Skip main navigation
  • Lolomi

O Fesili e Fesiligia Soo

O le a?

O le a le Sau, Mulimuli Mai ia te Au: Punaoa e Aoao Ai mo le Autalavou?
O le Sau, Mulimuli mai ia te Au: Punaoa e Aoao Ai mo le Autalavou o se mataupu aoaoina fou o le a fesoasoani i faiaoga e aoao atu ai i le ala a le Faaola ma fesoasoani i le autalavou ina ia liua atoa i le talalelei.

O a vasega o le a faaaogaina le Sau, Mulimuli Mai ia te Au?
O korama a le au Perisitua Arona, vasega a Tamaitai Talavou, ma vasega o le Aoga Sa mo talavou e i ai i vaitausaga o le 12 e oo i le 18 o le a faaaogaina le mataupu aoaoina mo aoaoga i le Aso Sa.

O a tusitaulima ia o le a suia e le Sau, Mulimuli Mai ia te Au?
O tusi lesona nei e le toe faaaogaina: Perisitua Arona Tusi Lesona 1 (34820), Perisitua Arona Tusi Lesona 2 (34821), Perisitua Arona Tusi Lesona 3 (34822), Tamaitai Talavou Tusi Lesona 1 (34823), Tamaitai Talavou Tusi Lesona 2 (34824), Tamaitai Talavou Tusi Lesona 3 (34825), O Peresitene o le Ekalesia (31382), ma Sauniuniga mo le Faaeaga (31384).

O fea ou te mauaina ai?

O fea ou te mauaina ai le Sau, Mulimuli Mai ia te Au?
O otootoga mo le aoaoina mo le Sau, Mulimuli Mai ia te Au o loo maua i le initoneti. Atonu o le a saunia foi mo outou e o outou taitai ni kopi na lolomiina.

Ae a pe afai e faatapulaa le mauaina o le Initoneti?
Afai e toatele ni faiaoga ma ni taitai o e faatapulaa le mauaina o le Initoneti i le eria, e mafai ona filifili taitai o le eria e lolomi ma tufatufa atu ni kopi o le Sau, Mulimuli Mai ia te Au. E mafai foi ona filifili taitai o le uarota po o paranesi e lolomi ni kopi o lesona taitasi mai le Initoneti mo faiaoga o e manaomiaina.

O afea ou te amata faaaoga ai le Sau, Mulimuli Mai ia te Au?
E ao i faiaoga ona amata aoao atu mai le Sau, Mulimuli Mai ia te Au ia Ianuari 2013. E mafai ona e amata suesue i otootoga mo le aoaoina ma anomea e faatatau i ai i le taimi lava lenei.

O a gagana ia e maua ai?
O le a maua le Sau, Mulimuli Mai ia te Au i gagana nei e 23: Saina, Tanisi, Take, Igilisi, Fiti, Finelani, Farani, Siamani, Hanikeri, Initonisia, Italia, Iapani, Korea, Monokolia, Nouei, Potukale, Rusia, Samoa, Sipaniolo, Suetena, Taialani, Toga, ma Iukureini.

A e isi gagana?
O uarota ma paranesi ia e tautatala tagata i isi gagana o le a faaauau pea ona faaaogaina le mataupu aoaoina autu a le autalavou a o loo iloiloina e taitai o le Ekalesia le faia o le Sau, Mulimuli Mai ia te Au ina ia maua i isi gagana.

O le a faapefea ona ou aoao e uiga i le Sau, Mulimuli Mai ia te Au?
E tatau ona faamasani taitai o le eria ma taitai i le lotoifale i le Sau, Mulimuli Mai ia te Au. E aofia i le saite ni vitio aoga e faamatalaina ai le auala e faaaoga ai le Sau, Mulimuli Mai ia te Au, manatu mo le sauniaina o ni gaoioiga faleaoaoga mataalia, ma se tusitaiala fou, Aoao Atu o le Talalelei i le Ala a le Faaola. E faaopoopo atu i ai, o le a saunia e taitai o le eria ma le lotoifale ni fonotaga faaleaoaoga e faalauiloa atu ai i taitai ma faiaoga le Sau, Mulimuli Mai ia te Au ao lei oo i le faaiuga o le 2012.

E faapefea ona aafia au pe afai o au o se faiaoga?

O le a faapefea ona suia e le Sau, Mulimuli Mai ia te Au le auala ou te saunia ai ma aoao atu ai?
E le tau atu e otootoga mo le aoaoina i le Sau, Mulimuli Mai ia te Au mea uma e tatau ona e tau atu ma faia i le vasega. Nai lo lena, latou te fautuaina mai ni mau ma isi punaoa e fesoasoani ia te oe i le aoaoina o le aoaoga faavae mo oe lava ia, sosoo ai ma ni nai manatu e filifili mai ai ina ia fesoasoani i le autalavou ia iloa le aoaoga faavae mo i latou lava. O le aoao atu i lenei auala e le o se lauga ae o se talanoaga e taitaia e le Agaga. O le a valaaulia le auatalavou ina ia auai atili i le aoaoina mai ma le aoao atu nai lo se isi lava taimi muamua.

E faapefea ona ou iloa mea e aoao atu i vaiaso taitasi?
Ua uma ona faatulaga le Sau, Mulimuli Mai ia te Au i ni iunite se 12 faalemasina. E tofu iunite taitasi ma ni otootoga e filifili mai ai—o le a le mafai ona e aoao atua mea. Filifili otootoga e tusa ma mea e manaomia e le autalavou. E mafai ona e faaaluina le sili atu ma se vaiaso se tasi i se otootoga pe a manaomia ai.

