Jodikdik ro an Rijolet eo Eutiej: Ta eo Kwonaaj Kālōte?

Kōrā eo pāleeō, Wendy, im n̄a rej m̧ōņōņō in pād ippām̧i. Jān Cannon Activities Center eo ilo kāāmbōj eo an BYU-Hawaii, kōm̧ij kadiwōjļo̧k imejatoto n̄an jarlepju ko an rūm̧m̧an ded ro aolepān laļ in. Kōm̧ij leļo̧k juon karuwainene n̄an ro kein kajuon aer pād ilo Nokon in jota in an CES. Ilo ami pād ilo jikin ekkatak ko routiej, kom̧ naaj kōņaan in bōk koņaami ilo kūlaaj in institute ko im nokon in jota kein n̄an dāpij juon jokkun wōt juon ilo jetōb n̄an katak ko am rāinjuon. Im eļan̄n̄e epaake ami etal n̄an juon mijen, eļap am̧ lukkuun m̧ōņōņō. Kom̧ naaj pād ilo jerbal eo an Irooj aolep raan.

Ij bōktok iakiakwe im iakwe jān Būreejtōn Thomas  S. Monson, Būreejtōn Henry   B. Eyring, Būreejtōn Dieter  F. Uchtdorf, im Em̧m̧aan ro aō rejitōnbōro ro rej kobatok jen Doulul eo an Jon̄oulruo Rijilōk ro. Ij barāinwōt bōktok iakiakwe jān Board of Trustees eo an Church Education System eo im Elder Paul  V. Johnson, Commissioner eo an Jikin Jeļāļo̧kjeņ.

Ekar wōr jilu rikōnono ro ad m̧oktaļo̧k ilo nokon in jota ko an CES iiō in. Kom̧ij ke kememej er? Taitōļ in kōnono eo an Būreejtōn Dieter F. Uchtdorf eaar “Ta Eo Em̧ool?” Eaar katakin kōj ekōjkan n̄an pukōt m̧ool eo ilo juon tōre n̄e ebo̧o̧ļ meļeļe repād, eļap wōt iaer rej jab m̧ool. Taitōļ in kōnono eo an Elder David  A. Bednar ekar “Bwe Jen Jab Maron̄ Makunļo̧k ’ (D&C 19:18).” Eaar kōkajoorļo̧k jetōb ko ad ilo an katakin kōj wāween n̄an kōļapļo̧k tōmak eo ad jen juon kajjitōk eo ekajoor eaar jipan̄ ruo ripālele ke ļeo pālele eaar tariņaeik kānjer. Kajjitōk eo kar leļo̧k jen Elder Bednar ekar, “Ewōr ke am tōmak n̄an jab mour?” Elder William  R. Walker eaar kōkajoorļo̧k naan in kam̧ool ko ad kōn jerbal im waanjon̄ok eo emake wōt an ad jitōt bōro Būreejtōn, Thomas  S. Monson.

Rainin, taitōļ in ennaan in aō ej “Jodikdik ro an Rijolet eo Eutiej¹: Ta eo Kwonaaj Kālōte?”

Kom̧, āinwōt jodikdik ro an rijolet eo eutiej, rej lukkuun ļaddik im leddik ro nejin Anij, ļotak ilo juon iien ilo bwebwenato in laļ in n̄an juon jibadbad ekwojarjar. Men̄e aorōk ko kōn m̧wil im kabun̄ an jukjukinpād rej mōjņo̧ ilo aolepān laļ in, jodikdik in Kabun̄ in rej rikwaļo̧k jon̄ok ko an Irooj im kakkōļ ko an meram eo n̄an kareel ro jet n̄an E. Kadkadimi im jibadbad eo ami rej jenolo̧k.

Ta kadkad eo ami? Kom̧ rej ajri in bujen eo. Ta in bujen? Eo Anij eaar kōm̧m̧ane ippān jemād Ebream ke Ebream kar kalim̧m̧uri bwe “im ilo ineom̧ naaj kōjeram̧m̧an nukun otemjej i laļ.² Kom̧ rej barāinwōt ajri ro an raan eo kalim̧m̧ur kake,³ tōre in ilo bwebwenato in laļ in n̄e ko̧jpeļ eo enaaj kajedeedļo̧k peļaakin aolepān laļ in.

Ta kōttōpar eo ami? Kom̧ em̧m̧aan ro kar ekkapit ilo juon mour m̧okta n̄an kabwijer priesthood eo. ⁴Ļōmņak kōn menin! Im kom̧ sister ro jitōn bōro, kar kālet kom̧ m̧okta jen pedped ko an laļ in n̄an keotak im kea kōn ajri ro nejin Anij, im ilo kōm̧m̧ane menin, kom̧ij kaiboojoj Anij.⁵ Kom̧ sister ro emōj ke ami kar ļōmņak ta lukkuun meļeļein n̄an erom rikōm̧anm̧an ippān Anij?

