O Le Taua e Faavavau o le Aiga
Saunia e Elder M. Russell Ballard
O Le Korama a Aposetolo e Toasefululua
Mai i se saunoaga na tuuina atu i le aso 27 Oketopa, 2015.
I lana saunoaga na tuuina atu i le taimi o le Konekaresi o Aiga i le Lalolagi i le Aai o Sate leki, Iuta, ISA, sa saunoa ai Elder M. Russell Ballard e faapea, o i latou e talitonu i le faaipoipoga o tu masani e tatau ona maua uma le lagolagosua latou te mafaia e faamalosia ma puipuia ai lo latou faatuatua, aiga, ma le saolotoga.
E matuai taua malumalu i Au Paia o Aso e Gata Ai aua o totonu o malumalu, e faaipoipo ai ulugalii mo le olaga nei ma le faavavau, e le na o le oti latou te mavae ai. E pei ona folafola mai e le Ekalesia i le “O Le Aiga: O Se Folafolaga i le Lalolagi” i le 23 tausaga talu ai, “O le faaipoipoga i le va o se alii ma se tamaitai, ua faauuina e le Atua ma … o le aiga o le totonugalemu lea o le fuafuaga a Lē Foafoa, mo le taunuuga e faavavau o Lana fanau.”1
Ua faamatala e lenei aoaoga faavae lo tatou tulaga malosi i le aiga. Tatou te talitonu foi e ao ona tatou aapa atu i tagata uma i le malamalama, alofa, ma le agalelei. O le a taulai muamua atu lau tautalaga i mafuaaga faaleaoaoga faavae lea e i ai i aiga masani se matafaioi taua i lo tatou Ekalesia. Lona lua, o le a ou faamatala atu le sootaga i le va o lagona faaletapuaiga o loo siomia ai le aiga ma le saolotoga tapuaiga. Ma le mea mulimuli, o le a ou fautua atu ni mataupu faavae taiala i le aapa atu ia i latou o siomia i tatou, e ui i soo se feeseeseaiga po o feteenaiga.
O Le Talitonuga o le Ekalesia i le Aiga
Ina ia maua se talaaga i lo tatou talitonuga faaleEkalesia e uiga i aiga, ou te fia sii maia ni upu mai i se pese e masani ona lagiina e fanau e taua “Ou Te Nofo i le Lagi.” E otooto e lenei pese le mea sa tatou o mai ai, le mafuaaga ua tatou i ai iinei, ma le nofoaga tatou te o i ai. E taua e Au Paia o Aso e Gata Ai o le fuafuaga o le faaolataga—o se fuafuaga e faavavau a lo tatou Tama Faalelagi.
Sa ou nofo i le lagi i aso anamua;
Nofo ai ma alofagia e tagata uma. Ma oe foi.
Tuu mai e le Tama se ata manaia,
O le lalolagi ma le faaolataga.
Manaomia e Tama se tasi e alofa
Tuu atu lona ola ia tatou toe foi atu ai.
Sa i ai le isi na saili le mamalu.
Fai mai Iesu, “Auina a’u ae tuu Lou mamalu.”
Filifili Iesu e avea ma Mesia.
Faato’ilalo le oti ma le fili i Lona suafa,
Maua ai lo tatou faamoemoe i le isi olaga—
I le lagi o loo faatali mai ai a’u e le Tama.2
Faatasi ai ma lenei pese i le mafaufau, sei ou faamatala atu ni nai elemene taua o le fuafuaga o le faaolataga lea e faamamafa ai lo tatou tino ola pea ma le natura faavavau ma o tatou aiga.
I le muai olaga, sa tatou nonofo ma le Atua, o lo tatou Tama Faalelagi. O Ia o le Tama moni o o tatou agaga, ma o i tatou o Ana fanau agaga. O le mea lea, o tagata uma o e soifua mai i lenei olaga o uso ma tuafafine faaleagaga.
