យុវវ័យនៃសិទ្ធិពីកំណើតដ៏ថ្លៃថ្នូរ ៖ តើអ្នកនឹងជ្រើសរើសអ្វី ?

អែលឌើរ រ័សុល អិម ណិលសុន

នៃកូរ៉ុមនៃពួកសាវកដប់ពីរនាក់

រូបភាព

ការប្រជុំស៊ី.អ៊ី.អេស សម្រាប់យុវជម្ឈិមវ័យ• ថ្ងៃទី 6 ខែកញ្ញា ឆ្នាំ 2013 • សាកលវិទ្យាល័យព្រិកហាំ យ៉ង់–រដ្ឋហាវ៉ៃ

ភរិយាខ្ញុំ វែនឌី និងខ្ញុំមានអំណរគុណជាខ្លាំងដោយបានជួបអ្នករាល់គ្នា ។ ចេញពីមជ្ឈមណ្ឌលសកម្មភាពខានុន នៅបរិវេណនៃប៊ី.វាយ.យូ-ហាវ៉ៃ យើងកំពុងចាក់ផ្សាយ ដើម្បីអបអរដល់យុវមជ្ឈិមវ័យនៅទូទាំងពិភពលោក ។ យើងសូមស្វាគមន៍ជាពិសេសដល់អ្នកចូលរួមការប្រជុំស៊ី.អ៊ី.អេសនេះជាលើកដំបូង ។ ពេលអ្នកចុះឈ្មោះក្នុងវិទ្យាស្ថាននៃការអប់រំជាន់ខ្ពស់ អ្នកនឹងចង់ចូលរួមក្នុងថ្នាក់វិទ្យាស្ថាន និងការប្រជុំពិសេសទាំងឡាយ ដើម្បីរក្សាលំនឹងខាងវិញ្ញាណចំពោះការរៀនសូត្រខាងលោកិយរបស់អ្នក ។ ហើយបើអ្នកនឹងទៅបេសកកម្មក្នុងពេលឆាប់ៗ នោះអ្នកនឹងមានអំណរគុណបំផុត ។ អ្នកនឹងនៅក្នុងការបម្រើពេញម៉ោងរបស់ព្រះអម្ចាស់ ។

ខ្ញុំនាំមកជាមួយនូវការសួរសុខទុក្ខសួរ និងក្ដីស្រឡាញ់ពីសំណាក់ប្រធានថូម៉ាស អេស ម៉នសុន ប្រធាន ហិនរី ប៊ី អាវរិង ប្រធាន ឌៀថើរ អេស្វ អុជដូហ្វ និងមិត្តជាទីស្រឡាញ់របស់ខ្ញុំក្នុងកូរ៉ុមពួកសាវកដប់ពីរនាក់ ។ ខ្ញុំក៏នាំមកនូវការសួរសុខទុក្ខពីសំណាក់ក្រុមប្រឹក្សាភិបាលនៃប្រព័ន្ធអប់រំសាសនាចក្រ និងអែលឌើរ ផល វី ចនសុន អភិបាលនៃប្រព័ន្ធអប់រំសាសនាចក្រផងដែរ ។

យើងមានអ្នកឡើងនិយាយបីរូបពីមុនក្នុងការប្រជុំស៊ី.អ៊ី.អេសយើងក្នុងឆ្នាំនេះ ។ តើនៅចាំពួកលោកទេ ? ការនិយាយរបស់ប្រធានឌៀថើរ អេស្វ អុជដូហ្វមានចំណងជើងថា « តើការពិតជាអ្វី ? » លោកបានបង្រៀនយើងពីរបៀបរកសេចក្ដីពិតដ៏ប្រាកដក្នុងជំនាន់មួយ ដែលមានព័ត៌មានភាគច្រើនសុទ្ធតែមិនពិត ។ ការនិយាយរបស់អែលឌើរ ដេវីឌ អេ បែដណា គឺ « ដើម្បីកុំឲ្យយើង ‹រួញខ្លាចឡើយ› (គ និងស 19:18) » ។ លោកបានពង្រឹងខាងវិញ្ញាណយើង ពេលលោកបង្រៀនយើងពីរបៀបបង្កើនជំនឿយើង តាមរយៈសំណួរដ៏មានអានុភាពមួយ ដែលបានជួយស្វាមីភរិយាវ័យក្មេងមួយគូ ដែលស្វាមីមានជំងឺមហារីក ។ សំណួរដែលបានសួរដោយ អែលឌើរ បែដណា គឺថា « តើអ្នកមានជំនឿថាមិន ត្រូវបានជាឬទេ ? » អែលឌើរ វីល្លាម អរ វ៉កឃើរ បានពង្រឹងទីបន្ទាល់យើងពីការបម្រើ និងគំរូដែលឥតផ្ទឹមរបស់ប្រធានជាទីស្រឡាញ់នៃយើង ថូម៉ាស អេស. ម៉នសុន ។

ថ្ងៃនេះ ចំណងជើងសារលិខិតខ្ញុំគឺ « យុវវ័យនៃសិទ្ធិពីកំណើតដ៏ថ្លៃថ្នូរ¹ ៖ តើអ្នកនឹងជ្រើសរើសអ្វី ? »

យុវវ័យនៃសិទ្ធិពីកំណើតដ៏ថ្លៃថ្នូរ អ្នកគឺជាបុត្រាបុត្រីពិតរបស់ព្រះ បានកើតក្នុងពេលពិសេសនេះនៃប្រវត្តិសាស្ត្រពិភពលោក សម្រាប់គោលបំណងពិសិដ្ឋបំផុតមួយ ។ ទោះជាតម្លៃសីលធម៌ និង សាសនាក្នុងសង្គមហាក់ដូចជាចុះអន់ថយ នៅទូទាំងសាកលលោកក្ដី ក៏យុវវ័យនៃសាសនាចក្រនេះ គឺជាអ្នកកាន់បទដ្ឋាននៃព្រះអម្ចាស់ ហើយជាប្រភពពន្លឺដើម្បីទាញចិត្តអ្នកដទៃមករកទ្រង់ដែរ ។ អត្តសញ្ញាណ និងគោលបំណងរបស់អ្នកគឺពិសេស ។

តើអត្តសញ្ញាណរបស់អ្នកជាអ្វី ? អ្នកជាកូនចៅនៃសេចក្ដីសញ្ញា ។ សេចក្ដីសញ្ញាអ្វី ? ជាសេចក្ដីសញ្ញាដែលព្រះបានចុះជាមួយឪពុកអ័ប្រាហាំ ពេលលោកអ័ប្រាហាំ ត្រូវបានសន្យាថា « អស់ទាំងគ្រួសារនៅផែនដីនឹងបានពរដោយសារពូជឯង » ។ ² អ្នកក៏ជាកូននៃជំនាន់ដែលបានសន្យានោះផងដែរ ³ ជារយៈកាលនេះនៃប្រវត្តិសាស្ត្រពិភពលោក ពេលដែលដំណឹងល្អនឹងត្រូវប្រកាសយ៉ាងទូលំទូលាយពេញពិភពលោក ។

តើគោលបំណងអ្នកជាអ្វី ? បងប្អូនប្រុស អ្នកត្រូវបានតែងតាំងពីមុននៅក្នុងនគរជីវិតមុនជីវិតនេះ ដើម្បីកាន់បព្វជិតភាព ។ ⁴ ចូរគិតវា ! ហើយបងប្អូនស្រីជាទីស្រឡាញ់ អ្នកត្រូវបានជ្រើសរើស តាំងពីមុនបង្កើតពិភពលោក ដើម្បីបង្កើត ហើយមើលថែកូនចៅព្រះ ហើយពេលធ្វើដូច្នោះ អ្នកផ្ដល់សិរីល្អដល់ព្រះ ។ ⁵ បងប្អូនស្រី តើអ្នកមានបានគិតវិនិច្ឆ័យពីអត្ថន័យពិត នៃការធ្វើជាអ្នកបង្កបង្កើតជាមួយព្រះឬទេ ?

