Skip main navigation
  • Imprimer

Vakasama ni Vuli kei na Veivakavulici

A vakayagataka na iVakabula na ivolanikalou me vakatavulica ka vakadinadinataka na Nona ilesilesi. A vakatavulici ira na tamata o Koya mera vakasamataka vagumatua na ivolanikalou ka vakayagataki ira me vukea na nodra lomatarotaro. A vukei ira o Koya mera tadolava na lesoni ni kosipeli mai na veika era sa sotava ena vuravura wavoliti ira ena vakayagataki ni ivakaraitaki e rawa ni ra semati kina. A sureti ira o Koya mera yaco me ivakadinadina ni Nona ivakavuvuli ena kena vakatavulici ka vakadinadinataki vei ira tale eso ena sala ka na vakatitobutaka na nodra kila deivaki na ivunau.

E tiki ni nomu ilesilesi vaqasenivuli ni itabagone oya na vakarautaki ni itaviqaravi me vulici ka salamuria na ivakavuvuli ka vakaraitaka na iVakabula. Kiliki ki na isema ena imawi mo raica kina eso na vakasama o na rawa ni vakayagataka me vukei ira na itabagone ena qarai ni vosa ni parofita, raica na ivakaraitaki ni ivakavuvuli o vakatavulica tiko, ka wasea na kosipeli vei ira tale eso. E rawa ni o vakayagataka na veivakasama oqo ki na ulutaga ni lesoni cava ga.

Ena nomu tuvana na veitavi me qaravi, nanuma ni dua na nomu itavi levu namaki ena vakatavulici ni itabagone oya na nodra vakayaloqaqataki mera wasea na veika era sa vulica. Ni ra vakatakila na dina ni kosipeli na itabagone, e sa na vakadeitaki e lomadra kei na nodra vakasama na dina oya mai na kaukauwa ni Yalo Tabu. Na wasei ni kosipeli vei ira tale eso ena vakavuna mera veivakaukauwataki na itabagone ena kena rogoci na dina ni kosipeli mai vua e dua e qase cake ka dau bibi sara toka ena so na gauna mai na kena rogoci vua e dua na iliuliu se qasenivuli.