Filifili e Faamuamua le Atua

O le talitonu o se filifiliga. O le faatuatua e aofia ai lou manao ma lou naunau e faatino. Pe a e filifilia le faatuatua, e te vaai ma ola i se auala e ese mai—i le ala a le Atua.

Lagona lou fiafia ma le olioli e tuputupu ae ma faalolotoina a o e filifili e talitonu ma ola ma le faatuatua i le ala o feagaiga a le Atua.

Pe a e suesue ma tatalo ia faia au faaiuga sili ona lelei, o le a masani ona e maua le taitaiga, puipuiga, po o auala agai i luma sa e le mafaufau i ai pe sa faamoemoeina.

O le a tatala e le Alii avanoa matagofie mo oe. O faaaliga mai le Agaga Paia e lagonaina i lou mafaufau ma lou loto. E masani ona faamatalaina nei mea o ni lagona mafanafana ma toafimalie. Latou te uunaia oe e fai na o mea lelei ma sa‘o.

Faamolemole aua e te manatu o isi e i ai ni aafiaga faaleagaga ae e te le maua. Faamolemole ia onosai i le Atua ma oe lava ia. O aafiaga faaleagaga e oo mai i lea fuaitau i luga o lea fuaitau, mai lea aafiaga i lea aafiaga.

O vaiaso taitasi a o e osia ma faafou feagaiga e ala i le sauniga o le faamanatuga, faamolemole ia manatunatu ma manatua Iesu Keriso. Manatua ma le agaga faafetai au taumafaiga e auauna atu i le Atua ma i latou o siomia oe. A o e faatinoina le faatuatua ma le taumafaiga, ou te folafola atu o lou manao ma le filifiliga e talitonu o le a faamanuiaina ai oe ma i latou e te alofa i ai i lou olaga atoa.

O le filifili e talitonu, e te faia ai se laasaga taua agai i le faamuamua o le Atua i lou olaga.

Ata

tagata talavou ma se apefa‘i

Tatou te lagona le fiafia pe a tatou faia ni faaiuga lelei.

O nisi taimi, e te manaomia ai le lototele e tu atu ai ma au uo. O nisi taimi atonu e te manaomia le lototele e tu teisi ese ai—e le o le faamasinoina o i latou po o se lagona [ua] e sili atu ae ia filifili le mea sa‘o e ala i le faia o se mea e ese mai ai.

Faamolemole ia manatua: O uo moni e le fai mai ia i tatou e matamata i ni mea, fai ni mea, pe aai, inu, pe faaaoga ni mea o le a faatiga ai ia i tatou po o isi. O uo mamae e fesoasoani le tasi i le isi ia avea ma o latou tagata silisili.

Ia avea oe ma se uo moni ma o le a e maua pe atiina ae ni faauoga moni. Ia avea ma se uo moni ma faatuatuaina e fesoasoani ia i latou o siomia oe ia alolofa i le Alii ma ola i Lana talalelei toefuataiina. Atonu e toalaiti pe toatele au uo moni, ae o tausaga mai i le taimi lenei o le a outou fiafia ai o loo outou malolosi faatasi i le talalelei.

E mafai ona ou faasoa atu se mea na ou aoaoina e uiga i le filifilia o uo? Matamata po o le a le mea ua latou talie ai. O le mea tatou te talie ai e tele sona uiga ia i tatou.

Saili i latou o e taliē faatasi, o e e le fe‘atai i ai; o e e aofia ai isi ma tusi le li’o ia lapoa atu, ae le itiiti; o e agalelei ma e lē taufaamata‘u pe taufaalili i isi faafesagai po o luga o le initoneti, aemaise lava i latou e i ai luitau faaletino pe faalemafaufau po o i latou e fou pe mai isi atunuu po o talaaga.

Ia loto fiafia, ae le o le manatu-māmā. O le loto fiafia o lona uiga o le tauagafau, agamalie lelei—e matuai tele lava. I se faatusatusaga, o le manatu-māmā e mafai ona aofia ai le ulagia o mea paia, faaaogaina o gagana leaga, po o le faia o mea e fiafia i ai le lalolagi.

E pei ona aoao mai le Mataupu Faavae ma Feagaiga 88:40 , o mea e tutusa e faatosina e le tasi le isi. Ia avea oe ma uo e te manao ia faapena foi isi ia te oe. Vaavaai mo ni uo o e fesoasoani ia te oe ia avea ma tagata e te manao moni e avea ai oe.

O le filifiliga ia lelei ma faamuamua le Atua i lou olaga e aofia ai le suia ma le latalata atili atu i le Atua tusa lava pe tatou te faia ni mea sese, lea tatou te faia uma lava. Afai e i ai ni ou lagona o le tausalaina po o le le agavaa, faamolemole ia tuu atu i lou epikopo, taitai, ma isi o e alolofa ia te oe e fesoasoani atu. Ia tuu atu i le Atua ma lo tatou nuu o le Au Paia e lagolago ma faamalosiau ia te oe pe a e feagai ma luitau po o le mautonu. O taimi uma lava, e tu mai pea le Atua ia te oe, faatasi ma oe. E tusa lava pe e te fesea‘i solo, ua Ia valaau mai, ua saunia e toe faafeiloai atu ia te oe. Faatasi ma le Atua, e leai se taimi tatou te faia ai le leaga ma lē mafai ona salamo.

Tatou te faamuamua le Atua pe a tatou filifili ia lelei.

Ata

tamaitai talavou ma se manulele

Na folafola mai e le Tama Faalelagi ma le alofa, “Ina soia, ma ia outou iloa o a’u lava o le Atua” (Salamo 46:10).

E manaomia le taumafaiga ma le loto i ai e faatelegese ai ma “ia filemu.” E manaomia le faamaoni faaleagaga ma le lotomaualalo e “iloa ai o [le Atua] o le Atua.” O nisi o taimi o le faatelegese i mea e faaletaua e fesoasoani ia i tatou e iloa ai mea e sili ona tāua.

Aoao e vaai i le aao o le Atua i Ana foafoaga.

Vaavaai mo le lelei ma le uiga i sootaga paia—agalelei, auauna atu, olioli, mea malie lelei.

I nisi taimi, faamolemole ia faalemu, aveese le palaka, ma fesootai i auala faaleagaga ma le lagi ma i latou o siomiaina oe.

Faamolemole, “ina soia, ma ia outou iloa o [Ia] o le Atua.” Ia faamuamua le Atua i lou olaga.

E agalelei ma alofa fua le Alii. Afai tatou te faia le mea sili tatou te mafaia, o le a Ia faatagaina i tatou e fai le mea e sili atu nai lo le mea tatou te mafaia.

Sa faateleina e le Alii potoi areto ma i‘a (tagai Mataio 6; 14). E faapena foi, Na te faalauteleina mea tatou te ofoina atu ma faia ia sili atu nai lo mea e mafai ona tatou mafaufauina.

E alofa le Tama Faalelagi ia te oe ma e finagalo mo na o le mea e sili ona lelei mo oe. Ia avea o Ia ma ou Taiala i luga o ou ala i le olaga. A e faamuamua le Atua i lou olaga, ua e faatagaina o Ia e faateleina faamanuiaga e finagalo o Ia e tuuina atu ia te oe. O lenei mea e aumaia ai le olioli tumau ia te Ia ma oe.