Duha ka mga Baruganan alang sa Kaayohan
Sa kasagaran diha kini sa pagsulay sa kalisdanan nga kita nakakat-on niadtong labing lisud nga mga leksyon nga nag-umol sa atong kinaiya ug naghulma sa atong kapalaran.
Sa among mga biyahe sa pagduaw sa mga miyembro sa Simbahan sa tibuok kalibutan ug pinaagi sa natukod nga mga paagi sa pagkapari, nakadawat kami og direkta nga kasayuran sa mga kondisyon ug mga hagit sa atong mga miyembro. Sulod sa mga katuigan daghan sa atong mga miyembro ang naapektuhan sa tibuok kalibutan nga mga kadaot, kinaiyanhon ug hinimo sa tawo. Amo usab nga nasabtan nga ang mga pamilya kinahanglan nga magdaginot ug nangabalaka mahitungod sa paglahutay niining mahagito nga mga panahon.
Mga kaigsoonan, kami mibati nga.duol kaayo kaninyo. Kami nahigugma kaninyo, ug kami kanunay nga nag-ampo alang kaninyo. Ako nakakita og igo nga gidaghanon sa maayo ug ngil-ad nga mga panahon sa tibuok nakong kinabuhi aron masayud nga ang malisud nga mga panahon sa tinuod mohatag og agianan ngadto sa kadasig ug paglaum sa usa ka bag-o nga adlaw. Ako malaumon mahitungod sa umaabot. Mga kaigsoonan, alang sa atong bahin, kinahanglan gayud nga kita magpabilin nga makanunayon diha sa paglaum, magtrabaho uban sa atong tanang kusog, ug mosalig sa Dios.
Bag-o pa lang kanunay akong naghunahuna og panahon sa akong kinabuhi sa diha nga ang gibug-aton sa kaguol ug kabalaka sa walay kasigurohan nga kaugmaon ingon ug kanunay nga anaa. 11 anyos ang akong panuigon ug nagpuyo uban sa akong pamilya didto sa lawting sa usa ka balay sa uma duol sa Frankfurt, Germany. Kami mga bakwit sa ikaduha nga higayon sa pipila ka mga tuig lamang, ug kami nanlimbasug sa pagpahimutang sa among mga kaugalingon diha sa usa ka bag-o nga lugar nga layo kaayo gikan sa among panimalay kaniadto. Ako makaingon nga kami mga kabus, apan mahimong dili pa gani na mao. Tanan kami natulog sa usa ka lawak nga hilabihan sa ka gamay nga hapit walay lugar nga kalakawan libut sa mga katre. Sa laing gamay nga lawak, kami dihay pipila ka buok nga yanong mga kasangkapan ug usa ka stove nga kasagarang gigamit ni Mama sa pagluto og mga pagkaon. Sa pag-adto gikan sa usa ka lawak ngadto sa lain, kinahanglang moagi kami sa usa ka bodega diin ang mag-uuma nagtago sa iyang mga ekipo ug mga himan, uban sa nagkalain-laing mga karne ug mga soriso nga nagbitay gikan sa mga sagunting nga kahoy. Ang kahumot kanunay naghimo kanako og hilabihan sa kagutom. Kami walay kaligoanan, apan kami adunay kasilyas sa gawas––ubos sa hagdanan ug mga 50 ka pye (15 ka metros) ang gilay-on, apan kini ingon og mas layo-layo sa panahon sa tingtugnaw.
Tungod kay ako usa ka bakwit ug tungod sa akong Silangang German nga tono, ang ubang mga bata kasagaran mibugal-bugal kanako ug mitawag kanako og mga ngalan nga makasakit kaayo. Sa tanang mga panahon sa akong kabatan-on, nagtuo ako kini tingali ang labing makapawala og kadasig.