Kom̧ kajjojo likao ro im jiron̄ ro kar jitōn̄ jen Jemedwōj Ilan̄ n̄an kalōk aelōn̄ in kiin̄ eo an Anij ioon laļ in kiiō im kōpooj juon armej n̄an bōk Rilo̧mo̧o̧r eo n̄e Enaaj irooj im pepe āinwōt Messaia in Millennial eo. Ami rijolet eutiej, kadkad, jibadbad, im ijjitōn̄ ekwojarjar ej kōjno̧lo̧k kom̧ jān aolep ro jet.

Bōtaab jekdoon ami jolet barāinwōt ekkapit ko ami ilo mour eo m̧okta im ijjitōn̄ ko jab maron̄ lo̧mo̧o̧remi ak kautiejlōn̄ļo̧k kom̧. Menin kom̧ naaj kōm̧m̧ane jen kālet ko ami kajjojo im ilo ami kālet n̄an bōk kajoor in Pinmuur eo an Irooj ilo mour ko ami. Kom̧ jeļā bwe “aolep jetōb rej anemkwoj n̄an kālet mour eo an im ta eo enaaj erom.”⁶ Pedped in katak in eļap indeeo kōn anemkwoj ej aorōk n̄an karōk eo an Jemed. Innām, kom̧ jodikdik ro an rijolet eo eutiej, ta naaj kālet eo ami?

Kom̧ naaj ke kālet n̄an kōļapļo̧k ekkatak?

Jeļāļo̧kjeņ ej ami n̄an bōke. Ejjeļo̧k bar juon emaron̄ bōke n̄an kom̧. Jekdoon ia kwopād ie, ejaake juon ikdelel em̧wilaļ n̄an ekkatak. N̄an kōj Armej ro Rekwojarjar ilo Raan-ko Āliktata, bōk juon jeļāļo̧kjeņ ej jab juon jeram̧m̧an, ej juon eddo in kabun̄. Aiboojoj an Anij ej māletlet.⁷ Ilo m̧ool, jeļāļo̧kjeņ eo ad ej n̄an indeeo.

“Jabdewōt pedped in jeļāļo̧kjeņ jej bōke ilo mour in, enaaj pād ippād ilo jerkakpeje eo.

“Im eļan̄n̄e juon armej ej bōk eļapļo̧k māletlet im jeļāļo̧kjeņ ilo mour in …  , ļeo [ak lio] enaaj barāinwōt ļap eddōkļo̧k ippān ilo laļ eo ej itok.”⁸

Baj juon iien etale eaitok enaaj jipan̄ kom̧ n̄an kōm̧m̧an kālet ko rem̧m̧an kōn ekkatak. Ij keememej juon iien bwebwenato elōn̄ iiō ko ļo̧k ippān juon rijikuuļ in high school emāletet 16 an iiō. Eaar jab lukkuun jeļā kōn kalim̧m̧ur eo an kōn kabun̄ im jan̄in kar pepe kōn jerbal eo an. Eaar kōļmenļo̧kjeņ kōn an maron̄ erom juon taktō in uno. Eaar kajjitōk ippa juon kajjitōk epidodo: “Ewōr jete iiō eaar bōk am̧ erom juon rim̧wijm̧wij menono?”

Iaar bōnbōn ilo kōļmenļo̧kjeņ eo aō: “Jān iien eo iaar kadiwōjļo̧k jān high school m̧ae iien iaar ebbōk wōņāān jerbal āinwōt juon rim̧wijm̧wij, eaar bōk 14 iiō ko n̄an n̄a.”

“Wow!” eaar uwaak. “Eļap an aetok n̄an n̄a!”

Innām iaar kajjitōk, “Ewi naaj rūttoom̧ 14 iiō jān kiiō eļan̄n̄e koban erom juon rim̧wijm̧wij menono?”

“Ejjeļo̧k oktak,” eaar uwaak. “Ejjeļo̧k oktak!”

Ewōr aō ikdelel ilo likao in. Juon iien iaar kauweiki ilo wa eo waaō ilo iaļ eo an jibbon̄ eo n̄an leto letak nuujpeba ko. Ium̧win iiō ko tōmak eo an eaar erom kajoor. Eaar juon mijenede ekajoor. Eaar pepe n̄an wōnm̧aanļo̧k ilo kōttōpar in jeļāļo̧kjeņ eo an. M̧oktata, eaar m̧areik riākwe eo an ilo tampeļ eo. Innām, iien eo eaar ekkatak uno im m̧wijm̧wij, erro kar erom ro jinen im jemān ajri ro rem̧m̧an. Kiiō ej lukkuun juon eo elōn̄ an peba āinwōt juon rim̧wijm̧wij menono—ālkin kijejeto ilo jeļāļo̧kjeņ im kamminene ium̧win juon iien 14 iiō ko.

