O le Faaolataga e ala mai ia Iesu Keriso

Faauta o le lelei, o le faapalepale, o le agalelei, ma le lagona malosi faamãtua o le Atua lo tatou Tama, i le sauniaina o se auala ma aumaia le ala ina ia faasaoina ai le fanauga a tagata—e le na o le Au Paia o Aso e Gata Ai—e le na o i latou ua maua le avanoa o uluai mataupu faavae o le tulafono faaselesitila, ae ia faasaoina ai tagata uma lava. O se faaolataga mo le lalolagi atoa—o se togiola mo le lalolagi atoa (DBY, 388).

E toafia nisi e tatau ona faasaoina? O i latou uma e lei faafitia ma tetee i le mana ma le uiga o le Alo o le Atua—o i latou uma o e lei agasala i le Agaga Paia (DBY, 387).

O atunuu uma o le a latou fetufaai i nei faamanuiaga; o mea uma o loo aofia ai i le togiola a le Faaola. Na ia tofoina le oti mo tagata uma; o loo i ai uma lava i lona mana, ma na ia faasaoina i latou uma, e pei ona ia fetalai i ai, sei vagana ai atalii o le malaia; ma ua tuuina e le Tama foafoaga uma o lenei lalolagi i lona mana. O le lalolagi lava ia, ma tagata uma o i ai, o manu vaefa, o i’a o le sami, ma manufelelei o le vanimonimo, o iniseti, ma manufetolofi uma, ma nei mea uma o i ai i lenei lalolagi, — o loo pulea uma ia e le Faaola, ma ua ia togiolaina uma lava (DBY, 388).

O igoa o atalii ma afafine uma lava o le Atua ua uma ona tusia i le Tusi o le Ola a le Tamai Mamoe. Pe i ai ea se taimi o le a aveesea ai na igoa mai le tusi? Ioe, seiloga lava e avea i latou ma atalii o le malaia. E i ai i tagata uma le aia o le mau ai iina e faavavau ma faavavau lava. Afai latou te faatamala i lena avanoa, o le a titinaese loa o latou igoa. O igoa uma lava o tagata soifua o loo tusia iina, ma o le a taofia pea e le Alii seiloga latou te malamalama i le upu moni, ma afai o le a mafai ona latou tetee atu ia te ia, ma mafai ona agasala i le Agaga Paia, o le a lafotuina i latou i seoli, ma o le a soloiesea o latou igoa mai le Tusi o le Ola a le Tamai Mamoe (DBY, 387–88).

O le a avea ma se fiafiaga le iloaina ua tatou faasaoina mea uma na tuuina mai e le Tama i la tatou vaavaaiga [tausiga]. Na fetalai mai Iesu e faapea e leai se tasi ua leiloa sei vagana ai atalii o le malaia. O le a leai ma se tasi o tagata e ola e malaia, sei vagana ai atalii o le malaia. Ia tatou faasaoina mea uma ua tuuina mai e le Tama ia i tatou (DBY, 388).

O lo tatou talitonuga ua faatatauina mo e vaivai o le fanau uma a tagata. Na te le auina atu se vaega o tagata ina ia taufaitagiaue i mafatiaga e faavavau ma faavavau lava, ae oo atu i toe atalii ma afafine o Atamu ma Eva, ma o le a taofia i latou mai le falepuipui, tatalaina faitotoa, ma tatalaina noataga ma aumaia agaga uma o e o le a mauaina le faaolataga (DBY, 389).

O loo popole le lagi uma aua e tatau ona faasaoina tagata uma. O le a laue le lagi uma i tagata, ona o lo latou loto maaa, le talitonu, ma le faatuaiona talitonu ma galulue (DBY, 388–89).

Ina ua faaali atu e le Alii ia Iosefa Samita ma Sini Rikitone e faapea e i ai se nofoaga ua saunia mo tagata uma, e fuafua lea i le malamalama na latou mauaina ma lo latou teenaina o le leaga ae faia le lelei, sa avea lea ma se luitau tele i nisi, ma o nisi ua liliuese ona o le a le auina atu e le Atua i le faasalaga e faavavau i latou e le talitonu ia Keriso ma tamaiti pepe, ae i ai so latou nofoaga i le faaolataga i le taimi o le Alii, mo tagata uma, ma o le a faamanuiaina i latou e faamaoni ma mama ma tonu, e tusa lava pe auai i soo se ekalesia pe leai foi. O se aoaoga fou lea i lenei augatupulaga, ma e toatele sa umi se taimi o taumafai e talia lenei aoaoga (DBY, 390–91).