E mafai faapefea ona ou iloa ia mea e manaomia e talavou?
Ina ia malamalama i mea e manaomia e le autalavou, faalogo ia i latou ao tuu mai ni o latou manatu ma faia ni fesili i le vasega. Faaalia le fiafia i o latou olaga. Fefautuaai ma matua, taitai, ma isi faiaoga. O le mea sili ona taua, saili i le taitaiga a le Agaga Paia. Fetuunai au aoaoga ina ia ogatasi ma le Agaga ma mea e manaomia ma fiafia i ai le autalavou.

O a nisi punaoa o le a ou manaomia?
E faaopoopo atu i tusitusiga paia ma upu a perofeta soifua, o punaoa nei e masani lava ona faasino i ai i le faagasologa o otootoga aoaoina ma o loo maua i tusiga ma luga o le initoneti:

E faapefea ona ou faaalia ia vitio i le vasega?
O le tele o vitio o loo fautuaina mai i otootoga o loo maua mo le siiina mai (o nisi e le mafai, ona o le puletaofia. E mafai ona faaali mai se vitio e sii mai i se masini eletonika feaveai. Afai e le mafai ona sii mai se vitio, e mafai ona e faaalia i le Initoneti e faaaoga ai le sootaga e le manaomia ai se uaea i la outou faletapuai, pe afai e mafai.

O a nisi mea e mafai ona aafia ai au?

E mafai faapefea ona fesoasoani ia te au le Sau, Mulimuli Mai ia te Au o se matua?
Ua valaaulia e le Sau, Mulimuli Mai ia te Au le autalavou e faasoa atu ma o latou aiga mea o loo latou aoaoina. A o e tuuina atu i lau fanau avanoa e faia ai, o le a tuputupu ae lo latou faatuatua, molimau, ma le tomai e faasoa atu ai le talalelei.
E mafai foi ona e aapa atu i faiaoga ma taitai ina ia fesoasoani ia i latou ia malamalama atili i mea e manaomia e a outou fanau ina ia mafai ona latou tuufaatasia a latou lesona e tusa ai ma nei manaoga. O loo maua vitio mo le autalavou ma matua i le lds.org/youth/learn.

E mafai faapefea ona fesoasoani ia te au le Sau, Mulimuli Mai ia te Au i le avea ai ma se umia le Perisitua Arona po o se tamaitai talavou?
E valaaulia e le Sau, Mulimuli Mai ia te Au outou ina ia tauave le tiutetauave faaletagata lava ia mo le aoaoina—e ala i le sau saunia i le vasega ina ia aoaoina, suesue i tusitusiga paia ma upu a perofeta, fai ni fesili, aoao atu ma faamatala ia upumoni o le talalelei i au uo ma aiga, ma faasoa atu le auala o loo musuia ai e le talalelei lou olaga.
O le a tuputupu ae lau molimau ao e galue i mea sa e aoaoina ma faatulaga ni vaisu amiotonu, e aofia ai le tatalo a oe lava ia ma suesue i tusitusiga paia, ola i tulaga faatonuina o le Ekalesia, ma valaaulia isi e ola i le talalelei e ala i upu ma faataitaiga.
E mafai ona e maua vitio lea e faalauiloa i le autalavou le Sau, Mulimuli Mai ia te Au.

E mafai faapefea ona fesoasoani ia te au le Sau, Mulimuli Mai ia te Au i le avea ai ma se faiaoaga seminare?
O le a faaauau pea ona aoao atu e le seminare ia mau i le faatulagaga e faaaoga ai tusi lesona a le seminare, ae ua fautuaina outou ina ia faamasani i le Sau, Mulimuli Mai ia te Au ina ia tou silafia mea o loo aoaoina ma lagonaina e le autalavou ia latou korama ma vasega i Aso Sa. Po o le a lava le tulaga e mafai ai, e ao i faiaoga seminare ma taitai o le uarota ma faiaoga ona faamalosia taumafaiga a le tasi ma le isi ina ia faamalosia ai le autalavou.

O a ni faamaopoopoga e manaomia ona faia?

O a auala e tatau ona faamaopoopo ai e faiaoga a latou taumafaiga?
O le fesoasoani atu i le autalavou ina ia liua e manaomia ai taumafaiga tuufaatasi a faiaoga uma a le autalavou (Perisitua Arona, Tamaitai Talavou, Aoga Sa, ma le seminare). E tatau ona latou fefautuaai faatasi e uiga i mea e manaomia e le autalavou ma faataga nei talanoaga e fesoasoani e fuafua ai mea e aoao atu. E mafai ona fuafua faiaoga e faamaopoopo a latou lesona faalevaiaso e faateleina ai lo latou mataalia mo talavou taitasi ma vasega taitasi. E mafai foi ona latou faamaopoopo e faasoa atu manatu ma metotia faafaiaoga.

E mafai faapefea ona fesootai le Sau, Mulimuli Mai ia te Au i le Mutuale?
Ua fautuaina taitai e fuafua ni gaoioiga o Mutuale e faatatau i autu faaleaoaoga faavae faalemasina o i le Sau, Mulimuli Mai ia te Au. O nei gaoioiga o le a tuuina atu ai i le autalavou ni avanoa e faaaoga ai mea sa latou aoaoina i Aso Sa. I nisi tulaga, o gaoioiga o loo fautuaina atu i otootoga mo le aoaoina e mafai ona talafeagai mo Mutuale.