យុវជន និងយុវនារី អ្នករាល់គ្នាម្នាក់ៗ គឺត្រូវបានចាត់ដោយព្រះវរបិតាសួគ៌ ដើម្បីស្ថាបនានគរព្រះលើផែនដីឥឡូវនេះ ហើយរៀបចំរាស្ត្រទទួលព្រះអង្គសង្គ្រោះ ពេលទ្រង់នឹងគ្រងរាជ្យ ជាព្រះមែស៊ីក្នុងសហសវត្ស ។ សិទ្ធិពីកំណើតដ៏ថ្លៃថ្នូរ អត្តសញ្ញាណ គោលបំណង និងការចាត់តាំងដ៏ទេវភាពរបស់អ្នក បានញែកអ្នកចេញពីអ្នកដទៃទៀតទាំងអស់ ។

ប៉ុន្តែសិទ្ធិពីកំណើត ការតែងតាំងពីជីវិតមុន និងការចាត់តាំងរបស់អ្នក ពុំអាចសង្គ្រោះ ឬលើកតម្កើងអ្នកបានទេ ។ អ្នកនឹងបានសង្គ្រោះ ហើយលើកតម្កើង តាមរយៈការសម្រេចចិត្តជាបុគ្គលរបស់អ្នក និងនៅពេលអ្នកជ្រើសរើសទទួលអំណាចនៃដង្វាយធួនរបស់ព្រះអម្ចាស់មកក្នុងជីវិតអ្នក ។ នោះអ្នកដឹងថា « ព្រលឹងគ្រប់រូបមានសិទ្ធិសេរីភាពជ្រើសរើសចំពោះជីវិតគាត់ និងការប្រែក្លាយរបស់គាត់ » ។ ⁶ គោលការណ៍នៃសិទ្ធិជ្រើសរើសដ៏អស់កល្បមហិមានោះ មានតម្លៃចំពោះផែនការនៃព្រះបិតាយើង ។ ដូច្នេះ យុវវ័យនៃសិទ្ធិពីកំណើតដ៏ថ្លៃថ្នូរ ៖ តើអ្នកនឹងជ្រើសរើសអ្វី ?

តើអ្នកនឹងជ្រើសរើសឲ្យមានចំណេះចម្រើនឡើងឬ ?

ការអប់រំ គឺជាអ្វីដែលអ្នកត្រូវទទួល ។ គ្មាននរណាផ្សេងអាចទទួលវាសម្រាប់អ្នកទេឡើយ ។ មិនថាអ្នកនៅកន្លែងណាទេ សូមបង្កើតនូវបំណងប្រាថ្នាខ្លាំងដើម្បីរៀនសូត្រ ។ ចំពោះយើង ដែលជាពួកបរិសុទ្ធថ្ងៃចុងក្រោយ ការទទួលបានការអប់រំពុំមែនគ្រាន់តែជាឯកសិទ្ធិមួយប៉ុណ្ណោះទេ តែវាជាការទទួលខុសត្រូវខាងសាសនាមួយផងដែរ ។ សិរីល្អនៃព្រះគឺជាបញ្ញា ។ ⁷ ប្រាកដណាស់ ការអប់រំរបស់យើងនឹងនៅយូរអង្វែងដល់អស់កល្បជានិច្ច ។

« គោលការណ៍នៃបញ្ញាណាក៏ដោយ ដែលយើងបាននៅក្នុងជីវិតនេះ នោះនឹងនៅជាប់នឹងយើងក្នុងដំណើររស់ឡើងវិញ ។

« ហើយបើសិនជាអ្នកណាមួយបានចំណេះវិជ្ជា និងបញ្ញាច្រើនជាងអ្នកផ្សេងនៅក្នុងជីវិតនេះ … អ្នកនោះនឹងបានប្រៀបច្រើននៅពិភពខាងមុខ » ។ ⁸

ទស្សនៈរយៈពេលយូរដូច្នោះ នឹងជួយអ្នកធ្វើការជ្រើសរើសល្អពីការអប់រំ ។ មែនហើយ ខ្ញុំនៅចាំពីការសន្ទនាមួយយូរហើយ ជាមួយសិស្សវិទ្យាល័យដ៏ពូកែម្នាក់អាយុ 16 ឆ្នាំ ។ គាត់ពុំច្បាស់ពីការតាំងចិត្តខាងសាសនារបស់គាត់ទេ ហើយក៏ពុំបានសម្រេចចិត្តពីអាជីពគាត់ដែរ ។ គាត់បានងឿងឆ្ងល់ពីលទ្ធភាពនៃការក្លាយជាគ្រូពេទ្យម្នាក់ ។ មានគ្រាមួយ គាត់បានសួរខ្ញុំសំណួរសាមញ្ញមួយថា ៖ « តើលោកបានចំណាយពេលប៉ុន្មានដើម្បីក្លាយជាគ្រូពេទ្យវះកាត់បេះដូង ? »

ខ្ញុំបានគណនាក្នុងគំនិតភ្លាមៗថា ៖ « តាំងពីខ្ញុំបានបញ្ចប់វិទ្យាល័យរហូតដល់ពេលខ្ញុំទទួលបានប្រាក់ខែដំបូងជាគ្រូពេទ្យវះកាត់ នោះខ្ញុំចំណាយពេលអស់ 14 ឆ្នាំ »

គាត់តបថា « អូ៎ ! យូរណាស់សម្រាប់ខ្ញុំ ! »

រួចខ្ញុំបានសួរថា « តើអ្នកនឹងមានអាយុប៉ុន្មានឆ្នាំ ក្នុងរយៈពេល 14 ឆ្នាំ ចាប់ពីឥឡូវនេះទៅ បើអ្នកមិនក្លាយជាគ្រូពេទ្យវះកាត់ទេនោះ ? »

គាត់តបថា « នៅតែដដែល » ។ « នៅតែដដែលហ្នឹង ! »

ខ្ញុំចាប់អារម្មណ៍ពិសេសចំពោះយុវជនម្នាក់នេះ ។ ជួនកាល ខ្ញុំបានដឹកគាត់នៅព្រឹកព្រលឹម ពេលគាត់ទៅបោះកាសែត ។ ជាច្រើនឆ្នាំកន្លងទៅ ជំនឿគាត់បានរឹងមាំឡើយ ។ គាត់ជាអ្នកផ្សាយសាសនាដ៏មានអានុភាព ។ គាត់បានសម្រេចចិត្តតស៊ូក្នុងគោលដៅការអប់រំរបស់អ្នក ។ ដំបូងឡើយ គាត់បានរៀបការនឹងនារីកំណាន់ចិត្តគាត់ក្នុងព្រះវិហារបរិសុទ្ធ ។ រួចហើយ ពេលគាត់សិក្សាផ្នែកឱសថ និងវះកាត់ នោះពួកគេបានមានកូនបួននាក់ដ៏ល្អ ។ ឥឡូវ គាត់បានទទួលបរិញ្ញាបត្រពេញលេញជាអ្នកវះកាត់ផ្នែកបេះដូង--បន្ទាប់ពីការសិក្សា និង ការហ្វឹកហ្វឺនអស់រយៈពេល 14 ឆ្នាំ ។

បងប្អូនប្រុសស្រី ចូរកុំខ្លាចក្នុងការតោងចាប់គោលដៅអ្នកឡើយ-- ទោះជាសុបិនអ្នកក្ដី ! គ្មានផ្លូវកាត់ណាដើម្បីបានឧត្ដមភាព និងមានសមត្ថភាពនោះទេ ។ ការអប់រំគឺខុសប្លែកពីការប៉ងប្រាថ្នា អ្នកអាចជួយអ្នកដទៃ និង អាច ជួយដល់ពួកគេ ។

នេះជាសំណួរមួយទៀត ៖ តើអ្នកនឹងជ្រើសរើសការរស់នៅលក្ខណៈណា ?

