Tagata Poto i Faatele

Ata

PDF of Multiplication Master

Iva ni fitu ua 63. Ono ni valu ua … 42? Leai, e le sa’o!

Na matuai titina ese e Luka lana tali.

“Ua uma le taimi!” Na valaau mai ai le faiaoga a Luka. “Tagata uma ia ao mai loa a outou suega.”

“Auoi leai!” O mafaufauga ia o Luka. “Ae e le’i uma [la’u suega]!”

Sa mapuea Luka a o ia aveina atu lana suega. Na tatau ona ia maua le 90 pasene i ana suega e tuu taimi ina ia pasi ai ana faatele ma avea ai o le Tagata Poto i Faatele, peitai na te le’i iloa pe o le a faapefea ona ia faia!

O le po lena i le taimi o le suesuega o tusitusiga paia faaleaiga, sa faitau mai Tama mai le Mataupu Faavae ma Feagaiga: “O lea, afai tou te ole mai ia te aʼu o le a outou mauaina; afai tou te tuitui mai o le a tatala atu ia te outou” (MF&F 6:5).

Na ea i luga le ulu o Luka. O le tali lena! Tatalo!

Sa amata ona tatalo i aso uma Luka ina ia lelei lana suega o faatele e tuu taimi. O le a aoga le mea lenei. E tatau lava ona aoga. O le a iu ina avea o ia ma Tagata Poto i Faatele!

Ina ua oo i le Aso Lua, na foi mai Luka mai le aoga ma uu lana polo paskiteki.

“E te manaomia se fesoasoani i au suesuega [o meaaoga]?” Na fesili ai tina.

“Leai! O lea ua i ai!” Na fai mai ai Luka a o tamoe atu i fafo o le faitotoa. Sa matuai talitonu lava o ia i le tatalo o lea na te le’i aumaia ai lava i fafo ana kata o faatele e faataitai ai lana numera.

I le aso Faraile, na iloa e Luka o le a pasi lana suega. Ae ina ua saofai e fai le suega, na te le’i iloa ia tali, ma sa sili atu ona leaga lana suega lea nai lo o le suega muamua!

Sa savali atu Luka i le fale mai le falefaatali pasi ma punou lona ulu. Sa tatalo malosi o ia ina ia avea ma Tagata Poto i Faatele. Aisea na le tali mai ai le Tama Faalelagi i lana tatalo?

Ina ua oo atu i le fale, na alu togitogi polo seia oo ina foi mai Tama mai le galuega. Na faaee e Tama le pu ina ua tu lana taavale.

“Na faapefea mai le aoga?” O le fesili lea a Tama.

“E le’i lelei tele,” na fai mai ai Luka ma autilo i lalo. “E le mafai ona pasi la’u suega o le faatele.”

“Oi talofa e,” o le tala lea a Tama. Sa sisii i luga ona luma e pasi atu i ai le polo.

“Na tatau ona ou pasi!” O le tala lea a Luka. “Sa ou tatalo ma fai mea faapena. Tama, na e fai mai e tali mai le Tama Faalelagi i tatalo. E le’i tali moni mai lava o Ia ananei i la’u tatalo!”

“Na e aoao e faaaoga ai au kata o faatele?” o le fesili lea a Tama.

“Leai.”

“Ae na fai ea ni au meaaoga?”

“Leai,” na fai atu ai Luka. “Ae sa ou tatalo i le vaiaso atoa!”

Sa popo i lalo e Tama le polo ma tilotilo atu ia Luka. “Ia, o faatele e pei lava o le pasiketipolo. Na faapefea ona e matuai lelei i le pasiketipolo?”

“Sa ou aoao,” o le tala lea a Luka.

“Ioe, ma a tatou tatalo i le Tama Faalelagi e fesoasoani ia te oe a o le’i faia au taaloga, tatou te le o tatalo ia faamaneta ona Ia faia oe o se tagata taalo pasitekipolo lelei. O a mea tatou te tatalo atu ai?”

“Ia ou manatua mea na ou aoaoina,” na fai atu ai Luka.

“E sa’o. E sili atu ona aoga le tatalo pe a fai la tatou vaega ma ole atu i le Tama Faalelagi e fesoasoani mai ia i tatou,” na fai atu ai Tama.

“O la’u vaega la o le suesue o a’u kata o faatele?” O le fesili lea a Luka.

“O lena tonu a,” na fai mai ai Tama, ma toe pasi atu le polo ia Luka.

Na mapuea leotele Luka ma velo le polo [i le mama] Na fiti ese le polo i augutu o le mama. “Ua lelei. E tele se galuega e manaomia ai. Ae ou te matea e mafai ona ou suesue malosi ma ole atu i le Tama Faalelagi e fesoasoani mai ia te a’u.”

“Ia lena laia!” Na fai mai ai Tama. “Ua e sauni la mo sina taaloga au taitoatasi?”

Sa ataata Luka ma gaoi le polo mai ia Tama. “Ioe! Pe afai e te fesoasoani mai i le taimi lava lea i le a’oga o a’u faatele.”

“Ua lelei la,” na fai atu ai Tama. “Ono ni valu ua fia?”

“Fasefuluvalu!” Na fai atu ai Luka, ma toe velo. O le taimi lenei na fafao lelei lava le polo i le ato.

I le va o faataitaiga ma le tatalo, o le a iu ina avea ai o ia ma Tagata Poto i Faatele.