Jisu Karisito: Na Dauveiqaravi ni Yaloda

Oi kemuni na taciqu kei na ganequ lomani, ena mataka ni Siga ni Mate totoka oqo na lomaqu e marau niu vakananuma na cakacaka e rui veivakurabutaki, lagilagi ka sega ni vakamacalataki rawa sa mai yaco ena ivolatukutuku ni bula vakatamata—na veisorovaki ni solibula ni noda Turaga ko Jisu Karisito. Na veivosa kilai levu ni parofita ko Aisea e vakalevulevuya na cecere ni nona sega ni nanumi koya ga na iVakabula me lomasoli ka lako sobu mai ka cabora na nona bula ena vukudra na luvena kecega na Kalou:

“E dina sa colata ko koya na noda rarawa, ka sa colata na rarawa ni lomada; ia eda a vakalewa vua ni sa yaviti ka cudruvi mai vua na Kalou, ka vakararawataki.

“Sa vakamavoataki ko koya ena vuku ni noda talaidredre, ka sa qaqi ena vuku ni noda caka cala; sa tau vua na cudruvi sa vu ni noda veivinakati tale; ia ena we ni kena kuita eda sa vakabulai kina.”¹

Ena nona lomasoli me colata ko Koya na ivalavala ca ni kawatamata, vakakoti vakararawa ki na kauveilatai, ka rawai mate ena qaqa ena ikatolu ni siga,² e a vakaraitaka kina o Jisu edua na ibalebale bibi cake ni tabu ni cakacaka vakalotu ni Lakosivia ka vakatikori vei Isireli ena gauna makawa.³ Ena vakayacori ni parofisai, e a solia o Koya na yagona kei na nona dra talei me ilutua ka iotioti ni isoro,⁴ me vakadonui kina na vei ivakatakarakara ka dau vakayagataki ena marautaki ni Lakosivia ni Turaga.⁵ Ena nona cakava vakakina, e a sotava kina na Karisito na rarawa vakayago ka vakayalo talega ka dredre me vakadeuca rawa na vakanananu ni tamata. Na iVakabula vakataki Koya a kaya:

“Ia raica, koi Au na Kalou, au sa vakararawataki oti ena veika oqo ena vukudra kece.

“Na rarawa sa vakavuna vei au, na Kalou sara mada ga, ko Koya sa kaukauwa sara, me sautaninini ena vuku ni mosi, sa titiri kina na dra mai na qara kecega ni yagoqu, ka sa rarawa sara kina na yagoqu kei na yaloqu—ka gadreva meu kakua ni gunu mai na bilo wiwi, ka vakasuka—

“Ia me vakalagilagi ga ko Tamaqu, kau sa gunuva na bilo ka vakacavara na noqu vakavakarau vei ira na luve ni tamata.”⁶

E a mai vakayacora ena yalololoma o Karisito na loma i Tamada⁷ ena Nona isoro ni loloma cecere tawavakaiyalayala. E a rawa na batigaga ni mate vakayago kei na mate vakayalo,⁸ ka vakacurumi ki na vuravura ena Lutu,⁹ me rawa vei keda na vakabulai tawamudu.¹⁰

O Jisu duaduaga na ka Bula a rawa ni mai vakayacora na isoro tawamudu ka taucoko ena vukuda kece.¹¹ O Koya a digitaki ka lesi oti ena Bose Levu mai Lomalagi, ni bera ni buli na vuravura.¹² Me kena ikuri, ena Nona sucu mai vua edua na tina vakatamata, a rawa kina vei Koya me mate vakayago, ia mai vua na Kalou, me vaka ni a Luvena e Duabau ga ka Vakatuburi, a rawata mai kina na kaukauwa me solia na Nona bula ka taura lesu tale.¹³ Ka rawa talega kina vei Karisito me bulataka e dua na bula e taucoko ka sega ni tauvi duka ka, rawa kina, me vagalalataki mai na lawa ni lewa dodonu vakalou.¹⁴ Ena so na soqoni e vakatavulica na parofita o Josefa Simici:

“E sega ni rawa ni yaco mai e vuravura na veivakabulai kevaka e sega na veivakaduavatataki i Jisu Karisito.