ក្នុងនាមជាយុវវ័យនៃសិទ្ធិពីកំណើតដ៏ថ្លៃថ្នូរ អ្នកត្រូវបានរំពឹងឲ្យរស់នៅខុសប្លែកពីអ្នកដទៃ ។ អ្នកដឹងនូវអ្វីដែលប៉ុលនិយាយទៅយុវជនធីម៉ូថេថា ៖ « ធ្វើជាគំរូដល់ពួកអ្នកជឿដោយពាក្យសម្ដី និងសេចក្ដីបរិសុទ្ធ » ។⁹ សូមជ្រើសយកការគិត និងទង្វើរខុសប្លែកពីមនុស្សក្នុងពិភពលោកនេះ ។ ដូចស៊ីស្ទើរ អាឌីស ជី ខាប មានគ្រាមួយបាននិយាយថា « អ្នកមិនអាចក្លាយជាអ្នកសង្គ្រោះជីវិតបានឡើយ បើអ្នកមានរូបរាងដូចនឹងពួកអ្នកហែលទឹកផ្សេងទៀតនៅលើឆ្នេរនោះ » ។ ¹⁰

ក្នុងនាមជាយុវវ័យដែលមានសិទ្ធិពីកំណើតថ្លៃថ្នូរ នោះអ្នកមានការចាប់ផ្ដើមដ៏អស្ចារ្យនៅក្នុងជីវិត ។ តែអ្នកក៏មាននូវទំនួលខុសត្រូវបន្ថែមទៀតផងដែរ ។ « ត្បិតដល់អ្នកណាដែលត្រូវបានប្រទានឲ្យច្រើន នោះក៏មានតម្រូវការជាច្រើនវិញ » ។¹¹ ផ្នែកនៃតម្រូវការនោះគឺការក្លាយជាទ័ពថ្មីម្នាក់ ។ តើអ្នកធ្លាប់គិតពីខ្លួនឯងថាជាទ័ពថ្មីម្នាក់ទេ ? ពេលអ្នកជ្រមុជទឹក អ្នកចុះឈ្មោះជាថ្មីនៅក្នុងកងទ័ពរបស់ព្រះអម្ចាស់ ។¹² ពីមុនជីវិតនេះ អ្នកបានឈរក្បែរព្រះយេស៊ូវ គ្រីស្ទក្នុងចម្បាំងនៅស្ថានសួគ៌ ។ ហើយឥឡូវនេះ ចម្បាំងរវាងកម្លាំងនៃអំពើល្អ និងអំពើអាក្រក់បានបន្តនៅលើផែនដី ។ វាពិត ! ចម្បាំងនោះដែលយើងចូលរួមនៅពេលនេះគឺនៅតែរវាងកម្លាំងនៃអំពើល្អ និងអំពើអាក្រក់ ។¹³ នៅខាងព្រះគឺព្រះយេស៊ូវគ្រីស្ទ ត្រូវបានតែងតាំងទុកជាមុនជាព្រះអង្គសង្គ្រោះនៃពិភពលោក ។¹⁴ រីឯម្ខាងទៀតគឺសាតាំង---ជាអ្នកបះបោរ---ជាអ្នកបំផ្លាញសិទ្ធិជ្រើសរើស ។¹⁵

ផែនការរបស់ព្រះអនុញ្ញាតឲ្យមារសត្រូវល្បួងអ្នក ដើម្បីឲ្យអ្នកអាចអនុវត្តសិទ្ធិជ្រើសរើសអ្នក ជ្រើសល្អជំនួសអាក្រក់ ជ្រើសប្រែចិត្ត ជ្រើសមករកព្រះយេស៊ូវគ្រីស្ទ ហើយជឿលើការបង្រៀនទ្រង់ ព្រមទាំងធ្វើតាមគំរូទ្រង់ ។ ឱ ! នេះជាការទទួលខុសត្រូវ និងជាទំនុកចិត្តដ៏ធំធេងណាស់ !

សេរីភាពជ្រើសរើសអ្នកគឺបានពន្យល់យ៉ាងច្បាស់ក្នុងព្រះគម្ពីរមរមនថា ៖ « មនុស្សលោកមានសេរីភាពស្របតាមសាច់ឈាម ។… ពួកគេមានសិទ្ធិនឹងរើសយកឥស្សរភាព និងជីវិតដ៏នៅអស់កល្បជានិច្ច… ឬក៏រើសយកការជាប់ឃុំឃាំង និងការស្លាប់ស្រប់តាមការជាប់ឃុំឃាំង និងអំណាចរបស់អារក្ស ត្បិតវាព្យាយាមធ្វើឲ្យមនុស្សលោកទាំងអស់មានទុក្ខវេទនាដូចវាដែរ » ។¹⁶ ឥឡូវ តើអ្នកនឹងរើសយកអ្វី ?

ខ-មួយទៀតបង្ហាញថា « សេចក្ដីទុច្ចរិតពុំដែលជាសុភមង្គលឡើយ » ។¹⁷ យុវវ័យជាច្រើនបានព្យាយាមល្បងសេចក្ដីពិតនោះ ហើយបរាជ័យគ្រប់ពេល ។

សេរីភាពអ្នកដើម្បីធ្វើដោយខ្លួនឯង គឺសំខាន់ចំពោះការរីកចម្រើន និងសុភមង្គលអស់កល្បរបស់អ្នក ដែលមារសត្រូវបានខិតខំយ៉ាងខ្លាំង ដើម្បីធ្វើឲ្យវាចុះខ្សោយ ។ ¹⁸ សាតាំងពិតជាខិតខំមិនខ្លាចនឿយហត់ គឺវាមិនដេកពួនឡើយ ។ អ្នករាល់គ្នាជាច្រើនធ្លាប់ជួបវារួចហើយ !

នេះជាសំណួរមួយទៀត ៖ តើអ្នកនឹងបង្កើតអាទិភាព ដើម្បីជួយអ្នកធ្វើការជ្រើសរើសក្នុងជីវិតដែរទេ ?

