niya ako sang bunga sang kahoy kag nagkaon ako.

19 Kag ako, nga Ginuong Dios, nagsiling sa babayi: Ano bala ining nahimo mo? Kag ang babayi nagsiling: Ang man-og nagsulay sa akon, kag nagkaon ako.

20 Kag ako, nga Ginuong Dios, nagsiling sa man-og: Bangod ginhimo mo ini, pagasumpaon ka labi sa tanan nga kahayupan kag labi sa tanan nga kasapatan sang kapatagan; paagi sa imo tiyan magakamang ka, kag yab-ok ang imo pagakaunon sa tanan nga adlaw sang imo kabuhi;

21 Kag magabutang ako sang kaawayon sa tunga nimo kag sang babayi, sa tunga sang imo kaliwatan kag sang iya kaliwatan; kag dugmokon niya ang imo ulo, kag dugmokon mo ang iya tikod.

22 Sa babayi, ako, nga Ginuong Dios, nagsiling: Padamuon ko sing labi ang imo kasakit kag ang imo pagpanamkon. Sa kasakit ibun-ag mo ang imo mga anak, kag ang imo handum mangin sa imo bana, kag magagahum sia sa imo.

23 Kag kay Adan, ako, nga Ginuong Dios, nagsiling: Bangod nagpamati ka sa tingug sang imo asawa, kag nagkaon sang bunga sang kahoy nga ginsugo ko sa imo, nga nagasiling—Indi ka magkaon sina, pagasumpaon ang duta bangod sa imo; sa pag-antos magakaon ka halin sini sa tanan nga adlaw sang imo kabuhi.

24 Mga tunok man kag mga hilamon ang ipatubo sini sa imo, kag magakaon ka sang mga tanom sang kapatagan.

25 Sa balhas sang imo nawong magakaon ka, tubtob nga magbalik ka sa duta—bangod sigurado nga mapatay ka—kay halin sa sini ginkuha ka: kay sa yab-ok ka naghalin, kag sa yab-ok ka magabalik.

26 Kag gintawag ni Adan ang ngalan sang iya asawa nga Eva, bangod iloy sia sang tanan nga nagakabuhi; kay amo man sina ang gintawag ko nga Ginuong Dios, sa pinakauna sa tanan nga babayi, nga madamo.

27 Para kay Adan, kag sa iya man asawa, ako, nga Ginuong Dios, naghimo sang mga kunop nga panit, kag ginbayoan sila.

28 Kag ako, nga Ginuong Dios, nagsiling sa akon Bugtong nga Anak: Tan-awa, ang tawo nangin pareho na sa aton, sa paghibalo sang maayo kag malain; kag karon agud indi niya pag-ikab-ot ang iya kamot kag mag-ambit man halin sa kahoy sang kabuhi, kag magkaon kag mabuhi tubtob sa wala’y katapusan,

29 Gani ako, nga Ginuong Dios, magatabog sa iya halin sa Hardin sang Eden, agud magpanguma sang duta kon sa diin sia ginkuha;

30 Kay kasubong nga ako, nga Ginuong Dios, buhi, sa amo man ang akon mga pulong indi magabalik nga wala sing pulos, kay bangod naggwa ang mga ini sa akon baba dapat ang mga ini matuman.

31 Gani gintabog ko ang lalaki, kag nagbutang ako sa este sang Hardin sang Eden sang querubin kag sang nagadabadaba nga espada, nga nagatiyog agud bantayan ang dalan pakadto sa kahoy sang kabuhi.

32 (Kag ini ang mga pulong nga ginhambal ko sa akon alagad nga si Moises, kag matuod ang mga ini suno sa akon pagbuot; kag ginhambal ko ang mga ini sa imo. Siguroha nga indi mo pag-ipakita ang mga ini sa bisan sin-o nga tawo, tubtob nga suguon ko ikaw, luwas lang sa ila nga nagapati. Amen.)