Ro jeiū im jatū, jab mijak n̄an jibadek kōttōpar ko ami—aaet ettōņak ko ami! Ejjeļo̧k iaļ ekadu n̄an wājepdik im kāpeel. Jeļāļo̧kjeņ ej pād ikōtaan kōņaankomaron̄ kar jipan̄ ro jet im maron̄ in jipan̄ ro jet.

En̄in ej bar juon kajjitōk: Ta jekjek in mour eo kwonaaj kālete?

Kom̧, āinwōt jodikdik ro an rijolet eo eutiej, rej aikuj mour oktakļo̧k jen ro jet. Kom̧ jeļā ta eo Paul eaar ba Timote eo edik: “Kwōn juon jon̄ak n̄an ro rej tōmak, ilo naan, ilo kōm̧anm̧an, ilo yokwe, ilo tōmak, im ilo kwōjarjar.”⁹ Kālet n̄an ļōmņak im m̧akūtkūt oktakļo̧k jān ro jen laļ in. Kālet n̄an ukōtļo̧k rokjem̧i im lale ta enaaj kareel kōn men eo em̧m̧an kom̧ naaj erom. Āinwōt an Sister Ardeth  G. Kapp kar ba, “Kwoj jab maron̄ erom rilo̧mo̧o̧r mour, eļan̄n̄e jekjekim ej āinwōt aolep riaōō ro ilo biij eo.”¹⁰

Āinwōt jodikdik ro an rijolet eo eutiej, ewōr ippāmi juon ijjino eo eļap ilo mour. Ak ebarāinwōt wōr juon ami eddo. “N̄an ļeo [ak lio] n̄an eo emōj leļo̧k n̄an e eļap, eļap ej aikuji jen e.”¹¹M̧ōttan eo aikuji ej n̄an erom juon rijjino. Konan̄in ke kar ļōmņak bwe kwoj juon rijjino ej ritariņae? Ke kwaar peptaij, kwaar ellaajrak ilo jarintariņae eo an Irooj.¹² Mour eo m̧okta, kwaar jutak iturin Jisōs Kraist ilo tariņae eo ilan̄. Im kiiō poktak eo ikōtaan kajoor ko kōn em̧m̧an im nana rej wōnm̧aanļo̧k wōt ijin ioon laļ in. Menin em̧ool! Poktak eo kiiō jej pād ie ejja wōt kōn kajoor ko kōn em̧m̧an im kajoor ko kōn nana.¹³ Turājet eo an Anij ej Jisōs Kraist, kar ekkapit m̧okta n̄an erom Rilo̧mo̧o̧r eo an Laļ in.¹⁴ Turājet eo juon ej Satan—juon rijorrāān, juon rikakure anemkwoj.¹⁵

Karōk eo an Anij ej kōtļo̧k an rikapo eo mālijjon̄e kom̧ bwe kom̧, kiiō ilo mour in, maron̄ kōjerbal anemkwoj eo ami n̄an kālet men eo em̧m̧an ioon eo enana, n̄an ukweļo̧k, n̄an kālet n̄an itok n̄an Jisōs Kraist im tōmak ilo katak ko An im ļoor waanjon̄ok eo An. Ej juon eddo im juon lōke eļap!

Ami anemkwoj n̄an kālet ej alikkar kōmeļeļeiki ilo Bok in Mormon. Kout: “Armej rej anemkwoj ekkar n̄an kanniōk. …  Im rej anemkwoj n̄an kālōt anemkwoj im mour indeeo, kōn Ri Jojomar eo an armej otemjeļo̧k, ak n̄an kālōt kōm̧akoko im mej, ekkar n̄an kōm̧akoko im kajoor eo an devil; bwe e ej pukot bwe aolep armej ren en̄taan āinwōt e.”¹⁶  Ta eo kwonaaj kālōte?

Eoon eo juon ej kwaļo̧k bwe “jerawiwi ejjan̄in kar mōnōnō.”¹⁷ Elōn̄ jodikdik ro raar kajjieon̄ n̄an idajon̄jon̄e m̧ool eo im kar wōtlo̧k aolep iien.

Anemkwoj in kālōt am n̄an m̧akūtkūt n̄an kwe make ej lukkuun dilep in eddōkļo̧k eo am indeeo im m̧ōņōņō bwe rikapo eo ej kōjerbal kijejeto eo ekijon̄ n̄an kōmōjņo̧iki.¹⁸ Satan em̧ool ej juon ejaje m̧ōk ejjab kiki, meļeļein ej jab kiki. Elōn̄ iami emōj aer en̄jake menin!

En̄in ej bar juon kajjitōk: Kom̧ naaj ke ejaaki kālōt ko im̧aan n̄an jipan̄ kom̧ kōm̧m̧ani kālōt ko ilo mour?

