UkuHlanganisa uSapho lukaThixo

Bazalwana noodade bam abathandekayo, ndiyavuya ngeli thuba lokuba kunye nani ekuqaleni koluhlelo lwenkomfa yajikelele. Ndiyanamkela ngokufudumele kakhulu.

Inkomfa yajikelele ibisoloko ilixesha lokuhlangana kwabaNgcwele beMihla yokuGqibela. Ukususela ngoko side sakhula ekukwazini ukuhlanganela endaweni enye, kodwa iNkosi ibonelele ngeendlela zokuba iintsikelelo zenkomfa yajikelele zifikelele kuwe nokuba uphi na. Xeshikweni kuncumisa ukubona ukuhlangana kwabaNgcwele kweli Ziko leNkomfa likhulu, thina bema kweliqonga sisoloko kwiliso lengqondo sinezigidi ngezigidi zabantu abahlanganisene nathi kwihlabathi jikelele ukuzo kubukela nokumamela inkomfa. Uninzi lwenu luhlangene kunye neentsapho zenu; abanye basenokuhlangana nabahlobo okanye namalungu eBandla elinye.

Naphi na apho ukhoyo kwaye nokuba uliva kanjani ilizwi lam, nceda wazi ukuba nangona ungekho nathi ngokwesiqu, sivakalelwa ngathi ukunye nathi ngokomoya. Siyathemba ukuba nonke niya kuziva nikunye nathi—ukuba niya kuwava amandla okomoya awavela nanini na xa iqela lamakholwa lihlangane ngegama likaYesu Krestu.

Ndizive ndichukumiseka ukuba ndithethe nani namhlanje malunga nolunye uhlobo lokuhlanganisana. Olu hlobo alwenzeki rhoqo kwiinyanga ezintandathu kuphela, njengoko inkomfa yajikelele isenzeka njalo. Endaweni yoko, ibiqhubeka ngokungapheziyo ukusukela kwimihla yokuqala yoBuyiso lweBandla, kwaye ibimana ikhawuleziswa kwiminyaka yakamva nje. Ndibhekisa kwindibano yosapho lukaThixo.

Ukuchaza le ndibano, kunokuba kuhle ukuqala ngaphambi kokuba sizalwe, ngaphambi koko iBhayibhile ikubiza “ekuqalekeni” (Genesis 1:1). Ngeloo xesha, sasihlala noBawo oseZulwini njengabantwana baKhe bomoya. Oku kuyinyani ngomntu wonke owakhe waphila emhlabeni.

Niyabona, amagama “umzalwana” kunye “nodade” awayomibuliso nje yobuhlobo okanye amazwi wokuthandana kuthi. Asisibonakaliso senyani yanaphakade: UThixo nguBawo wenene woluntu lonke; omnye ngamnye kuthi uyinxalenye yosapho lwaKhe lwanaphakade. Kuba Yena esithanda ngothando lukaBawo ogqibeleleyo, Yena ufuna ukuba senze inkqubela phambili kwaye sifane naYe. Wamisela isicwangciso esasiya kuza ngaso emhlabeni, kwiintsapho, kwaye sibe namava awaya kusilungiselela ukubuyela kuYe kwaye siphile ngohlobo Yena aphila ngalo.

Eyona nto isembindini kwesi sicwangciso yayisisithembiso sokuba uYesu Krestu wayeya kuzinikela njengedini, ukusihlangula esonweni nasekufeni. Umsebenzi wethu kweso sicwangciso kukwamkela idini loMsindisi ngokuthobela imithetho kunye nemimiselo yevangeli. Mna nawe sasamkela esi sicwangciso. Eneneni, saye savuya kuso, nangona oko kwakuya kuthetha ukuba sasiya kubushiya ubukho bukaBawo wethu kwaye sikulibale oko sasithe sanamava ako apho kunye Naye.

Kodwa sasingathunyelwanga apha ebumnyameni kwaphela. Umntu ngamnye kuthi wanikwa isahlulo sokukhanya kukaThixo, obizwa ngokuba “kukuKhanya kukaKrestu,” ukusinceda ukuba sahlule phakathi kokulungileyo nokubi ,okulungileyo nokungalunganga. Yiyo loo nto ke kwanabo baphila ngolwazi oluncinci okanye bangazi nto ngecebo likaBawo banokuziva, ezintliziyweni zabo, ukuba ezinye izinto zilungile kwaye zilungile ngelixa ezinye zingenjalo.

