Ni sa Kidavaki ki na Koniferedi

Kemuni na taciqu kei na ganequ lomani, au sa marautaka dina meu kidavaki kemuni mai kina koniferedi e vuravura ni Lotu i Jisu Karisto ni Yalododonu Edaidai. Eda sa soqoni vata mai e dua na matavuvale levu, sivia na 15 na milioni na keda iwiliwili, duavata ena vakabauta kei na vakanamata meda vakarorogo ka vuli mai na itukutuku ena wasei vei keda.

Sa toso totolo sara na ono na vula sa oti oqo, ena kena sa toso ki liu na cakacaka ni Lotu ka sega na ka me tarova. E a noqu itavi dokai ena sivia e dua na vula sa oti me’u vakatabuya na Gilbert Arizona Temple, e dua na vale sa rairai totoka dina. E a qaravi e dua na soqo ni veivakamarautaki vakavanua kei na vakatasuasua ena Discovery Park ena bogi ni bera na siga ni vakatabui ni valetabu. Era a vakaitavi kina e tinikarua na udolu na itabagone ena loma ni 90 na miniti. Sa rairai vinaka dina na nodra ivukivuki ni meke, lagasere, kei na ivakatagi.

E a sotava tiko na vanua oqo e dua na lauqa balavu, kau vakabauta ni ra a vakacabo masu voli ena kerei ni uca ena vica na macawa yani ki liu. Na kena ca ni a yaco mai ena gauna sara ga e vakarau tekivu kina na vakatasuasua ka tau voli ena gauna taucoko ni veivakamarautaki! Dina ga ni ra a suasua taucoko na itabagone ka ra via batabata, mai na liliwa ni draki, ia keimami vakila taucoko na Yalotabu ni Turaga. Na ikau ni parokaramu, “Bula Dina ena Vakabauta”—vakasamataka mada oya: “Bula Dina ena Vakabauta” —e a vakaraitaki matata sara ga ena nodra matadredredre kei na mamarau na cauravou kei na goneyalewa. Dina ga ni a tau na uca ka via batabata no na draki, oqo e dua na itaviqaravi e vakasinaiti ena vakabauta ka levu na ka e a sotavi mai vei ira na itabagone era na nanuma tu ena dua na gauna balavu ka ra na dau talanoataka vakavuqa vei ira na luvedra kei na makubudra ena veiyabaki se tu ki liu.

Sa qai qaravi na vakatabui ni valetabu mai Gilbert Arizona ena siga ka tarava. E yaco me ika 142 ni valetabu sa vakayagataki tiko ena Lotu. Sega ni tautauvata na draki kei na bogi ni siga yani ki liu, ni cila vinaka tu na siga. E a veivakauqeti dina na veisoqoni e vakayacori oqori. Eratou a tiko vata kei au ena veivakatabui o Peresitedi Henry B. Eyring, Elder kei Sisita Tad R. Callister, Elder kei Sisita William R. Walker, kei Elder kei Sisita Kent F. Richards.

Ena vakatabui tiko na valetabu mai Fort Lauderdale Florida, ena vula o Me. E so tale na valetabu era sa na vakatabui tiko ena mua ni yabaki oqo. Ena 2015 keitou namaka tiko me na tara vakaoti ka vakatabui kina na vo ni valetabu ena levu sara na veiyasai vuravura. Ena toso tikoga na cakacaka oqo. Ena gauna sa tara oti kece kina na valetabu ka ra sa kacivaki oti eda sa na yacova tiko yani na 170 na iwiliwili kece ni valetabu sa na vakayagataki tu ena Lotu.

Dina ga ni da sa vakanamata tiko oqo ena kena vakacavari na valetabu sa kacivaki oti, ka da na sega ni kacivaka e so tale na valetabu vou ena dua na gauna lekaleka ga mai oqo, eda na tosoya tikoga na cakacaka ni kena laurai na vanua me tara tale kina eso na valetabu. Sa na qai vakaraitaki na kena itukutuku ena koniferedi raraba ni veigauna mai muri. O keda eda tamata ni tara-valetabu ka dau lakova-talega na valetabu.

Oqo, kemuni na taciqu kei na ganequ, meda sa na vakanamata mada yani ka vakarogoca na itukutuku ena mai wasei tiko vei keda nikua, vakakina ni mataka. O ira era na mai vosa tiko vei keda era sa kerei lomalagi me ra vukei ka liutaki ena nodra a vakarautaka tiko mai na nodra itukutuku.

Me da na vakasinaiti—o keda kece sara, na tiko oqo kei ira era tu ena veivanua tale eso—ena Yalotabu ni Turaga ka tuberi cake ka vakauqeti ena noda na vakarorogo ka vuli. Ena yaca i Jisu Karisito, na noda iVakabula, emeni.