Kālōt ko ami rej jab aolep pād ikōtaan em̧m̧an im nana. Elōn̄ renaaj kālōt ikōtaan ruo jokālet ko rem̧m̧an. Ejjab aolep m̧ool ko kōm̧anm̧ani eirwōt juon, kōn menin kom̧ naaj aikuj in ejaaki kālōt ko im̧aantata. Ilo ami jibadek jeļāļo̧kjeņ, jeļā bwe m̧ool eo eaorōktata kom̧ maron̄ pidodo ami ekkatak ej itok jān Irooj. Ilo Jar eo An Kraist n̄an Jemen, Rilo̧mo̧o̧r eo Make eaar kapen menin. Eaar ba, “Im men in mour indeeo, bwe ren jeļā Kwe juon wōt Anij e m̧ool, im Jisōs Kraist, eo Kwaar jilkintok.”¹⁹ Ilōn̄ in men otemjej kwoj pukōt n̄an katak, pukōt n̄an jeļā Anij, Jemedwōj Ilan̄, im Nejin, Jisōs Kraist. Itok n̄an jeļā Er im iakwe Er āinwōt Ij.

Bar juon eoon eaorōk eo eaar jipan̄ eō aolepān mour eo aō ej eoon in: “Kom̧win pukōt m̧okta n̄an kalōk aelōn̄ in Anij, im n̄an ejaake kwojarjar eo An, im men kein renaaj maron̄ iwōj ioom̧i.”²⁰

Elōn̄ļo̧k jen jabdewōt men ilo laļ in, kwoj aikuj in kōm̧m̧an kālōt ko rej tōlļo̧k n̄an mejānkajjik eo eļaptata im aiboojojtata an mour indeeo. En̄in ej aiboojoj eo eļaptata n̄an kom̧.²¹ Kālōt mour indeeo āinwōt kālōt eo ilōn̄tata! Katak jeje ko rekwojarjar, āinwōt jekjen 76 im  88 ilo Doctrine and Covenants, n̄an maron̄ meļeļe eļapļo̧k kōn kōjeram̧m̧an ko roktak jen doon rej kōttar n̄an ro rej kālōt mour indeeo im ro rej jab. Kālōt mour indeeo āinwōt kālōt eo am̧ ilōn̄tata im kile wāween an kālōt ko jet itok ilo jikier.

Bar juon kajjitōk: Ippān wōn kom̧ naaj kālōt n̄an iiaio ippān?

Āinwōt jodikdik ro an rijolet eo eutiej, kom̧ naaj iiaio ippān elōn̄ armej ro rem̧m̧an ro rej barāinwōt tōmak ilo Anij. Men̄e rej Riju, Catholic, Protestant, ak Islam, ritōmak ro rejeļā bwe ewōr lukkuun m̧ool. Ilo ennaan eo m̧oktaļo̧k an Būreejtōn Uchtdorf, eaar kwaļo̧k bwe ewōr lukkuun jim̧we im bōd, im kakkure ilo jeļā juon iaan kien ko an Anij ej lukkuun jerawiwi. Ritōmak ro ilo Anij rej barāinwōt wōr aer juon en̄jake kōn jim̧we im nana. Ritōmak ro rej pokake kakien an armej im kakien an lan̄ ilo m̧ōņōņō, barāinwōt kakien ko edik ļoori.

Ippān kalim̧m̧ur eo am̧ n̄an pokake kakien an armej im kakien an lan̄, kwoj bōjrak ilo juon tōma bōrōrō, men̄e ejjeļo̧k tūrāpik ko repād im̧aan mejam̧. Kwe, āinwōt juon ajri nejin Anij, jeļā bwe men̄e police ejjab jibwe eok, bwe eļan̄n̄e kwaar ko̧o̧t, m̧anm̧an, ak lōn̄, ewōr m̧akūtkūt ko rebōd, im Anij enaaj ļap an dāpij am̧ eddo kaki. Kom̧ jeļā bwe bōd ko kōn jab ikkure jen kien ko rej jab wōt an kanniōk wōt ak an indeeo.

Ilo ami em̧m̧akūt m̧aanļo̧k ilo ilen mour, kom̧ naaj barāinwōt m̧ōttā ippān ro rej jab tōmak ilo Anij. Elōn̄ iaer raar jab loe m̧ool eo ekwojarjar im jab jeļā ia n̄an pukōte. Ak kom̧ jodikdik ro an rijolet eo eutiej rej itok n̄an aer lo̧mo̧o̧ren. Ilo bōnbōn ko reļļap, kōm̧ij itok ippān n̄an kūr rikanaan eo an Anij n̄an elōn̄ļo̧k mijenede ro. Kōm̧ij lukkuun m̧ōņōņō kōn kajjojo! Elōn̄ iaami emōj aer jerbal; ro jet rej kōbpopo n̄an etal.

