Hom mfa Gyedzi nyɛ Ndaamba Etuu
Ndaamba no bɛyɛ enyimnyam ama hɔn a wɔayɛ ahoboa na wɔkɔ do yɛ ahosiesie dɛ wɔbɛyɛ edwindadze wɔ Ewuradze ne nsa mu.
Iyi ayɛ ewimbir a werɛ nnkefir. Me nkyerɛbaa adɔfo, ɔyɛ me enyimnyamhyɛ dɛ menye hom wɔ ha! Hom ada m’adwen do, mber pii mu, wɔ abosoom kakra a abɛsen yinom mu no. Hom dodow abor ɔpepe awɔtwe. Hom nnyi ɔdodow no nko, mbom sunsum mu tum a hom dze bɛsesã wiadze no. Mahwɛ hom dɛ hom reyɛ dɛm wɔ wiadze nsan yarba ber yi mu.
Mpofirmu ara nna hom mu binom rohwehwɛ ndzɛmba a ho ayɛ nã anaa edwuma fofor. Pii kyerɛkyerɛɛ mbofra adze na wɔhwɛɛ fipamfo do. Binom gyee asɛmpasomafo baa fie ntsɛm kyɛn mbrɛ enyi da, binom sesãa hom efiefi yɛɛ no asɛmpasomafo ntsetsee asoɛe. Hom dze abaefo mfir nye ebusua na anyɛnkofo, hɔn a hom som hɔn a wɔayɛ ankonam no edzi ehyia, na hom nye binom esũa Come, Follow Me. Hom ehu akwan fofor ahorow a hom ma Ahomgyeda no yɛ enyigyedze. Hom ayɛ nkataenyim bambɔdze—ɔpepe!
Medze ayamuhyehye na ɔdɔ no, m’akoma gyam mbaa piinara a wɔwɔ wiadze yi mu a hɔn adɔfo ewuwu. Yɛnye hom sũ. Na yɛbɔ mpaa ma hom. Yɛkamfo na yɛbɔ mpaa ma hɔn nyina a wɔyɛ edwuma dzen bɔ binom hɔn apɔwmudzen ho ban.
Hom young women so hom ayɛ nwanwa. Wentwiwentwi ebu do wɔ social media do dze, naaso hom mu dodow ehu akwan ahorow a hom hyɛ binom nkuran na hom kyɛ hɛn Agyenkwa ne kan no.
Nkyerɛbaa, hom nyina ayɛ ekunyin mapã! Hom ahoɔdzen na hom gyedzi nyɛ me nwanwa. Hom akyerɛ dɛ nkõdzen gyinabew mu no, hom kɔ kan akokodur mu. Modɔ hom, na misi no tadua ma hom dɛ Ewuradze dɔ hom na Ohu edwuma akɛse a hom reyɛ no. Yɛda hom ase! Bio no, hom akyerɛ dɛ hom nye Israel enyidado ankasa no!
Hom gyina hɔ ma enyidado no a President Gordon B. Hinckley nyae ma hom no ber a oyii “Ebusua no: Dawurbɔ a wɔdze ma Wiadze” no n’enyim mfe 25 a abɛsen no wɔ Fankwa afe 1995 mu wɔ wiadze mfɛndzanan Relief Society nhyiamu ase no.1 Ɔyɛ adze tsitsir dɛ ɔsaan mu yii dɛ obeyi mpaamukã yi no hia yi enyim akyerɛ Asɔr no mu mbaa no. Ɔyɛɛ dɛm no, President Hinckley ada no edzi dɛ mbaa hɔn nhyɛdo tum wɔ Ewuradze ne nhyehyɛɛ mu no wonnkotum ennya nhyɛananmu.
Afei, mebɛpɛ dɛ mubohu dza hom esũa wɔ afe yi mu. Ana hom atwe abɛn Ewuradze, anaa hom tse dɛ hom akɔ ekyirekyir efi Ne nkyɛn? Na dza ndɛ orisisi yi osi dɛn na ɔma hom atsenkã yɛ hom wɔ ndaamba ho?