ការជ្រើសរើសអ្នកនឹងពុំមែនរវាងអំពើល្អ និងអំពើអាក្រក់ទាំងអស់នោះទេ ។ មនុស្សជាច្រើននឹងជ្រើសរើសរវាងជម្រើសល្អពីរ ។ រាល់សេចក្ដីពិតពុំបង្កើតឡើងដូចគ្នានោះទេ ដូច្នេះអ្នកត្រូវដាក់អាទិភាព ។ ក្នុងការស្វែងរកចំណេះដឹងរបស់អ្នក សូមដឹងថា សេចក្ដីពិតដ៏សំខាន់បំផុតដែលអ្នកអាចរៀន បានមកពីព្រះអម្ចាស់ ។ ក្នុងការអធិស្ឋានទៅព្រះវរបិតាសម្រាប់ពួកសិស្សទ្រង់ ព្រះអម្ចាស់ផ្ទាល់បានបញ្ជាក់ពីការណ៍នេះ ។ ទ្រង់មានបន្ទូលថា « នេះជាជីវិតដ៏នៅអស់កល្ប គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ និងព្រះយេស៊ូវគ្រីស្ទដែលទ្រង់បានចាត់ឲ្យមកផង » ។¹⁹ ម្យ៉ាងវិញទៀត ក្រៅពីការព្យាយាមរៀនសូត្រ ចូរព្យាយាមស្គាល់ព្រះ ជាព្រះវរបិតាសួគ៌អ្នក និងព្រះរាជបុត្រាទ្រង់ ព្រះយេស៊ូវគ្រីស្ទ ។ សូមមកស្គាល់ទ្រង់ ហើយស្រឡាញ់ទ្រង់ដូចជាខ្ញុំ ។

បទគម្ពីរមួយទៀតស្ដីពីអាទិភាពបានជួយខ្ញុំក្នុងជីវិតខ្ញុំ គឺបទគម្ពីរមួយនេះ ៖ « ចូរកុំស្វែងរកអ្វីៗនៃលោកិយនេះឡើយ ប៉ុន្តែចូរស្វែងរកដើម្បីកសាងនគរព្រះ ហើយដើម្បីតាំងសេចក្ដីសុចរិតរបស់ទ្រង់ជាមុនសិន ទើបគ្រប់របស់ទាំងនេះនឹងត្រូវបានប្រទានដល់អ្នកថែម ទៀត » ។ ²⁰

លើសពីអ្វីផ្សេងទៀតក្នុងពិភពលោកនេះ អ្នកគួរតែជ្រើសរើសអ្វីដែលដឹកនាំទៅកាន់ជោគវាសនានៃជីវិតអស់កល្បរុងរឿងដ៏ខ្ពស់បំផុត ។ នោះជាសិរីល្អធំជាងគេរបស់ព្រះសម្រាប់ អ្នក ។²¹ សូមជ្រើសយកជីវិតអស់កល្បជាអាទិភាពខ្ពស់បំផុតរបស់អ្នក ! សូមសិក្សាព្រះគម្ពីរ ដូចជាកណ្ឌ 76 និង 88 ក្នុងគោលលទ្ធិ និងសេចក្ដីសញ្ញា ដើម្បីយល់បន្ថែមពីពរជ័យផ្សេងគ្នាដែលកំពុងរង់ចាំអ្នកដែលជ្រើសយកជីវិតអស់កល្ប និងអ្នកដែលបដិសេធ ។ សូមជ្រើសយកជីវិតអស់កល្បជាអាទិភាពខ្ពស់បំផុតរបស់អ្នក ហើយកត់សម្គាល់ពីរបៀបដែលការជ្រើសរើសផ្សេងទៀតបានកើតឡើងយ៉ាងងាយ ។

សំណួរមួយទៀត ៖ តើអ្នកនឹងជ្រើសរើសសេពគប់មនុស្សបែបណា ?

ក្នុងនាមជាយុវវ័យដែលមានសិទ្ធិពីកំណើតថ្លៃថ្នូរ អ្នកនឹងសេពគប់នឹងមនុស្សល្អជាច្រើនដែលជឿលើព្រះដែរ ។ មិនថាពួកគេជាសាសនាយូដា កាតូលីក ប្រូតេស្ដង់ ឬម៉ូស្លីមទេ ពួកអ្នកជឿដឹងថាមានសេចក្ដីពិត ។ ក្នុងសារលិខិតពីលើកមុនរបស់ប្រធាន អុជដូហ្វ លោកបានបញ្ជាក់ថា ការខុស និងត្រូវគឺពិតជាមាន ហើយការមិនគោរពព្រះបញ្ញត្តិមួយដោយចេតនាគឺពិតជាអំពើបាប ។ ពួកអ្នកជឿលើព្រះក៏មានសតិមួយដែរ ។ ពួកអ្នកជឿគោរពច្បាប់មនុស្ស និងច្បាប់ព្រះដោយស្ម័គ្រចិត្ត ទោះជាច្បាប់នោះមិនអាចប្រតិបត្តិតាមបានក្ដី ។

ជាមួយការតាំងចិត្តរបស់អ្នកដើម្បីគោរពច្បាប់មនុស្ស និងច្បាប់ព្រះ នោះអ្នកនឹងឈប់នៅត្រង់ភ្លើងពណ៌ក្រហម ទោះជាគ្មានចរាចរពីផ្នែកម្ខាងទៀតក្ដី ។ ក្នុងនាមជាកូនចៅនៃព្រះ ទោះជានគរបាលមិនបានចាប់អ្នក ទោះជាអ្នកបានលួច ធ្វើឃាត ឬធ្វើអំពើកំផឹតក្ដី អ្នកដឹងថា ទង្វើរទាំងនេះខុស ហើយថាព្រះនឹងធ្វើឲ្យអ្នកទទួលខុសត្រូវ ។ អ្នកដឹងថា លទ្ធផលចំពោះការមិនប្រតិបត្តិតាមគឺមានដល់ភាពអស់កល្ប ពុំមែនត្រឹមតែខាងសាច់ឈាមនោះទេ ។

នៅពេលអ្នកធ្វើដំណើរក្នុងជីវិត អ្នកក៏នឹងជួបមនុស្សដែលមិនជឿព្រះផងដែរ ។ ពួកគេភាគច្រើនពុំទាន់ស្វែងរកឃើញសេចក្ដីពិតពីព្រះនៅឡើយ ហើយមិនដឹងពីទីកន្លែងនឹងរកវា ។ តែអ្នកដែលជាយុវវ័យដែលមានសិទ្ធិពីកំណើតថ្លៃថ្នូរនឹងជួយសង្គ្រោះដល់ពួកគេ ។ ក្នុងចំនួនដ៏ធំ អ្នកកំពុងប្រមូលផ្ដុំគ្នាតាមសំណើររបស់ព្យាការីនេះព្រះ សម្រាប់ការមានពួកអ្នកផ្សាយសាសនាដ៏ច្រើន ។ យើងមានអំណរជាខ្លាំងចំពោះពួកគេម្នាក់ៗ ! អ្នករាល់គ្នាភាគច្រើនបានបម្រើរួចហើយ រីឯអ្នកផ្សេងទៀតកំពុងរៀបចំខ្លួនចេញទៅ ។

នៅពេលអ្នកសេពគប់នឹងពួកអ្នកមិនជឿព្រះ ចូរប្រុងប្រយ័ត្នថា ពួកគេមួយចំនួនអាចនឹងមិនខ្វល់ពីចំណាប់អារម្មណ៍ក្នុងចិត្តអ្នកឡើយ ។²² រំពេចណាអ្នកធ្វើការវិនិច្ឆ័យ ហើយដឹងពីការណ៍នោះ--- សូមចាកចេញពីពួកគេភ្លាម ហើយជារៀងរហូត ។²³

ជាអកុសល អ្នកនឹងជួបមនុស្សដែល ការស្វែងរកសុភមង្គលរបស់ពួកគេហាក់ដូចជាកំពុងនាំពួកគេចុះទៅចំណោតរអិលនៃអំពើបាប ។ សូមប្រុងប្រយ័ត្នចំពោះចំណោតរអិលនោះ ! រាល់ភាពរីករាយក្នុងអំពើបាបគឺមានរយៈពេលខ្លី ហើយការចងចាំដ៏អាក្រក់របស់វានឹងអន្ទងតាមរយៈការព្រួយ និងកំហុស ។ ទង្វើរខុសឆ្គងនៃភាពស្និទ្ធស្នាល ធ្វើឲ្យខូចអ្វីៗដែលបានរៀបចំឡើងដោយព្រះដើម្បីរួបរួមប្ដីនិងប្រពន្ធ វាគឺជាតម្រាប់ក្លែងក្លាយ ។ បទពិសោធន៍មិនស្របច្បាប់នីមួយៗគឺបានដកយកចេញនូវអត្ថន័យជ្រាលជ្រៅ និងការចងចាំផ្អែមល្ហែម ។

សំណួរមួយទៀត ៖ តើអ្នកនឹងជ្រើសយកសេរីភាព ឬការជាប់ឃុំឃាំង ?

