Ang amahan ni Nephi, si Helaman, miaghat sa iyang anak nga mga lalaki nga “hinumdomi, hinumdomi.” Gusto siya nga mahinumdom sila sa ilang mga katigulangan, mahinumdom sa mga pulong sa mga propeta, ug labaw sa tanan mahinumdom sa “atong Manunubos, kinsa mao si Kristo” (tan-awa sa Helaman 5:5–14). Klaro nga si Nephi nahinumdom tungod kay kini mao ang samang mensahe nga iyang gipahayag sa mga tuig human niadto nga “walay kaluya” ngadto sa katawhan (Helaman 10:4). “Sa unsa nga paagi nga kamo nahikalimot sa inyong Dios?” siya nangutana (Helaman 7:20). Ang tanang paningkamot ni Nephi—pagsangyaw, pag-ampo, paghimo og mga milagro, ug pagpangaliyupo sa Dios alang sa kagutom—mao ang mga pagsulay sa pagtabang sa katawhan nga mobalik ngadto sa Dios ug sa paghinumdom Kaniya. Sa daghang paagi, ang pagkalimot sa Dios usa gani ka mas dako nga problema kay sa wala pagkaila Kaniya. Ug sayon ra ang paghikalimot Kaniya kon ang atong mga hunahuna mabalda “sa mga kawang nga butang dinhi sa kalibotan” ug nasalipdan sa sala (Helaman 7:21; tan-awa usab sa Helaman 12:2). Apan, ingon sa makita sa pagpangalagad ni Nephi, dili pa gayod ulahi ang paghinumdom ug “[pag]balik … ngadto sa Ginoo nga inyong Dios” (Helaman 7:17).
Mga Ideya alang sa Pagkat-on diha sa Panimalay ug sa Simbahan
Ang mga propeta nagpadayag sa kabubut-on sa Dios ngadto sa katawhan.
Ang Helaman 7–11 usa ka piho nga maayong dapit sa pagkat-on mahitungod sa unsay gibuhat sa mga propeta. Samtang ikaw nagbasa niini nga mga kapitulo, hatagi og pagtagad ang mga lihok, mga hunahuna, ug mga pagpakigsulti ni Nephi uban sa Ginoo. Sa unsang paagi ang pangalagad ni Nephi makatabang nimo sa pagsabot sa papel sa mga propeta? Aniay pipila ka ehemplo. Unsa pay lain nga imong makaplagan?
Helaman 7:17–22: Ang mga propeta nagsangyaw og paghinulsol ug nagpasidaan sa mga sangpotanan sa sala.
Base sa unsay imong nabasahan, unsaon nimo sa paghulagway kon unsa ang usa ka propeta ug kon unsa ang iyang gibuhat? Ikonsiderar ang pagsulat og mubo nga kahulogan. Dayon tan-awa unsa ang imong idugang ngadto sa imong kahulogan human mabasa ang gibutang alang sa “Propeta” diha sa Giya ngadto sa mga Kasulatan (Gospel Library) o sa “Sunda ang Buhing Propeta” (Mga Pagtulon-an sa mga Presidente sa Simbahan: Ezra Taft Benson [2014], 175–186).
Namatikdan ba nimo kon sa unsa nga paagi si Nephi walay kahadlok diha sa Helaman 7:11–29? Ngano kaha sa inyong pamati nga usahay ang mga propeta kinahanglan nga mamulong nga walay kahadlok sama ni Nephi? Ikonsiderar ang pagpangita og mga tubag diha sa seksiyon nga giulohan og “Ayaw Katingala” diha sa mensahe ni Elder Neil L. Andersen nga “Ang Propeta sa Dios” (Liahona, Mayo 2018, 26).
Uban niining tanang kamatuoran diha sa hunahuna, palandonga kon giunsa sa Ginoo pagpanalangin kanimo pinaagi sa pagpangalagad sa Iyang mga propeta. Unsa ang Iyang natudlo kanimo karong bag-ohay pinaagi sa atong buhi nga propeta? Unsay imong gihimo sa pagpaminaw ug pagsunod sa direksiyon sa Ginoo?
