O Le Vavega o le Faamagalo Atu

O loo i ai se vavega sili ona taua o loo faatalitali mai i tagata uma lava, o e ua saunia e suia o latou olaga. O le salamo ma le faamagaloga e mafai ai ona faamalamalamaina le ao mai le pogisa. Ina ua toe fanauina le agaga, ma ua suia olaga—ona oo mai ai lea o le vavega sili lena e faamatagofieina ma siitia ai i luga. Ina ua taufaamatau mai le oti faaleagaga ae o lea ua toe faafoi mai le malosi, ina ua tuleiese e le ola le oti—ina ua tupu lenei mea, o se vavega lava o vavega. Ma o na vavega ofoofogia o le a le mafai lava ona mavae atu pe afai e i ai pea lava se tasi e faaaogaina le mana laveai o le Faaola, atoa ma ana lava galuega lelei e aumaia ai lona fanaufouina. …

O le taua O Le Vavega o le Faamagalo Atu o le aumaia ai lea o le filemu i le agaga mafatia, tigaina, ma puapuagatia. I totonu o le lalolagi o faigata ma fevaevaeaiga o se meaalofa aupito sili lenei ona taua e le mafai e tupe ona faatauina.³

E le faigofie ona maua le filemu i le tulaga vevesi o le lalolagi, e pei ona i ai i aso nei. O le filemu e manaomia o se tulaga lea e sailia e le tagata lava ia. … E faatoa mafai ona maua i le tausisia pea lea o se uiga salamo, saili le faamagaloga o agasala tetele ma laiti, ma o le a mafai ona latalata atili atu ai le tagata i le Atua. Mo tagata o le Ekalesia o se mea sili lena ona taua o la latou sauniuniga, i le saunia ai e fetaiai ma le Faaola pe a afio mai o ia. … O i latou uma o e ua saunia o le a maua le filemu i o latou loto. Aua o le a mafai e i latou ona maua faamanuiaga, e pei ona folafolaina mai e le Faaola i ana aposetolo: “Ou te tuuina atu ia te outou le manuia [filemu], o lou manuia [filemu] ou te avatu ia te outou; ou te le avatu ia te outou, e faapei ona avatu e le lalolagi. Aua le atuatuvale o outou loto, aua foi tou te matatau.” (Ioane 14:27.)

[O se tasi o faamoemoega] O Le Ekalesia a Iesu Keriso o le Au Paia o Aso e Gata Ai o le valaau atu lea i tagata uma i soo se mea ina ia salamo. O i latou o e talia le valaau, pe o ni tagata o le Ekalesia pe leai e mafai ona maua e i latou le vavega o le faamagaloina. O le a soloiesea e le Atua mai o latou fofoga ia loimata o le tiga, ma le faanoanoa, ma le le mautonu, ma le atuatuvale, ma le tausalaina. O mata e matutu, o le a suia i le susu, o foliga ataata o le faamalieina o le a suia ai foliga popole ma le atuatuvale.

O se mapusaga! O se faamafanafanaga! O se olioliga! O i latou o e ua mafatia i soligatulafono ma faanoanoaga ma le agasala, e mafai ona faamagaloina ma faamamaina ma fufulueseina pe afai o le a latou toe foi mai i lo latou Alii, aoao e uiga ia te ia, ma tausia ana poloaiga. Ma o i tatou uma e manaomia le salamo i o tatou sese ma vaivaiga i lea aso ma lea aso e mafai foi ona mauaina lenei lava vavega.⁴

“… E le mafai ona sao se mea eleelea i le malo o le Atua. … ” (1 Ni. 15:34.) Ae le gata i lea, “… e le mafai ona nofo se mea eleelea faatasi ma le Atua. … ” (1 Ni. 10:21.) E tusa ai ma le au perofeta, o le upu eleelea i lenei faaupuga o lona uiga o loo faatatau tonu i le uiga o loo faauigaina ai e le Atua. I manatu o tagata e uiga i lea upu e tali uiga tutusa lava —mo se faataitaiga, o sina tamai palapala lava e le avea ai se ofutino paepae ma se ofu mama. Ae i le Atua o le ua atoatoa, o le mama o lona uiga o amioga ma uiga mama faaletagata. Afai e le ausia lea tulaga, pe o le a lava le tulaga, e le mafai e se mea eleelea ona mafuta faatasi ma le Atua.