កម្លាំងសត្រូវនៅព័ទ្ធជុំវិញ ។ អ្នកកំពុងរស់នៅក្នុង « ដែនដីដែលសត្រូវកាន់កាប់ » ។ ²⁴ ជំងឺនៃរូបអាសគ្រាមដ៏អាក្រក់កើតមានពាសពេញ ។ វាដាក់អន្ទាក់ដល់អស់ជនដែលងាកទៅរកឥទ្ធិពលអាក្រក់របស់វា ។

ការណ៍នេះបានឃើញជាមុនដោយព្រះអម្ចាស់ ដោយទ្រង់មានបន្ទូលថា « ហើយឥឡូវនេះ យើងបង្ហាញដល់អ្នកនូវសេចក្ដីអាថ៌កំបាំងមួយ ជាការណ៍ដែលមាននៅក្នុងបន្ទប់សម្ងាត់ ដើម្បីនាំឲ្យកើតមានសេចក្ដីបំផ្លិចបំផ្លាញដល់អ្នក កន្លងពេលក្រោយមក ហើយអ្នករាល់គ្នាពុំបានដឹងសោះ » ។²⁵ រួចទ្រង់បានបន្ថែមការព្រមានទីពីរថា ៖ « ហើយជាថ្មីទៀត យើងប្រាប់អ្នកថា ខ្មាំងសត្រូវដែលនៅក្នុងបន្ទប់សម្ងាត់កំពុងតែស្វែងរកជីវិតរបស់អ្នក » ។²⁶

សូមពិចារណាពីរបៀបដែលមនុស្សជាច្រើន ក្នុងបន្ទប់សម្ងាត់ជាច្រើនកំពុងស្វែងរកបំផ្លាញជីវិត និងសុភមង្គលអ្នកនៅពេលនេះ ! បងប្អូនប្រុសស្រី បើអ្នកមើលរូបអាសគ្រាម សូមឈប់ឥឡូវនេះ ។ សូមបញ្ឈប់វាទាំងស្រុង ។ វាអាក្រក់ដូចជាជំងឺឆ្លង ញៀនដូចជាថ្នាំ ហើយកាត់ដូចជាទឹកអាស៊ីត ។

ការល្បួងខាងរូបកាយពុំមែនជារឿងថ្មីនោះទេ ។ សាវកពេត្រុសបានព្រមានពីអន្ទាក់ដូចគ្នានេះ ពេលគាត់សរសេរថា ៖

« គេ...បិទនុយប្រកបដោយសេចក្ដីសម្រើបខាងសាច់ឈាម… ម្បីចាប់ពួកអស់អ្នកដែលទើបតែនឹងរួចចេញពីពួកវង្វេង ។ …

« ទាំងសន្យាឲ្យអ្នកទាំងនោះបានសេរីភាពផង តែខ្លួនគេក៏នៅជាប់ជាបាវបម្រើរបស់ពួកពុករលួយវិញ ត្បិតបើអ្នកណាត្រូវគេបង្ក្រាបខ្លួន នោះត្រូវនៅជាប់ជាបាវរបស់អ្នកនោះហើយ » ។²⁷

សូមជៀសពីការជាប់ឃុំឃាំងនោះ ឱ បងប្អូនប្រុសស្រីជាទីស្រឡាញ់របស់ខ្ញុំអើយ ។ បើអ្នកកំពុងមើលរូបអាសគ្រាមនៅពេលនេះ សូមបញ្ឈប់វា ! សូមឈប់ឥឡូវនេះ ! សូមស្វែងរកជំនួយពីប៊ីស្សពអ្នក ។ គ្មាននរណាម្នាក់ឆ្លាតគ្រប់គ្រាន់ដើម្បីវាយសត្រូវដោយខ្លួនឯងឡើយ នៅពេលពួកគេត្រូវបានបំពុលដោយរូបអាសគ្រាមនោះ ។

ឥឡូវ ខ្ញុំសុំចូលទៅសំណួរសំខាន់មួយទៀត ៖ តើអ្នកនឹងជ្រើសដើរតាមព្រះអម្ចាស់ ឬគំនិតរបស់មនុស្ស ?

ឧទាហរណ៍ ការវែកញែកដែលថា ផែនដីនេះមានចំនួនមនុស្សលើសចំណុះយ៉ាងខ្លាំង ហើយគូស្វាមីភរិយាគប្បីដាក់កំណត់នូវចំនួនកូនដែលត្រូវមាន ។ តើអ្នកធ្លាប់ឮការណ៍នោះទេ ? តែនៅឯសមាជពិភពលោកមួយស្ដីពីគ្រួសារ ក្នុងឆ្នាំ 2009 ស៊ិស្ទើរ នែលសុន និងខ្ញុំបានឮអ្នកប្រាជ្ញម្នាក់ បានធ្វើសេចក្ដីថ្លែងការណ៍មួយយ៉ាងល្អ ។ គាត់និយាយថា បុរសស្ត្រី និងកុមារម្នាក់ៗដែលរស់នៅលើផែនដីសព្វថ្ងៃនេះត្រូវបានផ្ដល់ដីមួយពាន់ម៉ែត្រការេ ប្រជាជន 700 លាននាក់នឹងល្មមសម្រាប់ប្រទេសប្រស៊ីល ដោយមានផ្ទៃដី 20 ភាគរយទៀតក្នុងប្រទេសប្រស៊ីលនៅសល់ ។²⁸ តើនេះមានន័យថាផែនដីមានមនុស្សលើសចំណុះឬ ?

ខ្ញុំបានមើលការគណនានោះ ។ វាត្រឹមត្រូវ ។ ខ្ញុំសូមអង្វរអ្នកឲ្យជឿលើព្រះអម្ចាស់ ដែលទ្រង់បានមានបន្ទូលថា « ផែនដីបានពោរពេញ ហើយមានបរិបូរគ្រប់គ្រាន់ និងនៅសល់ទៀតផង » ។²⁹

ការពិតមួយទៀតគឺថា អ្នករស់នៅក្នុងគ្រាមួយដែលការអត់ការងារធ្វើមានអាត្រាខ្ពស់ ហើយទីផ្សារហិរញ្ញវត្ថុនៅជុំវិញពិភពលោកមានភាពមិនប្រាកដប្រជា ។ ដំណោះស្រាយខាងលោកិយមួយត្រូវស្វែងរកការផ្លាស់ប្ដូរក្នុងផែនការរបស់ព្រះ ។ តែយើងដឹងថា អាពាហ៍ពិពាហ៍ និងគ្រួសាររឹងមាំពិតជាជួយឲ្យសេដ្ឋកិច្ចរីកចម្រើន ។ ហើយយើងមិនឯកោក្នុងអារម្មណ៍ទាំងនោះឡើយ ។