Pe le o se mafaufauga mamalu ea le faapea o loo i ai ni malo, o ni maota mamalu ma ni apitaga matagofie ua saunia mo atalii ma afafine uma o Atamu, sei vagana ai atalii o le malaia? O i latou uma o le a le i ai so latou tofi i le uluai toetutu, ma atonu e toatele o le a le vaaia i le toetutu lona lua; ae o le a toetutu uma lava (DBY, 391).

E i ai se avanoa [mo le faaeaga] mo i latou uma o e na ola ai ma i latou foi o loo ola nei. Ua oo mai le Talalelei. Ua auina mai le upu moni ma le amiotonu i le lalolagi, ma o i latou e mauaina, o le a faasaoina i le malo selesitila o le Atua. Ma o le toatele o i latou na, e ala i lo latou le malamalama, e ala i aganuu, taufaasese, ma manatu sese o augatama, latou te le mauaina, ae peitai o le a latou mauaina lava se malo lelei ma le mamalu, ma o le a tele mea latou te olioli ai, ma tele mea e mauaina ai nai lo mea e mafaufauina e se tagata, sei vagana ai ua ia mauaina se faaaliga (DBY, 389).

O nei upu [vaai MFF 88:21–24] ua faailoa mai ai le mea moni lea na faatatau i ai le fetalaiga a Iesu ina ua ia faapea mai, “E tele mea e nonofo ai i le maota o lo’u Tama” [Ioane 14:2; MFF 98:18]. Ou te le iloa pe fia le aofai, ae o vaega nei e tolu o loo maoti lava le tautalagia: o le selesitila, o le maualuga lea; o le terasitila, o le isi lea e sosoo ifo ai i lalo; ma le telesitila, o le lona tolu lea. Afai tatou te faia se taumafaiga ina ia faitauina le mea na tauina atu e le Alii i ona tagata i aso e gata ai, e tatau ona tatou mauaina ai, ua ia saunia ni apitaga mo tagata uma o le lalolagi; soo se tagata soifua lava e naunau, ma taumafai i le mea e gata ai ina ia faatoilaloina le tiapolo ma aveesea le leaga o loo i totonu ia te ia, ma ia ola agavaa mo se mamalu, o le a ia mauaina lava. O i tatou o e ua mauaina le atoatoaga o le Talalelei ale Alo o le Atua, po o le Malo o le lagi lea ua oo mai i le lalolagi, ua tatou umiaina na tulafono, sauniga, poloaiga ma faaaliga na o le a saunia ai i tatou, e ala i le usiusitai, ina ia tatou mautofi i le malo selesitila, ina ia ulu atu i le afioaga o le Tama ma le Alo (DBY, 391).

E leai se afaina po o a foliga vaaia i fafo—afai e mafai ona ou iloa ua matuai liua moni loto o tagata ina ia faia le finagalo o lo latou Tama o i le Lagi, e ui ina mafai ona faaseseina ma faia mea e tele e ala i vaivaiga o le natura faaletagata, ae peitai o le a faasaoina lava i latou (DBY, 389).

Ma, afai tatou te taliaina le faaolataga e tusa ai ma tuutuuga ua tuuina mai ia i tatou, o lea e ao ai ona tatou faamaoni i soo se manatu, i a tatou feutagaiga, ma a tatou talotaloga, i a tatou fegalegaleaiga, i a tatou fesootaiga, i a tatou faamatalaga, ma soo se gaoioiga i o tatou olaga, ma ia matuai lototoa ma e tusa lava po o a mataupu faavae o le sese, ma soo se mataupu faavae o le pepelo e mafai ona tuuina mai (DBY, 389).

E ui ina tasi lo tatou faamoemoega o ni tagata, ae peitai ia manatua, o le faaolataga o se galuega a le tagata e toatasi; e mo tagata uma lava mo ia lava. E tele atu se uiga o lenei mea o loo ia te au nai lo le taimi ou te faamatalaina atu ai ia te outou lona atoatoa, ae o le a ou tuuina atu ia te outou se faaataataga. O loo i ai i latou o loo i totonu o lenei Ekalesia ua latou manatu ua faasaoina i latou e ala lea i le amiotonu a isi. O le a latou le mauaina lo latou faamoemoega. O i latou na, e taunuu atu, ae tapuni loa le faitotoa, o lona uiga i lea tulaga, e mafai ona tapunia ai i fafo ma oe; ona e valaau atu ai lea i se tasi, o le ua ulu atu i le faitotoa o le selesitila ona o lo latou lava faatuatua ma le alofa tunoa o Iesu Keriso, ina ia tatala atu le faitotoa ia te oe; ae o le faia o lea mea, e le o so latou tiute lea. E faapena le taunuuga o tagata na e faamoemoe ina ia faasaoina i latou i le amiotonu ma aafiaga a se Uso po o se Tuafafine. O lea, ou te muai lapatai atu ai ia te outou, ina ia outou seleseleina le amiotonu ma le faatuatua ia te outou lava, e na o le pau lea o le tusifolau i le fiafia faaselesitila (DBY, 390).