Ilo ami iiaio ippān ro rejjab tōmak, kom̧in ekkōļ bwe emaron̄ bōlen lōn̄ jejjo remaron̄ jab kea n̄an kōjeram̧m̧an kom̧.²² Iien eo wōt kom̧ij kōm̧m̧an ekajet eo— iien eo wōt kom̧ij kile menin—ko jān er m̧ōkaj im etal wōt.²³

Kiiō, kabūromōjmōj, kom̧ naaj ioon armej ro rej m̧ōņōņō in pukōt men eo ilo er ej āinwōt lem̧ōņōņō ej lelaļļo̧k er ilo juon iaļ ej tōlļo̧k n̄an men ko renana im nana eo epen kabōjrake kōn jerawiwi. Ekkōļ kōn iaļ eo ejerawiwi! Jabdewōt kamōņōņō ilo jerawiwi ej an jidik iien, im ej kajorrāān kejōkļo̧kjeņ ko rej kattoonon jen en̄jake bōd in inepata im mōjņo̧. Kōm̧man bōd in jerawiwi kōn kautiej kōm̧anm̧an ekwojarjar n̄an likwōj ļeo im lio pālele ej ak juon men ejjab m̧ool. Kajjojo en̄jake eo ejjekkar ej bōkļo̧k jene meļeļe em̧wilaļ im an ememļo̧kjeņ em̧m̧an.

Bar juon wōt kajjitōk: Kom̧ naaj ke kālet anemkwoj ak kamakoko?

Ritōmak im rijjab tōmak rej kiel jikin otemjej. Kom̧ij lukkuun jokwe ilo jikin eobrak kōn rikōjdat.²⁴ Juon men ebaijin eobrak kōn pija ettoon. Ej baur aolep ro rej dāpdep n̄an nana ko ej kabwijere.

Menin kar kanaan jen Irooj, eo eaar ba, im kiiō ij kwaļo̧k n̄an kom̧ juon men ettiņo̧, juon men eo ej pād ilo jikin ko rettiņo̧, n̄an bōktok aaet kakkure eo ami ilo iien m̧admōd, im kom̧ ar jab jeļā kake.²⁵  Innām Eaar kobaitok kein karuo kakkōļ, im bar juon alen, Ij ba n̄an kom̧ bwe rikōjdat ej pād ilo jikin ko rettiņo̧ ej pukōt mour ko ami.²⁶

Ļōmņak ewōr jete armej, elōn̄ jete ilo jikin ko rettiņo̧, rej pukōt n̄an kakkure mour ko im m̧ōņōņō eo ami kiiō! Eļan̄n̄e kom̧ ro jeiū im jatū rej alooje pija ko rettoon, bōjrak kiiō. Bōjrak. Ej kakkure āinwōt lōba, āinwōt meth, im āinwōt lōjo āinwōt uno baijin.

Kapo an m̧ōm in kanniōk ej jab kāāl. Rijilōk Piter eaar kakkōļ menin ejja aujiid in ke eaar je:

“Rej kareel ilo m̧ōm̧ ko an kanniōk. … ro me raar erreeo.  …

“Rej kallim̧ur n̄an er bwe renaaj anemkwoj ke er make rej … ri kam̧akoko an men ko re kōt: bwe jabdewōt men eo ej bōk anjo̧ ioon armej, men in ej kam̧akoik e.”²⁷

Katoļo̧k kamakoko in, ro m̧ōttan jitōn bōro. Eļan̄n̄e kwoj kiiō alooje pija ettoonon, bōjrak! Kiiō! Pukōt jipan̄ jān bisop eo am. Ejjeļo̧k emāletlet ej anjo̧ make jān rikap, n̄e emōj aer baijin jen jen pija ettoonon.

Kiiō jen etal n̄an bar juon kajjitōk ejjab kōm̧m̧an kōjak: Kom̧ naaj ke kālōt n̄an ļoor Irooj ak katak ko an armej?

N̄an waanjon̄ok, iakwelel ko rej ilo̧k aolepān laļ in ej tarjen jon̄an kauwōtata im bwe ripālele ro rej aikuj kamo̧ oran ajri ro nejier. Emōj ke ami ron̄ kōn menin? Kōn menin, ilo Fifth World Congress of Families, ilo 2009, Sister Nelson im n̄a kar ron̄ kōn juon rimāletlet  eo eaar leļo̧k juon peba eo eaar kōm̧m̧ane juon ennaan ekabwilōn̄lōn̄. Eaar ba eļan̄n̄e kajjojo em̧m̧aan, kōrā, im ajri ro kiiō rej jokwe ioon laļ in raar ajeje juon eka in āne, aolep 6.8 billien armej ro renaaj maron̄ deļo̧n̄ ilo laļ en Brazil, kōn 20  bōjāān in Brazil ej pād wōt im ejjeļo̧k kobban.²⁸ Ej ke āinwōt laļ in ej obrak?

Iaar etale bōnbōn in. Ejim̧we. Ij akweļap ippāmi n̄an tōmak ilo Irooj, eo eaar ba laļ in eobrak, im ebwe n̄an kōjparok.²⁹

Bar juon m̧ool ej bwe kom̧ij mour ilo juon iien jabwe jerbal eļap im jeram̧man jen wiakake aolepān laļ in rej inepata. Bar juon alen, juon uwaak an laļ ej n̄an lale oktak ko n̄an karōk an Anij. Ak jeļā bwe m̧are ko rekajoor im baam̧le ko rej lukkuun jipan̄ economy eo eddōkļo̧k. Im jej jab make iaad ilo en̄jake kein.

