Jun tiikil sik’ok q’ajkamunb’il
Nintz’aama naq taqakawob’resi li qapaab’aal chirix li Kristo, li toj yoo chixjalb’al xyu’ameb’ li neke’sik’ok re.
Sa’ xtiklajik li chihab’ 1846, k’iila mil li pionero winq, ixq ut kok’al xkoheb’ toj aran Sion. Li xnimal xpaab’aaleb’ kixk’e xkawil xch’ooleb’ li maak’a’ roso’jik. Choq’ re junjunq, lix b’eenikeb’ maajun wa’ kiraqe’ xb’aan naq ke’kam chiru li b’e. Naab’aleb’, ke’xnumsi naab’al li ch’a’ajkilal, a’b’an xkoheb’ chi uub’ej rik’in paab’aal.
B’antiox reheb’ a’an, k’iila cient chihab’ chik chirix, lin junkab’al kixyal xsahileb’ li osob’tesink re lix tz’aqal evangelio li Jesukristo.
Jo’ jun chik li ch’ajom tinye resil moqon, wan kaalaju chihab’ we naq kin’ok chi patz’ok chirixeb’ li iglees ut lin paab’aal. Kinwulak sa’ jun li iglees nach’ rik’in li wochoch, a’b’an xweek’a naq nawaj rula’aninkil naab’aleb’ chik li iglees.
Jun ewu, kiwil wiib’eb’ li ch’ajom chaab’il tiqb’ileb’ rik’in saqi kamiis, ke’ok sa’ li rochoch li wech kab’al. Eb’ li ch’ajom a’an—jalaneb’.
Wulajaq kiwil li wech kab’al, xLeonor Lopez xk’ab’a’, ut kinpatz’ re aniheb’ li wiib’ chi ch’ajom. Li xLeonor kixch’olob’ naq a’aneb’ li misioneer re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan. Chi sa xch’ool kixye we naq lix junkab’al ke’kub’e xha’ chiru li chihab’ kinume’. Naq kixk’e reetal li wajom, li xLeonor kinixb’oq chixnawb’aleb’ ru li misioneer ut chi tzolok chirix li iglees.
Wiib’ kutan chirix a’an, kinch’utub’ wib’ rik’in li junkab’al Lopez re xnawb’aleb’ ru li misioneer. Ke’xye naq a’aneb’ laj Elder John Messerly, aj Ogden, Utah, ut laj Elder Christopher Osorio, aj Walnut Creek, California. Maajun wa’ te’sachq sa’ inch’ool.
Xb’aan naq laa’in kaalaju chihab’ ajwi’ wan chaq we, laj Elder Messerly kixye naq tooxik sa’ li wochoch re naq lin na’ tixnaw li k’a’ru yookin chixtzolb’al. Aran, kixch’olob’ naq ke’chal re xwotzb’al jun esil chirix li Jesukristo ut ke’xpatz’ lix liceens re naq te’ruuq chixk’utb’al li esil a’an chiwu. Lin na’ kixsumela ut jo’kan ajwi’ kitz’aqon sa’ li tzolok.
Eb’ li misioneer xb’een wa ke’xpatz’ re li xLeonor naq tixk’e junaq li tij. A’an tz’aqal kixtoch’ inch’ool xb’aan naq lix tij moko aatin ta k’uulanb’il sa’ xchool, a’an b’an aatin li na’el sa’ xch’ool. Kiweek’a tz’aqal naq yoo chi aatinak rik’in lix Choxahil Yuwa’.
Eb’ li misioneer koohe’raatina chirix li Jesukristo. Ke’xk’ut jun li jalam-uuch chirix a’an li kiwulak chiwu xb’aan naq a’an jun xjalam-uuch li Kristo naq kiwakli chi yo’yo.
Ke’xk’ut ajwi’ chan ru naq li Jesus kixk’ojob’ lix Iglees sa’ xtiklajik, chi jolominb’il xb’aan a’an rochb’eeneb’ kab’laju chi apostol. Ke’xk’ut chiqu k’a’ru li nimla Q’etok Paab’ank—chan ru naq li yaal ut lix wankilal li Kristo kisach sa’ xb’een li ruchich’och’ chirix naq eb’ lix apostol ke’kam.
Koohe’raatina chirix jun li ch’ajom li wan chaq kaalaju chihab’ re, ut lix k’ab’a a’an laj Jose Smith, sa’ xtiklajik chaq li siglo XIX, ut naq a’an kirula’ani chaq naab’al li iglees re xtawb’al li yaal. Chiru xnumik li hoonal, laj Jose kisach xna’leb’ chi us. Chirix naq kiril sa’ li Santil Hu naq naru “taqapatz’ qana’leb’ re li Dios,”1 laj Jose, rik’in xpaab’aal, xko’o sa’ jun li k’iche’ re tijok ut xpatz’b’al b’ar wan li iglees yaal.
Jun reheb’ li misioneer kiril ru li kixk’ul laj Jose naq yoo chi tijok:
“Kiwil jun xaqal li saqen, tz’aqal chixb’een injolom, li naxq’ax xlemtz’unkil ru li saq’e, li kikub’e chi timil timil toj reetal naq kikana sa’ inb’een.
“… Naq kihilan saʼ inbʼeen li saqen, kiwil wiibʼ chi Winq, li inkʼaʼ naru chi yeemank chanru xlemtzʼunkilebʼ ru ut xloqʼalebʼ, xaqxookebʼ chi kutankil saʼ inbʼeen. Jun rehebʼ kinraatina, kixpatzʼ inkʼabʼaʼ, ut kixye, rikʼin xkʼutbʼal chi ruqʼ li jun chik—Aʼin li Walal Raaro Inbʼaan. Chawab’i a’an!”2
Chiru li tzolok a’an, li Musiq’ej kixk’ut chiwu naab’al li yaal.
