Manatu mo Afiafi Faaleaiga
O lenei lomiga o loo aofia ai tusiga ma gaoioiga e mafai ona faaaoga mo afiafi faaleaiga. O ni faataitaiga nei se lua.
“O Le Mea Tatou Te Talitonu I Ai,” itulau 8: O loo aoao mai i lenei tusiga, “Ao tatou lagolagoina le perofeta ma aposetolo, tatou te maua se molimau ia i latou o ni auauna a le Atua.” E mafai ona faateleina lau molimau i perofeta e ala i le faitau po o le faalogologo i lauga o le konafesi aoao. I le avea ai o se aiga, mafaufau e faitau se tasi o saunoaga lata mai nei a Peresitene Monson ma filifili se vaega patino o lana fautuaga tou te ola ai. Ao e ola i mea ua fai mai ai le perofeta, taumafai ia iloa auala o loo faamanuiaina ai oe.
“O Mai, Mulimuli Mai Ia te Au: Aoaoina o Mea Faavae i le Aiga,” itulau 28: Na aoao mai Peresitene Spencer W. Kimball (1895–1985), “O lo tatou manuia, taitoatasi ma o se Ekalesia, o le a tele lava ina iloa i le ala tatou te taulai atu ai ma le faamaoni i le ola i le talalelei i le aiga.” Mafaufau e suesue o se aiga i se autu o le O Mai, Mulimuli Mai Ia te Au mo se masina. E mafai ona e suesue i vaega o le autu ua filifilia i vaiaso taitasi, e faaaoga ai tusitusiga paia po o isi mea e fesoasoani i suesuega e pei o le Talai Lau Talalelei, LDS.org, o le Taiala i Tusitusiga Paia, ma le The Life of Christ Bible Videos. I afiafi faaleaiga i vaiaso taitasi, e mafai ona e faasoa atu mea ua e aoaoina ma lagonaina. Mafaufau e faamaumau ou manatu ma lagona i se api talaaga mo suesuega ma faasoa atu mea ua e aoaoina i au uo e ala i faasalalauga faaleagafesootai.