Faasao ma Puipuia le Aiga

O le aiga o le iunite aupito taua i le olaga nei ma i le faavavau ma, ona o lea tulaga, e sili mamao atu ai nai lo isi lava mea e fiafia i ai o le olaga.⁵

Ua i ai i le Ekalesia le tiutetauave—ma le pule—e faasao ma puipuia le aiga o le faavae o nuu. O le mamanu o le olaga faaleaiga, na faatuina a o lei faavaeina le lalolagi, na saunia ina ia fananau mai fanau ma faafaileleina e se tama ma se tina, o se tane ma le ava, ua faaipoipoina faaletulafono. O le avea ma matua o se matafaioi paia ma o se avanoa paia, faatasi ai ma fanau e faafeiloaia o le “tofi mai le Alii”(Sala. 127:3).

Ua amata nei e se sosaiete popole ona vaai i le faamalepeina o le aiga ua aumaia ai i le lalolagi le malaia lea na muai ta’u mai e perofeta. O aufono ma tonu fai a le lalolagi, o le a na o le pau le auala e manuia ai, pe a latou faauigaina le aiga e faapei ona sa faaalia mai ai e le Alii. “Afai e le atiina ae e le Alii le fale, e galulue fua i latou o e atiina ae” (Sala. 127:1).⁶

I le sailia o le soifua manuia o tagata taitoatasi ma aiga, e taua ona manatua o le iunite faavae o le Ekalesia o le aiga. Peitai, i le taulai atu i le aiga, e ao ina tatou manatua o le lalolagi o loo tatou o ola ai, e le o faatuaoia aiga i le faavasegaga masani a tama, tina, ma fanau. O aiga i le Ekalesia i aso nei e aofia ai foi [tane ma ava] e leai ni fanau, o matua e taitoatasi ma fanau, ma tagata taitoatasi foi e nonofo na o i latou. … E tatau i nei aiga taitasi ona maua le tausiga faaleperisitua. E tele taimi, o i latou e ono sili ona manaomia le tausiga o aiga e le o ni aiga e pei ona masani ai. E manaomia faiaoga o aiga e alolofa ma tuuto i nei aiga taitasi. E le tatau ona le amanaiaina se tasi.⁷

O tiutetauave o ni matua e silisili ona taua. O taunuuga o a tatou taumafaiga, o le a i ai taunuuga e faavavau mo i tatou faapea foi i tama ma teine tatou te tausia. Soo se tasi e avea o se matua, ua i lalo o le matafaoi maua’i ia puipuia ma alolofa [i a latou] fanau ma fesoasoani ia i latou ia toe foi atu i lo latou Tama Faalelagi. E ao i matua uma ona malamalama o le a tausalaina e le Alii i latou o e le amanaiaina nei tiutetauave.⁸

Ua i ai i tama ma tina se tiutetauave sili e tusa ai ma le fanau sa tuuina atu i la latou tausiga. … I le Tusi a Faataoto tatou te maua ai le apoapoaiga lea i matua:

“Ia aoao le tama e tusa ma ona ala, aua a oo ina matua e le toe foi ese ai lava.” Faataoto 22:6.)

O le aoaoga aupito silisili e mafai ona tuuina i se tamaitiiti o lea e maua mai faataitaiga a matua. E ao i matua ona faia faataitaiga mo fanau iti e mulimuli ai. O le malosi sili e maua mai le aiga e aoao ai mataupu faavae amiotonu, lea e i ai le alofa ma le faaaloalo o le tasi ma le isi, lea e avea ai le tatalo o se faatosinaga i le olaga faaleaiga, ma lea e i ai le faaaloalo mo na mea e faatatau i le Atua.⁹

O le taitaiga lelei i le aiga … e manaomia ai le tele o le taimi ma le auau mama lelei. O le aoaoga ma le pulega o le aiga e le tatau ona tuua … i nuu, i aoga, po o le Ekalesia.¹⁰

O se alii e umia le perisitua, e manatu i le aiga e faapei ona faauuina ai e le Atua. O lau taitaiga o le aiga, o lou tiutetauave aupito taua ma le paia lea. …

