Restoresen bilong Olgeta Toktok bilong Gospel bilong Jisas Krais

Mipela i tokaut strong olsem God i laikim tumas ol pikinini bilong Em long olgeta nesen bilong wol. God Papa i bin kamapim yumi olsem ol pikinini bilong Em, na givim yumi dispela laip i gutpela stret, na atoning sakripais bilong Jisas Krais i nogat pinis bilong en. Wantaim pawa bilong Papa, Jisas i bin kirap bek gen na winim dai. Em i Sevia bilong yumi, Em i soim yumi long rot, na Em i Ridima bilong yumi.

Tu handred yia i go pinis, na long wanpela naispela moning long taim bilong liklik san, long yia 1820, Joseph Smith i bin gat bikpela laik long save wanem sios em bai bihainim, em i go long bus long beten klostu long haus bilong em long New York, USA. Em i bin gat planti askim long salvesen bilong sol bilong em na em i bin trastim olsem God bai halivim em.

Wantaim daunpasin mipela i tokaut olsem long bekim beten bilong em God Papa na Pikinini Man bilong Em, Jisas Krais i kamap long Joseph na statim wok bilong “mekim olgeta samting i kamap nupela gen” (Aposel 3:21) olsem Baibel i tok. Long dispela visen, em i lainim olsem bihain long dai bilong ol nambawan twelpela aposel, Nupela Testamen Sios bilong Krais i bin lus long graun. Joseph i bai kamap olsem man husat God i makim em long wokim wok long bringim dispela sios i kambek.

Mipela i tok gen olsem aninit long daireksen bilong Papa na Pikinini Man, ol man bilong karim toktok i kam long heven i bin kam long tisim Joseph na kirapim bek Sios bilong Jisas Krais. Jon Bilong Baptais husat i bin kirap bek pinis long dai i bin kam na bringim i kambek dispela atoriti bilong baptais aninit long wara long rausim sin. Ol tripela nambawan Aposel—Pita, Jems na Jon—i bin bringim i kambek pawa bilong mekim wok olsem aposel na ol ki bilong prishud atoriti. Ol narapela i bin kam tu, olsem Elaija, husat i bin bringim i kambek atoriti long bungim ol famili wantaim long stap oltaim oltaim bihain long dai.

Mipela i tokaut moa yet olsem Joseph Smith i bin kisim spesol blesing na pawa bilong God long tanim tok bilong wanpela buk bilong tumbuna taim, dispela em i Buk Momon—em i narapela testamen bilong Jisas Krais. Insait long dispela buk, i gat ol holi toktok olsem ministri wok bilong Jisas Krais namel long ol pipol long dispela hap bilong wol long Wes bihain tasol long kirap bek bilong Em. Em i toktok long as bilong laip bilong yumi na tok klia long doktrin bilong Krais, we em i stap namel long dispela as toktok. Olsem wanpela skripsa we i poromanim Buk Baibel, Buk Momon testifai olsem olgeta manmeri ol i pikinini bilong Papa long heven husat i laikim yumi tumas, Em i gat plen bilong laip bilong yumi, na Pikinini Man bilong Em Jisas Krais i toktok long yumi tede wankain olsem long taim bipo.

Mipela i tokaut olsem Sios bilong Jisas Krais bilong ol Seint long Las De, ol i bin stretim long 6 Epril, 1830, em i Nupela Testaman Sios bilong Krais i kambek gen. Dispela Sios i stap anka insait long stretpela laip bilong bikpela kona ston, Jisas Krais, na long dispela Atoning Sakripais bilong Em we i nogat arere bilong en, na Kirap Bek tru bilong Em. Jisas Krais i singautim gen ol Aposel na i givim ol prishud atoriti. Em i singautim yumi olgeta long kam long Em na long Sios bilong Em, long kisim Holi Gos, ol odinens bilong salvesen, na long kisim hamamas tru bilong oltaim.

Tu handred yia i go pinis nau long taim dispela Restoresen God i bin statim wantaim Pikinini Man bilong Em husat Em i laikim tumas, Jisas Krais. Planti milien lain long wol i holim pasim dispela save long ol dispela samting ol profet i bin tok bai kamap.

Mipela i hamamas long tokaut olsem dispela promis bilong Restoresen i go het yet long ol revelesen i wok long kamap yet. Dispela ples graun bai i no inap wankain olsem bipo, taim God i “bai bungim olgeta samting long Krais” (Efesus 1:10).

Wantaim bikpela rispek na tok tenkyu, mipela olsem ol Aposel bilong Em i askim olgeta long save—olsem mipela i save- olsem ol heven i op. Mipela i tok gen olsem God i wok long mekim kamap laik bilong Em bilong olgeta pikinini man na meri bilong Em, Em i laikim tumas. Mipela i tokaut olsem ol lain husat i beten na stadi long toksave bilong Restoresen na wokim samting wantaim feit bai kisim blesing long kisim save bilong ol yet olsem em i wok bilong God na as bilong dispela em long redim wol long Nambatu Kambek bilong Bikpela na Sevia bilong yumi, Jisas Krais.