Ni’a noa i te rorouira : Feiā ’Āpī Pa’ari
E mea huru ’ē ri’i i te fa’a’ohipara’a i te i’oa tā’āto’a o te ’Ēkālesia, terā rā, ’ua faufa’ahia te reira
’Ia hi’ohia, e au ē, e mea ’ōhie ’ia pe’e i te mau arata’ira’a a te peropheta, ’ua ’itehia rā i muri a’e ē, ’ua tītauhia te mau tauto’ora’a rahi, hau atu i tā’u i mana’o’.
I te paraparaura’a te Peresideni Nelson nō ni’a i te fa’a’ohipara’a i te i’oa tano o te ’Ēkālesia i roto i te ’āmuira’a rahi nō ’Ātopa 2018, e mea māramarama roa tāna parau poro’i nō’u : « E fa’auera’a nā te Fatu…
« … ’Īriti i te i’oa o te Fatu mai roto mai i te ’Ēkālesia a te Fatu, ’ua riro ïa ’ei upo’oti’ara’a rahi nō Sātane » (« Te i’oa ti’a o te ’Ēkālesia », Liahona, Novema 2018, 87, 88).
’Ua ’ite a’era vau ē, ’ua tītauhia iā’u ’ia feruri fa’ahou i te huru nō tā’u ha’amatara’a i te paraparau i te mau ta’ata ’ati a’e iā’u, mai te tahi mau hoani i tā’u vāhi ravera’a ’ohipa tei mātau i te pi’i iā’u ē « momoni » ’e e melo nō te « ’Ēkālesia Momoni ».
Ma te fa’aoti ē, e fa’a’ohipa i te i’oa tā’āto’a o te ’Ēkālesia, ’ua tīa’i au i te taime nō te fa’a’ite i tō’u ti’ara’a melo i roto i te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua tae mai hoa taua taime ra, i roto ā i te hō’ē taime tapiho’ora’a. « E mau ta’ata maita’i ’outou te mau momoni », te parau ïa a te hō’ē hoani i ni’a iā’u. ’Ua pāhono atu vau, « māuruuru maita’i ». « ’Ei melo nō te ’Ēkālesia a Iesu Mesia i te Feiā Mo’a i te mau Mahana Hope’a nei, tē ti’aturi nei mātou ē, e mau taea’e ’e e mau tuahine ana’e tātou pā’āto’a ». E ’ua haere noa te ’āparaura’a ’e ’ōna ’e te tahi atu mau ta’ata ma te paraparau nō ni’a i te maita’i o te « mau momoni ».
Noa atu ē, ’ua rave au i tā’u tuha’a nā roto i te fa’ahitira’a i te i’oa tā’āto’a o te ’Ēkālesia, ’ua vai noa te mana’o i roto iā’u ē, tē vai ra hō’ē mea ’aita i ’āfaro roa. ’Ua tāmau noa tō’u mau hoa ’e tō’u mau hoa ’ohipa i te hi’o iā’u ’ei ta’ata nō roto i te « ’Ēkālesia momoni » ’eiaha rā ’ei pipi mau nā te Mesia, ’eiaha roa atu ’ei melo nō te ’Ēkālesia a Iesu Mesia i fa’aho’ihia mai.
Mau’ara’a maita’i ānei te taime ?
I roto i te mau tau’ara’a parau i muri mai nō ni’a i tō’u ti’aturira’a, ’ua pau vau, te tumu, nō te huru ’ē i te fa’ahitira’a e rave rahi taime i te i’oa tā’āto’a ’e te roa o te ’Ēkālesia i roto i te hō’ē ’āparaura’a. E mea ’ē roa te mau parau a te mau ta’ata tā’u i paraparau. ’E tei ni’a noa te mau ’āparaura’a i te « momoni ».
’Ua tāmata vau i te fa’ariro i tā’u mau ’āparaura’a ’ei mau ’āparaura’a huru ’ōhie a’e. Terā rā, ’ua fifi roa te reira, hau atu i tā’u i mana’o, i mua iho ā rā i te mau ta’ata ’aita vau e hina’aro e fa’atupu i te ’ino’ino. ’Aita vau i hina’aro ’ia ha’amā ’aore rā, ’ia fāri’i noa i te mana’o nō ni’a i te orara’a i tō’u fa’aro’o, ’aita ato’a rā vau i hina’aro ’ia fa’a’eta’eta roa, nō te mea, e rave rahi ta’ata tei pi’i noa iā’u e « momoni » nā mua a’e nei, ’e ’ua fāri’i noa vau. ’Ua fa’aro’o ato’a vau e rave rahi melo o te ’Ēkālesia e tāmau noa nei i te pi’i « momoni » ia rātou iho ’e i te tahi atu mau melo o te ’Ēkālesia i roto i te mau putuputura’a rau ’e i te tahi atu vāhi.