“O le faamoemoega atoa lava o le Atua—Lana galuega ma Lona mamalu—ina ia mafai e i tatou ona olioli i Ana faamanuiaga uma.” O lo tatou filifiliga e usitai pe le usitai i Ana poloaiga e fuafua ai lo tatou taunuuga e faavavau. “O le aiga e totonugalemu i le fuafuaga a le Atua. O Lana Togiola, na faataunuu ai e Iesu Keriso le faamoemoega o Lona Tama ma mafai ai e i tatou taitoatasi ona olioli i se tino ola pea ma le ola faavavau eternal life.”3 O noataga o le faaipoipoga ma le aiga ua noatia e ala i le mana o le perisitua e tumau ai i talaatu o le tuugamau pe a tatou faaipoipo “mo le taimi nei ma mo le faavavau atoa” i le malumalu (MF&F 132:7).
Ou te faamoemoe o lenei aotelega puupuu o le a fesoasoani ia te oe e malamalama ai i le auala e fesootai atoa ai lo tatou aoaoga i tu ma aga faaleaiga. E mafai e sosaiete, tulafono, ma manatu lauiloa ona sui, ae o le manatu faalesosaiete o le aiga e le mafai ma o le a le suitulaga mo faamoemoe ma le fuafuaga a le Atua mo Lana fanau.
I le lalolagi i le aso, lea ua faateteleina ai le le faatauina o faaipoipoga ma fanau, e le tu na o Le Ekalesia a Iesu Keriso o le Au Paia o Aso e Gata Ai i le faailoaina o tu ma aga masani faaleaiga o se tasi o ona elemene faaleaoaoga faavae aupito taua.
Na saunoa mai Pope Francis, “Na Ia [le Atua] foafoaina alii ma tamaitai mo le fiafia, e fefaasoaai lo la malaga ma se isi e faaatoatoaina, ia aumau ai i aafiaga matagofie o le alofa: ia alofa atu ma ia alofaina, ma vaai lo la alofa o fua mai i fanau.”4
Ua tautino mai e le Ekalesia Papatiso i Saute: “O le faaipoipoga o le tuufaatasia o se alii ma se fafine e toatasi i le tautinoga o le feagaiga mo le olaga atoa. … E tutusa le taua o le tane ma le ava i luma o le Atua, talu ai na foafoaina uma i laua i le faatusa o le Atua.”5
O lo tatou talitonuga faaleaoaoga faavae e uiga i aiga e faavavau ma faamatalaga a isi taitai Kerisiano ua faigofie atu ona malamalama i le aisea ua tatou matuai tuuto ai e faafailelei, puipuia, ma uunaia tu ma aga masani faaleaiga.
Lagolago Faalelalolagi mo Manatu Faaletapuaiga
Ua i ai i latou o e manatu o na aoaoga faavae ma faamatalaga o ni leo faalelotu faavalevalea. Ae peitai, sa taumafai malosi le Faamasinoga Maualuga a le I.S ia Iuni 2015 e faailoa atu o tagata faamaoni ma mafaufau lelei e mafai ona umia se manatu e ese mai ai, e oo lava i le faailoaina o le faaipoipoga o le itupa e tasi:
“E paia le faaipoipoga ia i latou o e ola ai i o latou tapuaiga. …
“… O loo i ai tulaga e tele i le matagofie o le faaipoipoga i anotusi o tapuaiga ma taimi lautele faalefilosofia, aganuu, ma faatuatuaga, e oo lava i faatufugaga ma tusitusiga i o latou tulaga uma. E talafeagai ma tatau ai le fai atu o nei manatu sa faalagolago i luga o le malamalamaaga o le faaipoipoga o se tuufaatasiga i le va o tagata e toalua o itupa eseese. …
“… O le faaipoipoga, i lo latou silasila, e ala i lona natura o le tuufaatasia o le alii ma le fafine o itupa eseese. Ua leva ona i ai lenei vaaiga—ma e faaauau pea ona i ai—i le faatuatua lelei e ala i tagata mafaufau lelei ma faamaoni iinei ma i le lalolagi atoa.”6
Sa faailoa mai ma le sao e le Faamasinoga Maualuga e faapea e toatele tagata faamaoni ma mafaufau lelei i le lalolagi e faaauau pea ona faailoa mai tu ma aga o le faaipoipoga.