Karon, mga dekada na ang milabay, makahinumdom ako niadtong mga adlawa nga may pagsabut tungod sa mga kasinatian. Bisan tuod ako makahinumdom pa gihapon sa sakit ug sa pagkawalay paglaum, makakita na ako karon sa unsay wala nako makit-i kaniadto: kini usa ka panahon sa mahinungdanong personal nga pagtubo. Atol niini nga panahon, ang among pamilya nagkahiusa. Ako naniid ug nakakat-on gikan sa akong mga ginikanan. Gidayeg nako ang ilang determinasyon ug pagkamalaumon. Gikan kanila akong nakat-unan nga ang kalisdanan, kon atubangon uban sa hugot nga pagtuo, kaisug, ug kalig-on, mahimong mabuntog.
Nasayud nga pipila kaninyo nakasinati og inyong kaugalingong mga panahon sa kabalaka ug kawalay paglaum, buot akong mamulong karon mahitungod sa duha ka importanting mga baruganan nga mipatunhay kanako niining mga yugto sa pagkat-on sa akong kinabuhi.
Ang Unang Baruganan: Trabaho
Hangtud niining adlawa, ako nakadayeg kaayo sa paagi nga ang akong pamilya mitrabaho human nawad-an sa tanang butang pagkahuman sa Ikaduhang Gubat sa Kalibutan! Nahinumdom ako sa akong amahan––usa ka empleyado sa gobyerno pinaagi sa edukasyon ug kasinatian––nagdawat og daghang lisud nga mga trabaho, sama sa tigmina og karbon, tigmina og uranium, mekaniko, ug drayber sa trak. Siya mobiya og sayo sa buntag ug kasagaran mopauli og gabii na kaayo aron sa pagsuporta sa among pamilya. Ang akong inahan midawat og labada ug mitrabaho sa dili maihap nga mga oras nga nagtrabaho sa mga buluhaton sa sulugoon. Gipaapil niya ang akong igsoong babaye ug ako sa iyang negosyo. Gajmit akong bisekleta ako ang tigkuha ug tighatud. Nindot ang pamati nga makahimo sa pagtabang sa pamilya sa gamay nga paagi, ug bisan tuod ako wala masayud niini niana nga panahon, ang pisikal nga pagtrabaho nahimong usa ka panalangin usab sa akong panglawas.
Dili kadto sayon, apan ang trabaho mipalayo kanamo gikan sa pagsige og hunahuna sa mga kalisud sa among mga kahimtang. Bisan tuod nga ang among sitwasyon wala mausab diha-diha dayon, kini nahimong nausab gayud. Mao kana ang tinuod mahitungod sa trabaho. Kon kita magpadayon lamang niini––sa kanunay ug molahutay––ang mga sitwasyon sa tinuod molambo.
Unsa ang akong pagdayeg sa mga kalalakin-an, kababayen-an, ug kabataan kinsa makamao nga motrabaho! Unsa ang paghigugma sa Ginoo sa mamumuo! Siya miingon, “Sa singot sa imong nawong magakaon ikaw sa tinapay,”1 ug “Ang mamumuo takus sa iyang suhol.”2 Mihatag usab Siya og usa ka saad: “Igalab ang imong sanggot uban sa imong tibuok nga kasingkasing, ug ang imong mga sala mapasaylo diha kanimo.”3 Kadto kinsa dili mahadlok molulho sa ilang mga manggas ug kalimtan ang ilang mga kaugalingon sa pagtinguha sa bililhong mga tumong mahimong mga panalangin ngadto sa ilang mga pamilya, mga komunidad, mga nasud, ug ngadto sa Simbahan.
Ang Ginoo wala magpaabut kanato sa pagtrabaho og mas kusog pa kay sa atong mahimo. Siya dili (ni kita kinahanglan) motandi sa atong mga paninguha ngadto sa uban. Ang atong Langitnong Amahan nangayo lamang nga atong himoon ang labing maayo nga atong mahimo—nga kita motrabaho sumala sa atong tibuok nga kapasidad, bisan unsa pa tingali kana ka dako o ka gamay.