Ana fai e leai nei meaalofa taua o le salamo ma le faamagaloga, semanu o le a leai se faamoemoe mo le tagata talu ai ona e leai lava se tasi ua ola i luga o lenei fogaeleele e aunoa ma se agasala.⁵

E le mafai ona i ai se vaitaimi i se olaga o soo se tagata lava o le a le mafai ona le manaomia ai e ia le salamo, ina ia faaleleia ai o ia lava atoa foi ma lona alualu i luma e faavavau.

Ae o le toatele lava o i tatou pe a tatou mafaufau atu e uiga i le salamo, e masani lava ona tatou le manatu mamafa i ai pe ua tatou manatu atu e faapea ua na o a tatou tane, o a tatou ava, o o tatou matua, o a tatou fanau, o o tatou tuaoi, o a tatou uo, o le lalolagi ua aoga tonu i ai le salamo—o soo se tagata lava ma tagata uma ae sei vagana ai i tatou. E le gata foi i lea, o loo i ai foi se lagona taatele ma atonu foi e le o mautinoa lelei e i latou e faapea ua saunia e le Alii le salamo mo na o i latou e fasioti tagata pe mulilua pe gaoi po o isi solitulafono matuia. O le mea moni lava e le sa’o lena manatu. Afai tatou te lotomaulalo ma naunau atu e ola ai i le talalelei, o le a faapea ona tatou manatu o le salamo ua faatatau tonu lava lea i soo se mea lava tatou te faia i lenei olaga e tusa lava pe o se mea faaleagaga po o le faaletino. O le salamo ua faatatau tonu lava mo agaga uma o e latou te lei maua le tulaga atoatoa.⁶

O le salamo o le ki lea i le faamagaloga. Na te tatalaina le faitotoa i le fiafia ma le filemu ma faasino le ala e tau atu i le faaolataga i le malo o le Atua. E tatalaina ai le agaga o le lotomaulalo i le tagata ma salamo ifo ai o ia i lona lava loto, e tusa ai ma ana mea sese ua faia ma gauai atu ai loa i le finagalo o le Atua.

“O le agasala o le solia lea o le tulafono” (1 Ioane 3:4), ma o soligatulafono faapea ua i ai se faasalaga ua uma ona aofia ai i lalo o le tulafono faavavau. O tagata uma lava taitoatasi o lona lava tiute ana agasala e solia, ma o le a faapea foi ona pa’u atu ia te ia le faasalaga e o faatasi ma le solia o na tulafono. Ae peitai, o le maliu o Keriso i luga o le satauro ua faasaolotoina ai i tatou mai le faasalaga e faavavau mo le tele o agasala. Na Ia tauaveina i ona lava luga le faasalaga mo agasala a le lalolagi uma, faatasi ai ma le malamalamaaga e faapea o i latou o e salamo ma o mai ia te ia o le a faamagaloina a latou agasala ma faasaolotoina mai le faasalaga.⁷

O le salamo o se tulafono agalelei ma le alofa lea. E maualuga ma o loo aofia ai mea uma o le olaga. E tele vaega e aofia ai i le tetee i mafaufauga e masani ai, ma e taua tele ia vaega taitasi mo le maua ai o le salamo atoatoa. …

E leai se ala mamalu i le salamo, e leai se avanoa faapitoa mo nisi i le faamagalo atu. E tatau i tagata uma ona mulimuli i le ala e tasi, e tusa lava pe o ia o se tagata mauoa po o se tagata mativa, aoaoina po o le lei aoaoina, umi po o le puupuu, aloalii po o le mativa, tupu po o le tagata faatauvaa. “Aua e le faailogaina e le Atua ni tagata.” (Rom. 2:11.) …

