E Uiga i le Faaeega Paia o le Malumalu

O Lau Meaalofa Paia Patino Mai Le Atua

Na faamanatu mai ia i tatou e Peresitene Russell M. Nelson “o gaoioiga uma, o lesona uma, o mea uma tatou te faia i le Ekalesia, e faasino atu i le Alii ma Lona maota paia. O a tatou taumafaiga e talai atu le talalelei, faaatoatoa le Au Paia, ma togiola e ua maliliu e tau uma atu i le malumalu. O malumalu paia taitasi e avea o se faatusa o lo tatou auai i le Ekalesia, o se faailoga lea o lo tatou faatuatua i le olaga pe a mavae le oti, ma o se laasaga paia agai atu i le mamalu e faavavau mo i tatou ma o tatou aiga” (“Sauniuniga Patino mo Faamanuiaga o le Malumalu,” Ensign, Me 2001, 32; Liahona, Iulai 2001, 37).

Ua na o totonu o le malumalu tatou te osia ai feagaiga paia e aofia ai le folafolaga o le ola e faavavau i le malo o le Atua, o le “meaalofa silisili lea o meaalofa uma a le Atua” (Mataupu Faavae ma Feagaiga 14:7). O sauniga ma feagaiga o le malumalu sa avea lava ma se vaega o le talalelei a Iesu Keriso. Sa latou faamalolosia se sootaga paia ma fesoasoani ia i tatou e taulai atu i le Faaola, Lana Togiola, ma la tatou tautinoga e mulimuli ia te Ia.

O le mauaina o lou faaeega paia o se aafiaga e sili ona patino. O le saunia i ai o le a sili atu ai ona anoa. E toatele tagata o le Ekalesia ua maua o latou faaeega paia ao lei malaga i misiona pe faaipoipo. O isi ua i ai se manao malosi e agai i luma i luga o le ala o feagaiga. E tatau i epikopo ma peresitene o paranesi ona faamalosiau ma fautua ma tagata matutua o le au paia o e mananao e maua o latou faaeega paia. E taua le iloa o lou faaeega paia e sili atu nai lo se isi lava laasaga; o se vaega alagatatau ma mamalu o lau malaga e faavavau.

O se faaeega paia o le mea moni o se “meaalofa.” I lenei tulaga, o le faaeega paia o le malumalu o se meaalofa o faamanuiga paia mai le Atua mo i tatou taitoatasi. E na o Lana ala lava ma totonu o Lona malumalu paia e mafai ona maua ai le faaeega paia. O nisi o meaalofa e te maua e ala i le faaeega paia o le malumalu e aofia ai le:

1. Malamalama sili atu i faamoemoega ma aoaoga a le Alii.

2. Malosiaga e faia ai mea uma e finagalo le Atua tatou te faia.

3. Taitaiga faaleatua ma le puipuiga a o tatou auauna atu i le Alii, o tatou aiga, ma isi.

4. Faateleina le faamoemoe, mafanafana, ma le filemu.

5. Faamanuiaga folafolaina i le taimi nei ma le faavavau.

O tagata o le Ekalesia o ē e le itiiti ifo ma le 18 tausaga le matutua (ma ua le toe auai i aoga maualuluga po o aoga tulagalua) e mafai ona maua o latou faaeega paia pe afai latou faatuatua ma saunia. Ona o sauniga o le malumalu ma feagaiga e paia ma e i ai o latou taua e faavavau, ua faatulaga ai e le Alii tulaga faatauaina mo i latou o e mananao e mauaina. E ao foi i tagata o le ekalesia ona mafai ona malamalama i tiute mamalu o le a latou taliaina ao latou osi feagaiga ma le Atua.