Xb’een, li Dios narab’i lix tijeb’ li ralal xk’ajol, ut naq li choxa teeto choq’ reheb’ chixjunil—ink’a’ ka’ajwi’ choq’ reheb’ jarub’aq.
Xkab’, li Dios Yuwa’b’ej, li Jesukristo, ut li Santil Musiq’ej oxib’eb’ chi winq, junajeb’ rik’in li rajom “xk’eeb’al chi uxmank lix kolb’al chiru li kamk ut lix yu’am chi junelik li winq.”3
Rox, yo’ob’tesinb’ilo jo’ chanru xjalam-uuch li Dios. Li qaChoxahil Yuwa’ ut li Jesukristo, li Ralal, wankeb’ jun xxaqalil li tib’ ut b’aq okenaq, jo’ laa’o, a’b’anan nimeb’ xloq’al ut tz’aqaleb’ re ru, ut li Santil Musiq’ej a’an yal musiq’ejil winq.4
Xkaa, rik’in laj Jose Smith, li Jesukristo kixk’ojob’ wi’chik lix evangelio ut lix tz’aqal Iglees sa’ ruchich’och’. Lix wankilal li tijonelil li kik’eeman reheb’ lix apostol li Kristo wan na 2,000 chihab’ chaq, a’an ajwi’ li tijonelil ke’xk’ul laj Jose Smith ut laj Oliver Cowdery rik’ineb’ laj Pedro, laj Santiago, ut laj Jwan.5
Sa’ roso’jik, kootzolok chirix jun chik ch’olob’anb’il esil chirix li Jesukristo: lix Hu laj Mormon. Tz’iib’anb’il xb’aaneb’ najter profeet, a’an resileb’ li kristiaan ke’wan sa’ li ch’och’ America naq toj maji’, naq kiyo’la, ut chirix lix yo’lajik li Jesus. Chi sa’ a’an naqatzol chan ru ke’xnaw chaq ru, ke’xra, ut ke’xloq’oni chaq li Kristo, li kixk’ut rib’ chiruheb’ jo’ li Kolonel li kiwakli chi yo’yo.
Li Musiq’ej kixtoch’ inch’ool naq kintzol li kixye li Kolonel reheb’: “K’ehomaq reetal, laa’in li Jesukristo, li ke’xch’olob’ chaq xyaalal li profeet naq taachalq sa’ li ruchich’och’.”6
Eb’ li misioneer ke’xsi jun lix Hu laj Mormon qe. Kiqil ut kiqasumela xb’aanunkil li b’oqok li natawman sa’ roso’jik lix Hu laj Mormon, li naxye:
“Ut naq teekʼul li kʼaʼaq re ru aʼin, nawaj relajinkil cheru naq chepatzʼ re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin; ut wi texpatzʼoq rikʼin xʼanchalil eechʼool, chi tiik eerajom, chi wank eepaabʼaal chirix li Kristo, aʼan tixkʼutbʼesi cheru li yaal chirix, rikʼin lix wankil li Santil Musiqʼej.
“Ut rikʼin lix wankil li Santil Musiqʼej naru teenaw li yaal chirix chixjunil li kʼaʼaq re ru.”7
Ak kinume’ 45 chihab’ naq lin na’ ut laa’in xqatzol xb’een sut li sahil ch’oolej ut lix wankilal li paab’aal chirix li Kristo. Xb’aan lix paab’aaleb’ chirix li Kristo, li junkab’al Lopez ke’xwotz wik’in lix paab’aaleb’. Xb’aan lix paab’aaleb’ li misioneer chirix li Kristo, ke’xkanab’ chaq li rochoch sa’ Estados Unidos re xtawb’al lin na’ ut laa’in. Xb’aan lix paab’aaleb’ li qamiiw, ke’xk’e jun li riyajil li paab’aal choq’ qe, ut anajwan a’an jun xnimal ru che’ re osob’tesink chi junelik.
Chiruheb’ li osob’tesinb’il chihab’ a’an, naqanaw tz’aqal, jo’ kixye li Awa’b’ej Russell M. Nelson: “Chixjunil li us sa’ li yu’am a’in—chixjunil li osob’tesiik li wan xwankil chi junelik—natikla rik’in li paab’aal. Xkanab’ankil naq taanumtaaq li Dios sa’ li qayu’am natikla rik’in xpaab’ankil naq wan rajom chiqab’eresinkil. Tz’aqal li jalb’a-k’a’uxlej natikla rik’in xpaab’ankil naq li Jesukristo wan xwankil re qach’ajb’al, qak’irtesinkil, ut qakawob’resinkil.”8
Nintz’aama naq taqakawob’resi li qapaab’aal chirix li Kristo, li kijalok re lix yu’am lin raarookil na’ ut li we, ut li toj yoo chixjalb’al xyu’ameb’ li neke’sik’ok re. Ninnaw naq laj Jose Smith a’an li profeet re lix k’ojob’ankil wi’chik li evangelio, naq li Awa’b’ej Nelson a’an li qaprofeet anajwan, naq li Jesus a’an li yo’yookil Kristo ut aj Tojol qix, ut naq yo’yo li qaChoxahil Yuwa’ ut naxsume lix tijeb’ li ralal xk’ajol. Ninch’olob’ xyaalaleb’ li na’leb’ a’in, sa’ lix loq’laj k’ab’a’ li Jesukristo, amen.