Rimāletlet eo Dr. Patrick F. Fagan³⁰ eaar je: “M̧weo eaorōk ioon ijo jāān eļļap an economy eo ej pedped ioon ej m̧weo imōn rim̧are ro jinen im jemān—eļaptata ajri em̧eie nejin baam̧le eo ej kabun̄jar aolep wiik. …

“… Aolep m̧are ej kōm̧m̧an juon em̧ kāāl, juon jeram̧m̧an an laļ iunit eo emake iaan ej kwaļo̧k orļo̧k, diwōjļo̧k, kōjparok, im kwaļo̧k jāān ko.”³¹

Dr. Fagan eaar kobaik menin “rim̧are eo jinen ilo m̧weo ej kōjerbal kareel eo eļapļo̧k ej kōjeram̧m̧an economy eo jen rim̧are eo jemān ilo jikin jerbal. …  Iien eo ļeo pālele ej jipan̄ n̄an economy eo ej rainin, lio pālele ej jipan̄ n̄an jim̧or economy eo rainin im ilju im jekļaj.”³²

Ripo̧o̧t in an Dr. Fagan ej kapen jen katak ko kwaļo̧k iiō ko ļo̧k jen Būreejtōnji eo Kein Kajuon im Doulul eo an Jon̄oulruo Rijilōk ro ilo “Baam̧le Eo: Juon Naan in Kean̄ n̄an Laļ in.” Ij kōjatdikdik bwe kom̧ kajjojo ewōr juon ami kape. Lukkuun katak jene. Tōre in baam̧le ej pād ium̧win jum̧ae peļaakin laļ in, m̧ool ko kōn naan in kean̄ an baam̧le renaaj kōkajoorļo̧k kom̧.

Kom̧ jodikdik ro rem̧m̧an an rijolet eo eutiej, kom̧ij aikuj meļeļe eļapļo̧k kōn bōd ko jukjukinpād eo kiiō ej ire kake kōn lukkuun meļeļe eo an m̧are. Debate eo kiiō ekitbuuj kajjitōk eo men̄e ruo armej ejja nememeer wōt juon emaron̄ ke m̧are. Eļan̄n̄e ewōr ami juon kajjitōk kōn wāween in kōn Kabun̄ in kōn menin ak jabdewōt unin kōnono ko jet raorōk, lukkuun jar kaki, innām eo̧ron̄ ennaan eo an rikanaan eo ilo kweilo̧k eo eļap an Oktoba in ej itok an Kabun̄ in. Kōnono ko reim̧we, ekoba im̧we eo an Jetōb Kwojarjar, naaj bōktok ļōmņak eo ami juon meļeļe im em̧ool ļo̧k.

Debate in kōn m̧are ej ak juon iaan elōn̄ poktak ko renaaj jum̧ae eok ilju im jekļaj. Jum̧ae ainikien eo eļļaaj an rikapo eo, kom̧, āinwōt jodikdik ro an rijolet eo eutiej, naaj kālōt n̄an jutak kōn Irooj im m̧ool eo An. Keememej naan ko an al in ej eo eaar jan̄ jen kuwaer eo em̧m̧an. Āliji er. Kakkilōklōk er. Al in ej lukkuun kōn kom̧ aolep:

Kom̧ jeļā bwe Rijilōk Paul eaar kanaan kōn jekjek in epen an raan kein ad. An meļeļe ej āinwōt nuuj ko ad 10:00 awa. Ron̄jake!

“Ilo raan ko āliktata iien ko renana renaaj waļo̧ktok.

“Bwe armej ro renaaj yokwe er make, im renaaj ri arōk m̧weiuk, im ri juwaļōn̄lōn̄, im ri kajjirere, im ro rej kipillia n̄an jemeir im jineir, im ro re jab kam̧m̧oolol, im ri nana.

“Kōn ro re jab yokwe ro nukier, im ro re lāj, im ro rej kōņnaan naan in riab, ro re jab kōm̧m̧aanwa, rawiaa, ro rej dike em̧m̧an,

“Ro riketak, ro rej kōm̧man jet men m̧okta jān aer ļōmņak kake, ro rikōmmejāje, im ro rej yokwe men in kabun̄būrueir eļap jān aer yokwe Anij.

“Ro rej āinwōt re m̧wilin kwōjarjar, ak rej kaarmejete kajoor eo an; jān rein kwōn ilo̧k.”³⁴

En̄in ej jem̧ļo̧kin kakkōļ eo An.