O le saunia e maua ou faaeega paia o le a aofia ai le mulimuli i aoaoga a Iesu Keriso ma le taumafai e tausi feagaiga na e osia i le papatisoga. E te faafouina au feagaiga i taimi uma e te tagofia ai le faamanatuga. O le a e maua le avanoa e feiloai ai ma lou epikopo sosoo ai ma lou peresitene o le siteki mo se faatalanoaga mo le pepa faataga o le malumalu. O tulaga faatauaina mo le ulufale atu i le maota o le Alii o le a talanoaina i le aluga o le faatalanoaga. O le a latou fai atu ni fesili o le a faataga ai oe e faasoa lau molimau o le talalelei a Iesu Keriso, o Ana perofeta soifua, ma Lana ekalesia toefuataina. O au tali o le a faamautinoa ai o loo e taumafai e tausi poloaiga a le Atua ma mulimuli ia Iesu Keriso. Ona mafai lea e lau peresitene o le siteki ona tuuina atu se pepa faataga o le malumalu o le a mafai ai ona e ulu atu i le malumalu ma maua lou faaeega paia.

O se Vaaiga Aoao o le Faaeega Paia

Ina ua e auai i le Ekalesia, sa e mauaina ni sauniga se lua—papatisoga ma le faamauga. E faapena foi, o le faaeega paia o le malumalu e maua foi i ni vaega se lua.

I le vaega muamua, o le a e mauaina i se tulaga patino ma na o oe lava se mea ua ta’ua o le uluai sauniga. O nei sauniga e aofia ai ni faamanuiaga faapitoa e faatatau i lou tofi paia ma ou gafatia. O se vaega o nei sauniga, o le a faatagaina ai foi oe e ofu ofusa paia o le malumalu ma faatonuina e ofuina i lou olaga atoa.

I le vaega lona lua, o le a e mauaina ai le vaega o totoe o lou faaeega paia i se faatulagaga faalevaega. E faia lenei mea i se potu o aoaoga faatasi ma isi o auai atu i le malumalu. O nisi o vaega o le faaeega paia e tuuina atu i le vitio ae o nisi e tuuina atu e taitai o le malumalu. I le aluga o le sauniga, o mea o le vaega o le ata o le faaolataga ua tuuina mai ai. Ua aofia ai le Foafoaga o le lalolagi, le Pau o Atamu ma Eva, le Togiola a Iesu Keriso, le Liliuese, ma le Toefuataiga. O le a e aoao atili ai foi e uiga i le auala e mafai ona toe foi atu ai tagata uma i le afioaga o le Alii.

Ao faia le sauniga o le faaeega paia, o le a valaaulia oe e osia ni feagaiga faapitoa ma le Atua. O nei feagaiga o le:

• Tulafono o le Usiusitai, lea e aofia ai le taumafai malosi e tausi poloaiga a le Atua.

• Tulafono o le Taulaga, o lona uiga o le faia o mea uma tatou te mafaia e lagolago ai le galuega a le Alii, ma le salamo ma se loto momomo ma se agaga salamo.

• Tulafono o le Talalelei, o le tulafono maualuga atu lea na Ia aoao mai a o i ai o Ia i le lalolagi.

• Tulafono o le Ola Mama, o lona uiga o le faia o sootaga feusuai ma na o i latou o e ua tatou faaipoipo i ai faaletulafono ma i la le tulafono e tusa ai ma le tulafono a le Atua.

• Tulafono o le Faapaiaga, o lona uiga o le tuuto atu o o tatou taimi, taleni, ma mea uma ua faamanuiaina ai i tatou e le Alii i le atinaega o le Ekalesia a Iesu Keriso i le lalolagi.

O feagaiga uma ma le Atua ua faamoemoe e fusia ai. A e tausia au feagaiga ma salamo i ou lē atoataoa, o le a faamalosia ou sootaga ma Ia ma o le a sili atu ona atoatoa Lona faamanuiaina o oe. O lou sootaga ma le Faaola o le a mafai na vavalalata ma sili ona anoa. O tausi feagaiga e maua avanoa sili atu i le mana o le Atua ma i le alofa tumau, filemu, mafanafana, ma le fiafia. Ua folafola mai e le Atua o i latou o e tausia a latou feagaiga o le a maua le avanoa e toe foi atu ai ma mafuta faatasi ma Ia e faavavau.