Ang akong hugot nga pagtuo diha ni Jesukristo kinahanglan gayod nga matukod diha sa labaw pa sa mga timailhan ug mga milagro.
Kon ang mga timailhan o mga milagro igo na nga mausab ang kasingkasing sa usa ka tawo, ang tanang mga Nephite nakabig na unta pinaagi sa talagsaong mga timailhan nga gihatag ni Nephi diha sa Helaman 9. Apan wala kana mahitabo. Bantayi ang nagkadaiyang paagi nga ang mga tawo mitubag sa milagro diha sa Helaman 9–10. Sama panaglit, mahimo nimong itandi ang mga tubag sa lima ka lalaki ug sa labaw nga mga maghuhukom diha sa Helaman 9:1–20 (tan-awa usab sa Helaman 9:39–41; 10:12–15). Unsa ang imong nakat-onan gikan niini nga mga kasinatian mahitungod kon unsaon sa pagpalig-on sa imong hugot nga pagtuo diha ni Jesukristo?
Ang Ginoo mohatag og gahom ngadto sa mga tawo kinsa motinguha sa Iyang kabubut-on ug maningkamot sa pagsunod sa Iyang mga sugo.
Samtang imong tun-an ang Helaman 10:1–12, bantayi kon unsay gibuhat ni Nephi aron makaangkon sa pagsalig sa Ginoo. Giunsa niya pagpakita nga nagtinguha siya sa kabubut-on sa Ginoo kay sa iyang kaugalingon? Unsa ang gidasig sa kasinatian ni Nephi nga imong buhaton?
Ang pagpamalandong sa pulong sa Dios nagdapit og pagpadayag.
Kon ikaw mobati nga gisakitan, nabalaka, o nalibog, tingali makakat-on ka og importanteng leksiyon gikan sa ehemplo ni Nephi diha sa Helaman 10:2–4. Unsay iyang gihimo dihang gibati niya ang “hilabihan nga kasubo”? (bersikulo 3).
Si Presidente Henry B. Eyring mipasabot, “Kon kita mamalandong, atong gidapit ang pagpadayag pinaagi sa Espiritu.” (“Serve with the Spirit,” Liahona, Nob. 2010, 60). Sa unsang paagi ikaw mahimong makamugna og usa ka kinaiya sa pagpamalandong?
Giunsa nimo paghinumdom ang importante nga impormasyon—sama sa adlawng natawhan sa usa ka sakop sa pamilya o impormasyon alang sa usa ka pasulit? Sa unsang paagi nga kini susama sa paningkamot nga gikinahanglan aron “mahinumdom sa Ginoo”? (Helaman 12:5). Sa unsang paagi nga kini lahi?
Ang Helaman 12 naghulagway og pipila ka butang nga maoy hinungdan nga ang mga tawo makalimot sa Ginoo. Tingali imong malista kini ug pamalandongi kon kini ba nakabalda kanimo gikan Kaniya. Unsay makatabang nimo nga makahinumdom ni Jesukristo? Unsa ang imong nadasig nga buhaton base sa unsay imong nakat-onan?
