O Le Aiga e Totonugalemu i le Fuafuaga a le Atua
Fai mai le “O Le Aiga: O Se Folafolaga i le Lalolagi” o le “faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a Le Foafoa mo le taunuuga e faavavau o Ana fanau” (Ensign po o le Liahona, Nov. 2010, 129).
O olioliga silisili o le olaga e maua i se aiga agaalofa. E mafai lenei tulaga e ui i le tele o mea faalavefau ma luitau o le olaga. O le fausiaina o aiga malolosi e manaomia ai taumafaiga. Ae o na taumafaiga e mafai ona aumaia ai le olioli i le olaga nei ma le faavavau atoa. E oo lava i aiga lea e faigata ai mafutaga, e mafai e le talalelei a Iesu Keriso ona tuuina mai le faamoemoe, faamafanafanaga, ma le faamalologa.
I le fuafuaga o le fiafia a lo tatou Tama Faalelagi, e mafai e se tane ma se avā ona faatasi e faavavau. O le pule e tuufaatasia ai aiga e faavavau ua ta’ua o le mana o faamauga . O le mana lava foi lea na tuuina atu e Iesu i Ona Aposetolo i le taimi o Lana auaunaga i le lalolagi (Mataio 16:19). O se faaipoipoga la e faavavau ua ta’ua o se faamauga. O fanau e fananau mai pe vaetamaina i ia faaipoipoga e faavavau, e mafai foi ona faamauina i o latou aiga e faavavau
E le pei o faaipoipoga lea e muta “i le tete’a i le oti,” o faamauga i le malumalu e faamautinoa ai e le mafai e le oti ona faatete’a ē pele. Mo faaipoipoga ina ia faaauau pe a mavae le oti, e tatau ona faamauina i laua i le nofoaga sa‘o ma i le pule sa‘o. O le nofoaga sa‘o o le malumalu ae o le pule sa‘o o le perisitua a le Atua (Mataupu Faavae ma Feagaiga 132:7, 15–19).
O se tane ma se avā ua faamauina i le malumalu e osia ni feagaiga ma le Alii ma le tasi ma le isi. O nei feagaiga e faamautinoa ai ia i latou o a latou mafutaga o le a faaauau atu lea pe a mavae lenei olaga pe afai latou te faamaoni i a latou tautinoga. Ua latou iloa e leai se mea, e oo lava i le oti, e mafai ona tuueseeseina i latou. O i laua ua faaipoipoina e tatau ona mafaufau i lo laua faatasiga o le la mafutaga faalelalolagi aupito sili ona pele. Aua foi, o se toalua ua nao le pau lea o le tagata e ese mai i le Alii ua poloaiina i tatou ia alofa i ai ma o tatou loto atoa (Mataupu Faavae ma Feagaiga 42:22).
E Taua Faaipoipoga e Faavavau
Na aoao mai Peresitene Spencer W. Kimball (1895–1985): “O le faaipoipoga atonu o le filifiliga aupito sili lea ona taua o filifiliga uma, ma e aupito o’oo’o foi ona aafiaga, aua e le gata ina maua ai le fiafia i le taimi nei, ae faapea foi ona maua le olioli i le faavavau. E le gata ina aafia ai tagata e toalua o loo aafia ai, ae faapea foi o laua aiga, aemaise lava a la fanau ma fanau a fanau ma faasolo mai ai lava i le augatupulaga aupito mulimuli” (“The Importance of Celestial Marriage,” Ensign, Oct. 1979, 3).
E manaomia foi le feagaiga o le faaipoipoga e faavavau mo le faaeaga. O le faaeaga o le ola e faavavau—o le ituaiga o soifuaga o loo soifua ai le Atua. Ua atoatoa o Ia. O loo soifua o Ia i le mamalu silisili. Ua ia te Ia le malamalama uma, le mana uma, ma le poto uma. E alofa, agalelei, ma alofa mutimutivale o Ia. O Ia o le Tama Faalelagi o tagata uma i luga o le fogaeleele. E mafai ona tatou pei o Ia i se aso. O le faaeaga lena.
O le faaeaga o le meaalofa silisili lea ona maoae e mafai e lo tatou Tama Faalelagi ona tuuina mai i Lana fanau (Mataupu Faavae ma Feagaiga 14:7). O le taui lea mo i latou uma o e ua faamaonia le faamaoni i le Alii. O i latou o e mauaina o le a ola i le tikeri aupito maualuga o le malo selesitila.