’Ua tae roa vau i te ui iā’u iho ē, e mea faufa’a ānei te fa’a’ohipara’a i te i’oa tā’āto’a o te ’Ēkālesia i roto i te fa’anahora’a rahi o te mau mea ato’a. ’Inaha ho’i, e mea maita’i roa te tāpa’o « Mōmoni » i roto i te ferurira’a o te ta’ata e rave rahi—’ua riro nā ho’i te ti’ara’a « momoni » ’ei ’ohipa maita’i roa nō’u. Terā rā, i tō’u hi’o-fa’ahou-ra’a i te a’ora’a a te Peresideni Nelson, ’ua māere au i te ’itera’a ē, e mea faufa’a mau, noa atu ē, e mea huru ’ē ri’i te reira i roto i te ’āparaura’a. Nō reira, ’ua rave fa’ahou vau i te fafaura’a.
Hō’ē rāve’a nō te fa’a’ite pāpū i te Mesia
Te taime i muri iho ’a fa’a’ohipa ai au i te i’oa tā’āto’a o te ’Ēkālesia, te taime ïa ’a haere ai au e fārerei i te hō’ē hoa i te purera’a a te tahi atu ha’apa’ora’a. ’Ua haere mai ra te hō’ē ta’ata iā’u ra, ’e ma te mata ’ata’ata ’ua ani mai ra ē, e momoni ānei au. Nā ō atura vau ē, « ’Ē, e melo vau nō te ’Ēkālesia a Iesu Mesia i te Feiā Mo’a i te mau Mahana Hope’a nei ». ’Ua ha’amata a’era ’oia i te ui mai e rave rahi uira’a, ma te ha’amata nā ni’a i teie parau : « Tē ti’aturi ra ānei te ’Ēkālesia Momoni i te… ? » ’E, i te mau taime ato’a, ’ua ha’amata vau i tā’u pāhonora’a nā ni’a i teie parau : « I roto i te ’Ēkālesia i fa’aho’ihia mai, tē ti’aturi nei mātou… »
’Ua tāta’i maha ’aore rā, tāta’i pae te tere-noa-ra’a teie parau hō’ata. I tōna ’itera’a ē, ’aita vau e fāri’i ra i terā ti’ara’a e « momoni » ’ua ui pāpū mai ra ’oia iā’u ē, « E ’ere ’oe i te momoni ? »
’Ua ani atura vau iāna ē, ’ua ’ite ānei ’oia ē, o vai o Moromona—’aita ’oia i ’ite. ’Ua parau atura vau iāna ē, e peropheta o Moromona, e ta’ata pāpa’i ’ā’amu, e tenerara fa’ehau, ’e e ta’ata poritita i roto i te fenua Amerika i tahito ra. E te’ote’o rahi tō’u i te ’āpitira’ahia tō’u ti’ara’a i te hō’ē ta’ata mai teie te huru, tei tāvini rahi i te Fatu ’e i te mau ta’ata.
’Ua tāmau vau i te parau, terā rā ’aita ’o Moromona i pohe nō tā’u mau hara. ’Aita ’o Moromona i hāmani’i i tōna toto nō’u aore rā ’aita ’oia i māuiui i Getesemane ’aore rā, i pohe i ni’a i te sātauro. E ’ere ’o Moromona tō’u Atua. ’O Iesu Mesia tō’u Atua ’e tō’u Fa’aora. ’O ’oia tō’u tāra’ehara. ’E e mea nā roto i tōna i’oa tā’u e hina’aro ’ia ’itehia vau i te mahana hope’a, ’e e mea nā roto i tōna i’oa tā’u e ti’aturi nei ’ia ’itehia vau i teie mahana ».
’Ua ’ite pāpū vau i te pāturura’a a te Vārua i roto i teie ’itera’a pāpū poto i mua i te ta’ata tā’u i mātau ’āpī. I muri a’e i te tahi tetoni māmūra’a, nā ’ō mai ra ’oia, « e keretetiano ïa ’oe ? »
Pāhono atu rā vau « ’Ē, e keresetiano vau, ’e e melo nō te ’Ēkālesia a te Mesia i fa’aho’i-fa’ahou-hia mai ».
’Ia hi’ohia, e au ē, e mea ’ōhie te ’imira’a ’ia pe’e i te mau arata’ira’a a te peropheta, terā rā, ’ua tītauhia te mau tauto’ora’a rahi, hau atu i tā’u i mana’o. ’Aita ā vau i hope roa atura i te maita’i i te pe’era’a i te mau mea ato’a e anihia iā’u ’ia rave. Terā rā, i te mau taime ato’a, e ha’apāpū vau i teienei ’ia fa’a’ohipa i te i’oa tā’āto’a o te ’Ēkālesia.
Tē māuruuru nei au nō te Vārua tā’u i fāri’i i te taime e tītauhia iā’u ’ia fa’a’ite pāpū ia vetahi ’ē nō ni’a i tō’u Fa’aora ’e tō’u ti’ara’a melo i roto i tāna ’Ēkālesia. ’E i teienei e rāve’a maita’i roa tā’u nō te fa’a’ite pāpū, ma te ’ōhie, nō ni’a iāna ’e nō ni’a i tāna ’Ēkālesia, i te mau taime ato’a e anihia mai iā’u e « momoni » ānei au.