Auauna Atu

O itulau 58–59 o le lomiga lenei na faamalamalama mai ai e Carol F. McConkie, fesoasoani muamua i le au peresitene aoao o Tamaitai Talavou, faapea o le auaunaga o le talalelei lea a Iesu Keriso i le faatinoga: “Pe a tatou auauna atu i isi, ua tatou auai i le galuega o le faaolataga. E pei ona aoao mai e le Tupu o Peniamina, ‘Pe a outou auauna atu i o outou uso-a-tagata, ua nao lo outou auauna atu lava lea i lo outou Atua’ (Mosaea 2:17)” O fautuaga o loo i lalo o le a fesoasoani ia te oe e aoao ai le autalavou ma tamaiti e uiga i le auaunaga ma lana matafaioi i le talalelei a Iesu Keriso.

Fautuaga mo le Aoaoina o le Autalavou

O Savali faaMamona mo vitio a le Autalavou “Meaalofa Ofoofogia” (i le initoneti i le lds.org/go/E24service) o loo faasoa maia le tala e uiga i se alii talavou tauaso o le e faaaogaina ana taleni e faamanuia ai isi. Atonu e te manao tou te matamata ma lou aiga i le vitio ma talanoa e uiga i meaalofa ofoofogia na tuuina atu i tagata taitoatasi o le aiga. E mafai faapefea ona faaaoga nei meaalofa e auauna atu ai i isi?
I le Mo le Malosi o le Autalavou, tatou te faitau ai, “O nisi auaunaga sili ona taua e mafai ona e tuuina atu o totonu lea o lou lava aiga” (32). Talanoa faatasi ma la outou autalavou, i le taua o le auauna atu i le aiga. O a faamanuiaga e oo mai pe a auauna atu tagata o le aiga o le tasi i le isi? Fuafua se auala e mafai ai e la outou talavou ona tuuina atu se auaunaga sili ona anoa i le fale.
“E masani lava o auaunaga anoa e faaalia i galuega agalelei faigofie o aso uma” (Mo le Malosi o le Autalavou, 32). Valaaulia lau autalavou e fatu se gaoioiga auauna atu e aofia ai ia “gaoioiga agalelei o aso uma.” Talanoa pe faapefea ona fesootai le auaunaga i feagaiga tatou te osia i le papatisoga (tagai i le Mosaea 18:8–10).
Mafaufau e fai se suega o meaaoga o le konafesi aoao mo se afiafi faaleaiga lea e faaaoga ai e tagata o le aiga ni faaataataga e vaavaai ai mo faamatalaga i le auauna atu mai le konafesi aoao aupito lata mai. Faasoa atu mea ua e mauaina ma talanoaina pe faapefea ona e mulimuli i fautuaga ua tuuina mai e o tatou taitai.

Fautuaga mo le Aoaoina o Tamaiti

Fesoasoani i lau fanau ia malamalama o loo i ai ni avanoa e auauna atu ai i soo se mea. Fai atu i tagata o le aiga e vaavaai mo auala e mafai ona latou auauna atu ai i taimi o a latou gaoioiga i aso taitasi, ona potopoto faatasi lea ma talanoa e uiga i ou aafiaga.
Faasoa atu tala e uiga i auaunaga mai le talafaasolopito o lou aiga, o se mekasini o le Ekalesia, po o se lauga o le konafesi aoao. Faitau le Mosaea 2:17 ma talanoa e uiga i le auala e mafai ona tatou auauna atu ai i le Tama Faalelagi e ala i le auauna atu i isi.
Fai atu i lau fanau e tusi ni ata e faaali atu ai pe faapefea ona latou auauna atu i isi. Fai atu ia i latou po o a ni mea e mafai ona latou faia e auauna atu ai i o latou uso ma tuafafine, uo, faiaoga, po o matua.