Visōn eo ejjejjet an Paul kōn kakkure an jetōb ilo raan ko ad kar itok ālkin jen jem̧ļo̧k in kalim̧m̧ur eo an, jiron̄ kōj wāween n̄an pād ilo kōjparok: “Im jān ke kwōj ajri, kwaar jeļā jeje ko re kwōjarjar, ko re maron̄ in kamālōtlōt eok n̄an lo̧mo̧o̧r kōn tōmak eo ej ilo Kraist Jisōs.”³⁵

N̄an kapilōk in an ikōņaan kobaik eo aō: Wōnm̧aanļo̧k ekkatak jeje ko rekwojarjar. Kōm̧mani wōt men ko rej kalōk tōmak eo ami ilo Jisōs Kraist. Im kile kālet ko rejejjet kom̧ij ikdelel n̄an kōm̧mani.

Ami tōmak ilo Jisōs Kraist im ko̧jpeļ eo An enaaj lewaj n̄an kom̧ kajoor n̄an m̧are im n̄an bōktok ajri ro ilowaan baam̧le eo am tōre eo kwoj em̧m̧an ded im maron̄ būki. N̄e kwoj pād ilo jon̄an iiō e aō, kwonaaj kōm̧m̧an wōnāān ajri eo nejūm̧, ajri eo jibum̧, im ajri ro nejier, ilōn̄ in jabdewōt bun̄bun̄ ak m̧weie ko remaron̄ itok.

Kiiō n̄an juon kajjitōk ij jar bwe kom̧ naaj ļōmņak kake aolep iien: Ekōjkan ami kōbpopo n̄an intōrpiu eo ami make ippān Rilo̧mo̧o̧r eo?

Kom̧ jodikdik ro an rijolet eo eutiej rej jab wāppen kiiō. Ejjeļo̧k iaad ej. Kōn menin, kom̧, barāinwōt ro jet m̧ōttad, rej lukkuun m̧ōņōņō kōn Pinmuur eo an Rilo̧mo̧o̧r eo ej letok likio in jeorļo̧k bōd ilo ami m̧ool in ukweļo̧k. Kom̧ barāinwōt jeļā bwe ami pād ijin ilo mour in ej lukkuun kadu. (Im ilo ami rūttoļo̧k, kwōj kile eļapļo̧k kam̧ool.) Ilo iien, kajjojo iami enaaj kadiwōjļo̧k jān mour in im em̧m̧akūtļo̧k n̄an laļ eo juon.

Raan in ekajet ej kōttar kōj kajjojo. Ij jab jeļā men̄e kōjem in lan̄ ej kōm̧m̧an jen bōōr ak jaab, ak ijeļā, āinwōt aolep rijikuuļ ro an Bok in Mormon, bwe “Ri lale Kōjām eo ej Ri Kwojarjar Eo in Israel; im E jab kōjerbal jadewōt ri karejaran ijo; …  bwe Irooj Anij ej etan.”³⁶ Aaet, kōj kajjojo naaj bōk juon intōrpiu ad make ippān Jisōs Kraist.

Kajjojo raan ioon laļ in ej lewaj iien im iien em̧m̧an n̄an kōbpopo n̄an intōrpiu in. Jouj jeļā menin: Ilo ami kālōt n̄an mour ilo turājet eo an Irooj, kwoj jamin naaj make iaam̧. Anij eaar lewaj am maron̄ deļo̧n̄e jipan̄ eo An iien in kom̧ij em̧m̧akūt m̧aanļo̧k jen iaļen mour in ekauwōtata. Ilo ami tiljek, lukkuun leļo̧k būrom̧i n̄an E ilo jar aolep iien, Enaaj jilkinwaj eņjeļ ro An n̄an jipan̄ kom̧³⁷  Eaar lewaj Jetōb Kwojarjar eo bwen pād turājetim̧i n̄e kom̧ij mour wānōk. Eaar lewaj jeje ko rekwojarjar bwe kom̧in maron̄ lukkuun kwojkwoj ioon naan ko an Jisōs Kraist.³⁸ Eaar lewaj n̄an kom̧ naan ko n̄an eo̧ron̄ jān rikanaan ro remour.

Eaar lewaj n̄an kom̧ juon iien em̧m̧an n̄an bōk juon kōjeram̧m̧an an petriak. Enaaj lewaj maron̄ kōn ami ekkejel n̄an Ebream, Aisek, Jekab im bujen eo kar kōm̧m̧ane ippāer n̄an ro ineer. Kōjeram̧m̧an an petriak eo am̧i ej barāinwōt lewaj maron̄ kōn jibadbad in mour eo ami ilo mour in ijin im tokālik. Kajjojo iaan men kein im jipan̄ ko jet rekwojarjar naaj jipan̄ kom̧ kālōt em̧m̧an bwe kom̧in maron̄ reim̧aanļo̧k n̄an kweilo̧k eo ami jeļm̧ae doon ippān Irooj im Rilo̧mo̧o̧r eo.

Kajjitōk eo āliktata: Ilo wōn kom̧ naaj likūt ami lōke?

