Te pāturura’a i te u’i ’āpī

’A fa’aineine ai au nō te paraparau ia ’outou, ’ua fa’auruhia vau e te ’ā’amu o Helamana ’e te mau tamaiti ’āpī a te nūna’a o Amona. ’Ua putapū vau i te mana o te mau peropheta o te Buka a Moromona ’o tei ha’api’i i te mau metua, te mau ’episekōpo ’e te mau melo o te pāroita, i te ’imi-maita’i-ra’a vau i teie ’ā’amu.

’O Helamana, e ta’ata ti’aturihia ’oia e te feiā ’āpī o te mau ’āti Amona. ’Ua tauturu ’oia ia rātou ’ia fa’ananea atu ā ia rātou ’e ’ia pa’ari i roto i te parauti’a. ’Ua mātau maita’i rātou iāna ’e ’ua here iāna ’e « ’ua hina’aro ’ia riro [’oia] ’ei ta’ata fa’atere nō rātou ».¹

’Ua here Helamana i teie feiā ’āpī tamāroa mai tāna mau tamaiti ’e ’ua ’ite i tō rātou fāito pūai.² ’Ua ha’api’i Elder Dale G. Renlund ē « nō te tāvini maita’i a’e ia vetahi ’ē, tītauhia ia tātou ’ia hi’o ia rātou … nā roto i te mata o te Metua i te ao ra. I reira noa e ti’a ai ia tātou ’ia ha’amata i te hāro’aro’a i te faufa’a mau o te hō’ē vaerua ta’ata. I reira noa e ti’a ai ia tātou ’ia putapū i te here o te Metua i te ao ra nō tātou pā’āto’a … tāna mau tamari’i ».³ ’Ua ha’amaita’ihia te mau ’episekōpo i teie mahana, ’ia ’ite mai i te ihota’ata hanahana o te feiā ’āpī ’o tā rātou e ha’apa’o nei.

’Ua « tai’o »⁴ Helamana i te feiā ’āpī ’o tāna e ha’apa’o ra. ’Ua nā mua ’oia i te ha’amaura’a i te mau tā’amura’a pūai ’e o rātou.

I te hō’ē taime fifi mau, tei roto rātou i te ora ’e te pohe, ’ua mo’e ia Helamana ’e tāna mau fa’ehau ’āpī te ’ē’a o te nu’u e tāpapa ra ia rātou. ’Ua a’o atu Helamana i te feiā ’āpī :

« Inaha, ’aita tātou i ’ite ē ’ua fa’aea ānei rātou ’ei ’ōpuara’a ’ia haere atu tātou e ’aro ia rātou, …

« Nō reira, e aha tā ’outou parau, e tā’u mau tamaiti … ? »⁵

’Ua pāhono a’era teie mau taure’are’a ha’apa’o maita’i, « e tō mātou metua, inaha, tei pīha’i iho tō tātou Atua ia tātou, ’e e’ita ’oia e vaiiho ia tātou ’ia ma’iri ; haere ana’e ïa i mua ».⁶ ’Ua manuia terā mahana, nō te mea ’ua turu Helamana i taua mau taure’are’a ra i roto i tā rātou fa’aotira’a⁷ ’ia ’ohipa.⁸

Tē aro nei te feiā ’āpī ’āti Amona i te tumu rahi mau ’e ’ua itoito rātou nō te « tauturu i te mau ta’ata ».⁹ ’Ua ha’aparare « teie nu’u fa’ehau iti », e arata’ihia nei e Helamana, i te « itoito ’e te ’oa’oa rahi »¹⁰ i roto i te ’ā’au o te mau nu’u ’āti Nephi ’aravihi. I teie mahana, e nehenehe te mau ’episekōpo e arata’i i tā rātou feiā ’āpī ’aravihi ta’a ’ē mau, ma te ha’amaita’ira’a i te pāroisa ’e te ha’aputuputura’a ia ’Īserā’ela. ’Ua ha’api’i te peresideni Russell M. Nelson ē e misiōni teie « nō reira [rātou] i tonohia mai ai i niʼa i te fenua nei ».¹¹

Mai teie feiā ’āpī ’āti Amona i « ’ohipa parau mau i te mau taime ato’a i roto i te mau mea ato’a e tītauhia ia rātou »,¹² ’ua ha’apa’o maita’i Helama i tōna feiā fa’atere. Noa atu te huru o te tāmatara’a ’aore rā te manuia-’ore-ra’a, ’ua « ’ōpua pāpū »¹³ noa Helamana i te fa’ahaere i tā rātou ’ōpuara’a i mua. I te fa’auera’ahia ’oia ’ia « haere atu ’oia e [tāna] mau tamaiti »,¹⁴ ’ua fa’aro’o ’oia.