Gamit og mga leksiyon nga naggamit og butang. Ang Manluluwas sa kasagaran mihimo og koneksiyon sa mga baroganan sa ebanghelyo ngadto sa inadlaw-adlaw nga mga butang nga pamilyar ang mga tawo. Kon magkat-on o magtudlo mahitungod sa Helaman 12:1–6, mahimo nimong itandi ang “pagkadili makanunayon sa mga … katawhan” ngadto sa paagi nga kita mobati kon mosulay sa pagbalanse sa usa ka bitiis. Sa unsang paagi kita magpabiling makanunayon sa espiritwal nga paagi?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Sa pagsugod sa usa ka panag-istoryahanay mahitungod sa paghinumdom sa Ginoo, mahimo nimong istoryahan ang inyong mga anak mahitungod sa usa ka panahon sa dihang nakalimot ka og usa ka butang. Tugoti sila sa pagpakigbahin og ilang susama nga mga kasinatian. Dayon mahimo ninyong basahon og dungan ang Helaman 7:20–21 ug pangutan-a ang inyong mga anak kon unsa kaha sa ilang hunahuna ang gipasabot sa pagkalimot sa Dios. Tingali ang inyong mga anak makadrowing og mga hulagway sa mga butang nga maoy hinungdan nga kita makalimot sa Ginoo ug gamita ang ilang mga drowing sa pagtabon sa usa ka hulagway ni Jesus. Dayon mahimo silang maghunahuna og mga butang nga ilang mabuhat aron sa paghinumdom Kaniya. Samtang mopakigbahin sila sa ilang mga hunahuna, mahimo nilang kuhaon og tagsa-tagsa ang mga drowing hangtod nga makita ang hulagway sa Manluluwas.
Tabangi ang inyong mga anak sa pagsiksik sa Helaman 8:13–23 aron sa pagpangita sa mga ngalan sa mga propeta kinsa mitudlo mahitungod ni Jesukristo. Tingali ilang mapasa-pasa ang usa ka hulagway ni Jesus sa matag higayon nga makakita sila og usa ka ngalan sa propeta. Unsa ang gitudlo sa atong buhi nga propeta mahitungod sa Manluluwas?
Mahimong manganta usab kamo og dungan sa usa ka awit mahitungod sa mga propeta, sama sa “Sunda ang Propeta” (Songbook sa mga Bata, 58–59). Tingali ikaw ug ang inyong mga anak mahimong mopili og usa ka mahinungdanon nga pulongan gikan sa awit ug isulat ang usa ka pulong gikan sa pulongan sa matag usa sa pipila ka papel nga tunob sa tiil. Dayon mahimo nimong ibutang ang mga tunob sa tiil diha sa salog nga magpadulong ngadto sa usa ka hulagway sa Manluluwas, ug ang inyong mga anak mahimong mosunod sa mga tunob sa tiil paingon ngadto sa hulagway. Sa unsang paagi ang pagsunod sa propeta migiya kanato paingon ngadto kang Jesukristo?
Ang pagpamalandong sa mga pulong sa Dios modapit og pagpadayag.
Aron sa pagtabang sa inyong mga anak nga makasabot kon unsay ipasabot sa pagpamalandong, mahimong magbasa kamo og dungan sa “Pagpa[ma]landong” sa Giya ngadto sa mga Kasulatan (Gospel Library). Unsa ang pipila sa ubang mga pulong nga susama sa pagpa[ma]landong? Tingali mahimong magdungan kamo sa pagbasa sa Helaman 10:1–3 ug pulihan ang pulong nga na[ma]landong gamit kadto nga mga pulong. Hisgoti ngadto sa inyong mga anak ang mahitungod sa mga paagi sa paghimo sa pagpamalandong nga kabahin sa ilang pagtuon sa kasulatan.
Gisunod ni Nephi ang Langitnong Amahan bisan kon kini nagpasabot sa pagbuhat og butang nga lisod. Alang sa usa ka ehemplo niini, ikaw ug ang inyong mga anak makabasa sa Helaman 10:2, 11–12. Tingali ang inyong mga anak makadrama-drama unsay gibuhat ni Nephi—molakaw paingon ngadto sa usa ka bahin sa lawak (ingon og mamauli na sila), mohunong, motalikod, ug molakaw paingon sa pikas nga bahin sa lawak (ingon og mamalik na sila aron motudlo sa mga tawo). Unsa ang pipila ka butang nga gusto sa Langitnong Amahan nga atong buhaton?
Alang sa dugang nga mga ideya, tan-awa ang isyu karong bulana sa Higala nga magasin.
Imahe
Seantum nasakpan nga mao ang mamumuno
Pinaagi sa gasa sa panagna, nasulbad ni Nephi ang pagpatay sa labaw nga maghuhukom.