Ang trabaho pangontra alang sa kabalaka, haplas alang sa kaguol, ug ganghaan sa oportunidad. Bisan unsa ang atong mga kahimtang sa kinabuhi, minahal kong mga kaigsoonan, atong himoon ang labing maayo nga atong mahimo ug magpalambo og reputasyon nga maayo kaayo diha sa tanan natong buhaton. Ibutang nato ang atong mga hunahuna ug mga lawas ngadto sa mahimayaon nga oportunidad alang sa trabaho nga ang matag bag-ong adlaw nagtanyag.
Kon ang atong sakyanan malubong sa lapok, ang Dios mas gusto nga motabang sa tawo kinsa manaog aron sa pagduot kay sa tawo kinsa mopataas lamang sa iyang tingog diha sa pag-ampo—walay igsapayan unsa kanindot ang pagkasulti. Gisulti ni Presidente Thomas S. Monson og ingon niini: “Kini dili igo nga gustong mohimo og paninguha ug mosulti nga atong buhaton ang paninguha. … Anaa diha sa pagbuhat, dili lamang ang paghunahuna, nga atong matuman ang atong mga tumong. Kon kanunay natong iunya-unya ang atong mga tumong, dili gayud nato makita nga kini nangatuman.”4
Ang trabaho makapahalangdon ug makatagbaw, apan hinumdumi ang pasidaan ni Jacob sa dili “paghago … niana nga dili makatagbaw.”5 Kon atong igahin ang atong kaugalingon ngadto sa pagpangita sa kalibutanong katigayunan ug sa kadungganan sa pagkainila sa publiko nga napasagdan na hinoon ang atong mga pamilya ug atong espiritwal nga paglambo, atong madiskobrehan sa dili madugay nga kita naghimo og buhat nga walay kapuslanan. Ang matarung nga trabaho nga atong gibuhat sulod sa mga bongbong sa atong mga panimalay maoy labing sagrado; ang mga kaayohan niini mahangturon ang matang. Dili kini ikasugo. Kini mao ang pundasyon sa atong trabaho isip mga tighupot sa pagkapari.
Hinumdumi, kita lumalabay lamang nga mga tigbiyahe niini nga kalibutan. Dili nato ihalad ang atong hinatag sa Dios nga mga talento ug mga kusog ngadto lamang sa paghan-ay og kalibutanong mga ankla apan hinonoa atong igahin ang atong mga adlaw sa pagpauswag sa espiritwal nga mga paagi. Tungod kay, isip anak nga mga lalaki sa Labing Halangdong Dios, gilalang kita sa pagpangita og mas labaw nga espirituhanon nga mga kasinatian.
Karon, usa ka pulong ngari kanato sinati nga mga kaigsoonan: ang pagpahulay dili kabahin sa plano sa kalipay sa Ginoo. Walay pagpahulay o pag-undang gikan sa mga responsibilidad sa pagkapari––walay pagsapayan sa edad o pisikal nga kapasidad. Samtang ang hugpong sa mga pulong “nakahuman na ako niana” mahimong magamit isip usa ka pasangil aron sa paglikay sa skateboarding, sa pagbalibad sa imbitasyon sa pagmotorbike, o ipalabay ang halang nga curry diha sa kan-anan, kini dili madawat nga pasangil alang sa paglikay sa mga responsibilidad sa pakigsaad sa paghalad sa atong panahon, mga talento, ug mga kapanguhaan diha sa buhat sa gingharian sa Dios.
Tingali aduna kadto kinsa, human sa daghang mga katuigan sa pagserbisyo sa Simbahan, nagtuo nga sila adunay katungod og panahon sa pagpahulay samtang ang uban naghimo sa trabaho. Sa prangka nga pagkasulti, mga kaigsoonan, kini nga matang sa paghunahuna dili takus sa usa ka disipulo ni Kristo. Usa ka dakong bahin sa atong trabaho dinhi niini nga yuta mao ang paglahutay sa malipayong paagi hangtud sa katapusan––sa matag adlaw sa atong kinabuhi.