Imvakalelo yethu yokulungileyo nokungalunganga ibonakala inzulu ngakumbi xa sikhulisa abantwana bethu. Okudalwe phantse kuwo wonke umzali ngumnqweno wokufundisa abantwana bakhe izithako zobunyulu. Le yinxalenye yommangaliso wecebo likaBawo oseZulwini. Ufuna ukuba abantwana baKhe beze emhlabeni, balandele inkqubo yanaphakade yeentsapho ezikhoyo ezulwini. Iintsapho zilucandelo olusisiseko kwimimandla yanaphakade, kwaye ke Yena uzimisele ukuba nazo zibe sesona sisiseko sokuqala emhlabeni. Nangona iintsapho zasemhlabeni zikude kakhulu nokugqibeleleyo, zinika abantwana bakaThixo elona thuba lingcono lokwamkeleka emhlabeni ngothando ekuphela kwalo olusondela kolo esaluvayo ezulwini—uthando lwabazali. Iintsapho zikwayeyona ndlela ibalaseleyo yokugcina nokudlulisa iimpawu zobunyulu kunye nemigaqo enokusikhokelela kubukho bukaThixo kwakhona.

Kuphela nje kwegcuntswana labantwana bakaThixo abafumana ukuqonda okupheleleyo kobu bomi kwecebo likaThixo, kunye nokufikelela kwimimiselo yobubingeleli kunye neminqophiso eyenza amandla wentlawulelo yoMsindisi asebenze ngokupheleleyo kubomi bethu. Nkqu abo banabazali ababalaseleyo banokuphila ngokuthembekileyo ngokokukhanya abanako kodwa bangaze beve ngoYesu Krestu kunye neNtlawulelo yaKhe okanye bamenywe ukuba babhaptizwe egameni laKhe. Oku kuyinyani kwizigidi ngezigidi ezingenakubalwa zabazalwana noodade bethu kwimbali yehlabathi liphela.

Abanye banokukucingela oku njengokunomkhethe. Basenokukuthatha njengobungqina bokuba akukho sicwangciso, akukho zidingo zithile zokusindiswa—beziva ukuba uThixo onobulungisa, onothando akangekhe enze icebo elifumaneka kwabambalwa kangaka abantwana bakhe. Abanye basenokugqiba kwelokuba uThixo umele ukuba wamisela kwangaphambili ukuba ngabaphi na abantwana baKhe awayeza kubasindisa kwaye wenza ivangeli yafumaneka kubo, xeshikweni abo bangazange bayive ivangeli ngokulula “benganyulwanga.”

Kodwa mna nawe siyazi, ngenxa yeenyaniso ezibuyiselwe ngoMprofeti uJoseph Smith, ukuba icebo likaThixo linothando ngakumbi kwaye linobulungisa kunoko. UBawo wethu oseZulwini uxhinele ukuhlanganisa nokusikelela lonke usapho lwaKhe. Ngelixa esazi Yena ukuba ayingabo bonke abaza kukhetha ukuhlanganiswa, icebo laKhe linika ngamnye kubantwana baKhe ithuba lokwamkela okanye lokwala isimemo saKhe. Kwaye iintsapho zisembindini wesisicwangciso.

Kwiinkulungwane ezidlulileyo, umprofeti uMalaki wathi, ngemini ezayo, uThixo wayeya kuthumela uEliya ukuba “wobuyisela iintliziyo zooyise kubantwana, neentliziyo zabantwana kooyise”(Malaki 4:6).

Esi siprofetho sasibaluleke kakhulu kangangokuba uMsindisi wasicaphula xa wayetyelele eMelika emva koVuko lwaKhe (bona 3 Nifayi 25:5–6). Kwaye xa ingelosi uMoronayi yayindwendwele uMprofeti uJoseph Smith, naye wacaphula isiprofetho ngo-Eliya neentliziyo, ooyise kunye nabantwana (bona IMbali—kaJoseph Smith 1:36–39).