O se alii e umia le perisitua na te taitaia lona aiga i le auai i le Ekalesia ina ia latou iloa ai le talalelei ma i ai i lalo o le puipuiga o feagaiga ma sauniga. A e fia olioli i faamanuiaga a le Alii, e tatau ona e faatulagaina lelei lou lava aiga. Faatasi ai ma lou toalua, lua te fuafuaina le siomaga i lou aiga. O lau matafaioi muamua lava o le faatulagaina lelei lea o lou lava ola faaleagaga e ala i le suesue e le aunoa i tusitusiga paia ma tatalo i aso taitasi. Faamautu ma faamamaluina lou perisitua ma feagaiga o le malumalu; fautuaina lou aiga e faia foi le mea lava lena e tasi.¹¹

O se alii e umia le perisitua e ava ma migao i le tulaga faatina. Ua tuuina mai i tina se avanoa paia e “fanauina agaga o tagata; ona o totonu o lenei mea e faaauau ai pea le galuega a lo’u Tama, ina ia faamamaluina o ia” (MF&F 132:63)

… E le mafai e le perisitua ona galueaiina lona lava taunuuga, e le mafai foi ona faataunuuina faamoemoega o le Atua, e aunoa ma a tatou fesoasoani. E faatinoina e tina se galuega e le mafai e le perisitua ona fai. Ona o lenei mea foaifua mai o le ola, e ao ai i le perisitua ona i ai se alofa e le faatuaoia mo tina o a latou fanau.

[Uso e,] ia faamamalu matafaioi tulagaese ma le paia a a outou ava, o ni tina ia Isaraelu ma lona mana faapitoa e fanauina ma faafailele le fanau. Ua tatou i ai i lalo o le poloaiga faalelagi ina ia fanafanau ma uluuluola ia tumu ai le lalolagi, ma ia aoao a outou fanau ma fanau a fanau i le malamalama ma le upumoni (tagai Mose 2:28; D&C 93:40). Ia oulua tauaveina faatasi o se paaga alolofa, le tausiga o le fanau. Fesoasoani ia te ia [ava] e faafoe ma tausia lo outou aiga. Fesoasoani e aoao, faamasani, ma aoa’i lau lua fanau.

E ao ona e ta’u soo atu i lau ava ma le fanau lou ava ma lou faaaloalo mo ia. Ioe, o se tasi o mea aupito sili e mafai e se tama ona fai mo lana fanau o le alofa lea i lo latou tina.¹²

O se alii e umia le perisitua na te taliaina lana ava o se paaga i le taitaiga o le aiga ma le auaiga ma le malamalama atoa ma gauai atoatoa i le faia o faaiuga e tusa ai. O se mea e tatau ai i le Ekalesia ma i le aiga se taitai pulefaamalumalu (tagai MF&F 107:21). E ala i se tofiga mai le lagi, o le tiutetauave e pulefaamalumalu i le aiga ua i ai lea i e umia le perisitua (tagai Mose 4:22). Ua faamoemoe le Alii o le ava ia avea o se fesoasoani mo le tane, o le (fesoasosanio lona uiga e tutusa)—o lona uiga, o se soa e vaavaalua ma e tatau ai ona avea o se paaga atoatoa. O le pulefaamalumalu i le amiotonu ua tatau ai le tiutetauave e tausoa faatasi i le va o le tane ma le ava: lua te faatinoina faatasi ma le iloa, ma auai i le faatinoga o mataupu uma faaleaiga. Mo se alii e faatinoina na o ia lava e aunoa ma le mafaufau i lagona ma fautuaga a lana ava i le faafoeina o le aiga, ua ia faaaogaina le pulega e le amiotonu.¹³

Matou te fautuaina outou uso e, ina ia manatua o lena perisitua ua na o se pule amiotonu lava. Ia e maua le faaaloalo ma le talitonuga o lau fanau e ala i au fegalegaleaiga alofa ma i latou. O se tama amiotonu e puipuia lana fanau i lona taimi ma le i ai i a latou gaoioiga ma tiutetauave faaleagafesootai, faaleaoaoga, ma faaleagaga. O le faailoa atu ma le agalelei o le alofa ma le faamemelo i le fanau, o le tiutetauave o le tama faapei foi o le tina. Ta’u atu i lau fanau e te alofa ia te i latou.¹⁴