Faatuatua, Aiga, ma le Saolotoga
O le malamalama ai e mafai e tagata mafaufau lelei ma faamaoni ona silasila i le faaipoipoga ua na o le va o tagata o le itupa eseese, e tatau i manatu lautele ona lagolagoina, ma e tatau i saolotoga faalelotu ona puipui, ia ituaiga o manatu. E moni, aua e mafai e talitonuga faalelotu ona aafia ai le auala e silasila ai tagata talitonu i le faamoemoega moni o le olaga, o ia manatu o le a tau mai ai le auala latou te fegalegaleai ai ma le lalolagi.
Ua faamanatu mai ai ia te au ni tala o tala fou e uiga i fanau laiti e ona le faiaoga o le aoga na faitaua se tala ia i latou e uiga i ni perenise se toalua ua faamamai i le alofa. Sa tuuina atu e le faiaoga lenei anomea ma le leai o se lapataiga po o se faasilasilaga. Ina ua fai atu matua e logo i latou pe a toe faitauina lenei tala i le lumanai, sa teena e le aoga.7
Pe faamata e afaina moni taitai o le aoga e tuu atu i matua e aveese a latou fanau pe afai o anomea na aoaoina e le tusa ai ma o latou talitonuga? O le faaiuga a le aoga na foliga mai o se osofaiga tuusao i le matafaioi a matua i le tausiaina o a latou fanau.
Ua tatou ola i se vaitaimi faigata. E masani lava o le ioeina e foliga faigata ma mamao. Tatou te faalogo i tala o tagata o e taumafai e ola ai i o latou talitonuga, i le tuuaia ai i le tulaga faatonuina, i le tuuaia ai i le manatu faapito po o le le talitonu po o le faasalaina i se tulaga e foliga e le talafeagai.
O le tele o atunuu e toeitiiti 200, e aofia ai le Iunaite Setete, e taliaina le aia tatau a matua i le aoaoina o o latou fanau pe latou te le Osia Feagaiga Faavaomalo o Feagaiga ma Aia Tatau. O le tusiga 18 o lenei feagaiga ua faapea mai, “O … Itu … e uia ina ia faaaloalo mo saolotoga a matua … ina ia mautinoa ai o aoaoga faalelotu o le mama o a latou fanau ia fuatasi ma lo latou lava talitonuga.”8
O lenei puipuiga o aia tatau faalevaomalo e ogatusa ma le tulaga o le Ekalesia, lea e taua i le folafolaga o le aiga: “Ua i ai i matua se tiute paia e tausia a latou fanau i le alofa ma le amiotonu … ma ia aoao i latou e alolofa ma feauaunaai, [ma] ia tausia poloaiga a le Atua. … O tane ma ava—tina ma tamā—o le a latou tali atu i le Atua mo le faataunuuina o nei mea e ao ona faia.”9
Atonu e foliga mai o loo faasagatau mai manatu ia i tatou, ae o ia te i tatou le tele o lagolagosua e faaauau ai ona uumau i a tatou vaaiga o tu ma aga o le faaipoipoga. Ua ou faailoa atu na o ni nai punavai. E tele isi punavai o loo i ai.