សាស្ត្រាចារ្យ បណ្ឌិត ផាទ្រីស អែហ្វ. ហ្វាហ្គាន ³⁰ បានសរសេរថា ៖ « គ្រឹះដ៏សំខាន់ដែលជោគវាសនានៃសេដ្ឋកិច្ចពឹងអាស្រ័យគឺគ្រួសារដែលរៀបការ---ជាពិសេសគ្រួសារកូនច្រើនដែលថ្វាយបង្គំព្រះរាល់សប្ដាហ៍ ។ …

« … រាល់ការរៀបការបង្កើតនូវគ្រួសារថ្មីមួយ ជាស្ថាប័នសេដ្ឋកិច្ចឯករាជ្យមួយដែលបង្កើតប្រាក់ចំណូល ប្រាក់ចំណាយ ប្រាក់សន្សំ និងវិនិយោគទុន » ។³¹

បណ្ឌិត ហ្វាហ្គាន បានបន្ថែមទៀតថា « ម្ដាយបានរៀបការដែលនៅផ្ទះមានឥទ្ធិពលយ៉ាងខ្លាំងលើសេដ្ឋកិច្ចលើសពីឪពុកបានរៀបការនៅកន្លែងធ្វើការទៀត។ … ខណៈដែលឪពុកបរិច្ចាគទៅនឹងសេដ្ឋកិច្ចបច្ចុប្បន្ន នោះម្ដាយបរិច្ចាគទាំងចំពោះសេដ្ឋកិច្ចបច្ចុប្បន្ន និងអនាគត » ។³²

របាយការណ៍របស់បណ្ឌិត Fagan បញ្ជាក់ពីគំនិតដែលបានលើកឡើងជាយូរមកហើយ ដោយគណៈប្រធានទីមួយ និងពួកសាវកដប់ពីរនាក់ក្នុង « គ្រួសារ៖ ការប្រកាសដល់ពិភពលោក » ។ ខ្ញុំសង្ឃឹមថា អ្នករាល់គ្នានឹងមានការប្រកាសនោះ ។ សូមសិក្សាវាដោយយកចិត្តទុកដាក់ ។ ខណៈដែលគ្រួសារនៅទូទាំងពិភពលោករងការវាយប្រហារ នោះសេចក្ដីពិតនៃការប្រកាសពីគ្រួសារនឹងជួយពង្រឹងអ្នក ។

អ្នកដែលជាយុវវ័យមានសិទ្ធិពីកំណើតថ្លៃថ្នូរអើយ អ្នកត្រូវយល់ពីផលវិបាកដ៏ធំធេងនៃចម្បាំងបច្ចុប្បន្នរបស់សង្គម ទៅលើនិយមន័យជាច្រើននៃអាពាហ៍ពិពាហ៍ ។ ការជជែកវែកញែកសព្វថ្ងៃនេះជាប់ទាក់ទងនឹងសំណួរថា តើមនុស្សពីរនាក់មានភេទដូចគ្នាអាចរៀបការបានទេ ។ បើអ្នកមានសំណួរពីទីតាំងនៃសាសនាចក្រស្ដីពីបញ្ហានេះ ឬបញ្ហាសំខាន់ដ៏ទៃទៀតណាមួយ សូមសញ្ជឹងគិតវាប្រកបដោយការអធិស្ឋាន បន្ទាប់មកសូមស្ដាប់តាមសារលិខិតរបស់ព្យាការីក្នុងសន្និសីទទូទៅសាសនាចក្រនៅខែតុលាខាងមុខនេះ ។ សុន្ទរកថាដ៏បំផុសគំនិតទាំងនោះ រួមទាំង ការបំផុសគំនិតពីព្រះវិញ្ញាណបរិសុទ្ធនឹងផ្ដល់ការយល់ដឹងពេញលេញដ៏ពិតដល់គំនិតអ្នក ។

ការជជែកគ្នាពីអាពាហ៍ពិពាហ៍គឺគ្រាន់តែជាការវែកញែកគ្នាមួយដែលនឹងសាកល្បងអ្នកនាអនាគត ។ ប្រឆាំងនឹងសំឡេងរំខាននៃមារសត្រូវ អ្នក ក្នុងនាមជាយុវវ័យដែលមានកំណើតថ្លៃថ្នូរ នឹងជ្រើសឈរសម្រាប់ព្រះអម្ចាស់ និងសេចក្ដីពិតទ្រង់ ។ ចងចាំនូវទំនុកច្រៀងនៃទំនុកតម្កើងដូចខាងក្រោម ។ សូមថាវាម្ដងទៀត ។ ទន្ទេញវា ។ ទំនុកតម្កើងនេះសម្រាប់អ្នក ៖

តើ​យុវវ័យ​នៃ​ស៊ីយ៉ូននឹង​វេចវេរ
ក្នុង​ការ​ការពារ​សេចក្ដីពិត និង​ភាព​ត្រឹមត្រូវ​ឬ ?
ខណៈ​ដែល​សត្រូវ​វា​យ​ប្រហារ
តើ​យើង​នឹង​ដកថយ ឬគេច​ពី​ចម្បាំងនេះមែនទេ ? ទេ!

ពិត​ចំពោះ​ក្ដីជំនឿ​ដែល​ឪពុក​ម្ដាយ​យើង​បាន​ឲ្យ​តម្លៃ ។
ពិតចំពោះ​សេចក្ដី​ពិត​ដែល​ជន​រងគ្រោះ​បាន​ស្លាប់
ចំពោះ​បញ្ញត្តិ​របស់​ព្រះ
ជាមួយ​នឹង​ព្រលឹង ចិត្ត និង​ដៃ​ទាំងទ្វេរ
ស្មោះត្រង់ ហើយ​ពិត​ យើងឈរ​ជារៀងរហូត ។33

សាវកប៉ុលបានព្យាករណ៍ពីស្ថានភាពអាក្រក់នៃជំនាន់យើង ។ ការពិពណ៌នារបស់គាត់ហាក់ដូចជាការផ្សាយព័ត៌មាននៅយប់ម៉ោង 10:00 របស់យើង ។ សូមស្ដាប់ ៖

« នៅជាន់ក្រោយបង្អស់នឹងមានគ្រាលំបាកណាស់។

« ត្បិតនៅគ្រានោះ មនុស្សនឹងស្រឡាញ់តែខ្លួនឯង ទាំងស្រឡាញ់ប្រាក់ អួតអាងខ្លួន មានឫកខ្ពស់ ប្រមាថមើលងាយ មិនស្ដាប់បង្គាប់ឪពុកម្ដាយ រមិលគុណ មានចិត្តមិនបរិសុទ្ធ

« មិនស្រឡាញ់តាមធម្មតាមនុស្ស គ្មានសេចក្ដីអធ្យោគ និយាយបង្កាច់គេ មិនចេះទប់ចិត្ត មានចិត្តសាហាវ មិនចូលចិត្តនឹងការល្អ

« ក្បត់គេ ឥតបើគិត មានចិត្តធំ ហើយចូលចិត្តនឹងល្បែងលេងជាជាងព្រះ

« គេមានឫកពាជាអ្នកគោរពប្រតិបត្តិដល់ព្រះ ប៉ុន្តែមិនព្រមទទួលស្គាល់ព្រះចេស្ដាដែលមកដោយការគោរពប្រតិបត្តិនោះទេ ចូរបែរពីពួកមនុស្សយ៉ាងនោះចេញ » ។³⁴