E na ona tatau lava ona i ai mataupu faavae malolosi o le alofa ma le amiosa’o i totonu o o tatou fale. E tatau ona i ai sa tatou tautinoga mauai i le faaipoipoga ma fanau ma le mama. E tatau ona faamanuiaina i tatou i le mea e sili ona faitaulia ai le manuia mo le isi augatupulaga.

E moni lava o lena fale e aupito sili ona malosi ma aupito sili ona matagofie lea tatou te maua ai tagata taitoatasi o nofouta i lagona o isi, taumafai e auauna atu le tasi i le isi, taumafai e ola i le fale i mataupu faavae e tele ina ia tatou faatinoina i nofoaga faitele. E manaomia ona tatou taumafai malosi atu e ola i le talalelei i o tatou li’o faaleaiga. Ua tatau mo o tatou aiga a tatou tautinoga e sili ona faamaoni. E i ai i se tamaitiiti le aia tatau e lagona ai e saogalemu i lona aiga, o iina o loo i ai se nofoaga mo le puipuiga mai mea matautia ma mealeaga o le lalolagi i fafo atu. O le amiosa’o ma le lotogatasi i le aiga, e taua mo le maua mai ai o lenei tulaga manaomia. E manaomia e se tamaitiiti ni matua e fiafia i le la mafutaga ma le tasi ma le isi, o e e galulue fiafia i le faataunuuina o le ola fiafia i le aiga, o e e alolofa i a latou fanau i se alofa faamaoni ma le le faatuaoia, ma e e tuuto atu i le manuia o le aiga.¹⁵

Ina ua faatoa folasia mai afiafi faaleaiga e avea o se polokalama aloaia a le Ekalesia, na saunoa le Au Peresitene Sili, “Afai e usitai le Au Paia i lenei fautuaga [ia faia afiafi faaleaiga] matou te folafola atu o le a tulai mai faamanuiaga silisili. O le a faateleina le alofa i le aiga ma le usiusitai i matua. O le a atiina ae le faatuatua i loto o le au talavou a Isaraelu, ma o le a latou maua le mana e tau ai ma faatosinaga a le fili ma tofotofoga e luitauina ai i latou.” Matou te faamautinoa atu ia faamanuiaga folafolaina ia i latou o e faia ma le faamaoni a latou afiafi faaleaiga.

O afiafi o Aso Gafua e tatau ona faaavanoa mo afiafi faaleaiga. E tatau i taitai i le lotoifale ona mautinoa ua tapunia fale ma fanua o le Ekalesia, e leai ni gaoioiga a uarota po o siteki e fuafuaina mo afiafi o Aso Gafua ma ia teenaina nisi lava mea e faalavelave i afiafi faaleaiga.

O le faamoemoega autu lava o afiafi faaleaiga e tatau ona i ai e mo aiga ia faatasitasi e aoao i le talalelei. Matou te faamanatu atu i tagata uma ua poloaiina e le Alii matua e aoao a latou fanau i le talalelei, ia tatalo ma ia faapaia le Aso Sapati. O tusitusiga paia o punavai sili ia ona taua mo le aoaoina o le talalelei.

Tatalo faatasi o se aiga i le taeao ma le po. O ni faamanuiaga sili o le a oo mai i olaga o le fanau o e faalogo i o latou matua o aioi atu i le Alii mo lo latou soifua manuia. E moni lava o fanau e i ai i le faatosinaga a na matua amiotonu, o le a sili atu ona puipuia mai le faatosinaga a le fili. ¹⁷