Karon, usa ka pulong usab ngadto sa atong mas batan-ong mga kaigsoonan sa Melchizedek nga Pagkapari, kinsa nagtinguha sa matarung nga mga tumong sa pagkuha og edukasyon ug sa pagpangita og mahangturon nga asawa. Kini mao ang husto nga mga tumong, akong mga kaigsoonan, apan hinumdumi: ang pagtrabaho nga makugihon diha sa ubasan sa atong Ginoo modugang pag-ayo sa inyong oportunidad ug mopatubo sa inyong kahigayunan alang sa kalampusan sa duha niining takus nga mga panlimbasug.
Bisan kon ikaw mao ang labing bata-on nga deacon o ang labing tigulang nga halangdon nga pari [high priest], adunay trabaho nga himoon!
Ang Ikaduhang Baruganan: Pagkat-on
Atol sa malisud nga mga sitwasyon sa ekonomiya human sa gubat sa Germany, ang mga oportunidad alang sa edukasyon dili ingon ka daghan sama sa karon. Apan bisan pa sa limitado nga mga kapilian, gibati nako kanunay ang kahinam sa pagkat-on. Ako nakahinumdom og usa ka adlaw, samtang ako nagbisekleta nga naghatud sa linabhan, misulod ako sa panimalay sa akong klasmeyt. Diha sa usa sa mga lawak, duha ka gagmay nga mga lingkuranang sulatanan [desk] ang gisandig sa bongbong. Unsa ka nindot nga talan-awon kadto! Unsa ka swerte kadto nga mga anak nga adunay mga lingkuranang sulatanan nga ilang kaugalingon! Akong mahanduraw sila nga naglingkod nga may abli nga mga basahon nga nagtuon sa ilang mga leksyon ug nagbuhat sa ilang homework. Para nako ang pagbaton og lingkuranang sulatanan nga akong kaugalingon mao ang labing nindot nga butang sa kalibutan.
Kinahanglan akong maghulat og dugay nga panahon una pa kana matuman. Mga katuigan ang milabay, ako nakakita og trabaho diha sa usa ka tigsiksik nga institusyon nga adunaydako nga librarya. Ako nakahinumdom nga naggamit og daghan sa akong oras diha niana nga librarya. Didto sa katapusan makalingkod ako sa usa ka lingkuranang sulatanan––nga ako ra gyud––ug nagbasa sa impormasyon ug kahibalo nga gihatag niadto nga mga basahon. Unsa ako ka ganahan nga magbasa ug magkat-on! Niadtong mga adlawa direkta nakong nasabtan ang mga pulong sa usa ka karaang pinulongan: Ang edukasyon dili kaayo ang pagbaton og kahibalo apan ang paggamit sa kahibalo.
Alang sa mga miyembro sa Simbahan, ang edukasyon dili lamang usa ka maayo nga ideya––kini usa ka sugo. Kita gikinahanglan nga magkat-on “sa mga butang diha sa langit ug diha sa yuta, ug sa ilawom sa yuta; mga butang nga diha na, mga butang nga anaa na, mga butang nga sa mubong panahon mahinabo; mga butang nga anaa sa panimalay, mga butang nga atua sa layong dapit,”6
Si Joseph Smith nahigugma sa pagkat-on bisan tuod diyutay ra ang iyang oportunidad alang sa pormal nga edukasyon. Sa iyang mga journal, malipayon siya nga misulti sa mga adlaw nga iyang gigahin sa pagtuon ug sa kasagaran mipahayag sa iyang gugma sa pagkat-on.7
Gitudloan ni Joseph ang mga Santos nga ang kahibalo usa ka gikinahanglan nga bahin sa atong mortal nga panaw, tungod kay ang “usa ka tawo dili maluwas sama ka sa iyang [pag-angkon] og kahibalo,”8 ug nga “bisan unsa nga baruganan sa salabutan nga kita makakab-ut … dinhi niini nga kinabuhi, kini madala uban kanato sa pagkabanhaw.”9 Sulod sa mahagitong mga panahon, kini labaw pa gani ka importante pa gani nga magkat-on. Gitudlo ni Propeta Joseph Smith, “Ang kahibalo moabug sa kangitngit, [kabalaka], ug pagduha-duha; kay kini dili mabuhi diin anaa ang kahibalo.”10