Namhlanje nguTshazimpunzi 1. Iintsuku ezimbini ukusuka ngoku, Tshazimpunzi 3, iphawula iminyaka engama–181 ukusukela kusuku esazaliseka ngalo isiprofetho sikaMalaki. Ngalo mhla, uEliya wafika, kwaye wanika uJoseph Smith amandla obubingeleli okutywina iintsapho ngonaphakade (bona IMfundiso&neMinqophis 110:13–16).

Ukusukela ngaloo mhla ukuzokuthi ga kulo, umdla wokuphanda ngembali yosapho lomntu lukhule ngokungapheziyo. Kumazinga awasoloko esanda, abantu babonakala ngathi batsalelekile kwizinyanya zabo ngaphaya nje kunokuzigqatsa. Amathala eencwadi enzala, imibutho kunye nobuxhakaxhaka buye bavela kwihlabathi liphela ukuxhasa lo mdla. Amandla e-intanethi okuphucula unxibelelwano enze ukuba iintsapho zisebenze kunye ukwenza uphando lwembali yosapho ngesantya kunye nokucaciswa okungazange kwenzeke ngaphambili.

Kutheni yonke le nto isenzeka? Ngenxa yokunqongophala kwegama elingcono, siyibiza ngokuba “ngumoya kaEliya.” Kananjalo sinokukubiza ngokuba “kukuzaliseka kwesiprofetho.” Ndiyangqina ukuba uEliya weza. Iintliziyo zabantwana—eyam kunye neyakho—ziguqukele koobawo bethu, izinyanya zethu. Uthando onalo ngezinyanya zakho luyinxalenye yokuzaliseka kweso siprofetho. Ihleli ngokunzulu ngaphakathi kwintsingiselo yakho yokuba ungubani. Kodwa inokwenza okungaphezulu kokufumana iDNA njengelifa.

Umzekelo, njengoko ulandela iimpembelelo zokufunda ngembali yosapho lwakho, usenokufumanisa ukuba isalamane esikude sabelana ngezinye iimpawu zobuso bakho okanye umdla onawo ezincwadini okanye kwitalente yakho yokucula. Oku kunokunika umdla kakhulu kwaye kunikeze nangeengqiqo. Kodwa ukuba umsebenzi wakho uyema apho, uya kuva ukuba kukho into engekhoyo. Oku kungenxa yokuba ukuhlanganisa nokumanyanisa usapho lukaThixo kufuna okungaphezulu kuneemvakalelo nje ezifudumeleyo. Kufuna iminqophiso engcwele eyenziwa ngokunxulumene nemimiselo yobubingeleli.

Uninzi lwezinyanya zakho aluyifumenanga loo mimiselo. Kodwa ekubonelelweni nguThixo, wena uyifumene. Kwaye uThixo wayesazi ukuba wawuya kuziva utsalelekile kwizinyanya zakho ngothando kwaye uya kuba nobuxhakaxhaka obufanelekileyo ukuze ubakhangele. Wayesazi nokuba wawuya kuphila ngexesha apho ukufikelela kwiitempile ezingcwele, apho imimiselo inokwenziwa khona, kwakuya kuba lukhulu kunangaphambili embalini. Kwaye wayesazi ukuba Yena wayengakuthemba ukuba uwufeze lo msebenzi usenzela izinyanya zakho.

Ngokucacileyo, sonke sinezinto ezininzi zoxinzelelo kunye noxanduva olubalulekileyo oluya kufuna ingqalelo yethu kunye nexesha lethu. Sonke sifumana iinxalenye zezinto iNkosi elindele ukuba sizenze ukwegqitha kokuba sinako. Ngethamsanqa, iNkosi ibonelela ngendlela yokuba omnye ngamnye wethu azuze ukuzithemba kunye nolwaneliseko kuyo yonke inkonzo yethu, kuquka nenkonzo yembali yosapho. Sifumana amandla okwenza oko Yena akufunayo ngokholo lwethu ukuba uMsindisi akaniki miyalelo “ingasilungiselelanga [thina] indlela yokufezekisa into eyalele yona” (1 Nifayi 3:7).