Ina ia malamalama lelei matua ma fanau o le tasi ma le isi, ua i ai se fuafuaga na faia e le ekalesia ua ta’ua o le “Aufono Faaleaiga.” O lea fono e valaau ma taitaia e matua ma e auai tagata uma o le aiga. E faamalolosia ai sootaga faaleaiga, e faamautinoa ai i fanau lo latou “piitaga” ma faatalitonu ai i latou e naunau atu o latou matua i o latou faafitauli. O lenei fonotaga faaleaiga e aoao ai le faaaloalo moni o le tasi i le isi, e faaitiitia ai le manatu faapito, ma faamamafaina ai le Tulafono Auro [tagai Mataio 7:12]i le aiga ma le ola i se olaga mama. E aoao ai le tapuaiga ma tatalo faaleaiga, faatasi ai ma lesona o le agalelei ma le faamaoni. O le faafitauli o le aiga e masani ona faafetoaia ai se tasi i se ituaiga faiga vavalalata, ma le talisapaia ai lona taua ma lona elemene, ae a malolosi aiga ma lotogatasi i le taumafaiga e auauna atu i le Atua ma tausi Ana poloaiga, ¹⁸o le tele o a tatou faafitauli faaona po nei o le a mou atu.

[Uso e,] ia manatu mamafa i lou tiutetauave o le a’oa’o atu o le talalelei i lou aiga e ala i le faia e le aunoa o afiafi faaleaiga, tatalo faaleaiga, faigalotu ma le faitauina o tusitusiga paia ma isi taimi e aoao ai. Ia faamamafa atu faapitoa le saunia mo galuega faafaifeautalai ma faaipoipoga i le malumalu. I le avea ai ma peteriaka i le aiga, faaaoga lou perisitua e ala i le faatinoina o sauniga e tatau ai mo lou aiga ma le tuuina atu o faamanuiaga i lou toalua ma le fanau. E sosoo mai ma lou lava faaolataga uso e, e leai se mea e sili ona taua ia te oe nai lo le faaolataga o lau ava ma lau fanau.¹⁹

E maua e le Au Pulega Aoao le avanoa e feiloai ai ma faamasani ma tagata o le Ekalesia i le lalolagi atoa, o e e ola pea lava pea i ni olaga lelei ma tausia o latou aiga i le faatosinaga a le talalelei. Ua sapi nei Au Paia i faamanuiaga silisili ma le mafanafana e mafai ona maua mai i le toe tiotilo atu i tua, o ni matua, matua matutua, ma matua o matua matutua, ona o taumafaiga manuia ua loa ona fai. E mautinoa o se mea lea e tofu mananao i ai i tatou uma.

Peitai, e toatele o i le Ekalesia ma le lalolagi o loo ola ma lagona o le ta’usalana ma le le agavaa, ona o nisi o o latou atalii ma afafine ua se ese mai le lafu ma ua taase. …

…Ua tatou malamalama o matua magafagafa e taumafai i le mea sili ae toetoe lava o tagata uma e faia ni mea sese. E leai se tasi e aga atu i lena galuega faatino o se matua, e aunoa ma le vave ona iloa o le a tele ni mea sese i le ala. E moni lava e silafia e le Tama Faalelagi, pe a ia tuuina mai ana fanau agaga i le tausiga a ni matua talavou ma le leai o se poto masani, o le a i ai ni mea sese i la latou faautautaga. …

… E eseese i tatou taitoatasi. E eseese tamaiti uma. E faapei lava ina tofu eseese mea tatou te amata ai i le taututuuga o le olaga, ma e pei lava foi ina eseese o tatou malosiaga ma vaivaiga ma taleni, e faapena foi ona faamanuiaina tamaiti taitoatasi i ona lava uiga faapitoa. E le tatau ona tatou mafaufau faapea o le a faamasinoina e le alii le manuia o le tasi i le ala e tasi e pei o le isi. I le avea ai oni matua e tele taimi tatou te faapea ai, afai e le sili atu nai lo le averesi se tamaitiiti i itu uma, o lona uiga ua ta toilalo. E ao ona tatou faaeteete i a tatou faamasinoga. …

O se matua faamanuiaina, o ia lea e alofa, e ositaulaga, ma e popole ma aoao ma auauna atu i manaoga o se tamaitiiti. Afai ua e faia mea uma nei ae o loo faalogogata pea lau tama pe fai ma faafitauli pe faalelalolagi, e ono mafai lava ona faapea, o oe o se matua faamanuiaina. Atonu e i ai fanau ua o mai i le lalolagi, e luitau soo se ituaiga o matua i soo se tulaga. E faapena foi, atonu o i ai foi nisi o le a faamanuiaina olaga o, ma avea o se olioliga i, soo se tama po o se tina.

