Kōtļo̧k bwe Jetōb eo en Tōl

Ro jeiū im jatū, n̄a, āinwōt aolepāmi wōj, kūle bwe jej lo libjerjer eo an jerbal eo an Irooj ilo Būreejtōn Thomas S. Monson im ennaan eo an kiiō jibbon̄. Būreejtōn Monson, kōmij iakwe eok, rejtake eok, im indeeo jar kōn kwe, “am rikanaan jitōnbōro.”¹

Kōm kar en̄jake jiōbtok eo an Jetōb eo ilo weekend in. Men̄e kwar pād ijin ilo im̧ōn kweilo̧k in eļap ak alooj jān im̧ōko ak koba ilo im̧ōn kweilo̧k ko ilo m̧ōttan ko an laļ in rettoļo̧k, eaar wōr ami iien em̧m̧an n̄an en̄jake Jetōb eo an Irooj. Jetōb eo ej kapen n̄an būruwōmi im ami lōmņak m̧ool ko kar katakin ilo kweilo̧k in.

Ļōmņak kōn naan ko an al in jejeļā kake:

Jān revelesōn ko raan kein jejeļā bwe Doulul in Anij eo ej ejaak in jilu armej ro reoktak im jeno̧lo̧k: Jemed ilo Lan̄; Nejin Jitōnbōro Emake Wōt, Jisōs Kraist, im Jetōb Kwojarjar. Jejeļā bwe “Jemān ewōr ānbwinnin kanniōk im di ko āinwōt maron̄ un̄ūr wōt ānbwinnin armej, Nejin barāinwōt, a Jetōb Kwojarjar ejjeļo̧k ānbwinnin kanniōk im di, a ej juon ānbwinnin Jetōb. Eļan̄n̄e ekar jab āindein, Jetōb Kwōjarjar eban kar maron̄ jokwe ilo kōj.”³

Ennaan eo aō rainin ej pedped ioon aorōk eo an Jetōb Kwojarjar ilo mour ko ad. Jemedwōj Ilan̄wōj ilo Lan̄eaar jeļā bwe ilo mour in jenaaj kar jelm̧ae apan̄ ko, ikurbalōklōk ko, im aen̄wān̄wā; Eaar jeļā jenaaj kar kobōk ippān kajjitōk ko, inepata ko, im kapok ko im m̧ōjņo̧ ko. N̄an letok n̄an kōj kajoor im tōl kwojarjar, Eaar letok Jetōb Ewojarjar eo, bar juon āt n̄an Jetōb Kwojarjar.

Jetōb Kwojarjar ej lukōj kōj n̄an Irooj. Kōn ijjitōn̄ kwojarjar eo, Ej kōketak kōj, kam̧ool, katakin, im im̧we kōj n̄an etetal ilo meram eo an Irooj. Ewōr ippād eddo eo ekwojarjar n̄an katak n̄an kile An kareel ilo mour ko ad im uwaaki.

Kememej kallim̧ur eo an Irooj: “Inaaj ajejewaj n̄an eok Jetōb eo Aō, eo enaaj kōmeram am ļōmņak, eo enaaj koobrak am kōn m̧ōņōņō.”⁴ Ij iakwe kean̄ in. Lan̄lōn̄ eo me ej kobrak jetōb ko ad ej bōktok ippān juon ļōmņak indeeo ilo jum̧ae jekjek ko aolep raan. Lan̄lōn̄ jab in ej itok āinwōt aenōm̧m̧an ilubwilijin apan̄ im rup bōro. Ej letok kaenōm̧m̧an im kōketak, m̧ool ko an gospel eo rej erļo̧k, im kōdepakpad ad iakwe n̄an Irooj im aolep ro nejin Anij. Men̄e aikuj eo n̄an kain kōjeram̧m̧an ko rekanooj eļļap, ilo elōn̄ wāween ko laļ in kar meļo̧kļo̧ki im kowaani.

Kajjojo wiik ilo ad bōk m̧ōttan kwojkwoj eo ekwojarjareojej kōm̧m̧an bujen n̄an “keememej e iien otemjej,” Irooj Jisōs Kraist, im en̄taan in pinmuur eo An. Ilo kōjparok bujen in ekwojarjar, kallim̧ur eo kar letok bwe “Jetōb eo An en maron̄ pād [ippād].”⁵

Ekōjkan ad maron̄ kōm̧m̧ane?

M̧oktata, jej kajieon̄ mour erreo n̄an Jetōb eo.

