“O Le Ola Faavavau, e Ala Mai ia Iesu Keriso”

Toeitiiti atoa le 2000 tausaga talu ai, sa sau ai se alii mauoa, o le “sa tele ana mea,” ma fai atu se fesili e matua taua tele i le Faaola: “Le Aoao e, se a se mea lelei ou te faia ou te maua ai le ola faavavau? (Mataio 19:16; faamamafa faaopoopo).

Ina ua “faalogo” o ia i le faatonuga a le Faaola, ma Lana valaaulia malu e “… mulimuli mai ia te au,” (Mataio 19:21), sa “alu ese le taulealea ma le faanoanoa: aua e tele lava ana mea” (Mataio 19:22 ).

O se tulaga matautia, ona e faitau miliona i latou i le lalolagi e manatu maualuga ma filifili “oa o le lalolagi” ae le o “oa o le faavavau” (MFF 38:39), latou te le iloa, pe malamalama atoatoa foi, “o le maua le olaga faavavau ua mauoa” (MFF 6:7; faamamafa faaopoopo), ma o le ola faavavau o le meaalofa aupito sili lea a le Atua i le tagata (MFF 14:7). I se faaupuga faigofie, o le ola faavavau o le ola lea e faavavau o ni aiga i le afioaga o le Atua (MFF 132: 19–20, 24, 55).

I Lana tatalo faatoga maoae, na tuu atu ai e le Faaola i tagata uma le ki e maua ai le ola faavavau, “Ma o le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3).

Ae e mafai faapefea ona iloa e le tagata le Atua moni e toatasi?

Ua tali mai le Faaola: “O au nei le ala, ma le upu moni, ma le ola; e le alu atu lava se tasi i le Tama, pe a le ui mai ia te au” (Ioane 14:6).

Ou te molimau atu na pau le ala e mafai ai e i tatou ma tagata uma, ona o atu i lo tatou Tama Faalelagi ma iloa o Ia, ma maua ai le ola e faavavau, o le o mai lea i le Alii o Iesu Keriso, ma iloa o Ia.

Ae o ai Iesu Keriso, e tatau ai ona tatou o mai ia te Ia ma iloa o Ia? Ou te le iloa se isi aotelega mamana ma le matagofie o le faasinomaga ma le matafaioi a le Alii o Iesu Keriso, nai lo le tautinoga a le Au Peresitene Sili ma le Korama a le Toasefululua, lea ua faaulutalaina “O Le Keriso Soifua,” lea o le a ou faitauina atu:

“[O Iesu Keriso] o le Ieova Silisili o le Feagaiga Tuai ma le Mesia o le Feagaiga Fou. O Ia o le na foafoaina le lalolagi, i lalo o le taitaiga a Lona Tama… .

“… Na Ia tuuina atu Lona soifua e togiola ai agasala a tagata uma… .

“… O Ia o le Ulumatua a le Tama, o le Alo Pele e Toatasi i la le tino, o le Faaola ia o le lalolagi.

“ Na toe tu mai o Ia mai le tuugamau e ‘avea ma faapolopolo o e ua momoe’ (1 Korinito 15:20)

“I Lona tulaga o se Alii Toetu, . . na Ia asiasi atu foi i ‘isi [o Ana] mamoe’ (Ioane 10:16) i Amerika anamua.

“… Na faaali atu o Ia ma Lona Tama i le taulealea o Iosefa Samita, i le amataga o le oo mai o le “sauniga i le faaatoaga o tausaga” ua loa ona folafola mai (Efeso 1:10)… .

“… Ua toefuataiina mai i le fogaeleele Lana perisitua ma Lana Ekalesia—“ua atina’e i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea’ (Efeso 2:20).

“… O le a i ai se aso e toe afio mai ai o Ia i le lalolagi … ma pule ai o Ia o le Tupu o Tupu ma nofotupu foi o le Alii o Alii… . O le a tatou tutu atu foi taitoatasi ina ia faamasinoina e Ia.

“… O Ana Aposetolo ua faauuina [ua molimauina] o Iesu o le Keriso Soifua, o le Alo tino ola pea o le Atua. O Ia o le Tupu silisili o Emanuelu … O Ia o le malamalama, o le ola, ma le faamoemoega o le lalolagi …” (Liahona, Aperila 2000, 2–3).

E ese le matagofie, ma e matua taua lava, le iloa po o ai le Alii o Iesu Keriso.

