Mataupu 54
Ua Toetu Mai Iesu
Sa i ai se fafine sa faamalolo e Iesu e igoa ia Maria le Makatala sa alu atu i le tuugamau. Sa ofo o ia ina ua vaai atu ua ave ese le maa. Ua leai se tino o Iesu i totonu o le tuugamau.
Sa tamoe o ia e ta’u atu ia Peteru ma Ioane ua ave e se tagata le tino o le Faaola. Sa le iloa e ia po o fea o i ai.
Sa tamomoe Peteru ma Ioane i le tuugamau. Sa la maua ie sa tanu ai o ia, peitai sa le’i i ai iina le tino o Iesu. Sa le iloa e Peteru ma Ioane le mea a fai. Sa la o i le fale.
Sa nofo ai Maria le Makatala i tala ane o le tuugamau, ma tagi ai. Ina ua ia toe vaai i totonu o le tuugamau, sa ia iloa atu agelu e toalua.
Sa la fesili atu ia Maria le Makatala pe aisea ua tagi ai o ia. Sa ia fai mai ua ave ese e se tagata le tino o Iesu. Sa le iloa e ia po o fea o i ai.
Sa faliu o ia i tua ma sa iloa atu ai se tagata. Sa manatu o ia o le leoleo o le fanua. Sa Ia fesili atu ia te ia pe aisea ua tagi ai. Sa ia fesili atu ia te Ia pe Na te iloa o fea o i ai le tino o Iesu.
Ona fai mai lea o le tagata, “Maria e,” ma ua iloa ai e ia o Iesu. Sa Ia fai atu ia te ia e ta’u atu i le au Aposetolo ua toetu mai o Ia.
Sa ta’u atu e Maria le Makatala ma nisi o fafine i le au Aposetolo ua toetu mai Iesu. Sa le’i talitonu muamua le au Aposetolo ia i latou.
Mulimuli ane, a o talatalanoa le au Aposetolo, sa oo ane Iesu i totonu o le potu. Sa fefefe le au Aposetolo. Sa latou manatu lava ua maliu o Ia.
Sa fai atu le Faaola ia i latou e tagotago i Ona vae ma lima. Ua toetu mai o Ia—ua toe tuu faatasi Lona tino ma le agaga.
Sa fiafia le au Aposetolo e vaai ia te Ia. Sa Ia fesili atu ia i latou mo se meaai. Sa latou avatu ia te Ia se i’a ma le melikerio. Sa ‘ai o Ia.
O Iesu Keriso o le tagata muamua lea na toetu mai. E toatele isi sa toetutu mai ma sa iloa e tagata sa nonofo i Ierusalema. Sa ta’u mai e Iesu, “O Au nei o le toetu, ma le ola.” Aua ua Ia manumalo i le oti, o le a tatou toe tutu uma mai i se aso.