E tatau ona tatou aoina mai lagolagosua uma tatou te mafaia e faamalosia ma puipuia ai lo tatou faatuatuaga, aiga, ma saolotoga. O loo taumafai malosi nisi e aveese nei aia tatau mai ia i tatou. Sa lipoti mai e se tasi o tala le tele o le miliona ua faaaluina e taumafai e faatoilalo le puipuiga o saolotoga o tapuaiga i le Iunaite Setete.10
E tusa ai ma nei ituaiga o taufaafefe, ou te talitonu na sili atu ona tuuina e lau uo o Elder Dallin H. Oaks o le Korama a Aposetolo e Toasefululua: “E tusa lava pe tatou te saili atu ia agamalu ma aloese mai finauga, e le tatau lava ona tatou fetuunaia pe faavaivaia lo tatou tuuto i upumoni ua tatou malamalama i ai. E le tatau ona tatou lafoaia o tatou tulaga po o tulaga faatauaina.”11
Afai e faamaoni i latou o e tetee ia i tatou i o latou tautinoga i tulaga faatauaina o vaega eseese ma mea e tutusa ai, e ao ona tatou galulue faatasi e saili le agaalofa ma le filemu. O le faamalosia o talitonuga o se tasi i luga o se isi tagata, e pei ona tupu i fanau sa faitau i ai anomea e feteenai i moomooga o o latou matua, e tuuitiitia ai le tele o vaega ma motugaafa o tulaga o le tutusa. I le auai i le ioeina ma le tuuina atu o le alofa i fanau uma a le Atua, o o tatou uso ma tuafafine, e mafai ona tatou fatuina se sosaiete eseese o manatu ma talitonuga filemu.
Mataupu Faavae Taiala i le Alofa i Le Tasi ma Le Isi
O lea la ua ou faamatalaina le taua o tu ma aga o le faaipoipoga ma le tatau ona tatou puipuia o o tatou aia tatau, sei ou faamatala atu pe aisea e tatau ai ona tatou tuuina atu se lima o le faaaumea ia i latou o e tatou te le malilie faatasi. Sa poloai mai Iesu Keriso:
“Ia outou alolofa atu i e ua ita mai ia te outou, ia outou faamanuia atu i e ua fetuu mai ia te outou, ia outou agalelei atu i e ua inoino mai ia te outou, ia outou tatalo foi mo e ua tuuaifua mai ma faasaua mai ia te outou.”
“Ina ia avea outou ma fanau a lo outou Tamā o lē o i le lagi” (Mataio 5:44–45).
E pei lava ona le tatau ona tatou teena tagata o aiga o e tatou te le malilie faatasi, e le mafai ma e le tatau ona teenaina i latou o e ese le vaai pe mafaufau pe amioai nai lo mea tatou te faia. Tatou te faatino lo tatou tagata silisili pe a tatou faaali atu le alofa ma le agalelei i fanau uma a le Atua. Tatou te faatino lo tatou avea ma soo pe a tatou teena uiga mataga, pe a tatou teena faailoga taufaifai, ma pe a tatou ulu atu i nofoaga lautele e saili taunuuga talafeagai e ala i le malamalama ma le faaaloalo.
Sa lagolagoina talu ai nei e le Ekalesia le tulafono lea na fetaui ma popolega o le nuu o LGBT i popolega a i latou o e na i ai ni maaleale faaletapuaiga i tu ma aga masani. E puipuia e le LGBT tagata mai le faamaloloina po o le teenaina o le maua o fale ona o lo latou faasinomaga po o le tulaga faalefeusuaiga. I le taimi lava e tasi, e puipuia le manatu faaletapuaiga ma aia tatau e faatino ai talitonuga loloto faaletapuaiga e ala i lenei tulafono malosi.12
E leai se tasi o ia vaega e na ausia mea uma na mananao ai, ae o lo matou galuega ma le nuu o le LGBTma Faitulafono a Iuta na faaitiitia ai le fevaevaeaiga i o matou nuu e aunoa ma fetuunaia i luga o mataupu faavae autu.13 E mafai ona tatou alolofa i le tasi ma le isi e aunoa ma le fetuunaia o mataupu faavae paia faaletagata lava ia. Ma e mafai ona tatou talanoa i na mataupu faavae e aunoa ma le tuuitiitia o isi.
