Savali a Faiaoga Asiasi
Sailia ma le Mauaina o Faaaliga Faaletagata Lava Ia
Ia aoao atu ma le agaga tatalo mau ma upusii nei po o se isi mataupu faavae o le a faamanuiaina ai uso o loo e asia, pe afai e manaomia. Ia molimau atu e uiga i le aoaoga faavae. Ia valaaulia i latou o loo e aoaoina e faasoa mai mea ua latou lagonaina ma aoaoina.
E Mafai Faapefea ona Ou Sailia Faaaliga Faaletagata Lava Ia?
“Tatou te saunia e maua ni a tatou lava faaaliga e pei o perofeta, e ala i le suesue i tusitusiga paia, anapogi, tatalo, ma le fausiaina o le faatuatua. O le faatuatua o le ki lea. Manatua le sauniuniga a Iosefa mo le Uluai Faaaliga:
‘“A e afai ua leai se poto i so outou, ina ole atu ia i le Atua. …
“‘A ia ole atu ma le faatuatua, aua lava nei masalosalo.’”1
Elder Robert D. Hales o le Korama a Aposetolo e Toasefululua.
“O le tatalo o lau lava lea ki i le lagi. O le loka o loo i lou itu o le veli.
“Ae e le na o le pau lena. Mo i latou ua mafaufau e oo mai faaaliga e aunoa ma se galuega, ua fetalai mai le Alii:
“‘E te le’i malamalama; fa te oe ou te tuuina atu ia te oe, i le na o lou ole mai a e te le’i mafaufau i ai.
“‘Ae peitai, faauta, ou te fai atu ia te oe, e ao ina e filifili maea ai i lou mafaufau; ona e ole mai lea ia te au po ua sao, afai ua sao ou te faia ia mu lou loto i totonu ia te oe; o lea la, o le a e lagona ai ua tonu.’”2
Peresitene Boyd K. Packer, Peresitene o le Korama a Aposetolo e Toasefululua.
E Mafai Faapefea Ona Ou Maua Faaaliga Faaletagata Lava Ia?
“I ona tulaga ua masani ai, o faaaliga po o musumusuga e oo mai i upu po o manatu e fesootai atu i le mafaufau (tagai Enosa 1:10; MFF 8:2–3), e ala i se vave ona faamalamalamaina (tagai MFF 6:14–15), e auala mai i ni lagona mautinoa po o le le mautonu e uiga i se gaoioiga ua fuafuaina, pe auala mai foi i ni faafiafiaga musuia, e pei ona i ai i faatufugaga o faafiafiaga. E pei ona saunoa mai ia Peresitene Boyd K. Packer, … Peresitene o le Korama a Aposetolo e Toasefululua, ‘O musumusuga e sili atu ona oo mai o se faalogona nai lo o se mea e lagonaina.’”3
Elder Dallin H. Oaks o le Korama a Aposetolo e Toasefululua.
“O le malumalu o se fale o le aoaoga. O le tele o aoaoga e tuuina mai i le malumalu o ni faatusa ma e aoaoina e ala i le Agaga. O le uiga o lenei mea, e aoaoina i tatou mai luga. … O lo tatou malamalama i le uiga o sauniga ma feagaiga o le a faateleina a o tatou foi atu e le aunoa i le malumalu ma le agaga o le aoaoina ma le mafaufau i upumoni e faavavau o loo aoaoina ai. … Ia tatou olioli i le malosi faaleagaga ma le faaaliga tatou te maua a o tatou auai atu e le aunoa i le malumalu.”4
Silvia H. Allred, fesoasoani muamua i le au peresitene aoao o le Aualofa.
Ata na saunia e Juan Pablo Aragón Armas