Na Kalou … a vakarautaka e dua na isoro ena Nona solia na Luvena, o koya a talai mai ena kena gauna me … dolava e dua na katuba me na curuma yani na tamata ki na iserau ni Turaga.”¹⁵

Dina ga ni a mai vakatikitikitaka vakai Koya na iVakabula na revurevu ni mate vakayago ena Nona solibula,¹⁶ a sega ni kauta tani o Koya na noda itavi vaka tamata yadua meda veivutunitaka na ivalavala ca eda vakayacora.¹⁷ Ia, e sa vakatetea vei keda e dua na veisureti vakatabakidua meda veivinakati kei Tamada Tawamudu. Ena vuku i Jisu Karisito kei na Nona veisorovaki ni solibula, sa rawa me yaco kina vei keda edua na veisau levu ni vakasama kei na lomada, ka kauta mai edua na vakanananu vou, me baleta na kalou kei na bula raraba.¹⁸ Nida veivutunitaka ena yalodina na noda ivalavala ca, ka digitaka meda lomasoli ni talairawarawa ki na ivakaro ni Turaga, eda rawa ni ciqoma na Nona veivosoti ka vakila vakalevu sara na veivakayarayarataki ni Nona Yalo Tabu ena noda bula. Me kena ikuri, eda na levea noda sotava na titobu ni rarawa a sotava na iVakabula.¹⁹

Na isolisoli ni veivutuni e ivakaraitaki ni yalololoma ni Kalou vei ira na Luvena ka vakatakila na Nona kaukauwa sega ni vakatauvatani rawa me vukei keda meda rawa na ivalavala ca eda vakayacora. E ivakadinadina talega ni dauvosota kei na vosota vakadede nei Tamada dauloloma ena vuku ni noda malumalumu vakayago kei na noda dau rawai rawarawa. Na noda parofita lomani, o Peresitedi Russell M. Nelson, e vakatoka na isolisoli oqo me “sai koya na idola ki na marau kei na vakacegu ni vakasama.”²⁰

Kemuni noqui tokani lomani, au vakadinadinataka vei kemuni ni da veivutunitaka vakaidina na noda ivalavala ca,²¹ eda vakatara na veisorovaki ni solibula i Karisito me yaco me yaga vakalevu sara ena noda bula.²² Eda na sereki mai na veivakabobulataki ni ivalavala ca, ka kune marau ena noda ilakolako e vuravura, ka yaco me rawa ni ciqoma na veivakabulai tawamudu, ka vakarautaki tu mai na tauyavutaki ni vuravura vei ira kece na vakabauti Jisu Karisito ka lako mai vei Koya.²³

Me ikuri ni isolisoli cecere ni veivakabulai, sa vakarautaka talega vei keda na iVakabula na veivakadeitaki kei na veivakacegui nida sotava na veika rarawa, veitemaki, kei na malumalumu ni bula vakayago, ka oka kina na ituvaki eso eda lako curuma ena mate dewa ka takavi keda tiko oqo. Au rawa ni vakadeitaka veikemuni ni o Karisito e dau kila vinaka tu na veika dredre eda sotava ena bula vakayago. O Koya e kila taucoko tu na loma rarawa, na yaluma kei na mosi vakayago ka vakakina na bolebole eso ni lomada kei na yaloda eda sotava. Sa sinai na lomana na iVakabula ena loloma cecere, ka sa dau tu vakarau o Koya me vukei keda. Oqo e rawa baleta ni a sotava vakai Koya ka kauta vei Koya ena yagona na mosi ni noda malumalumu vakayalo ka vakayago talega.²⁴

Ena yalomalumalumu kei na yalomalua ni lomana sa lako sobu ki ra sara ka ciqoma me beci, cati ka vakasewasewani mai vei ira na tamata, ka sa vakamavoataki ena vuku ni noda talaidredre kei na caka cala. E a vosota na veika kece oqo ena vukudra na tamata kecega, taura vei Koya na ivalavala ca kecega ni kai vuravura,²⁵ ka yaco o Koya me noda dauniveiqaravi vakayalo.