Jetōb Kwojarjar ej pād ippān ro me rej “niknik ilo keememej Irooj aer Anij jān raan n̄an raan.”⁶ Āinwōt an Irooj kar kapilōk, jej aikuj “likūtļo̧k men ko an laļ in, im kappukōt men ko rem̧m̧anļo̧k,”⁷ bwe “Jetōb eo an Irooj ej jab jokwe ilo tampeļ ko rejjab kwōjarjar.”⁸ Jej aikuj iien otemjej kajieon̄ pokake kien ko an Anij, ekkatak jeje ko rekwojarjar, jar, etal n̄an tampeļ, im mour m̧ool n̄an laajrak in tōmak ko eo kein kajōn̄ouljilu, “jejjet, m̧ool, erreo ilo ānbwin, jouj, wānōk, im … kōm̧m̧an em̧m̧an n̄an aolep armej.”

Kein karuo, jej aikuj m̧ōņōņō n̄an bōk Jetōb eo.

Irooj eaar kallim̧ur, “I naaj ba n̄an eok ilo ļōmņak eo am im ilo būruōm̧, jān Jetōb Kwojarjar, eo enaaj itok ioom̧ im eo enaaj pād ilo būruōm̧.”⁹ Iaar jino aō meļeļe menin ke iaar juon mijinede edik ilo Scotch Plains, New Jersey. Juon jibbon̄ in Juļāe bwil eo m̧ōtta im n̄a kar en̄jake im̧we n̄an pukōt juon rikkatak kar elletok in Temple Square eo. Kōm kar kōļaļļaļ ilo kōjām in m̧weo m̧ōn Elwood Schaffer. Mrs. Schaffer eaar jouj ilo an kar kōro̧o̧l kōm.

Ke liin eaar jino kiil kōjām eo, iaar en̄jake n̄an kōm̧m̧ane juon men ijjan̄in kar wōjake m̧okta im kar jab bar kōm̧m̧an jān iien eo! Iaar likūt neeō ilo kōjām eo im kajjitōk, “Ebar wōr ke emaron̄ m̧ōņōņō ilo ennaan eo am? Leddik eo 16-iiō dettan nejin, Marti, eaar wōr juon an itok limo, im eaar kanooj jar kōn tōl juon raan m̧oktaļo̧k. Marti eaar ioon kōm, im āliktata, jinen eaar koba tok ilo katak ko. Erro jim̧or kar koba tok ilo Kabun̄ in.

Pija

Elder Rasband āinwōt juon mijinede

Tōprak eo jān peptaij eo an Marti, 136 armej, ekoba elōn̄ ro uwaan baam̧le eo an make, kar peptaij im kar kōm̧m̧an bujen ko an gospel eo. Ekanooj ļap aō kam̧oolol bwe iaar ron̄jake Jetōb eo im likūt neeō ilo kōjām eo ilo Juļae eo ebwil. Marti im juon oran ro uwaan baam̧ļe eo rej pād ijin rainin.

Kein kajilu, jej aikuj kile Jetōb eo n̄e ej itok.

Jeļā eo aō eaar bwe Jetōb eo ekanooj emakijkij an ekōnono tok āinwōt juon en̄jake. Kwoj en̄jake ilo naan ko me kwoj kili ļo̧k, bwe rej meļeļe n̄an kwe, me “reim̧we eok.” Ļōmņak kōn uwaak eo an RiNipai ro ke raar ron̄jake an Irooj jar kōn er: “Im jarlepju eo eaar ron̄ im kar jeje; bwe burueer raar peļļo̧k im raar meļeļe ilo burueer naan ko eaar jar.”¹⁰ Raar en̄jake ilo būruwāer naan ko an jar eo An. Ainikien Jetōb Kwojarjar emera im dik.

Ilo kallim̧ur M̧okta, Ilaija ekar jum̧ae pris ro an Baal. Pris ro raar kōtmene “ainikien” Baal en walaļtak āinwōt jourur im tile katok eo aer kōn kijeek. Bōtaab eaar ejjeļo̧k ainikien, im eaar ejjeļo̧k kijeek.¹¹

Ilo juon iien tokālik, Ilaija eaar jar. “Im, lo, Jeova ear eļļā jān e, im juon kōto eļap im e kajoor ear ko̧kkure toļ eo, im rupe dekā ko im̧aan Jeova; a Jeova ear jab pād ilo kōt eo: im ālkin kōto eo, e m̧akūtkūt laļ; a Jeova ear jab pād ilo an laļ m̧akūtkūt:

“Im ālikin an m̧akūtkūt laļ juon kijeek; a Jeova ear jab pād ilo kijeek eo: im ālikin kijeek eo juon ainikien e dik im e mera.”¹²

Kwojeļā ke ainikien jab in?