Ae ou te toe fai atu, Ou te molimau atu na pau le ala e mafai ai e i tatou ma tagata uma, ona o atu i lo tatou Tama Faalelagi ma iloa o Ia, ma maua ai le ola e faavavau, o le o mai lea i le Alii o Iesu Keriso, ma iloa o Ia.

O le a le uiga o le iloa o le Alii o Iesu Keriso, ma e mafai foi faapefea ona tatou iloa o Ia?

Ua fetalai mai le Faaola: “E vaapiapi le faitotoa, e lauitiiti le ala e tau atu i le faaeaina ma le uluola pea lava pea o olaga, e toaitiiti foi e maua ai, aua tou te le i talia au i le lalolagi pe iloa foi au.

“Ae afai e te talia au i le lalolagi, ona e iloa lea o au… .” (MFF 132:22–23).

Mata e mafai ona tatou malamalama moni atoatoa i Ana afioga? “Afai e te talia au,”—le Ieova Silisili, le Mesia, le Foafoa o le lalolagi, le Faaola ma le Togiola o le lalolagi, le Alo tino ola pea o le Atua—“Afai e te talia au… , ona e iloa lea o au” (MFF 132:23).

Ina ia iloa le Alii o Iesu Keriso, e ao ia i tatou ma tagata uma ona talia o Ia. Ma ina ia talia o Ia, e ao ona tatou talia Ana auauna (tagai Mataio 10:40; MFF 1:38; 68:8–9; 84:36; 112:20).

Ina ia talia o Ia, e tatau ona tatou talia le atoaga o Lana talalelei, Lana feagaiga e faavavau, e aofia ai upumoni uma po o tulafono, o feagaiga, ma sauniga e manaomia mo tagata e toe ulufale atu ai i le afioaga o le Atua (tagai MFF 39:11; 45:9; 66:2; 76:40–43; 132: 12; 133:57).

Ina ia talia o Ia, e ao i atalii faamaoni o le Atua ona talia Lana perisitua, ma faalautetele o latou valaauga (MFF 84:33–35 ).

Peitai, o le mea mulimuli, ina ia talia o Ia ma iloa o Ia, e ao ia i tatou ma tagata uma, e pei ona apoapoai mai Moronae, “… ina o mai ia ia Keriso, ina ia faaatoatoaina outou e Ia” (Moronae 10:32; faamamafa faaopoopo). I se isi faaupuga, e ao ona tatou o mai ia Keriso ma taumafai ia “faapei” o Ia (tagai: Elder Dallin H. Oaks, “O Le Luitau ia Avea ma se Tasi,” Liahona, Ianuari 2001, 38).

Na fetalai mai le Alii Toetu: “… pe faapefea la outou amio e tatau ai? E moni, ou te fai atu ia te outou “E pei lava o au nei” (3 Nifae 27:27). O le uiga o le upu “e tatau” e pei ona faaaoga ai i Lana fesili, “… pe faapefea la outou amio e tatau ai?” e taua mo le malamalama i Lana tali, “E pei lava o au nei.” O le upu “e tatau” o lona uiga, “e taua ona i ai” po o le “e ao ina tauaveina pe noatia o se tiute po o se matafaioi” (Noah Webster’s First Edition of an American Dictionary of the English Language, 7^th ed. [1993], “e tatau ai”; tagai foi i le Luka 24:26), o loo faapea mai ai—o loo faamaonia mai e tusitusiga paia, o aso anamua ma ona po nei, e “taua ona i ai,” ma ua “noatia” i tatou, i le feagaiga, “ia avea” e pei ona Ia tautino mai, “E pei lava o Au nei” (foi tagai 3 Nifae 12:48; Mataio 5:48; 1 Ioane 3:2; Moronae 7: 48).

Ou te tatalo ia vave ona sau le aso “e faasalalauina atu ai le tala i le Faaola i atunuu uma, ma ituaiga, ma gagana eseese, ma nuu” (Mosaea 3: 20; tagai foi i le Mose 7: 62; Isaia 11: 9), ma o i latou uma lava o le a [faalogo i ai] ia latou talia o Ia, le Alii o Iesu Keriso, ma iloa o Ia, ina ia latou o mai ai i lo tatou Tama Faalelagi, ma Iloa o Ia, ma maua ai le ola e faavavau, i le suafa o Iesu Keriso, amene.