Ntɔyɛɛ Fofor

Mo nuanom na me nkyerɛbaa adɔfo, nda ebien wiadze mfɛndzanan ehyiadzi yi ayɛ enyimnyam! Menye Elder Jeffrey R. Holland yɛ adwen. Tse dɛ mbrɛ ɔkãe no, nsɛmkã no, mpaabɔ, na ndwom no nyina Ewuradze na okenyanee. Meda hɔn nyina a woedzi ho dwuma wɔ kwan biara do no ase.

Nhyiamu no rokɔ nyina no, metwa hom mfonyin wɔ m’adwen mu a hom retsie ehyiadzi yi. Mebisa Ewuradze dɛ Ɔmboa me ma mentse hom atsenkã ase, dza ɔrehaw hom anaa hom robɔ mbɔdzen esiesie. Madwen dza mebɛkã dze ehyiadzi yi aba ewiei a ɔnye hom befir edzi akɔ a, hom dze enyidado wɔ ndaamba a minyim dɛ Ewuradze pɛ dɛ hom nya ho atsenkã no, rokɔ

Yɛtse enyimnyam mber mu, a nkɔnhyɛfo ehu no dadaw mfe ɔha mfe ɔha mu. Iyi nye berano a wɔremmfa sunsum mu nhyira biara nkam atseneneefo no.¹ Wiadze yi ne begyabegyayɛ mpo no,² Ewuradze bɛpɛ dɛ yɛdze “dɛwdzi hwɛ ndaamba kwan.”³ Mma hom mma yɛnngyina fakor nkaakaa dza abɛsen. Israel mboano no rokɔ do. Ewuradze Jesus Christ na Ɔkyerɛ N’Asɔr mu dwumadzi kwan, na obenya no botae krɔnkrɔn no.

Taferbanyin-mbɔmu a ɔwɔ hɔ ma emi na ɔwo nye dɛ yɛbɔhwɛ no yie dɛ hɛn mu kor biara benya ne ndaamba nkrabea. Ndɛ yɛtse dɛ wɔkã fa “ntɔyɛɛ fofor no” ho. Sɛ hom pɛ dɛ hom fua “ntɔyɛɛ fofor no” a, moto nsa frɛ hom dɛ hom ndan hom akoma, adwen, na ɔkra no nkɔ hɛn Ɔsor Egya na Ne Ba, Jesus Christ do ara yie. Hom mma ɔno nyɛ hom ntɔyɛɛ fofor no.”

Hom nnu homho daa daa mfa mfua hom ntɔyɛɛ fofor no. Hom nhwehwɛ ma hom adwendwen, nsɛmfua, na ndzeyɛɛ nkɔ do ara ho ntsew. Hom nsom binom. Hom nsie onnyiewiei nhumu. Hom ntu hom frɛ mpon. Na ɔhaw biara mu no, mo nuanom na nkyerɛbaa adɔfo, hom ntsena ase da biara ama hom ayɛ ahosiesie yie dɛ hom dze behyia hom Yɛfo.⁴

Dɛm ntsi na yɛwɔ temple horow no. Ewuradze n’ayɛdze na ahyɛmudzi no siesie hɛn ma onnyiewiei nkwa, akyɛdze a ɔsõ sen Nyame ne nhyira nyina.⁵ Dɛ mbrɛ hom nyim no, COVID nsan yarba no kehiaa dɛ yɛtoto temple horow no mu mber kakra. Nkyii yɛhyɛɛ ase dɛ ahwɛyie mu ara yerubuebue no esiado esiado. Temple fãara wɔ phase 2 mu a, wɔasɔw awarfo mpempem ano, na mpempem so enya hɔnankasa hɔn endowment wɔ ndaasa yi abosoom kakra ara mu. Yɛhwɛ da no kwan a, Asɔrmba a wɔfata no nyina botum akɔsom hɔn ewuakɔr bio na wɔasɔr wɔ temple krɔnkrɔn mu.

Ɔyɛ me enyigye dɛ mobɔ nhyehyɛɛ no dawur dɛ yebesisi temple afofor esia wɔ mbea a odzi do yinom: Tarawa, Kiribati; Port Vila, Vanuatu; Lindon, Utah; Greater Guatemala City, Guatemala; São Paulo East, Brazil; na Santa Cruz, Bolivia.

Ber a yesi na yesiesie temple yinom mu no, yɛbɔ mpaa dɛ hom mu kor biara besi na woesiesie nankasa noho ama ɔaafata dɛ ɔbɛhɛn temple. krɔnkrɔn mu.

Sesei, mo nuanom na nkyerɛbaa adɔfo, mihyira hom dɛ Ewuradze Jesus Christ n’asomdwee bɛhyɛ hom mã. N’asomdwee no bor honandua mu ntseasee koraa.⁶ Medze pɛ na tum kɛse a wɔdze besie Nyame ne mbrasɛm no hyira hom. Mobɔ hom anohoba dɛ ber a hom reyɛ no, nhyira bɔsosɔ hom do, a akokodur kɛse, ankorankor nyikyerɛ ntomu, na enyigye dɛɛdɛw wɔ hom efiefi, na dɛwdzi wɔ mber a yennyim dza ɔreba no mpo kã ho.

Hom ma yɛmbɔ mu nkɔ kan nhyɛ hɛn asɛdze krɔnkrɔn no mã—dɛ yebesiesie hɛnho na wiadze no ama Ewuradze Ne Mbae a Otsĩa Ebien no. Mobɔ ho mpaa, na mekyerɛ modɔ ma hom, wɔ Jesus Christ ne dzin krɔnkrɔn no mu, amen.