Būreejtōn Monson eaar katakin, “Ilo ad jibadōk em̧m̧akūt eo an mour in, kōm̧m̧an bwe jān katak kajin eo an Jetōb.”¹³ Jetōb eo ej kōnono naan ko jej en̄jake. En̄jake kien rej meeoeo, dik kōmājeje, n̄an kōm̧m̧ān jet men, n̄an ba jet men, n̄an uwaak ilo juon wāween em̧ool. Eļan̄n̄e jej bajjōk ak ņōbar kōj make kōn ekōjkan an men ko waļo̧k im jab kōņaan ukōti ilo ad kabun̄ jar im jab en̄jake jān men ko bwinnin laļ in, jenaaj lo ad make makunļo̧k ilo maron̄ eo ad n̄an en̄jake. Nipai eaar ba n̄an Laman im Lemuel, “Kom̧ ar ron̄ ainikien jān iien n̄an iien; im eaar kōnono n̄an kom̧ro ilo juon ainikien edik im emera, ak kom̧ ar jab eļļā jān en̄jake eo, jon̄an kom̧ ar jab maron̄ en̄jaki naan ko an.”¹⁴

Juun eo ļo̧k, iaar pād ilo juon ijjitōn̄ n̄an South America. Eaar dim 10-raan jikejuuļ in loļo̧k eo am n̄an Colombia, Peru, im Ecuador. Juon m̧akūtkūt in laļ eo eļap eaar m̧an buki, kakinejnej n̄oul taujin, kakkure im kōjeepepļo̧k im̧ōk im jukjukinpād ko ilo jikin kweilo̧k ko armej in Ecuador ilo Portoviejo im Manta. Iaar en̄jake im̧we n̄an kobaik ilo jikejuuļ eo am juon loļo̧k membōr ro rej jokwe ilo jikin ko. Kōn jorrāān n̄an iaļ ko, kōm kar jab jeļā n̄e kom̧ maron̄ tōpar ļo̧k ijōko. Ilo m̧ool, kar jiron̄ kōm bwe kōmij jab maron̄ in tōparļo̧k ijo, bōtaab im̧we eo eaar jab ilo̧k. Āinwōt juon tōprak, kōm kar jeraam̧m̧an im kar maron̄ in loļo̧k jikin kweilo̧k ko jim̧or.

Kōn kadu in kōjeļļā, iaar kōtmene jet wōt ritōl ro an priesthood eo ijo ren kar pād ilo iien aiin doon ko rejidimkij. Mekarta, kōm kar itakļo̧k ilo kajjojo stake center ko n̄an lo an kar obrak jikin jar eo jān im̧aan n̄an liktata. Jet raar membōr ro rekar pād rekajoor tata ilo eria eo, paineer ro me raar dim wōt n̄an Kabun̄ in, kōketak ro jet n̄an koba ippāer ilo kabun̄-jar im n̄an en̄jake Jetōb eo ilo mour ko aer. Jijet ilo jea ko im̧aan raar membōr ro me eaar jako jitōnbōro ro aer im ro riturier ilo m̧akūtkūt in laļ eo. Iaar en̄jake im̧we n̄an leļo̧k juon kōjeram̧m̧an an rijilōk ioon aolep ro raar pād, eo kein kajuon tata in aō leļo̧k. Men̄e iaar jutak im̧aan ruum̧ eo, eaar āinwōt eļan̄n̄e peiū eaar pād ioon kajjojo bōraer im iaar en̄jake naan ko Irooj eaar lutōk leplepi.

Pija

Elder im Sistert Rasband ilo South America

Eaar jab bōjrak ijo. Iaar en̄jake im̧we n̄an kōnono n̄an er āinwōt n̄e Jisōs Kraist eaar kōm̧m̧ane ke eaar loļo̧k armej ro ilo Amedka. “Eaar bōk ro reddik nejier … im kōjeraam̧m̧an er, im jar n̄an Jemān kōn er.”¹⁵ Kōm kar pād ilo Ecuador, kōm kar kōm̧m̧ane jerbal eo an Jemed, im rein raar ro Nejin.

Kein kemen, jej aikuj jerbale im̧we eo im̧aan tata.

Kememej naan ko an Nipai. “Im Jetōb eo eaar tōl eō, jab jeļā m̧okta men ko in kar kōm̧m̧ani. Merakta,” eaar ba, “iaar wōnm̧aanļo̧k.”¹⁶

Im kōn menin jej aikuj. Jej aikuj lōke ilo im̧we ko ad im̧aantata. Jet iien jej jekpenņae, jej ļōmņak eļan̄n̄e jej en̄jake juon m̧weiur ilo jetōb ak eļan̄n̄e ej ad ļōmņak ko make. N̄e jej jino kajjitikin, ļōmņak alen jilu en̄jake ko ad—im aolep ko ewōr ippād—jej kōmakunļo̧k Jetōb eo, jej kajjitikin kapilōk eo ekwojarjar. Rikanaan Joseph smith eaar ba, “Eļan̄n̄e kwonaaj ron̄jake im̧we ko im̧aan tata, enaaj jim̧we am̧ būki ratimjuon alen in jōn̄oul.¹⁷

Kiiō juon kakkōl: jab kōtmene kōjeraam̧m̧an kōnke kwar uwaak n̄an Jetōb Kwojarjar. Keememej, kwoj ļoor jerbal eo an ainikien eo emera edik.