E ha’amaita’ihia te feiā ’āpī i teie mahana, ’a pe’e ai te mau ’episekōpo i te a’o a tō tātou feiā fa’atere ’ia « paraparau i te mau peresideni Feiā ’Āpī Tamāhine nō te pāroisa ».¹⁵ E ha’apāpū te mau peresideni titi ē e fa’ari’i te mau ’episekōpo ’e te mau peresideni o te Feiā ’Āpī Tamāhine i te mau arata’ira’a e hina’arohia nō te fa’aoti i tā rātou mau hōpoi’a nō te feiā ’āpī.¹⁶

’Ua fa’atura Helamana i tāna mau fafaura’a. I tō Amona ha’api’ira’a i te ’evanelia i te mau metua o te feiā ’āpī, ’ua fa’ari’i rātou i te reira ma te ’ā’au tae. Nō tō rātou ha’apa’o rahi i tō rātou orara’a ’āpī ’ei mau pipi ti’a, ’ua fafau rātou e « vaiiho i tā rātou mau mauha’a tama’i nō te ’ōrurehau i raro ».¹⁷ Te ’ohipa noa tei tūra’i ia rātou e feruri e ’ōfati i teie fafaura’a, ’ia ho’i fa’ahou ā i te aroa’a o tā rātou i mātau i muta’a ihora, ’ua ’ite atu rātou i te mau ’āti Nephi i roto i te fifi.

’Ua hina’aro te mau ’āti Amona e tauturu i teie mau ta’ata ’o tei hōro’a i te hō’ē fare pāpū nō rātou. ’Ua tāparu Helamana ’oia ato’a vetahi, i te tītaura’a ia rātou ’ia fa’atura i tā rātou fafaura’a, ’eiaha e ’aro. ’Ua ti’aturi rahi a’e ’oia i te pūai tā te Atua e hōro’a mai iāna, i tā teie mau ’āti Amona e nehenehe e hōro’a mai ’e tā rātou mau ’o’e ’e te mau te’a.

’A fa’aruru ai Helamana ’e tāna mau fa’ehau ’āpī i te mau tāmatara’a ri’ari’a, e mana’o pāpū tō Helamana. « ’Āre’a rā, inaha, ’aita e pe’ape’a—tē ti’aturi nei mātou e fa’aora te Atua ia mātou ».¹⁸ I te hō’ē taime, ’a fātata ai rātou i te pohe i te po’ia, tā rātou pāhonora’a o te « pure atu ïa i te Atua ma tō [rātou] ’ā’au ato’a, ’ia ha’apūai mai ia [rātou] ’e ’ia fa’aora mai ho’i ’oia ia [rātou] … [’e] te Fatu … ’ua fa’a’ite pāpū mai ia [rātou] ē e fa’aora ’oia ia [rātou] »¹⁹ « nō tō rātou fa’aro’o rahi ’ia ti’aturi i tei ha’api’ihia ia rātou ».²⁰

Tē ha’api’i mai nei Helamana ia tātou ē, ’ua pāturuhia teie feiā ’āpī tamāroa e tō rātou mau metua. ’Ua ’ite teie mau metua ha’apa’o maita’i e hōpoi’a mātāmua nā rātou i te ha’api’ira’a i tā rātou mau tamari’i. ’Ua ha’api’i rātou i tā rātou mau tamari’i ’ia ha’apa’o i te mau fa’auera’a ’e « ’ia haere ma te parauti’a »²¹ i mua i te Atua. ’Ua ha’api’i tō rātou mau metua vahine ia rātou e « mai te mea ’aita rātou e fē’a’a, e fa’aora te Atua ia rātou ».²² ’Ua fa’a’ite tō rātou mau metua tāne i te hō’ē hi’ora’a pūai nō te ravera’a i te fafaura’a.²³ ’Ua ’ite teie mau ’aito tahito i te mau ’ohipa ri’ari’a o te tama’i. ’Ua hōro’a rātou i tā rātou mau tamaiti ’aravihi ’ore i te aupurura’a a Helamana ’e ’ua pāturu ia rātou ma te hāponora’a « i te mā’a e rave rahi ».²⁴

’Aita Helamana i vai ’ōtahi noa ’a tāvini ai ’oia i tāna nu’u fa’ehau ’āpī. Tē vai ra ’ati a’e iāna te mau ta’ata i reira ’o tāna e fāriu atu nō te fāri’i i te pāturura’a ’e te a’ora’a. ’Ua ani ’oia i te tauturu i te tāpena Moroni, ’e ’ua tae mai te reira.