Mga kaigsoonan, kamo adunay katungdanan sa pagkat-on og daghan kutob sa inyong mahimo. Palihug awhaga ang inyong mga pamilya, ang inyong mga sakop sa korum, ang tanan sa pagkat-on ug mahimo nga mas labaw ka edukado. Kon ang pormal nga edukasyon dili makab-ot, ayaw tuguti kana sa pagpugong kaninyo gikan sa pag-angkon sa tanang kahibalo nga inyong mahimo. Ubos sa ingon nga mga kahimtang, ang labing maayo nga mga basahon, maingon nato, mahimo nga inyong “unibersidad”—usa ka lawak klasehanan nga kanunay abli ug modawat sa tanan kinsa mosulod. Paningkamot sa pagdugang sa inyong kahibalo sa tanan nga mahiyason, matahum, o maayo og dungog o dalaygon.”11 Pangita og kahibalo “pinaagi sa pagtuon ug usab pinaagi sa hugot nga pagtuo.”12 Pangita uban sa mapainubsanon nga espiritu ug mahinulsulon nga kasingkasing.13 Samtang inyong gamiton ang espiritwal nga bahin sa inyong hugot nga pagtuo sa inyong pagtuon––bisan sa temporal nga mga butang––inyong mapadako ang inyong intelektwal nga kapasidad, tungod kay “kon ang inyong katuyoan usa ngadto sa himaya sa [Dios] ang inyong tibuok [kalawasan] mapuno sa kahayag, … ug [makasabut ] sa tanan nga mga butang.”14
Sa atong pagkat-on, dili nato kalimtan ang tuburan sa pagpadayag. Ang mga kasulatan ug ang mga pulong sa mga apostoles ug mga propeta karon nga adlaw mao ang mga tinubdan sa kaalam, balaang kahibalo, ug sa personal nga pagpadayag aron sa pagtabang kanato nga makakita og mga tubag sa tanang mga hagit sa kinabuhi. Magkat-on kita mahitungod ni Kristo; pangitaon nato kana nga kahibalo nga modala ngadto sa kalinaw, kamatuoran, ug sa talagsaon nga mga misteryo sa kahangturan.15
Panapos
Mga kaigsoonan, ako nahinumdum nianang 11 anyos ang panuigon nga batang lalaki sa Frankfurt, Germany, kinsa naguol mahitungod sa iyang kaugmaon ug mibati sa mahangturon nga kahapdos sa walay kalooy nga mga pulong. Akong nahinumdom niini nga panahon uban sa ingon og subo nga pagbati. Samtang ako dili matinguhaon nga mopuyo og usab niadtong mga adlaw sa pagsulay ug kasamok, ako adunay gamay nga pagduda nga ang mga leksyon nga akong nakat-unan mga gikinahanglan nga pagpangandam alang sa umaabut nga oportunidad. Karon, daghan nga mga tuig na ang milabay, ako nasayud uban ang kasigurohan diha kini sa pagsulay sa kalisdanan nga kita nagkat-on niadtong labing lisud nga mga leksyon nga nag-umol sa atong kinaiya ug naghulma sa atong kapalaran.
Ako nag-ampo nga sulod sa umaabot nga mga bulan ug mga tuig atong mapuno ang atong mga oras ug mga adlaw sa matarung nga buhat. Ako nag-ampo nga kitamaningkamot kita sa pagkat-on ug sa pagpalambo sa atong mga hunahuna ug mga kasingkasing pinaagi sa pagkat-on og maayo gikan sa lunsa nga mga tuburan sa kamatuoran. Akong ibilin kaninyo ang akong gugma ug mga panalangin sa ngalan ni Jesukristo, amen.