Ndiyazi ukuba kuyinyani oku ngokwamava. Kwiminyaka emininzi eyadlulayo, njengomfundi wasedyunivesithi, ndaye ndadibana nendoda eyayisebenzela enye yeenkampani ezinkulu zekhompuyutha ehlabathini. Oku kwakukwiintsuku zokuqala zokusetyenziswa kwekhompuyutha, kwaye kwenzeka nje ukuba inkampani yakhe yayimthumele ukuba azo kuthengisa iikhompuyutha kwiBandla likaYesu Krestu labaNgcwele beMihla yokuGqibela.

Kangangokubona kwam, lo mthengisi wayengenalo ukholo lwezenkolo. Kodwa wathetha ngokumangalisayo nangokukruquka, “Kweli bandla babesenza oko bakubiza ngokuba ‘ngumnombo,’ bekhangela amagama abantu abaswelekileyo, bezama ukukhangela izinyanya zabo. Abantu, uninzi lwabo yayingabafazi, babebaleka phakathi kweekhabhathi, bekhangela ulwazi emakhadini amancinci . ” Ukuba ndisakhumbula kakuhle, wathi amanenekazi ayenxibe izihlangu zentenetya ukuze abaleke ngokukhawulezileyo. Le ndoda yaqhubeka, “Njengoko ndandibona ubukhulu bento ababezama ukuyenza, ndaye ndaqaphela ukuba ndisifumene isizathu sokuba kwenziwe ikhompuyutha.”

Ewe, wayenyanisile kancinane. Iikhompuyutha zaziya kuba yinxalenye ebalulekileyo yekamva lomsebenzi weembali zosapho—kungezizo iikhompuyutha awayezithengisa. Inkokheli ephenjelelweyo yeBandla yakhetha ukungazithengi iikhompuyutha zayo. IBandla lalilinde ubuxhakaxhaka obabungekacingwa nokucingwa ngeloo xesha. Kodwa ndifundile kwiminyaka emininzi edlulileyo ukuba nkqu kwa nobona bubalaseleyo ubuxhakaxhaka babungenakuze buthathe indawo yesityhilelo esivela ezulwini, njengohlobo olafunyanwa yiloo nkokeli yeBandla. Lo ngumsebenzi wokomoya, kwaye iNkosi iyawukhokela ngoMoya waYo oyiNgcwele.

Kwiiveki nje ezimbalwa ezidlulileyo, bendisebenza kwimbali yosapho lwam kunye nomcebisi ecaleni kwam nomnye umncedisi emnxebeni. Kwisikrini sekhompuyutha ebiphambi kwam yayiyingxaki engaphaya kwamandla wam wokuyisombulula. Ndabona amagama amabini, athunyelwe kum ngemimangaliso yobuxhakaxhaka, yabantu ababesenokuba balinde ummiselo wasetempileni. Kodwa ingxaki yayikukuba amagama ayehlukile, kodwa kwakunesizathu sokukholelwa ukuba basenokuba bangumntu omnye. Umsebenzi wam yayikukufumanisa ukuba yintoni eyinyaniso.

Ndacela abacebisi bam ukuba bandixelele. Bona bathi, “Hayi, kufuneka ukhethe.” Kwaye babeqinisekile ukuba ndandiza kuyifumana inyaniso. Ikhompuyutha, ngawo onke amandla ayo kunye nolwazi, yandishiya nentsikelelo yokujonga loo magama akwiskrini, ndivavanya ulwazi olukhoyo, ndikhangela olunye uphando, ndithandaza ngokuthe cwaka, nokufumanisa ukuba iyinyani yayiyephi na. Njengoko ndandithandaza, ndayazi ngokuqinisekileyo into endandiya kuyenza—njengokuba kwakunjalo nakwezinye iimeko xa kwakufuneka ndithembele kuncedo lwasezulwini ukusombulula ingxaki.

Asiyazi ukuba yeyiphi imimangaliso uThixo aza kuphembelela abantu ukuba bayidale ukuze bancede umsebenzi waKhe wokuhlanganisa usapho lwaKhe. Kodwa nokuba yintoni na eyenziweyo emangalisayo, ukusetyenziswa kwayo kuya kufuna ukuba uMoya usebenze kubantu abafana nam kunye nawe. Oku akumelanga kusimangaze. Emva kwayo yonke loo nto, aba ngoonyana neentombi ezithandekayo zikaThixo. Yena uya kuthumela nayiphi na impembelelo efunekayo ukuze abanike ithuba lokubuyela kuYe.