Na faamatala mai e Peresitene Russell M. Nelson o le “Osia o se feagaiga ma le Atua e suia ai lo tatou sootaga ma Ia e faavavau. E faamanuiaina ai i tatou i se fuataga faaopoopo o le alofa ma le alofa mutimutivale. E aafia ai i tatou ma le auala o le a fesoasoani mai ai le Atua ia i tatou ia avea ma tagata e mafai ona avea ai i tatou.” Ona o le alofaagalelei o le Atua mo i latou o e ua osifeagaiga ma Ia, “o le a alofa ai o Ia ia i latou. O le a faaauau pea ona galue o Ia faatasi ma i latou ma ofo atu ia i latou avanoa e sui ai. O le a Ia faamagalo i latou pe a latou salamo. Ma a latou se ese, o le a Ia fesoasoani ia i latou ia maua lo latou ala e toe foi atu ai ia te Ia” (“O Le Feagaiga e Tumau Faavavau,” Liahona, Oketopa 2022).

I le faaiuga o le faaeega paia, e ulu atu tagata auai faafaailoga i le afioaga o le Alii ao latou ulu atu i le potu selesitila. O iina e mafai ai ona e faaalu le taimi e mafaufau loloto ai, tatalo, faitau tusitusiga paia, pe faasoa filemu atu ai ou lagona ma aiga ma uo. O se nofoaga lenei o le filemu, lea e mafai ai foi ona e maua le mafanafana ma le taitaiga faalelagi.

O i latou uma e auai i le sauniga o le faaeega paia ua fautuaina e faalogo lelei i mea o aoaoina mai. O lou aafiaga o le a sili atu ona faamalieina pe a e alu ma le faamoemoe ina ia aoaoina e le Agaga Paia. Aua le popole i le manatua po o le malamalama i mea uma i le taimi muamua. O le a i ai pea iina tagata faigaluega o le malumalu e fesoasoani ma lagolago atu ia te oe. E le o se suega, ae o se avanoa e lagona ai le latalata atili atu i le Tama Faalelagi ma Iesu Keriso. Tulimatai atu i le fiafia i le i ai i le maota o le Alii ma lagona faaleagaga e te maua.

Faalatalata Atu i le Faaola

O le faaeega paia o le malumalu o se laasaga talafeagai agai atu i le faaolataga ma le toe foi atu i le Tama Faalelagi. O se taimi foi e o mai latalata atili atu ai ia Iesu Keriso—ia sili atu le iloa o Ia ma mulimuli i Ana Faataitaiga. O lea lava, o faamanuiaga folafolaina uma lava o le faaeega paia e faalagolago i lo tatou faatuatua.

A maea ona e mauaina ou lava faaeega paia, toe foi soo atu i le malumalu i le tele e te mafaia. Pe a e faia, e mafai ona e auai i sauniga muamua, sauniga o faaeega paia mo tuaa ma isi ua maliliu. E faapei o isi sauniga uma e faia i le malumalu, o i latou ua maliliu ua silafia lau auaunaga ma e mafai ona filifili e talia pe le talia le mea ua e faia mo i latou.

O lou auai e faataga ai foi ia te oe le avanoa e toe faalogo ai i faamanuiaga, faatonuga, ma feagaiga. Ao e auai atu i le malumalu, o le a e maitauina ai le tele o auala e fesootai ai le faaeega paia i le fuafuaga o le faaolataga ma faamanuia ai lou olaga. O le mea ua e aoaoina ma lagona o le a faapea ona manino mai ma sili atu le taua ia te oe i le aluga o taimi. Ao e asiasi atu, o le a e lagona le alofa o le Atua ma faamanatu atu mea e sili ona taua.