Afai o le a sese ese le auala o le a alu ai le Uso o Polika, ma faapea ona tulia i fafo mai le Malo o le lagi, e leai se tasi o le a tuuaiina, ae o le Uso o Polika lava ia. E na o au lava le tagata i le lagi, lalolagi, po o seoli, e mafai ona tuuaia (DBY, 390).

O lenei foi mea, e faatatau lea i soo se Au Paia lava o Aso e Gata Ai. O le faaolataga, o se fuafuaga fai toatasi. E na o au lava le tagata e mafai ona ou faasaoina au lava ia. Afai e auina mai le faaolataga ia te au, e mafai ona ou teenaina pe taliaina foi. I lona taliaina, ou te gauai atu ma le usiusitai atoatoa ma le lotofuatiaifo, i le na aumaia le faaolataga i lo’u olaga atoa, faapea ma i latou o le a ia tofiaina, e faatonutonuina au; ae i lona teenaina, ou te mulimuli atu i manatunatuga o lo’u lava loto, e tetee atu ai i le finagalo o Le na Foafoaina au (DBY, 390).

E leai lava se tagata e faapea ua tele naua lona faaolaina; o i latou uma ua faaolaina, ma i latou uma o le a faaolaina i le lumanai, ua na ona faaolaina, ma o le a le aunoa ma se tauiviga ina ia faatoilaloina, e moomia ai le malosi atoa o le agaga (DBY, 388).

O alii ma tamaitai o e naunau ina ia mauaina ni nofoaga i le malo selesitila, o le a latou iloaina e tatau ona latou tauivi malosi i aso taitasi (DBY, 392).

Ae mo se tagata faapea ua faaolaina i le malo selesitila o le Atua, e aunoa ma le saunia ina ia nofo ai i se nofoaga paia ma le mama, e matuai sese lava ma o se mea ula foi; ma afai e i ai soo se tasi e manatu e mafai ona latou mauaina le afioaga o le Tama ma le Alo, e ala lea i lona tauivi i ai, nai lo le ola ai, i lo latou talitonuga, o le a faaseseina i latou, ae ui i lea, o le vave lava tatou te mafaufau ai e ola i lo tatou talitonuga, o le lelei foi lena o le a i ai mo i tatou (DBY, 392).

O le faatulagaga o le puleaina o le lagi, o le faapotopotoina mai lea o tagata uma, ma faaolaina tagata taitoatasi uma e mafai ona faaolaina (DBY, 387).

E tatau i tagata ona malamalama, e leai se alii [po o se tamaitai] e fanau mai i lenei lalolagi e le mafai ona faaolaina i le Malo o le Atua, pe afai na te faamoemoe e faaolaina (DBY, 387).

O i latou uma sa ola pe o le a ola ai foi i lenei lalolagi o le a latou mauaina le avanoa e maua ai le Talalelei. O le a latou mauaina ni Aposetolo, perofeta, ma faifeau iina, e pei foi ona i ai iinei, ina ia taitaiina i latou i ala o le upumoni ma le amiotonu, ma taitai atu i latou i le Atua. O le a maua e tagata uma le avanoa mo le faaolataga ma le ola e faavavau (DBY, 387).

Afai e tasi lo tatou faatuatua, ma ua tatou lotogatasi ina ia mauaina le faamoemoega tele o le ulu atu i le malo selesitila, ma afai e mafai e au o se tagata e toatasi ona ulu atu i le malo selesitila, e mafai foi e outou ma soo se tagata, e ala i lea lava tulafono e tasi, ona ulu atu foi iina (DBY, 387).

Pe tutusa ea meaalofa ma agavaa o agaga taitasi uma? Leai, e le tutusa i soo se auala. Pe o le a tutusa uma ea i le malo selesitila? Leai. [Vaai MFF 131:1–4.] O nisi agaga e sili atu ona tamalii nai lo isi; o nisi e sili atu mea e mafai ona latou maua nai lo isi. E faapena foi le eseesega i le lalolagi o agaga e pei ona outou mauaina iinei, ae peitai e tutusa uma i le tulaga e tasi, o le tasi lea o le Tama, tasi le Atua (DBY, 391).