’Aore e ta’ata e tāvini nei ’ōna ana’e i roto i te bāsileia o te Fatu. ’Ua ha’amaita’i mai te Fatu ia tātou ma te mau pāroisa ’e te mau titi. Nā roto i tāna fa’anahora’a i fa’aho’i-fa’ahou-hia mai, tē vai nei te mau rāve’a tauturu, te pa’ari ’e te fa’aurura’a e hina’arohia nō te fa’aruru i te mau huru tāmatara’a ato’a.

E hōro’a mai te ’episekōpo i te arata’ira’a i te pāroita nā roto mai i te mau ’āpo’ora’a.²⁵ E fa’aitoito ’oia i te mau uiuira’a toru ’āva’e o te ’ohipa aupurura’a ’e i muri iho e fa’aitoito i te pupu peresibutero ’e te Sōtaiete Tauturu ’ia rave i tā rātou hōpoi’a ’ia tāvini i te mau ’utuāfare. E rave teie mau peresidenira’a i te fa’aotira’a e hi’opo’a i te mau hina’aro ’e e ’imi i te mau rāve’a fa’auruhia. E hōro’a te mau peresideni titi i tā rātou turura’a ma te ha’api’ira’a i teie mau hōpoi’a i te pupu peresibutero ’e i te peresidenira’a o te Sōtaiete Tauturu.

E ’itehia te arata’ira’a e hina’arohia nā te feiā fa’atere ’e te mau metua i roto i te Vaira’a buka ’evanelia ’e te fa’aaura’a rorouira o te ’evanelia ora. I roto i teie mau mātēria fa’auruhia, e nehenehe tātou e ’ite mai i te mau pāpa’ira’a mo’a, te mau ha’api’ira’a a te mau peropheta nō teie tau, ’e te Buka arata’i rahi. I te vāhi nō te Feiā ’Āpī i roto i te Vaira’a buka ’evanelia, tē vai ra e rave rahi mātēria tauturu nā te mau peresidenira’a pupu autahu’ara’a ’e te piha ha’api’ira’a²⁶ ’e tē vai ra te Nō te Pūai o te Feiā ’Āpī : E arata’i nō te rave i te mau mā’itira’a. ’A ’imi maita’i ai te mau melo ato’a o te pāroisa i teie mau mātēria fa’auruhia ’e e ’imi i te arata’ira’a a te Vārua, e arata’ihia te ta’ata tāta’itahi ato’a e te Fatu nō te ha’apūai i te feiā ’āpī.

E ha’amaita’ihia ’e e ha’apūaihia te pāroisa tā’āto’a ’a rōtahi ai te mau melo i ni’a i te u’i ’āpī. Noa atu tō tātou mau paruparu ’e tō tātou mau hapehape, tē ani mai nei te Metua i te ao ra ia tātou tāta’itahi, nā roto i te hoara’a o tōna Vārua, ’ia toro atu i te rima ia vetahi ’ē. ’Ua ’ite ’oia e tupu tātou i te rahi ’e e ha’amo’ahia tātou ’ia pe’e ana’e tātou i te mau muhumuhura’a a te Vārua Maita’i.²⁷ Noa atu ā e ’ere tā tātou mau tauto’ora’a i te mea maita’i roa. ’Ia ’āmui ana’e atu tātou i te Fatu, e nehenehe e pāpū ia tātou ē e tū’ati tā tātou mau tauto’ora’a i te mea tāna e rave nō te feiā ’āpī.

’A pe’e ai tātou i te arata’ira’a a te Vārua Maita’i ma te torora’a i te rima i te feiā ’āpī, e riro mai tātou ’ei mau ’ite nō te here o te Metua i te ao ra i roto i tō rātou orara’a. E patu te ravera’a mai te au i te mau fa’aurura’a a te Fatu i te mau tā’amura’a nō te here ’e te ti’aturi. Nā te mau tā’amura’a i roto i te orara’a o te feiā ’āpī e fa’atupu i te fa’aurura’a rahi i ni’a i tā rātou mau mā’itira’a.

E ha’api’i mai te feiā ’āpī i te hōho’a o te heheura’a, ’a ’āmui mai ai rātou ’e tātou i roto i te fa’anahora’a nō te ’imira’a ’e te ’ohipara’a mai te au i te fa’aurura’a nō te tāvini ia vetahi ’ē. ’A fāriu atu ai te feiā ’āpī i ni’a i te Fatu nō te fa’ari’i i teie arata’ira’a fa’auruhia, e hōhonu atu ā tō rātou tā’amura’a ’e ’ōna ’e tō rātou ti’aturira’a iāna.