Yɛgye to mu dɛ, Ewuradze akã nsɛm a ɔfa hɛn nda yi ho a ɔyɛ hu kakra. Ɔbɔɔ kɔkɔ dɛ hɛn da yi mu no “nyimpa bɔtɔ akɔtɔmborɔnsa”2 na sɛ ɔbɛyɛ a mpamufo no mpo wɔbɛdaadaa hɔn.3 Ɔkãa kyerɛɛ Nkɔnhyɛnyi Joseph Smith dɛ “wobeyi asomdwee efi asaase do”4 na mbusu bɛba adasamba wɔ asaase do.5
Naaso Ewuradze ama enyido-adzehu so a ɔkyerɛ mbrɛ mberano yi besi bɛyɛ nwanwa. Okenyaan Nkɔnhyɛnyi Joseph Smith ma ɔpaa mu kãa dɛ “Edwuma [no] wɔ nda a odzi ekyir yinom mu no, yɛ adze kukuankoma. … Wonnkotum akyerɛ n’enyimnyam, na no nwanwa bor adzebiara do.”6
Sesei, bia nwanwa nnkɛyɛ kasafua edze bɛkyerɛ abosoom kakra abyɛsen yinom yi! Yebesi dɛn bɛdze nyikyerɛɛ kusuww na enyimnyam ebien nyina a wɔakã afa hɛn da yi ho edzi dwuma? Ewuradze ase hɛn ara na Ɔma hɛn awerɛhyɛmu dɛ “sɛ hom ayɛ ahosiesie a, hom nnkosuro.”7
Anohoba bɛn nye yi! Ɔyɛ dza obotum asesã mbrɛ yesi hu hɛn ndaamba no koraa. Ndaansa yi matse ɔbaa bi a ɔwɔ dasegye ara yie gyee too mu dɛ, wiadze mu nsan yarba no nye asaase-wosow a osii Salt Lake Bɔnsa mu no, aboa no ma oehu dɛ saana ɔnnyɛɛ ahosiesie yie dɛ mbrɛ ɔdwenee no. Ber a mibisaa no dɛ ɔkyerɛ n’edziban nsiei anaa ne dasegye no, ɔyerɛɛw n’ano na ɔsee dɛ, “Nyew!”
Sɛ ahosiesie na gyedzi nye hɛn saafee a yɛdze bɛyɛ mberano yi na hɛn ndaamba yi etuu a, yebesi dɛn ayɛ ahosiesie a odzi mu?
Mfe du mfe du mu no, Ewuradze no nkɔnhyɛfo etu hɛn fo dɛ yɛmfa edziban, nsu, na sika nsie mma ber a ohia mu. Sesei wiadze mu nsan yarba no esi dɛm afotu yi ne nyansaa no pi. Motu hom fo dɛ hom ntu anamɔn nyɛ ahosie honandua mu. Mbom hom sunsum na nkã-tse ahosiesie na modwen ho mpo.
Dɛm no, yebotum esũa pii efi Ɔsahen Moroni hɔ. Dɛ ɔyɛ Nephifo nsordaafo panyin no, ohyiaa akõ dɔm a woritsia no a hɔn ahoɔdzen, dodow, na tsirmuɔdzen kyen no nkorɔfo. Ntsi, Moroni siesie no nkorɔfo wɔ akwan ebiasa a ohia papaapa mu.
Odzi Kan, ɔboaa hɔn ma wɔyɛɛ mbea a wobenya bambɔ—ɔfrɛɛ hɔ “bambɔ mbea.”8 Otsĩa Ebien, osiesie “nkorɔfo adwen ma woedzi nokwar ama Ewuradze.”9 Na otsĩa ebiasa, oenngyaa da dɛ orisiesie no nkorɔfo—honandua mu anaa sunsum mu.10 Hom mma yensusu fapem ebiasa yinom.
Fapem Nkanee Kor: Hom Nyɛ Bambɔ Mbea.
Moroni dze dɛtse sisii, akõ ban nkakraba, na afasu dze gyegye ban wɔ kuropɔn biara ho.11 Ber a Lamanfo no tuu hyɛɛ hɔn do no, hɔn “abaw guraa mbordo, osian Nephifo no hɔn nyansaa a wonyae dze bɔɔ hɔnho ban no ntsi.”12
Dɛmara so, ber a basabasayɛ asɔr wɔ hɛnho aporow no ohia dɛ yɛyɛ bambɔ mbea a yenya ahotɔ, honandua mu na sunsum mu. Sɛ hom efiefi bɛyɛ ankorankor gyedzi krɔnkrɔn bea—bea a Sunsum no tse a—hom efiefi bɛyɛ akõban a odzi kan.
Dɛmara so, Zion stake horow no yɛ … “guandɔbea ma hom wɔ ehum [ho]”13 osiandɛ hɔn a wokita asɔfodzi nsaafee na wɔdze asɔfodzi tumdzi dzi dwuma na wodzi bano. Ber a hom kɔ do dzi afotu a hɔn a Ewuradze ama hɔn tumdzi dɛ wɔma wo kwankyerɛ no, ibenya bambɔ ho atsenkã kɛse.
