Tsev Neeg

Peb, uas yog Thawj Pawg Thawj Tswj Hwm thiab Pawg Kaum Ob tug Thwj Tim ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg, tshaj tawm tiag tiag hais tias txoj kev ua txij ua nkawm ntawm ib tug txiv neej thiab ib tug poj niam yog Vajtswv tsa los thiab hais tias tsev neeg yog lub ntsiab ntawm Leej Tsim lub tswv yim rau Nws cov me nyuam txoj hmoov nyob mus ib txhis li.

Txhua txhia tus tib neeg—txiv neej thiab poj niam—yog Vajtswv tsim kom muaj yam ntxwv zoo li Nws. Txhua tus yog leej niam leej txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub, thiab, vim yog li ntawd, txhua tus muaj ib tug cwj pwm thiab txoj hmoov los saum ntuj los. Qhov uas yus yog ib tug poj niam los yog ib tug txiv neej yog ib yam tseem ceeb ntawm ib tug neeg tus xeeb ceem thiab lub ntsiab, txawm hais tias nyob lub neej ua ntej yug los yog, lub neej no los yog, lub neej nyob mus ib txhis li.

Nyob rau lub neej ua ntej yug, tej tub ntsuj plig thiab tej ntxhais ntsuj plig tau paub thiab teev tiam Vajtswv ua lawv Leej Txiv uas Nyob Mus Ib Txhis Li thiab lawv tau txais yuav Nws lub tswv yim uas tau npaj tseg lawm hais tias Nws cov me nyuam yuav txais tau ib lub cev nqaij daim tawv thiab yuav muaj ib lub sij hawm saum ntiaj teb no kom thiaj xyaum tau ua neeg zoo tag nrho thiab thaum kawg ncav tau lawv txoj hmoov los saum ntuj los ua cov uas txais txoj sia nyob mus ib txhis ua lawv tug. Los ntawm txoj kev zoo siab los saum ntuj los, kev ua niam ua txiv, ua tub ua ntxhais, ua kwv ua tij, ua neej ua tsa thiaj nyob tau mus li tom qab lub neej no. Tej kab ke thiab tej kev khi lus dawb ceev uas muaj hauv tej tuam tsev dawb huv ua rau tib neeg rov qab mus nyob tau ntawm Vajtswv lub xub ntiag thiab ua rau tsev neeg nyob tau ua ke mus ib txhis li.

Thawj lo lus txib uas Vajtswv txib kom Adas thiab E-vas ua hais ntsig txog nkawd txoj kev ua niam ua txiv. Peb tshaj tawm hais tias Vajtswv lo lus txib uas hais kom nws cov me nyuam huaj vam mus puv tas lub ntiaj teb tseem muaj ceem li qhov qub. Tsis tas li ntawd xwb, peb tshaj tawm ntxiv hais tias Vajtswv tau txib kom tej hwj chim dawb ceev ntawm txoj kev muaj tub muaj ki yuav tsum siv tsuas yog ntawm ib tug txiv neej thiab ib tug poj niam xwb, uas tau sib yuav raws li kev cai lij choj ua niam ua txiv.

Peb tshaj tawm hais tias txoj hau kev uas yus tsim tau txoj sia hauv ntiaj teb no yog Vajtswv tsa. Peb pom zoo rau qhov uas ib tug neeg txoj sia yog ib yam tseem ceeb dawb ceev thiab uas nws tseem ceeb rau Vajtswv lub tswv yim nyob mus ib txhis li.

Ib khub niam txiv twg los muaj ib txoj kev lav ris tseem ceeb kom ib tug hlub thiab saib xyuas ib tug thiab kom hlub thiab saib xyuas nkawd cov me nyuam. “Me nyuam yog tej paj tshab uas tus Tswv pub rau neeg ” (Nkauj Qhuas Vajtswv 127:3). Niam txiv muaj ib lub luag hauj lwm dawb ceev kom cob qhia nkawd cov me nyuam raws li kev hlub thiab kev ncaj ncees, kom npaj muab raws li lawv xav tau ntawm sab nqaij daim tawv thiab sab ntsuj plig, thiab kom qhia lawv sib hlub thiab sib pab, kom ua raws li Vajtswv tej lus txib, thiab kom ua pej xeem uas ua raws li kev cai lij choj, txawm nyob qhov twg los xij. Tej txiv thiab poj niam—niam tsev thiab txiv tsev—yuav muaj ib hnub uas lawv yuav los lav lees rau Vajtswv saib lawv puas tau ua tej kev lav ris no tiav lawm.

Tsev neeg raug tsa los ntawm Vajtswv. Txoj kev sib yuav ntawm ib tug txiv neej thiab ib tug poj niam tseem ceeb heev rau Nws lub tswv yim nyob mus ib txhis li. Tej me nyuam tsim nyog yug los raws li txoj kev sib khi ntawm txoj kev sib yuav, thiab tsim nyog muaj niam muaj txiv, uas ua ib siab hawm tej lus cog tseg ntawm txoj kev sib yuav, cob lawv loj hlob. Ib tse neeg twg haj yam yuav ncav tau kev zoo siab hauv lawv lub neej no thaum tus Tswv Yexus Khetos cov lus qhuab qhia ua lawv lub hauv paus. Tej kev sib yuav thiab tej tsev neeg uas kav ntev raug tsa thiab nyob mus li ntawm tej kev cai xws li kev ntseeg, kev thov Vajtswv, kev hloov siab lees txim, kev zam txim, kev sib hwm, kev hlub, kev khuv leej, kev ua hauj lwm, thiab kev ua si uas tsim nyog ua. Los ntawm lub tswv yim los saum ntuj los, cov txiv tsev yuav tsum kav lawv tej tsev neeg los ntawm kev hlub thiab kev ncaj ncees thiab lav ris npaj ua kom muaj tej yam uas lawv tsev neeg yuav tsum muaj kom thiaj ua neej tau thiab txais tau kev pov hwm rau lawv tsev neeg. Cov niam tsev txoj kev lav ris thib ib yog tu lawv cov me nyuam. Nyob rau tej kev lav ris tseem ceeb dawb ceev no, tej niam tsev txiv tsev yuav tsum sib pab xws li nkawd nyob sib txig. Tej zaum kev mob nkeeg, kev tuag, los yog lwm yam yuav ntxim ua txawv tej lus no. Thaum twg ib tse neeg xav tau kev pab nws tsim nyog tej kwv tij neej tsa cev tes mus pab thiab.

Peb ceeb toom hais tias cov neeg uas ua txhaum tej kev khi lus ntawm kev coj dawb huv, cov uas tsim txom lawv tus khub los yog lawv cov me nyuam, los yog cov uas tsis lav ris koob lawv tsev neeg yuav muaj ib hnub twg uas lawv yuav lav ris txog tej no rau ntawm Vajtswv lub xub ntiag. Tsis tas li ntawd xwb, peb ceeb toom hais tias txoj kev puas tsuaj ntawm tsev neeg yuav coj tej kev kub ntxhov uas cov yaj saub thaum ub thiab niaj hnub nim no hais txog los rau saum tej tib neeg, zej zog, thiab teb chaws.

Peb nqua hu kom cov pej xeem zoo thiab cov nom tswv ntawm tseem fwv nyob txhua qhov txhia chaw txhawb nqa tej kev lis kev cai uas raug tsim kom yug thiab ntxiv dag zog rau tsev neeg kom tsev neeg thiaj ua tau lub sawm fem pawg neeg tseem ceeb tshaj plaws.