Aisea e tatau ai ona ou tatalo na o a’u lava ae ua uma ona matou tatalo ma lo’u aiga?

Mafaufau e faapea o loo e tauivi ma se faafitauli e patino ia te oe lava. Pe le afaina ia te oe le faasoa atu o lou faafitauli i se vaega o tagata, pe e te manao e faailoa atu i se tagata se toatasi ma le lē faalauaiteleina?

Na aoao mai Peresitene Spencer W. Kimball (1895–1985): “O lenei o mea e sili atu ona tatou tatalo ai na o i tatou lava, pe a tatou le manatu i le taimi, po o le le faalauaiteleina e sili ona taua ma aoga. O lo tatou tatalo taitoatasi e fesoasoani lena ia i tatou e aveese ai lo tatou maasiasi po o a tatou faaiuga sese, po o a tatou togafiti; o le a fesoasoani foi lea i le tatalaina o o tatou loto ma faaatoatoaina ai lo tatou faamaoni ma le faaaloalo e faaali atu ai o tatou faamoemoega ma o tatou manaoga.”¹ O mea tatou te matamumuli e ta’u ia tatou tatalo faaleaiga e mafai—ma e tele lava ina tatau ona—ta’u atu i tatalo lilo.

O a tatou tatalo faaletagata lava ia e mafai ai ona tatou matuai faamaoni i lo tatou Tama Faalelagi agalelei ma talanoaina o tatou atuatuvalega ma faanaunauga loloto o o tatou loto. Sa maua e Iosefa Samita le faaaliga lea na amataina ai le Toefuataiga o le talalelei a Iesu Keriso ina ua tatalo faalilolilo o ia. O le talanoa atu i le Tama Faalelagi na o oe lava ma Ia e mafai ai atili ai e i tatou ona gauai atu i musumusuga a le Agaga ua faamoemoe mo lo tatou lelei.

E ui i lea, e matuai taua lava foi tatalo faaleaiga—e mafai ai ona tatou faalatalata atu i lo tatou Tama oi le Lagi ma maua ni aafiaga faaleagaga ma o tatou aiga. E pei ona aoao mai Peresitene Kimball, “Ua uunaia e le Ekalesia ia faia ni tatalo faaleaiga i po uma ma taeao uma.”²