Auaunaga i le Ekalesia
Faamanuiaina ona o La‘u Auaunaga
E alala le tusitala i Ausetalia Sisifo.
E fiafia le Alii e faamanuia i tatou, ma ua ou iloa e tusa lava po o le a le tele o mea na ou auauna atu ai, e tumau pea lava lou nofoaitalafu ia te Ia.
A o faailoa atu a‘u o se failauga talu ai nei, sa ta’ua e le tagata na taitaia ma le faaaloalo nisi o ou valaauga iloga ua mavae i le Ekalesia, e pei o le epikopo, peresitene o le misiona, ma le sui o se au peresitene o le siteki. Sa ava ma faaaloalo lenei uso, ae na tupu ai le manatu ia te au, aisea na le faailoa atu ai au o se taitai misiona a le uarota (o lo‘u valaauga i le taimi nei) po o nisi o o’u valaauga e tau le faia i tagata lautele?
E mafai ona ou faapea ma le faamaoni sa ou lagonaina le agaga taiala lava lea e tasi i valaauga taitasi, ma o valaauga taitasi e tauia. Ou te sailia lava le taitaiga a le Alii i o‘u valaauga, ma e lei i ai lava se taimi na ou lagonaina ai faapea e lei tali mai. Ua i ai lau faaiuga faapea e fiafia le Alii e faamanuia i tatou—tusa lava po o fea tatou te auauna atu ai.
Ou te talitonu o le a tatou mauaina “se pale o le tino ola pea, ma le ola e faavavau” (MF&F 81:6) e le faapea ona o ni valaauga lauiloa ae ona ua tatou auauna atu ma le lotomaualalo i soo se valaauga tatou te maua. Na fetalai mai le Faaola:
“Ia le tuu atu i le ulu e fai atu i vae ua le manaomia e ia vae; aua a aunoa ma vae o le a mafai faapefea e le tino ona tu?”
“O le tasi foi e manaomia e le tino itutino taitasi uma, ina ia mafai ona faagaeetia uma faatasi, ina ia mafai ona tausi i le atoatoa le faatulagaga” (MF&F 84:109–10).
Na ou fefe i nisi o valaauga i le Ekalesia i lou olaga. Soo se taimi lava sa ou mauaina ai na ituaiga manatu e uiga i se valaauga e ono oo mai, e mautinoa lava e le umi ae ou maua. Ina ia talia na valaauga sa manaomia ai le faatuatua ma le faalagolago i folafolaga o loo maua i tusitusiga paia.
Na fai mai Nifae, “O le a ou alu ma fai mea ua poloaiina e le Alii, aua ua ou iloa, e le tuuina mai e le Alii ni poloaiga i le fanauga a tagata, vagana o le a saunia e Ia se ala mo i latou ia mafai ai ona latou faataunuuina o le mea ua Ia poloaiina ai i latou” (1 Nifae 3:7). Na tautino mai Paulo, “Aua ua le foaiina mai e le Atua ia te i tatou le Agaga e matau ai, a o le Agaga e faamalosi ai, ma alofa ai, ma mafaufau tonu ai” (2 Timoteo 1:7).
E i ai taimi atonu tatou te faapea ai e i ai la tatou aia tatau e teena ai se valaauga pe afai tatou te fefefe ai. Ae e tatau ona tatou manatua e tatalo taitai o le Ekalesia e uiga i valaauga ma le tagata e tatau ona tuu i ai.
Pe a tatou teena se valaauga, ona pasi atu lea o le tofiga i se isi, o le a ia maua le avanoa e tuputupu ae ai ma faamanuiaina i le auauna atu (tagai i le MF&F 58:32).
E fiafia le Alii e faamanuia i tatou, ma ua ou iloa e tusa lava po o le a le tele o mea na ou auauna atu ai, e tumau pea lava lou nofoaitalafu ia te Ia. E moni lava, ua Ia faamanuiaina a‘u ma lo’u aiga i talaatu o mea sa ou moemiti i ai ona o la matou auaunaga i Lona malo.