Tē fa’a’ite atu nei mātou i tō mātou ti’aturira’a i te feiā ’āpī ma te hōro’ara’a i te pāturura’a ’e te arata’ira’a ia rātou, ma te ’ore e rave i te monora’a.²⁸ Mai te hō’ē ta’ahira’a i muri ’e te fa’ati’ara’a i te feiā ’āpī ’ia ha’api’i mai nā roto i te ’āparau-’āmui-ra’a, te mā’itira’a i te hō’ē ha’api’ira’a fa’auruhia, ’e te fa’a’ohipara’a i tā rātou ’ōpuara’a, e ’ite rātou i te ’oa’oa ’e te tupura’a mau.

’Ua ha’api’i te peresideni Henry B. Eyring ē « te mea faufa’a roa a’e ’o te mea ïa tā rātou e ha’api’i mai nā roto mai ia [’outou] nō ni’a ’o vai mau rātou ’e te huru ta’ata tā rātou e nehenehe e riro mai. Tē mana’o nei au e’ita rātou e ha’api’i rahi mai nā roto mai i te mau a’ora’a. E fa’ari’i rātou i te reira nā roto mai i te mau nino’a mana’o ’o vai ’outou, ’o vai tā ’outou e mana’o ra ’o vai rātou, ’e tā ’outou e mana’o ra e nehenehe rātou e riro mai ».²⁹

Tē ha’amāere nei tō tātou feiā ’āpī ia tātou ma tō rātou itoito, tō rātou fa’aro’o, ’e tō rātou ’aravihi. Mai te mea e mā’iti rātou ’ia riro ’ei mau pipi tei ’ī i te itoito nā Iesu Mesia, e nana’ohia tāna ’evanelia i roto i tō rātou ’ā’au. E riro te pe’era’a iāna ’ei tuha’a ’o vai mau rātou, ’eiaha noa nō te ’ohipa tā rātou e rave ra.

’Ua tauturu Helamana i te feiā ’āpī ’āti Amona ’ia hi’o nāhea te hō’ē pipi itoito a Iesu Mesia e ora ai. E nehenehe tātou e riro ’ei hi’ora’a pūai nō te feiā ’āpī, e mea nāhea te mau pipi a te Mesia e ora ai i teie mahana. Tē pure nei te mau metua ha’apa’o maita’i ’ia vai teie mau hi’ora’a i roto i te orara’a o tā rātou mau tamari’i. ’Aore roa e fa’anahora’a e nehenehe e mono i te fa’aurura’a o te feiā pa’ari here ’e tē ha’apa’o maita’i i tā rātou mau fafaura’a.

’Ei peresideni nō te pupu o te mau tahu’a, e nehenehe te ’episekōpo e hōro’a i te hi’ora’a maita’i i te feiā ’āpī, e nāhea ’ia riro ’ei tāne fa’aipoipo ha’apa’o maita’i ’e ’ei metua tāne here³⁰ ma te pārurura’a, te tauturura’a ’e te fa’aterera’a³¹ ma te mau rāve’a parauti’a. Te mau ’episekōpo, ma te « rōtahi-pūai-ra’a i ni’a i te feiā ’āpī »,³² e fa’ari’i i te hō’ē fa’aurura’a e vai noa i te mau u’i e rave rahi.

Nō roto mai te feiā ’āpī o teie mahana i te mau vaerua hanahana roa a’e³³ a te Metua i te ao ra. Nō roto mai rātou i te pupu e pāruru pūai nei i te parau mau ’e te ti’amāra’a i roto i te ao hou te tāhuti nei.³⁴ ’Ua fānauhia mai rātou i teie ’anotau nō te ha’aputuputu ia ’Īserā’ela maoti tō rātou ’itera’a pāpū pūai nō ni’a i te Fatu ia Iesu Mesia. ’Ua mātau ’oia ia rātou tāta’itahi ’e ’ua ’ite ’oia i tō rātou fāito pūai rahi. Mea fa’a’oroma’i ’oia ’a tupu ai rātou i te rahi. E fa’aora ’e e pāruru ’oia ia rātou. E fa’aoraora ’e e arata’i ’oia ia rātou. E fa’auru ’oia ia rātou. Tātou, tō rātou mau metua ’e tō rātou feiā fa’atere, ’ua ineine nō te pāturu ia rātou. Tē vai nei te ’Ēkālēsia a te Fa’aora nō te tauturu ia tātou ’ia aupuru i te u’i i muri nei.

Tē fa’a’ite pāpū nei au ē ’ua fa’anahohia te ’Ēkālēsia a te Mesia, i fa’aho’i-fa’ahou-hia mai nā roto i te peropheta Iosepha Semita ’e tē arata’ihia nei i teie mahana e te peresideni Russell M. Nelson, nō te tauturu i te feiā ’āpī ’ia fa’aoti i tā rātou ’ōpuara’a rahi i teie mau mahana hope’a nei. Nā roto i te i’oa o Iesu Mesia, ’āmene.