Kwiminyaka yakamvanje, ulutsha lweBandla luye lwaphendula kumoya kaEliya ngendlela ekhuthazayo. Uninzi ngoku lubambe elayo imvume yeastempileni yethutyana eyenzelwe ukusetyenziswa kwaye bayisebenzisa rhoqo. Iindawo zokubhaptiza zetempile zixakekile kunakuqala; ezinye iitempile kuye kwafuneka ukuba zilungelelanise iishedyuli zazo ukuze zilungiselele ukwanda kwenani labantu abatsha abaya etempileni.

Ibikade iyinto enqabileyo kodwa eyamkelekileyo into yokuba ulutsha luzise amagama wezinyanya zalo etempileni. Ngoku le yinto eqhelekileyo, kwaye ngoku ngabantu abatsha ngokwabo abafumana ezo zinyanya rhoqo.

Ukongeza, ulutsha oluninzi lufumanise ukuba ukunikela ngexesha lalo ukwenza uphando lwembali yosapho kunye nomsebenzi wasetempileni kubenze baqina ubungqina babo kwicebo losindiso. Kuye kwandisa amandla oMoya ebomini babo kwaye kwanciphisa amandla alowo ulutshaba. Kuye kwabancede ukuba bazive besondele ngakumbi kwiintsapho zabo kwaye bekufutshane neNkosi uYesu Krestu. Baye bafunda ukuba lo msebenzi awusindisi nje abafileyo kuphela; uyasisindisa sonke (bona IMfundiso&neMinqophiso 128:18).

Ulutsha lubambe umbono ngokuncomekayo; ngoku abazali babo kufuneka nabo bawubambe. Ngoku baninzi abantu abamkele ubhaptizo kwilizwe loomoya ngenxa yomsebenzi owenziwe lulutsha, kwaye balinde eminye imimiselo enokwenziwa ngabantu abadala kuphela kwiitempile zeli lizwe. Umsebenzi wokuhlanganisa usapho lukaBawo oseZulwini awuyonto yenzelwe abantu abatsha, kwaye ayenzelwanga oomakhulu nootatomkhulu. Yenzelwe wonke umntu. Sonke singabahlanganisi.

Lo ngumsebenzi wesizukulwana sethu, oko uMpostile uPawulosi akubiza ngokuba “ixesha lokuhlanganisela kokuzaliseka amaxesha,“ xa wayesithi uThixo uya “kuhlanganisela ndawonye zonke izinto ezikuKrestu, ezisemazulwini, kwanezisemhlabeni; kuye” (Kwabase-Efese 1:10). Oku kwenzeka ngenxa yomsebenzi wentlawulelo yoNyana kaThixo oyintanda, uYesu Krestu. Ngenxa yaKhe, amalungu osapho lwethu, “awayefudula ekude, athe aba kufuphi ngalo igazi likaKrestu . Kuba nguye oluxolo lwethu, yena uthe izinto zombini wazenza zaba nye, waluchitha ke udonga lothango oluphakathi ” (Kwabase-Efese 2:13–14). Ukuvile oku, njengam ndithe ndakuva, njengoko uthe wakuva ukwanda kothando njengoko ubujonge umfanekiso wesinyanya. Ukhe wakuva etempileni xa igama ekhadini lalikhangeleka ngathi lingaphaya nje kunegama, kwaye ubungenakunceda kodwa uqonde ukuba lo mntu uyakwazi kwaye uyaluva uthando lwakho.

Ndiyangqina ukuba uThixo uBawo ufuna abantwana Bakhe babuyele ekhaya kwakhona, kwiintsapho nasebuqaqawulini. UMsindisi uyaphila. Yena uyawukhokela kwaye uyawusikelele lo msebenzi, kwaye Yena usijongile kwaye uyasikhokela. Yena uyakubulela ngenkonzo yakho ethembekileyo yokuhlanganisa usapho lukaYise, kwaye ndiyakuthembisa ngoncedo oluphenjelelweyo olufunayo kwaye oludingayo. Egameni likaYesu Krestu, amen.