នេះជាចុងបញ្ចប់ការព្រមានលោក ។

មែនហើយ ការនិមិត្តដ៏ពិតរបស់ប៉ុលស្ដីពីការបំផ្លាញខាងវិញ្ញាណ ក្នុងជំនាន់យើងត្រូវបានអមដោយការសន្និដ្ឋានរបស់គាត់ ដោយប្រាប់យើងពីរបៀបរក្សាខ្លួនឲ្យមានសុវត្ថិភាពថា ៖ « តាំងពីក្មេងតូចមក អ្នកបានស្គាល់បទគម្ពីរទាំងប៉ុន្មាន ដែលអាចនឹងនាំឲ្យអ្នកមានប្រាជ្ញាដល់ទីសង្គ្រោះ ដែលបានដោយសារសេចក្ដីជំនឿជឿដល់ព្រះយេស៊ូវគ្រីស្ទផង » ។³⁵

ខ្ញុំសូមបន្ថែមការណែនាំផ្ទាល់របស់ខ្ញុំចំពោះការណែនាំរបស់គាត់ ។ បន្តសិក្សាព្រះគម្ពីរ ។ បន្តធ្វើរឿងដែលស្ថាបនាសេចក្ដីជំនឿអ្នកលើព្រះយេស៊ូវគ្រីស្ទ ។ រួចហើយកត់សម្គាល់ពីការជ្រើសរើសដ៏ឈ្លាសវៃដែលអ្នកបានលើកទឹកចិត្តឲ្យធ្វើតាមធម្មជាតិ ។

សេចក្ដីជំនឿអ្នកលើព្រះយេស៊ូវគ្រីស្ទ និងដំណឹងល្អទ្រង់នឹងផ្ដល់ភាពក្លាហានដល់អ្នក ដើម្បីរៀបការ ហើយនាំកូនចៅមកក្នុងគ្រួសារអ្នក ខណៈដែលអ្នកនៅក្មេង ហើយមានលទ្ធភាពមានពួកគេ ។ នៅពេលអ្នកមានវ័យដូចខ្ញុំ អ្នកនឹងឲ្យតម្លៃដល់កូនចៅអ្នក និងកូនរបស់ពួកគេ លើសពីកេរ្តិ៍ឈ្មោះ ឬទ្រព្យដែលនឹងអាចកើតឡើងទាំងអស់ ។

ឥឡូវនេះ ចំពោះសំណួរមួយដែលខ្ញុំបានអធិស្ឋានថាអ្នកនឹងពិចារណាវាថ្ងៃគឺ ៖ តើអ្នកនឹងរៀបចំខ្លួនសម្រាប់ការសម្ភាសន៍ផ្ទាល់របស់អ្នក នឹងព្រះអង្គសង្គ្រោះដោយរបៀបណា ?

អ្នកក្នុងនាមជាយុវវ័យដែលមានសិទ្ធិពីកំណើតថ្លៃថ្នូរមិនល្អឥតខ្ចោះនៅឡើយទេ ។ គឺយើងគ្រប់គ្នា ។ ដូច្នេះ អ្នករួមនឹងពួកយើងផ្សេងទៀត មានអំណរគុណជាខ្លាំងចំពោះដង្វាយធួននៃព្រះអង្គសង្គ្រោះ ដែលផ្ដល់ការអភ័យទោសពេញលេញ នៅពេលប្រែចិត្តដោយពិតប្រាកដ ។ អ្នកក៏ដឹងដែរថា ជីវិតរមែងស្លាប់នេះខ្លីណាស់ ។ (ហើយកាលណាអ្នកកាន់ចាស់ អ្នកនឹងឃើញពីរឿងនេះ) ។ នៅពេលកំណត់មួយ អ្នករាល់គ្នានឹងបញ្ចប់ក្នុងជីវិតរមែងស្លាប់នេះ ហើយផ្លាស់ទៅភពមួយទៀត ។

ថ្ងៃជំនុំជំរះរង់ចាំយើងម្នាក់ៗ ។ ខ្ញុំមិនដឹងថា ទ្វារស្ថានសួគ៌មានពន្លឺត្រចះត្រចង់ដែរឬអត់នោះទេ តែខ្ញុំដឹង ដូចជាអ្នកសិក្សាព្រះគម្ពីរមរមនទាំងអស់គ្នាដែរ ថា « អ្នកឆ្មាំទ្វារគឺជាព្រះដ៏បរិសុទ្ធនៃសាសន៍អ៊ីស្រាអែល ហើយទ្រង់មិនជួលបាវបម្រើនៅឡើយ… ព្រោះព្រះអម្ចាស់ដ៏ជាព្រះ គឺជាព្រះនាមទ្រង់ » ។³⁶

ជីវិតរាល់ថ្ងៃលើផែនដីផ្ដល់ពេល និងឱកាសដល់អ្នកឲ្យរៀបចំខ្លួនសម្រាប់ការសម្ភាសន៍នោះ ។ សូមដឹងពីការណ៍នេះថា ៖ ពេលអ្នកជ្រើសរស់នៅខាងព្រះអម្ចាស់ នោះអ្នកនឹងមិនឯកោឡើយ ។ ព្រះបានប្រទានសិទ្ធិដល់អ្នកដើម្បីទទួលបានជំនួយទ្រង់ ខណៈអ្នកធ្វើដំណើរលើផ្លូវដ៏គ្រោះថ្នាក់ក្នុងជីវិតរមែងស្លាប់នេះ ។ ពេលអ្នកបង្វែរចិត្តអ្នកទៅរកទ្រង់ដោយព្យាយាមយ៉ាងស្មោះក្នុងការអធិស្ឋានប្រចាំថ្ងៃ ទ្រង់នឹងបញ្ជូនពួកទេវតាទ្រង់មកជួយអ្នក ។ ³⁷ ហើយទ្រង់ប្រទានព្រះវិញ្ញាណបរិសុទ្ធឲ្យគង់ក្បែរខ្លួនអ្នក ពេលអ្នករស់នៅសក្ដិសម ។ ទ្រង់ប្រទានព្រះគម្ពីរដល់អ្នក ដើម្បីអ្នកត្រូវបានអាចចិញ្ចឹមបីបាច់យ៉ាងពេញលេញដោយព្រះបន្ទូលនៃព្រះយេស៊ូវគ្រីស្ទ ។³⁸ ទ្រង់ប្រទានសម្ដីនៃព្យាការីនៅរស់ឲ្យអ្នកស្ដាប់ ។

ទ្រង់ប្រទានឱកាសឲ្យអ្នកដើម្បីទទួលពរលោកអយ្យកោ ។ វានឹងផ្ដល់ជាចំណេះពីទំនាក់ទំនងអ្នកនឹងអ័ប្រាហាំ អ៊ីសាក និង យ៉ាកុប និងសេចក្ដីសញ្ញាដែលធ្វើនឹងពួកគាត់សម្រាប់កូនចៅពួកគាត់ ។ ពរអយ្យកោអ្នកក៏ផ្ដល់ជាចំណេះពីជីវិតអ្នកនាអនាគតនៅទីនេះ និងក្រោយពីនេះដែរ ។ ជំនួយទាំងនេះនីមួយៗ និងជំនួយផ្សេងទៀតមកពីព្រះនឹងជួយអ្នកជ្រើសយ៉ាងល្អ ដើម្បីអ្នកទន្ទឹងរង់ចាំការជួបនឹងព្រះអម្ចាស់ និងព្រះអង្គសង្គ្រោះរបស់យើងដោយផ្ទាល់។

សំណួរចុងក្រោយរបស់ខ្ញុំ ៖ តើអ្នកនឹងដាក់ការទុកចិត្តអ្នកលើនរណា ?