O lo’u atugaluga i le taimi nei o le, e i ai matua e ono faia ni faamasinoga matuia mo i latou lava, ma ono faatagaina ai nei lagona e faatamaia ai o latou olaga, ae o le mea moni ua uma ona latou faia le mea sili ma e ao ina faaauau pea i le faatuatua.²⁰

O se tama po o se tina [o i ai se atalii po o se afafine ua se ese] e le o tuua na o ia. Sa iloa e o tatou uluai matua le tiga ma mafatiaga o le vaai atu i nisi o a la fanau o teena aoaoga o le ola e faavavau. (Tagai Mose 5:27.) I seneturi mulimuli ane, na iloa ai e Iakopo le loto matau’a ma lagona le lelei o ona atalii matutua i si ana pele o Iosefa. (Tagai Kene. 37:1–8.) O le perofeta maoae o Alema, o le sa i ai sona atalii na faaigoa ia Alema, sa tatalo mo se taimi umi i le Alii e tusa ai ma le uiga fouvale o lona atalii, ma e mautinoa sa lofituina o ia i le popole ma le atuatuvale, ona o le tetee ma le amioleaga na matuaia e lona atalii i tagata o le Ekalesia. (Tagai Mosaea 27:14.) O lo tatou Tama oi le Lagi, na leiloloa le toatele o ana fanau agaga i le lalolagi; na te silafia lagona o lou loto. …

… Aua le fiu i se tama po o se teine ua taase. O le toatele sa foliga mai ua matua leiloloa, ae ua toe foi mai. E tatau ona tatou nofotatalo ma, afai e mafai, ta’u atu ia tatou fanau lo tatou alolofa ma le popolega. …

… Ia iloa o le a silafia e le Tama Faalelagi le alofa ma le osigataulaga, o le popole ma le atuatuvale, e ui ina ua le manuia a tatou taumafaiga tele. E tele taimi e momomo ai loto o matua, ae e tatau ona latou iloa o le tiutetauave maualuga lava e i ai i le tamaitiiti pe a uma ona aoao i ai e matua mataupu faavae sa’o.

… Po o le a lava le faanoanoa, po o le a lava le atugaluga, po o le a lava le tiga ma le mafatia, vaavaai mo se auala e liliu ai i le faaaogaina tatau—atonu e fesoasoani ai i isi e aloese mai faafitauli lava ia, pe atinae foi se malamalamaaga sili atu i lagona o isi o loo tauivi i le ala lava lea e tasi. E moni lava o le a tatou maua se malamalama e loloto atu o le alofa o lo tatou Tama Faalelagi pe a oo ina tatou iloa e ala i le tatalo, e malamalma o ia ma finagalo tatou te tepa i luma. …

E le tatau ona tatou faatagaina satani e faavalea i tatou e mafaufau ua le aoga mea uma. Ia tatou mitamita i mea lelei ma le sa’o ua tatou faia i o tatou olaga; teena ma lafoai mai o tatou olaga na mea e sese; vaavaai atu i le Alii mo le faamagaloga, malosi, ma le mafanafana; ona agai atu lea i luma.

Matou te faamoemoe o le a le faatoilaloina outou i le lotofaavaivai i a outou taumafaiga e tausia o outou aiga i le amiotonu. Manatua ua poloai mai le Alii i le mea lenei:” Ae o o’u soo o le a tuu i nofoaga paia, ma o le a le masii ese”(MF&F 45:32).

E ui ina faaliliu e isi lenei mea faapea o malumalu, lea e moni lava, e suitulaga foi i fale o loo tatou nonofo ai. Afai o le a outou galulue ma le maelega e taitai o outou aiga i le amiotonu, uunaia ma auai i tatalo faaleaiga i aso taitasi; faitauga tusitusiga paia, afiafi faaleaiga, ma le alofa ma le lagolagosua o le tasi i le isi i le ola ai i aoaoga o le talalelei, o le a outou maua faamanuiaga na folafola mai e le Alii i le tausia o se fanau amiotonu.