Ke kar jerbal āinwōt juon mijen būreejtōn ilo New York City, iaar pād ippān jet iaan mijinede ro am ilo juon im̧ōn m̧ōn̄ā ilo Bronx. Juon baam̧le edik eaar deļo̧n̄ tok im jijet epaake kōm. Raar alikkar tok āinwōt ro repojak n̄an bōk gospel eo. Iaar alooje an mijinede ro am ke raar wōnm̧aanļo̧k wōt im pād ippa, innām kar kile ke baam̧le eo eaar kadedeļo̧k iien m̧ōn̄ā eo aer im diwōjļo̧k ilo kōjām eo. Innām iaar ba, “Elder ro, ewōr juon katak ijin rainin. Kwar lo juon baam̧ļe em̧m̧an eaar deļōn̄ tok ilo restaurant in. Ta eo jemaron̄ kar kōm̧m̧ane?

Juon iaan elder ro eaar m̧ōkaj an kōnono: “iaar ļōmņak in kar jutak im etal im kōnono ippāer. Iaar en̄jake im̧we eo, ak iaar jab ron̄jake.”

“Elder ro,” iaar ba, “jej aikuj iien otemjej jerbale im̧we eo ad im̧aan tata. Im̧we eo kwar en̄jake eaar Jetōb Kwojarjar!”

Im̧we ko im̧aan tata rej im̧we erreo jān lan̄. N̄e rej kapen ak kam̧ool n̄an kōj, jej aikuj kile er kōn ta eo rej jutak kake im jab n̄an jidik likjab in kūli. Ekanooj emakijkij, ej Jetōb eo ej im̧we kōj n̄an pukōtļo̧k juon eo ej pād ilo aikuj, baam̧le im ro m̧ōttad eļap tata. “Aaet … ainikien elur im mera, eo ej unoojdikdik im wākar men ko otemjej,”¹⁸ bōkļo̧k kōj n̄an iien ko rem̧m̧an n̄an katakin gospel eo, n̄an kwaļo̧k naan in kam̧ool kōn Jepļaaktok eo im Jisōs Kraist, n̄an letok rejtak im n̄ūrbōktak, im n̄an lo̧mo̧o̧ren juon nejin Anij eaorōk.

Ļōmņak kake āinwōt kar ta eo ņa etan eo im̧aan tata n̄an uwaak. Ilo enan̄in jukjukin pād ko ro im̧aan tata rej uwaake juon jorrāān ļapļap, jorrāān, ak jerata rej rikkun kijeek ro, būļijmen opija ro, paramedic ro. Rej itaakļo̧k kōn tōmak ko rejaromrom, im imaron̄ ke kakobaba, jekanooj in kam̧oolol kōn er. Wāween eo an Irooj ejjab kanooj alikkar bōtaab ejjeļo̧k oktak aikuji uwaak eo em̧ōkaj tata. Irooj ejeļā iakuj ko an aolep ro Nejin—im Ejeļā wōnwoeo epojak n̄an jipan̄. Eļan̄n̄e jej kōm̧m̧an bwe Irooj en jeļā ilo jar in jibbon̄ ko ad bwe jej pojak, Enaaj kūr kōj n̄an uwaak. Eļan̄n̄e jej uwaak, Enaaj kūr kōj kiiō im tok ālik im jenaaj lo kōj make ilo ta eo Būreejtōn Monson ej ņa etan “jerbal eo an Irooj.”¹⁹ Jenaaj ilo jetōb ro im̧aan tata rej uwaak bōktok jipan̄ jān ilan̄.

Eļan̄n̄e jej leļo̧k ad n̄an im̧we ko me rej itok n̄an kōj, jenaaj eddōkļo̧k ilo jetōb in revelesōn im bōk lōn̄ļo̧k im lōn̄ļo̧k en̄jake im tōl an Jetōb. Irooj eaar ba, “Likūt am lōke ilo Jetōb eo ej tōlļo̧k n̄an kōm̧m̧ān jim̧we.”²⁰

Kōm̧m̧an bwe jān bōk ilo m̧o̧ol kūr eo an Irooj n̄an “kom̧win m̧ōņōņō, bwe Inaaj tōlļo̧k kom̧.”²¹ Ej tōl kōj kōn Jetōb Kwojarjar eo. Kōm̧m̧an bwe jān mour epaakeļo̧k Jetōb eo, m̧ōkaj jerbali im̧we ko ad im̧aan tata, jeļā rej itok jān Anij. Ij kwaļo̧k kam̧ool kōn kajoor eo an Jetōb Kwojarjar n̄an tōl kōj, mije kōj, im indeeo pād ippād, ilo etan Jisōs Kraist, amen.