O le fuafuaga, o le manaoga, o le finagalo, ma le mafaufau lea o le Alii, e tatau ona faaeaina uma tagata o le lalolagi i nofoalii, malo, pulega, ma malosiaga, e tusa ai ma mea latou te mafaia… . e tatau ona latou gauai muamua atu lava i le agasala ma faigata o le olaga faaletino, ina ia mafai ai ona faamaoniaina lo latou agavaa; ona saunia ai lea o le Talalelei ina ia taofia i latou ma aumaia i luga, ma faatasia i latou, ma faapupulaina o latou malamalama, ma avea i latou ma tino e tasi i le Alii o Iesu, ma o lo latou faatuatua, tatalo, faamoemoega, lagona, ma o o latou faanaunauga uma e ao ona faaautu uma i le faamoemoega e tasi (DBY, 391–92).

O le eseesega i le va o le tagata amiotonu ma le tagata agasala, o le ola e faavavau po o le oti, fiafia po o le faanoanoa, o lenei, o i latou ua faaeaina e leai ni noataga po o ni faatapulaa i o latou avanoa, o o latou faamanuiaga e faaauauina pea, ma o o latou malo, nofoalii, ma pulega, faiga malo, ma malosiaga e leai se iuga, ae latou te faateleina e oo atu i le faavavau atoay (DBY, 63).

O ai e mafai ona faamatalaina le paia o le tagata? E na o i latou ua i ai le malamalama i mataupu faavae moni o le faavavau—o mataupu faavae e faatatau i le ola ma le faaolataga. O le tagata, i lona faaeaina, e le mafai ai ona aveesea le mana ma le agavaa lea na tuuina atu ia te ia; ae, i le isi itu, o le uia o le ala lea e tau atu i le ola, na te mauaina ai se isi mana, se isi aafiaga, ma le agavaa i soo se laasaga na te laasia i le ala e tau atu i le ola (DBY, 392).

O le malo o le Atua lea o loo i ai le Au Paia o Aso e Gata Ai i totonu, e fesootai atu i le Malo Selesitila; o se malo lea e mafai ai ona tatou saunia, ina ia tatou o atu i le afioaga o le Tama ma le Alo. O lea, ia tatou ola ai, ina ia tatou mautofi i lena mamalu. Ua folafola atu e le Atua ia te outou, ua folafola atu e Iesu ia te outou, ma o aposetolo ma perofeta o aso anamua ma o tatou foi aso, ua latou folafola atu ia te outou, e tatau ona tauia outou e tusa ai ma mea uma e mafai ona outou faanaunau i ai i le amiotonu i luma o le Alii, pe afai tou te ola ai mo lena taui (DNW, 31 Oct. 1860, 1).

O le faaolataga, o le atoatoaga lea o le i ai o le tagata, o agelu, ma le aiga Atua; o le ola e faavavau—le ola lea sa i ai, o loo i ai, ma o le a i ai. Ma, o i tatou, o ni tagata ola, o ni suli ia i lenei ola atoa, pe afai tatou te matuai usiusitai i mea o loo manaomia i tulafono a le Atua, ma faaauau pea i le faatuatua(DBY, 387).

Afai e i ai ni au auro ma ni siliva, aua lava nei faalavelave ia te oe ma lou tiute. O le a ou tauina atu ia te outou mea tou te faia, ina ia mafai ai ona maua lo outou faaeaina, lea e le mafai ona outou mauaina, sei vagana ua outou uia lenei auala. Afai o ou lagona o loo tuuina atu i soo se mea lava e faalavelaveina ai oe mai lou gauai atu i le Alii, ia e faia faapaiaga o lena mea i se taimi vave lava, o lena faapaiaina e mafai ona atoatoa… .Afai e le o atoa ona tuuina atu lo’u loto i lenei galuega, o le a tuuina atu lo’u taimi, o a’utaleni, ma lima, ma a’u meatotino, seia iu ina tonu i lo’u loto o le a ou uai atu i ai; o le a ou faaaogaina o’u lima i le galuega a le Atua, seia uai atu atoa i ai lo’u loto… . Ua ou ta’uina atu ia te outou le mataupu e tulimatai ina ia maua ai se faaeaga. E ao ona faamuamua ma aupito taua le Alii i o tatou faanaunauga; o le fausiaina o lana galuega ma lona malo ua faamalosia mai ai le tatau ona tatou manatu muamua i ai (DNW, 5 Jan. 1854, 2).