O Iesu Keriso o se faataitaiga sili o le alofa atu i isi. I nai itula a o lei amata e Ia le faagasologa tiga o le totogiina mo agasala a i tatou taitoatasi, sa Ia feiloai ma Ona aposetolo e taumafa i le Tausamaaga o le Paseka—Lana Tausamaaga Mulimuli—ma tuu atu ia i latou faatonuga mulimuli na Ia ofo atu i le olaga faaletino. I Ana aoaoga, o le tautinoga musuia, e suia ai le olaga “O le poloaiga fou ou te tuu atu ai ia te outou, ia outou fealofani; faapei ona ou alofa atu ia te outou, ia fealofani foi outou” (Ioane 13:34).
E mafai ona tatou faapatino ma faamemelo e uiga i manuia o le faaipoipoga o le alii i le tamaitai e aunoa ma le le faaaloalo pe faamanualia i latou o e ese o latou manatu. E tusa lava po o a talitonuga po o faatinoga, i le avea ai o ni uso ma ni tuafafine e tatau ona tatou taumafai e malamalama i le tasi ma le isi. Ia manatua i le iuga, pe faaipoipo pe nofotoatasi, o i tatou o se vaega tulaga ese o le fuafuaga tele a le Atua.
Faaiuga
Na fasiotia le Perofeta o Iosefa Samita ma Ailama lona uso i le aso 27 Iuni, 1844, e vaega faatupuvevesi a o taofia i laua i le puipuiga a le setete. I le mavae ai o lo la faamaturoina, na faamatauina e tagata faatupuvevesi sauaga i tagata o le Ekalesia a o latou fausia le Malumalu i Navu. Ae sa latou fausia pea e tusa lava pe na iloaina atonu latou te tuua le malumalu. A o lei tutuli ese e tagata leaga, sa latou auai atu i le malumalu i le ao ma le po e osia folafolaga paia lea e tuufaatasia ai i latou e faavavau o ni aiga.14
I le faia o savaliga sopo i le Vanu o Sate Leki, o matua o matua matutua i itu uma o lou tina ma lou tama sa totogia se tau maoae i le mafatia ma faigata. Sa tuueseeseina aiga paionia e ala i le maliu, ma e ui i le tanuina o fanau, taitoalua, matua, matua matutua, ma uo i le ala i sisifo, sa latou faaauau pea i luma.
O lo latou faatuatua i se fuafuaga paia na mamanuina e ni Matua Faalelagi o e alolofa i ai tatou na tuuina atu ai ia i latou le lototele e feagai ai i luitau ogaoga. Sa latou saili se nofoaga lea, e aunoa ma ni sauaga, e mafai ai ona latou tausi ae o latou aiga ia alolofa i le Atua ma auauna atu ia te Ia. Ou te faafetai ia i latou mo le taitaiina o le ala.
O le aoaoga faavae ma le mataupu faavae o Le Ekalesia a Iesu Keriso o le Au Paia o Aso e Gata Ai e amata ma faaiu moni i le aiga. Ou te toe fai atu mea sa ou tau atu muamua: tatou te talitonu sa tatou nonofo muamua o ni aiga o le Atua a o lei i ai lenei olaga o ni sui o le aiga faaleagaga, ma o ni fanau a ni Matua Faalelagi, e tatau ona tatou saunia a o i ai i le lalolagi e toe foi atu e maua faamanuiaga folafolaina ia i latou o e tausia poloaiga a le Atua.
O lenei malamalama o le a saunia ai tatou taitoatasi mo lena aso pe a tatou feoti ma iloa moni, i lo tatou toe foi atu i le afioaga paia o le Atua, o le faamoemoega moni o Lona fuafuaga mo i tatou. Ma e pei ona faamauina i le folafola o le aiga, “Matou te valaau atu i tamalii ma failauga ma taitai o malo i soo se mea ina ia faalauiloa atu na fua faatatau ua fuafuaina ina ia faatumauina ma faamalosia le aiga o se iunite faavae o malo.”15