Na faaali mai e le Alii e ala ia Iosefa Samita:
“I le mamalu selesitila o loo i ai lagi e tolu, po o tikeri; ma ina ia maua le [tikeri] aupito maualuga, e tatau i se tane ona ulu atu i lenei faatulagaga o le perisitua [lona uiga o le feagaiga fou e faavavau o le faaipoipoga]; ma afai na te le faia, e le mafai ona ia maua” (Mataupu Faavae ma Feagaiga 131:1–3).
A o tatou faamamalu a tatou feagaiga, e mafai ona tatou mautinoa o le a tatou faatasi ma e e pele ia i tatou e faavavau. Ua folafola mai le Alii:
“Afai e faaipoipo e se tane se ava i la’u upu, o la’u tulafono lea, ma i le feagaiga fou ma le tumau-faavavau, ma ua faamauina ia te i laua e le Agaga Paia o le folafolaga, e ia o le ua faauuina, o le ua Ou tofia i ai lenei mana ma ki o lenei perisitua; … ma afai e ola i [laua] i la’u feagaiga, … o le a faia ia te i laua i mea uma i soo se mea e tuu atu e la’u auauna i luga o i laua, i le taimi nei, ma i le faavavau atoa; ma o le a taulia atoatoa pe a i ai i laua i fafo o le lalolagi” (Mataupu Faavae ma Feagaiga 132:19).
Ua silafia e le Atua e le o Ana fanau uma o le a maua le avanoa e faaipoipoina ai i lenei olaga. Ua Ia folafola mai, o i latou uma o e talia le talalelei ma taumafai malosi e tausi a latou feagaiga, o le a maua le avanoa e faaipoipoina ai ma maua fanau a le i le olaga nei o le isi olaga e sosoo ai.
E Fesootai Augatupulaga Uma
Ua ta’u mai i le folafolaga i le aiga: “o le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”
O le mana o le faamauga e faapea foi ona tau atu mai matua i fanau, i augatupuaga uma mai lava i le amataga o le lalolagi. Na aoao mai Peresitene Iosefa Filitia Samita (1876–1972) e faapea, o fanau e fananau i le feagaiga—ma i latou o e ua faamauina i o latou matua i le malumalu—“e mafai ona maua faamanuiaga o le talalelei e sili atu i faamanuiaga ua agavaa ai i latou e lei fananau [i le feagaiga]. E mafai ona latou maua se taitaiga sili atu, se puipuiga sili atu, se musumusuga sili atu mai le Agaga o le Alii; ma e leai se mana e mafai ona aveesea i latou mai o latou matua” (Doctrines of Salvation, comp. Bruce R. McConkie [1955], 2:90).
O fanau e fananau mai matua ua uma ona faamauina i le malumalu ua fananau i totonu o le feagaiga. O le mea lea, o i latou o se vaega o se aiga e faavavau, e faavae i luga o lo latou faamaoni. O fanau e le fananau i le feagaiga e mafai foi ona avea ma vaega o se aiga e faavavau pe a faamauina o latou matua moni po o matua vaetamaina i le tasi ma le isi. O le sauniga o le faamauina o fanau i matua e na o totonu o le malumau e faatinoina ai. Ina ia faasafua atu nei faamanuiaga i tagata uma, e mafai foi ona tatou faia faamauga sui mo i latou o e ua maliliu. I lenei auala, e mafai ai e aiga uma ona faatasi e faavavau.
O le folafolaga e faapea, e mafai ona toe faatasia o tatou aiga pe a mavae le oti ua i ai se uiga sili atu i le olaga. E faamalosiau ai i tatou ia faamaoni ma tuuto atu. E faaleleia ma faaoaina ai a tatou mafutaga faaleaiga. E fesoasoani tatou te maua ai le olioli ma le faamoemoe a o tatou taulimaina luitau o le olaga. Ma o le iloaina tatou toe faatasi e aumaia ai le mafanafana ma le filemu ao tatou feagai ma mafatiaga po o le maliliu o ē pele.
O le sauniga o le faamauga o le meaalofa silisili lea a le Atua i Ana fanau. E mafai ai ona tatou toe foi atu e mafuta ma Ia e faavavau ma ē uma e pele ia i tatou. E ofoina mai ai faamanuiaga ofoofogia mo le olaga nei ma le isi. O se faamanatu faifaipea o aiga e totonugalemu i le fuafuaga a le Atua ma mo lo tatou fiafia iinei ma i le faavavau. E aumaia ai le filemu, faamoemoe, ma le olioli mo i latou uma o e mauaina ma le faamaoni.