Temple no—Ewuradze ne fie no—yɛ bambɔ bea a ne sasõ nnyi hɔ. Hɔ no, hom nkyerɛbaa nya asɔfodzi tum mu adom akyɛdze a odua asɔfodzi ayɛdze krɔnkrɔn no a hom yɛ no mu.14 Hɔ no, wɔsɔw hom ebusua ebusua ano afebɔɔ. Afe yi mu mpo no, ber a kwan a wɔdze kɔ hɛn temple horow mu no do etwa koraa no, hom adom akyɛdze ama hom Nyankopɔn no tum ho kwan aber nyina ber a hom edzi ahyɛmudzi a hom nye No edzi no nyi.
Ne sin ara nye, bambɔ bea nye beebiara a ibotum atse Sunsum Krɔnkrɔn ne nkã dɛ ɔbɛn wo na Ɔama wo kwankyerɛ.15 Sɛ Sunsum Krɔnkrɔn no wɔ wo nkyɛn a, ibotum akyerɛkyerɛ nokwar no, sɛ otsia adwenkyerɛ horow a wɔatahye mpo a. Na ibotum adwendwen akoma mu nsɛmbisa a ɔfa asɛmpa no ho wɔ nyikyerɛ ehuu mu.
Me nkyerɛbaa adɔfo, moto nsa frɛ hom dɛ hom nkyekyer fie a ɔyɛ bambɔ bea. Na mekenyan me nsato ma hom dɛ hom ntow hom ntseasee mu wɔ asɔfodzi tum na temple ahyɛmudzi na nhyira horow no ho. Hom rinya bambɔ mbea a hom botum atwe akɛhyɛ hɔ no bɔboa hom ma hom dze gyedzi ayɛ ndaamba etuu.
Fapem Nkanee Ebien: Hom Nsiesie Hom Adwen dɛ Hom Bedzi Nokwar ama Nyankopɔn.
Yɛahyɛ edwuma kɛse ase dɛ yɛbɛtra Salt Lake Temple no ne mfe a obegyina na n’ahoɔdzen mu.
Binom bisaa siantsir a ohia dɛ yɛfa kwan soronko do yɛ dɛm. Naaso, ber a Salt Lake Bɔnsa no nyaa asaase-wosow a ne dzen yɛ 5.7 afe yi ahyɛse no, ɔwɔsow temple yi a ɔagye dzin pa yi ara ma ɔbɔfo Moroni no totorobɛnto no tɔe!18
Tse dɛ ma Salt Lake Temple ne fapem no otwar dɛ ɔyɛ dzen a obotum egyina ɔdomankoma esian ano no, hɛn sunsum mu fapem horow otwar dɛ ɔyɛ botantsim. Nkyii, asɛnkã ara, sɛ asaase-wosow wosow hɛn abrabɔ a, yebotum egyina “pintsinn na yennhihim” osian hɛn gyedzi ntsi.17
Ewuradze kyerɛkyerɛɛ hɛn mbrɛ yebesi bɛma hɛn gyedzi enyin ber a yɛper hwehwɛ “sũa nwoma na [ye]dua adzesua mpo nye gyedzi so do.”18 Yɛhyɛ hɛn gyedzi dzen wɔ Jesus Christ mu ber a yɛbɔ mbɔdzen dɛ yesie Ne mbrasɛm na “ [yɛa]kaa no aber nyina.”19 Bio no, hɛn gyedzi yɛ kɛse ber biara yɛdze gyedzi wɔ Christ mu no dzi dwuma. Edze gyedzi rusũa adze n’asekyerɛ nye yi.
Mfatoho, ber biara yenya gyedzi dɛ yɛbɛyɛ setsie ama Nyankopɔn Ne mbrasɛm—ber mpo a adwenkyerɛ a wɔayɛ atsenkã brɛ hɛn adze—anaa ber biara yetsia enyikãdze anaa adwenkyerɛ horow a wotuw wɔ ahyɛmudzi no mbu do no, nna yɛdze hɛn gyedzi ridzi dwuma a ɔma hɛn gyedzi kɔ sor.
Bi so, ndzɛmba kumaabi na ɔtow gyedzi mu kyɛn yɛtaa dze hɛnho hyɛ Mormon Nwoma no mu. Nwoma biara nnyi hɔ a ɔdze tum na pefeeyɛ gye Jesus Christ ho dase kyɛn no. Dɛ mbrɛ Ewuradze kenyaan no nkɔnhyɛfo no, wohun hɛn nda yi na woyiyii nkyerɛkyerɛ na nokwar horow a ɔbɔboa hɛn papaapa. Mormon Nwoma no nye hɛn nda a odzi ekyir sunsum mu abambɔ ho kwankyerɛ.
