Alma 36–38

Diyutay kanato ang makabaton og mga kasinatian nga ingon ka mahinuklugon sama sa pagkakabig ni Alma. Apan ang tanan kinahanglan gayod nga “natawo sa Dios,” bisan og kini sa kasagaran mahitabo sa hinayhinay.(Alma 36:23; 38:6). Samtang ikaw magbasa sa Alma 36, paghunahuna mahitungod kon unsay buot ipasabot nga natawo sa Dios. Sama pananglitan, sa proseso sa pagkahimong natawo sa Dios, unsay atong bation mahitungod sa sala? mahitungod ni Jesukristo? Sa unsang paagi ang pagkahimong natawo sa Dios makaapekto sa unsay imong buhaton sa imong kaugalingon nga mga sayop? Unsa ang ubang mga kausaban ang mahitabo sa imong mga tinuohan ug mga lihok? Pamalandongi kon sa unsang paagi ikaw nagsinati nini nga mga kausaban.

Tan-awa usab sa Mosiah 5:7; 27:25–26; Alma 5:14; 22:15; Helaman 3:35; “Si Alma nga Batan-on Nakabig ngadto sa Ginoo” (bidyo), Gospel Library.

Usahay ang mga tawo mahadlok sa paghinulsol tungod kay nagtan-aw sila sa paghinulsol isip usa ka masakit nga kastigo alang sa sala. Unsa kaha ang isulti ni Alma mahitungod niana? Aron masayran, mahimo nimong itandi kon unsa sama ang kinabuhi ni Alma sa wala pa siya naghinulsol (tan-awa sa Alma 36:6–17) ngadto sa iyang paghulagway sa iyang kaugalingon human siya naghinulsol (tan-awa sa mga bersikulo 18–27). Sumala diha sa Alma 36:17–18, giunsa pagkadawat ni Alma niini nga kapasayloan?

Tan-awa usab sa Matthew S. Holland, “Ang Talagsaon nga Kanindot nga Gasa sa Anak,” Liahona, Nob. 2020, 45–47.

Ikonsiderar ang milagro ug panalangin sa pagka-adunay mga kasulatan karon! Samtang imong basahon ang Alma 37, pangitaa ang mga panalangin nga moabot tungod sa pagkaadunay mga kasulatan (tan-awa, sama pananglit sa mga bersikulo 7–10, 18–19, 44–45).

Diha sa Alma 37:38–47, gitandi ni Alma “ang pulong ni Kristo” ngadto sa Liahona. Samtang palandongon nimo kini nga pagtandi, hunahunaa ang mga paagi nga imong nasinati ang milagro ug gahom sa mga pagtulon-an ni Kristo “sa matag adlaw” (Alma 37:40).

Tan-awa usab sa D. Todd Christofferson, “Ang Panalangin sa Kasulatan,” Liahona, Mayo 2010, 32–35; “Sa Ako nga Pagsiksik sa Balaang Kasulatan,” Mga Himno, nu. 175; “Si Alma Mipamatuod ngadto sa Iyang Anak nga si Helaman” (bidyo), Gospel Library.

Imahe

babaye nga nagbasa sa mga kasulatan

Usahay mobati kita nga ingon og ang atong mga problema hilabihan sa ka dako ug komplikado nga ang mga solusyon kinahanglan gayod nga dako ug komplikado usab. Apan dili kana kanunay mao ang paagi sa Ginoo. Samtang imong basahon ang Alma 37:1–14, ikonsiderar kon unsa ang nakapadani kanimo mahitungod kon giunsa paghimo ang Iyang buhat. Dayon ikaw makapamalandong ug makarekord sa mga paagi nga imong nakita kini nga baroganan sa imong kinabuhi.

Kon imong itudlo kini nga baroganan ngadto sa usa ka tawo, unsa nga mga ehemplo gikan sa kinaiyahan o sa matag adlaw nga kinabuhi ang imong gamiton sa paghulagway niini? Makakaplag ka og pipila ka baroganan sa mensahe ni Presidente Dallin H. Oaks “Gagmay ug Yano nga mga Butang,” (Liahona, Mayo 2018, 89–92).

Unsa ang pipila ka gagmay ug yano nga mga butang nga makapaduol kanimo sa Langitnong Amahan ug kang Jesukristo?

Kasagaran, ang atong “gagmay ug yano” nga mga pagpili mohimo og dagko nga mga kalainan sa atong mga kinabuhi. Ikonsiderar ang pagpili og hilisgotan gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ug sa pagpangutana sa imong kaugalingon sa mga pangutana sama niini: Sa unsang paagi ang akong mga pagpili mahitungod niini makaapekto kanako ug sa mga tawo nga naglibot kanako? Unsa ang gagmay ug yano nga mga kausaban ang akong mahimo nga mosangpot ngadto sa mas dako nga kalinaw ug kalipay?