I se lalolagi amioleaga, e ese le taua mo i tatou taitoatasi e “tutu i nofoaga paia” ma tuu atu i tatou ia faamaoni ma faatuatua i aoaoga o le talalelei a Iesu Keriso. ²²

Ina ia ausia le manuia i le aiga, e tatau i matua ona alolofa ma faaaloalo le tasi i le isi. O tane, o e tauaveina le perisitua, e ao ona sili lo latou mafaufau maualuga i a latou ava, e muamua i a latou fanau, ma e ao foi i ava ona alolofa ma lagolago a latou tane. I se isi itu, o le a alolofa foi le fanau i o latou matua ma alolofa foi le tasi i le isi. Ona avea ai lea o le aiga o se nofoaga e paia lea e mafai ona ola sili ai i mataupu faavae o le talalelei, ma lea foi e mau ai le Agaga o le Alii. O le avea ma se tama faamanuiaina ma se tina faamanuiaina, e sili atu lena nai lo le tulai mai i ni tulaga faaletaitai i pisinisi, malo, po o mea faalelalolagi. Atonu e foliga mai o le fale o se nofoaga ua masani ai, ma ona tiute masani, ae o lona tulaga manuia e ao ina avea ma a tatou tulimataiga aupito silisili i le olaga.²³

• A o e iloiloina aoaoga a Peresitene Hunter i le vaega 1, mafaufau i le taua o le aiga. O le a le tiutetauave o le Ekalesia mo le aiga? E mafai faapefea ona tatou puipuia ma faamalolosia o tatou aiga?

• Mafaufau i aoaoga a Peresitene Hunter i le avea o matua ma paaga i le taitaiga o le aiga (tagai vaega 2) E mafai faapefea e nei aoaoga ona fesoasoani i tama ma tina? E mafai faapefea e matua ona faaaoga lenei mataupu i le tausiaina o a latou fanau? Mafaufau pe mafai faapefea ona e faaleleia le “siomaga faaleagaga” o lou aiga.

• I le vaega e 3, o loo aumaia ai e Peresitene Hunter se fautuaga mo le faatuina o se aiga malosi. E mafai faapefa ona tatou fausia ia sili atu le “lotogatasi ma le amiosa’o faaleaiga”? Ua faamanuiaina faapefea lou aiga i afiafi faaleaiga? Ua faamanuiaina faapefea lou aiga ona o suesuega o tusitusiga paia ma tatalo faaleaiga?

• E mafai faapefea e aoaoga a Peresitene Hunter i le vaega e 4 ona fesoasoani i matua o se tamaitiiti ua taase? E mafai faapefea e matua ua oo i le faanoanoa ma le tiga ona faaliliu lena mea e avea ma mea e aoga? O a ni mea e mafai e matua, matua matutua, taitai o autalavou, ma isi e fesoasoani ai i fanau ua taase?

• A uma ona faitau le vaega e 5, mafaufau i aoaoga a Peresitene Hunter e uiga i le faia o o tatou fale ia avea ma “nofoaga paia.” O a nisi o luitau o tatou feagai i le faia o lenei mea? E mafai faapefea ona tatou taumafai ia avea o tatou fale ma nofoaga paia?

Esoto 20:12; Teuteronome 6:4–7; Salamo 127:3–5; Efeso 6:1–4; Enosa 1:1–3; Mosaea 4:14–15; Alema 56:45–48; 3 Nifae 18:21; MF&F 68:25–28; 93:40; 121:41–46

Fai i le vasega e fai paga ona fuafua lea pe faapefea ona latou aoao atu se vaega o le mataupu i se afiafi faaleaiga. E mafai faapefea ona tatou faatatauina aoaoga i tamaiti ma le autalavou? Valaaulia nisi o paga e faasoa mai i le vasega a latou fuafuaga.