Nida toro voleka ki vei Koya, soli keda vakayalo ki na nona veikaroni, ena rawa kina vei keda meda vakataqara vei keda na Nona ivua, ni sa rawarawa, kei na Nona i colacola, ni sa mamada, ka kunea kina na veivakacegui kei na vakacegu e yalataka. Me ikuri, eda na ciqoma na kaukauwa eda gadreva kece meda rawa na vei dredre, malumalumu, kei na rarawa ni bula, ka na dredre sara vakalevu meda vosota ke sega na kaukauwa ni Nona veivukei kei na veivakabulai.²⁶ Na ivolanikalou e vakavulica vei keda mo “biuta vei Jiova na nomui colacola bibi, ena tokoni iko ko koya”²⁷ “Ia ena vakamamadataka vei [keda] na Kalou na [noda] icolacola ena vuku ni veivakamarautaki [Ni] Luvena.”²⁸

iVakatakilakila

Regina kei Mario Emerick

Voleka na mua ni yabaki sa oti, au a kila kina na nodrau mai takali e dua na veiwatini lomani, o Mario kei Regina Emerick, ka rau dau yalodina vua na Turaga ka veisivi ga ena va na siga na nodrau mate, ena vuku ni bibi ni mate na COVID-19.

E dua vei iratou na luvedrau tagane, ka veiqaravi tiko vaka bisopi e Brazil ena gauna oqo, a talanoataka vei au na veika oqo: “ Sa dredre dina meu raica na nodrau takali na noqui tubutubu ena ituvaki vaka o ya, ia au a vakila na liga ni Turaga ena noqu bula ena loma ni nodrau mai takali, baleta niu a rawata na kaukauwa kei na vakacegu ka uasivia na noqu kila ka. Ena vuku ni noqu vakabauti Jisu Karisito kei na Nona Veisorovaki, au a ciqoma kina na veivuke vakalou me vukea ka vakaukauwataka na lewe ni noqu matavuvale ena ituvaki dredre o ya. E dina ni a sega ni yaco na caka mana era a nuitaka taucoko tiko me na yaco, au a vakadinadinataka vakai au na veisau ka yaco ena noqu bula kei na nodra bula na lewe ni noqu matavuvale. Au a vakila e dua na vakacegu e tawa vakamacalataki rawa ka laubasikata na lomaqu sara e loma, ka solia vei au na inuinui kei na lomadei ena loloma ni iVakabula vei au kei na ituvatuva ni marau ni Kalou vei ira na luvena. Au a vulica ni ena veisiga ni rarawa, na liga loloma ni iVakabula sa dau dodo tu ga ni da vakasaqarai Koya ena lomada, noda igu, nanuma kei na noda kaukauwa.”

iVakatakilakila

Matavuvale na Emerick

Kemuni na taciqu kei na ganequ lomani, ena Sigatabu ni Siga ni Mate oqo, au cavuta na noqui vakadinadina bibi ni o Jisu a tucaketale mai na mate ka sa bula tiko ko Koya. Au vakadinadinataka vei kemuni ni ena vukuna kei na Nona Veisorovaki ni solibula, a vakarautaka kina vei keda na iVakabula na sala meda rawa na mate, vakayago ka vakayalo talega. Me ikuri ni veivakalougatataki cecere, e solia talega vei keda o Koya na vakacegu kei na veivakadeitaki ena veigauna dredre. Au vakadeitaka vei kemuni ni da vakararavi vei Jisu Karisito kei na Nona Veisorovaki cecere, vosota ena noda vakabauta ki na ivakataotioti, eda na marautaka na veiyalayala eso nei Tamada Vakalomalagi lomani, o Koya e vakayacora na veika kecega me vaka na Nona kaukauwa me vukei keda meda lesu ki na Nona i serau ena dua na siga. Oqo na Nona cakacaka kei na Nona lagilagi!²⁹ Au vakadinadinataka vei kemuni ni o Jisu na Karisito, na Dauveivueti kei vuravura, na Mesaia yalataki, na vu ni tucaketale kei na vu ni bula.³⁰ Au wasea na vei dina oqo vei kemuni ena Yacana tabu, o koya ka Vakatuburi maivei Tamana, na noda Turaga, ko Jisu Karisito, emeni.