Tan-awa usab sa Michael A. Dunn, “Mas Maayo og Usa ka Porsento,” Liahona, Nob. 2021, 106–8.

Diha sa Alma 37:35–37, pangitaa ang mga pagdapit ni Alma ngadto sa iyang anak nga lalaki nga si Helaman. Hain niini nga mga pagdapit ang nabati nimo nga giaghat sa paglihok? Sama pananglit, mahimong mamalandong ka sa unsay gipasabot sa “pakitambag uban sa Ginoo” (bersikulo 37). Giunsa nimo sa pagpaninguha sa paghimo niini? Sa unsang paagi Siya migiya kanimo alang sa kaayohan?

Ang mga pulong ni Alma ngadto sa iyang anak nga lalaki nga si Shiblon naghatag og maayo nga ehemplo kon unsaon sa pagpalig-on ug pag-awhag sa mga tawo nga atong gihigugma sa pagsunod sa ebanghelyo. Ang pagtuon sa Alma 38 mahimong mohatag kanimo og pipila ka ideya alang sa pagtabang sa mga sakop sa pamilya ug mga higala nga makakaplag og kalig-on diha ni Jesukristo. Isulat kon unsa ang imong nakaplagan.

• Aron matabangan ang inyong mga anak nga makasabot nga ang paghinulsol maghatag og hingpit kalipay, mahimo kang mohatag kanila og usa ka piraso sa papel nga adunay malipayon nga nawong sa usa ka habig ug usa ka masulub-on nga nawong sa pikas. Hangyoa sila sa pagpaminaw samtang imong basahon o i-summarize ang Alma 36: 13, 17–20 ug ipataas ang usa sa mga nawong aron sa pagpakita kon unsay gibati ni Alma. Ang mas magulang nga mga bata mahimong mosulat sa mga pulong o mga hugpong sa mga pulong nga naghulagway kon unsa ang iyang gibati. Unsa ang nakapaguol ni Alma, ug unsa ang nagdala kaniya og hingpit nga kalipay? Dayon masultihan nimo sila mahitungod sa hingpit nga kalipay nga imong mabati kon ikaw maghinulsol.

• Ang inyong mga anak tingali malingaw sa pagpangita og gagmay nga mga butang nga makapahinabo sa dagko nga mga butang. Ang mga aytem sama sa usa ka bateriya, yawe sa sakyanan, o gani usa ka dulaan nga makapahupay kanila mahimong mga ehemplo. Dayon magkauban ninyong mabasa ang Alma 37:6–7 ug maghunahuna sa pipila ka gagmay o yano nga mga butang nga gusto sa Dios nga buhaton nato. Unsa ang dagko nga mga butang ang mahitabo kon kita motuman niining gagmay o yano nga mga sugo?

• Ang inyong mga anak mahimong mosulay usab og butang nga sama niini: pagsugod sa pagpuno sa usa ka tasa og tubig, usa ka tulo sa matag higayon. Sa unsang paagi kini may kalabotan sa Alma 37:6–7? Dayon mahimo kang maghisgot mahitungod kon sa unsang paagi ang “gagmay ug yano nga mga butang” sa Ginoo, sama sa pagbasa sa mga kasulatan kada adlaw, sama sa mga tulo sa tubig diha sa usa ka tasa.

• Tabangi ang inyong mga anak sa paghunahuna og mga paagi nga ilang mapahinabo ang dagko nga mga butang sa panimalay, eskwelahan, o simbahan. Ang awit nga “Sulti sa Gamay nga Sapa ‘Hatag’” (Songbook sa mga Bata, 116) naghulagway usab niini nga baroganan.

• Sa unsa kaha nga paagi nga inyong matabangan ang inyong mga anak nga makapalambo og gugma alang sa pulong sa Dios, sama sa gibuhat ni Alma alang kang Helaman? Ikonsiderar ang pagpakita kanila og usa ka litrato sa Liahona (sama sa Libro sa mga Hulagway sa Ebanghelyo, nu. 68) o ang pagdapit kanila sa pagdrowing niini samtang mopakigbahin sila sa unsay ilang nahibaloan bahin niini (tan-awa sa Alma 37:38–47; 1 Nephi 16:10, 28–29). Sa unsa nga paagi nga ang mga kasulatan sama sa Liahona?