Kom̧ jodikdik ro an rijolet eo eutiej ro rejeļā bwe Anij ej Jememi. Ej iakwe kom̧. Ekōņaan bwe kom̧in m̧ōņōņō. Likūt ami lōke ilo E.³⁹ Jerbale ami pedped wōt ilo tampeļ eo An ekwojarjar. Kom̧in erreeo n̄an bōk menin letok kwojarjar eo ami im kain̄i ko an liāp. Tiljek wōt n̄an bujen ko, im emakijkij jepļaakļo̧k n̄an tampeļ eo. Keememej, kōttōpar eo ami eutiej tata ej n̄an bōk kōjeram̧m̧an ko reļļaptata an Anij, eo ej mour indeeo.⁴⁰ Kaini ko an tampeļ rej aorōk n̄an kōjeram̧m̧an in.⁴¹

Ij karuwaineneik kom̧ n̄an lukkuun katak naan eo ekwojarjar kōn kadkad eo ami, jibadbad eo, im kōjeram̧m̧an eo, āinwōt an jeje ilo jekjen  86 in Doctrine and Covenants. Ej kōn kom̧. Ron̄jake!

“Irooj eaar ba n̄an kom̧ [jodikdik ro an rijolet eo eutiej], eo ippān priesthood eo eaar wōnm̧aanļo̧k jen bwij eo an ro jememi—

“Bwe kom̧ ineer, [rijolet remālim] ekkar n̄an kanniōk, im kar ņojak jān laļ ippān Kraist ilo Anij—

“Kōn menin ami mour im priesthood eaar pād wōt, im ej aikuj pād wōt kōn kom̧ im bwij eo ami m̧ae jepļaaktok eo an aolep men kein kar kōnono jen lon̄iin aolep rikanaan ro rekwojarjar jen tōre eo laļ in ej ejaak.

“Kōn menin, jeram̧m̧an n̄an kom̧ eļan̄n̄e kom̧ naaj wōnm̧aanļo̧k ilo em̧m̧an in Aō, juon meram n̄an Riaelōn̄ ko, im jen priesthood in, juon rilo̧mo̧o̧r n̄an armej ro Aō Israel.”⁴²

Aaet, kom̧ij m̧ool in jodikdik ro an rijolet eo eutiej, kar kōm̧anm̧an ilo nememen Anij. Kom̧ij Ineen, pād n̄an kajjieon̄ im mālijjon̄. Kom̧ maron̄ kālōt n̄an erom juon meram n̄an laļ in, n̄an jipan̄ lo̧mo̧o̧ren ajri ro nejin Anij, n̄an bōk lan̄lōn̄, im eļaptata bōk kōjeram̧m̧an eo an mour indeeo.

Kiiō, n̄an jipan̄ kom̧ ilo kālōt kein reppen im̧aan mejāmi, ikōņaan lewaj ioom̧i juon kōjeram̧m̧an. Lewaj ioom̧i kii ko an Rijilōk ekwojarjar letok n̄an eō, ij kōjeram̧m̧an kom̧ bwe kom̧in maron̄ kwojkwoj ioon naan ko an Jisōs Kraist im mour kōn katak ko An ilo mour ko ami. Ij kōjeram̧m̧an kom̧ kōn kajoor eo n̄an mour āinwōt Enaaj kar kōņaan bwe kom̧in mour āinwōt im, jen waanjon̄ok in wāppen eo ami, kom̧ naaj erreeo kōn kajjieon̄ juon wōt āinwōt juon membōr in Kabun̄ in ej kwaļo̧k Etan ekwojarjar. Ij kōjeram̧m̧an kom̧ kōn kōttōpar ko ilo jeļāļo̧kjeņ im kijejeto in jerbal, n̄an jem̧ļo̧kin bwe kom̧in maron̄ bōk jipan̄ eo eaorōk n̄an armej ro m̧ōttami. Ij kōjeram̧m̧an kom̧ kōn ājmour im kajoor eo aikuji n̄an kakūrm̧ool mejānkajjik in ekwojarjar eo Anij eaar kōjparok e n̄an kom̧ kajjojo, bwe Ankilaan en maron̄ dedeļo̧k jen kom̧ im kōn kom̧.

Ij barāinwōt kōjeram̧m̧an kom̧ im kwaļo̧k aō naan in kam̧ool bwe Anij ej mour! Jisōs ej RiKraist. En̄in ej Kabun̄ eo An eo Ej tōl jen rikanaan ro im rijilōk ro An. Kōm̧ij iakwe im rejtake Thomas  S. Monson āinwōt Būreejtōn eo an Kabun̄ in an Irooj rainin. Naan in kam̧ool im kōjeram̧m̧an in ij likūt ippāmi ro jeiū im jatū jitōn bōro, ippān aō iakwe em̧ool n̄an kom̧ kajjojo, ilo etan Jisōs Kraist, amen.

©  2013 jen Intellectual Reserve, Inc. Aolep jim̧we rej pād ippān. Kōmālim ilo kajin English: 1/13. Kōmālim an ukook: 1/13. Ukook eo an Youth of the Noble Birthright: What Will You Choose? Marshallese. PD50048932 874