E leai se tagata o le a faaolaina ma oo mai i le afioaga o le Tama, sei vagana ua ui mai i le Talalelei a Iesu Keriso—e faapea foi i soo se tagata lava. O loo i ai i le Alii lona faamoemoega, o ona ala, o lana galuega; o le a ia faamaeaina lava. O loo galue Iesu ma lona malosi atoa, ina ia faapaiaina ma togiolaina le lalolagi, ma toe aumaia ona uso ma tuafafine i le afioaga o le Tama. O loo tatou galulue faatasi ma ia, mo le faamamaina o le fanau atoa a tagata, ina ia mafai ai ona saunia i tatou ma i latou, e mau ma le Atua i lona Malo (DBY, 389).

• O le a le uiga o le faaolataga lea na ofoina mai e Iesu Keriso “o se faaolataga mo le lalolagi atoa—o se togiola mo le lalolagi atoa”? E faapefea ona faaalia mai i lenei faaolataga le “lagona malosi faamãtua” o lo tatou Tama Faalelagi o loo i ai mo Lana fanau? E faapefea ona aumaia e lenei malamalamaaga le olioli ia te oe?

• Na saunoa mai Peresitene Iaga e faapea, e toatele tagata na liliuese ona ua faaalia e le Atua ia Iosefa Samita ma Sini Rikitone e faapea, e mafai e tagata uma ona mauaina le faaolataga. O le a sou manatu aisea na faigata ai i nisi o tagata o le Ekalesia ona taliaina lena aoaoga? E mafai faapefea ona tatou foiaina nisi o faafitauli faapena i aso nei, i aoaoga a perofeta ma aposetolo o aso nei?

• O le a sou manatu, o le a le uiga o le saunoaga lea a Peresitene Iaga ina ua ia faapea mai, “o le faaolataga o se galuega fai toatasi”? Aisea e manaomia ai e le faaolataga le “faaaogaina o le malosi atoa o le agaga”? (Vaai foi 2 Nifae 25:23.)

• Faatusatusa le talanoaga a Peresitene Iaga o i latou “ua fuafuaina lo latou faaolaina e ala i le amiotonu a isi” ma le faataoto a le Faaola i taupou valea ma taupou popoto. (Vaai foi Mataio 25:1–13; MFF 33:17; 45:56–57.) Na saunoa mai foi Peresitene Iaga e faapea “o loo tatou galulue faatasi ma Iesu, i le faamamaina o le fanau atoa a tagata.” I le iloaina o le “faaolataga o se galuega fai toatasi,” e mafai faapefea ona tatou fesoasoani i isi, i a latou taumafaiga, ina ia o mai ia Iesu Keriso ma mauaina le ola e faavavau?

• Aisea e oo ai i le Au Paia sili ona faatuatua, lo latou manaomia o le alofa tunoa o Iesu Keriso, ina ia ulu atu ai i le malo selesitila?

• E tusa ai ma le saunoaga a Peresitene Iaga, o le a le uiga o le mauaina o le faaolataga ua ofoina mai mo i tatou? O le a le uiga o le teenaina o le faaolataga? O a ni mea na oo ia te oe ua fesoasoani ai ia te oe ina ia e aoaoina le taua o le gauai atu i le finagalo o le Atua?

• Aisea e avea ai o se mea “lå mafaufau ma se mea ula” le manatu e mafaiona tatou mau i le afioaga o le Tama e aunoa ma lo tatou saunia i ai? (Vaai foi Mamona 9:4.) E faapefea ona avea le auauna atu ma le faamaoni i totonu o le Ekalesia a Iesu Keriso o le Au Paia o Aso e Gata Ai ma ala e saunia ai i tatou e ulu atu i le malo selesitila? Aisea e manaomia ai e lenei sauniuniga i tatou ina ia tatou “tau i aso uma”?

• O le a le uiga o le saunoaga a Peresitene Iaga ina ua ia faapea mai, e mafai e le talalelei ona “faatasia i tatou i le Alii o Iesu”? (Vaai foiIoane 17; 4 Nifae 1:15–17; MFF 38:27.)

• Na aoao mai e Peresitene Iaga e faapea, “o loo galue Iesu ma lona malosi atoatoa … ina ia mafai ona toe aumaia ona uso ma ona tuafafine, i le afioaga o le Tama. O loo tatou galulue faatasi ma ia.” O a ni auala e mafai ai ona tatou galulue faatasi ma Ia, “mo le faamamaina o le fanau atoa a tagata”?