Nokwar hɛn bambɔ mapã no ba ber a yɛdze hɛnho bata Ɔsor Egya na Jesus Christ ho. Suro hyɛ abrabɔ a Nyankopɔn nnyi mu no mã. Asomdwee hyɛ abrabɔ a yɛnye Nyankopɔn mu no mã. Iyi ba osiandɛ sunsum mu nhyira horow ba anokwafo do. Irenya ankorankor nyikyerɛ nye nhyira no mu dza ɔsõ kɛse no kor.
Ewuradze abɔ anohoba dɛ sɛ yebisa a, yebenya “nyikyerɛ mu nyikyerɛ.”20 Mobɔ anohoba dɛ ber a hom tu hom tum a hom dze nya nyikyerɛ mpon no, Ewuradze dze hom abrabɔ ho kwankyerɛ mapã bɛma hom nye Sunsum akyɛdze a onnyi kabea.
Fapem Nkanee Ebiasa: Mma Nngyaa Ahosiesie Ara Da.
Ndzɛmba kɔɔr do yie mpo no, Ɔsahen Moroni kɔɔr do dɛ orisiesie no nkorɔfo. Oenngyaa dabiara da. Ɔannyɛ dɛ ɔmmfa no ho.
Ɔtamfo no nngyaa ɔsatu da. Ntsi, yennkotum egyaa ahoboa ara da! Mbrɛ yɛyɛ ahodan yie no—honandua mu, nkã-tse mu, na sunsum mu no—nna yɛayɛ ahoboa ara yie a yɛdze besiw Satan n’ekutukubɔ a onngyaa no.
Nkyerɛbaa adɔfo hom awea wɔ bambɔ mbea ne nyɛe ma homho na hɔn a hom dɔ hɔn. Bio so no, hom wɔ akyɛdze krɔnkrɔn a ɔma wotum ma binom hɔn gyedzi nyin wɔ akwan horow do.21 Na hom nngyaa dabiara da. Hom akyerɛ iyi bio wɔ afe yi mu.
Meserɛ, hom nkɔ do! Hom enyidahɔ a hom dze bɔ hom efiefi ban na hom ma gyedzi tahye wɔ hom adɔfo hɔn akoma mu no beyir ndɔbaa ebusuasantsen ebusuasantsen a ɔbɛba no.
Me nkyerɛbaa adɔfo yɛwɔ dodow a yɛbɔhwɛ no kan! Ewuradze dze hom ato ha sesei osiandɛ Onyim dɛ hom botum esiesie nda odzi ekyir yi mu nsɛnhia horow a ɔkyer do wɔ nda a odzi ekyir n’afã yinom mu. Nna Onyim dɛ hom bɛtse No ndwuma no nwanwa ho ase na hom aboa enyiber do dze abɔbɔ adze.
Mirinnkã dɛ nda a ɔreba no bɛyɛ mberɛw, mbom mobɔ hom anohoba dɛ ndaamba no bɛyɛ enyimnyam ama hɔn a wɔayɛ ahoboa na wɔkɔ do yɛ ahosiesie dɛ wɔbɛyɛ edwindadze wɔ Ewuradze ne nsa mu.
Me nkyerɛbaa adɔfo mma hom mma yennsɔw ndɛ hyɛber yi ara. Hom mma yɛmfa gyedzi nyɛ ndaamba etuu! Begyabegya mber ma hɛn kwan ma yentu mpon sunsum mu. Wɔyɛ mber a hɛn nhyɛdo botum ahɛnhɛn akyɛn mber a ataa dzinn no.
Mobɔ hom anohoba dɛ ber a yɛkyekyer bambɔ mbea no, siesie hɛn adwen ma yedzi nokwar ma Nyame, na yenngyaa dabiarada dɛ yɛbɛyɛ ahoboa no, Nyankopɔn behyira hɛn. “Ɔbɛgye hɛn, nyew; Ɔakã asomdwee nsɛm akyerɛ hɛn akra, na Ɔama hɛn gyedzi kɛse, na … [ɔama yetum] enya enyidado wɔ no mu dɛ ɔbɛgye hɛn.”22
Ber a hom yɛ ahoboa dɛ hom dze gyedzi bɛyɛ ndaamba etuu no, anohoba yinom bɛyɛ hom dze! Megye ho dase, na mekyerɛ modɔ ma hom na m’awerɛhyɛmu wɔ hom mu, wɔ Jesus Christ ne dzin krɔnkrɔn mu, amen.