អ្នកក្នុងនាមជាយុវវ័យដែលមានសិទ្ធិពីកំណើតថ្លៃថ្នូរដឹងថា ព្រះជាព្រះវរបិតាអ្នក ។ ទ្រង់ស្រឡាញ់អ្នក ។ ទ្រង់ចង់ឲ្យអ្នករីករាយ ។ សូមដាក់ការទុកចិត្តអ្នកលើទ្រង់ ។³⁹ រក្សាការផ្ដោតអារម្មណ៍អ្នកលើព្រះវិហារបរិសុទ្ធទ្រង់ ។ ចូរសក្ដិសមដើម្បីទទួលបានពិធីបរិសុទ្ធនៃអំណោយទានពិសិដ្ឋ និងការផ្សារភ្ជាប់របស់អ្នក ។ ចូរបន្តស្មោះត្រង់ចំពោះសេចក្ដីសញ្ញានោះ ហើយត្រលប់ទៅព្រះវិហារបរិសុទ្ធជាញឹកញាប់ ។ ចងចាំថា គោលដៅដ៏ខ្ពស់បំផុតរបស់អ្នកគឺដើម្បីទទួលពរជ័យដ៏ធំជាងគេរបស់ព្រះ ជាជីវិតអស់កល្ប ។⁴⁰ ពិធីបរិសុទ្ធនៃព្រះវិហារបរិសុទ្ធគឺចាំបាច់ចំពោះពរជ័យនោះ ។⁴¹

ខ្ញុំអញ្ជើញអ្នកឲ្យសិក្សាបទគម្ពីរស្ដីពីអត្តសញ្ញាណ គោលបំណង និងពររបស់អ្នកប្រកបដោយការអធិស្ឋាន ដូចបានកត់ត្រាក្នុងកណ្ឌ 86 នៃគោលលទ្ធិ និងសេចក្ដីសញ្ញា ។ គ្រប់យ៉ាងគឺសម្រាប់អ្នក ។ សូមស្ដាប់ !

« ហេតុដូច្នេះហើយ ព្រះអម្ចាស់ទ្រង់មានបន្ទូលដល់អ្នកដែលបព្វជិតភាពបានបន្តមក តាមរយៈពូជពង្សនៃពួកអយ្យកោរបស់អ្នក ដូច្នេះថា---

« ត្បិតអ្នករាល់គ្នាជាអ្នកគ្រងមរតកពេញច្បាប់ ស្របតាមសាច់ឈាម ហើយបានលាក់ទុកពីពិភពលោកដោយសារព្រះគ្រីស្ទនៅក្នុងព្រះ—

« ហេតុដូច្នេះហើយ ជីវិត និងបព្វជិតភាពរបស់អ្នក ត្រូវបានទុក ហើយត្រូវតែមានតាមរយៈអ្នក និងតាមពូជពង្សអ្នករហូតដល់ការសាងឡើងវិញនូវគ្រប់ទាំងអស់ដែលបានពោលដល់ដោយមាត់នៃអស់ទាំងពួកព្យាការីបរិសុទ្ធ ចាប់តាំងពីកំណើតលោកិយមកម្ល៉េះ ។

« ហេតុដូច្នេះហើយ អ្នករាល់គ្នាមានពរហើយ បើសិនជា អ្នករាល់គ្នាបន្តនៅក្នុងសេចក្ដីល្អរបស់យើង គឺជាពន្លឺដល់ពួកសាសន៍ដទៃ និងតាមរយៈបព្វជិតភាពនេះ គឺជាអ្នកសង្គ្រោះដល់រាស្ត្ររបស់យើង គឺសាសន៍អ៊ីស្រាអែល » ។⁴²

មែនហើយ អ្នកពិតជាយុវវ័យដែលមានសិទ្ធិពីកំណើតថ្លៃថ្នូរ ដែលបានបង្កើតតាមរូបនៃព្រះ ។ អ្នកជាកូនចៅស្របច្បាប់របស់ទ្រង់ នៅទីនេះដើម្បីព្យាយាម ហើយសាកល្បង ។ អ្នកអាចជ្រើសធ្វើជាពន្លឺនៃលោកិយ ដើម្បីជួយសង្គ្រោះកូនចៅព្រះ ដើម្បីបានអំណរ ហើយនៅទីបំផុតទទួលបានពរនៃជីវិតអស់កល្ប ។

ឥឡូវ ដើម្បីជួយអ្នកធ្វើការជ្រើសរើសដ៏សំខាន់ទាំងនេះនៅចំពោះមុខអ្នក ខ្ញុំសូមផ្ដល់ពរជ័យមួយដល់អ្នក ។ ដោយប្រើកូនសោរនៃសាវកដ៏បរិសុទ្ធដែលខ្ញុំមាន ខ្ញុំប្រទានពរអ្នកថា អ្នកខិតខំសិក្សាបន្ទូលនៃព្រះគ្រីស្ទ ហើយអនុវត្តការបង្រៀនទ្រង់ក្នុងជីវិតអ្នក ។ ខ្ញុំប្រទានពរអ្នកជាមួយនឹងអំណាចដើម្បីរស់នៅដូចដែលទ្រង់ចង់ឲ្យអ្នករស់នៅ ហើយមានភាពសក្ដិសមក្នុងនាមជាសមាជិកសាសនាចក្រដែលមានព្រះនាមទ្រង់ តាមរយៈគំរូសុចរិតរបស់អ្នក ។ ខ្ញុំប្រទានពរដល់អ្នកឲ្យទទួលជោគជ័យក្នុងការសិក្សា និងការងាររបស់អ្នក ដើម្បីអ្នកផ្ដល់ការបម្រើដ៏មានតម្លៃដល់អ្នកដទៃទៀត ។ ខ្ញុំប្រទានពរឲ្យអ្នកមានសុខភាពល្អ និងកម្លាំងមាំមួន ដើម្បីបំពេញជោគវាសនាដ៏ទេវភាព ដែលព្រះបានរៀបចំសម្រាប់អ្នករាល់គ្នា ដើម្បីព្រះទ័យបានសម្រេចតាមរយៈអ្នក ។

ខ្ញុំប្រទានទាំងនេះដល់អ្នក ហើយសូមថ្លែងទីបន្ទាល់ថា ព្រះមានព្រះជន្មរស់ ! ព្រះយេស៊ូវគឺព្រះគ្រីស្ទ។ នេះជាសាសនាចក្រទ្រង់ដែលទ្រង់ដឹកនាំតាមរយៈព្យាការី និងសាវក ។ យើងស្រឡាញ់ ហើយគាំទ្រ ថូម៉ាស អេស. ម៉នសុន ជាប្រធានសាសនាចក្ររបស់ព្រះអម្ចាស់សព្វថ្ងៃ ។ ទីបន្ទាល់ និងពរជ័យនេះ ខ្ញុំសូមបន្សល់ទុកនឹងអ្នក ឱ បងប្អូនប្រុសស្រីជាទីស្រឡាញ់របស់ខ្ញុំអើយ ជាមួយនឹងសេចក្ដីស្រឡាញ់របស់ខ្ញុំចំពោះអ្នករាល់គ្នា ក្នុងព្រះនាមពិសិដ្ឋនៃព្រះយេស៊ូវគ្រីស្ទ អាម៉ែន ។

© 2013 ដោយ Intellectual Reserve, Inc. រក្សាសិទ្ធិគ្រប់យ៉ាង ។ អនុម័តភាសាអង់គ្លេស ៖ 1/13 ។ អនុម័តការបកប្រែ ៖ 1/13 ។ ការបកប្រែនៃ Youth of the Noble Birthright: What Will You Choose? Cambodian ។ PD50048932 258