A o lei faagaoioia le tele o isi elemene o le salamo e i ai se laasaga muamua e tatau ona uia. O lena laasaga muamua o le autu lea aua e mafai ai e le tagata agasala ona iloaina ma le malamalama lana agasala. O le fafaguina lea, o le talitonuga o le tausalaina. A aunoa ma lena, e le mafai ona i ai se salamo moni aua e le faailoaina le agasala. …

Afai tatou te malamalama i le matuia o la tatou agasala, e mafai ona faatulaga o tatou mafaufau ina ia mulimulitaia ia laasaga o le a tatou aveeseina ai aafiaga o le agasala. Sa taumafai Alema e momoli atu le tulaga lenei ia Korianetona ina ua ia faapea atu i ai: “… Ia e le toe tuu atu i agasala e faaatuatuvale ai oe, a ia na o au agasala e te ātu ai i lena atuatuvale e mafai ona faamaulaloina ai oe e oo i le salamo. … Aua e te taumafai e tauamiotonuina oe i se mea aupito faatauvaa. … ” (Alema 42:29–30.)⁸

E mafai e le Agaga Paia ona tauaveina se vaega taua i le faatalitonuina o le tagata agasala i lana mea sese. E fesoasoani o ia i le faailoaina atu “o le tonu i mea uma lava” (Moro. 10:5); i le aoaoina atu o mea uma ma le aumaia o mea uma ina ia manatuaina e se tasi (Ioane 14:26); ma le aoaiina o le lalolagi agasala (Ioane 16:8).

E masani ona faailoa mai e tagata faapea ua latou salamo ae na o le pau le mea ua latou faia o le faailoa mai lea o le tiga mo se mea sese na fai. Ae o le salamo moni e faailoa mai lea i lena faanoanoa faaleatua lea e suia ai, liua ai, ma faasaoina ai. O le tiga ua le lava lea. … Na faaupuina faapenei e Paulo i le au paia i Korinito:

“O lenei ou te olioli, e le ona ua outou tiga, a ona ua iu lo outou tiga i le salamo: aua na faatigaina outou e tusa i le Atua, ina ne’i leaga outou ia i matou i le mea e tasi.

“Aua o le tiga e tusa i le Atua e tupu ai le salamo e oo i le ola e le toe salamo ai; a o le tiga faalelalolagi e tupu ai le oti.” (2 Kor. 7:9–10.)⁹

Soo se faamagaloga lava e i ai se tuutuuga. E tatau ona fuafua le lapoa o le mea faapipii i le lapoa o le manua e faapipii ai. O le anapogi, o tatalo, o le lotomaulalo e tatau ona tutusa pe sili atu nai lo le agasala. E tatau ona i ai le loto momomo ma le agaga salamo. E tatau ona i ai le uiga o le “ofu talatala ma le lefulefu.” E tatau ona i ai le loifofoga maligi ma le suia moni o le loto.¹⁰

E moni, ua le lava foi le na o le talitonu ma le iloa o le agasala. E mafai ona avea ma se mea e faatamaia ma faaumatia ai pe afai e le i ai faatasi ma ni taumafaiga e lafoaia atoatoa ai le tausalaina o se tasi. Ua tatau foi la ona o faatasi le iloa o le mea sese ma le loto naunautai e faamamaina le tausalaina ma matua toe faaleleia le tulaga na faaleagaina ona o le sese.¹¹

O loo i ai se suega taua o le salamo. O le lafoaia atoatoa lea o le agasala. E maua e le tagata le salamo faamaoni, pe afai e matua lafoaia e ia lana agasala i le tulaga tatau—ona o le malamalama faatupulaia o le leaga o le agasala, atoa ma le naunau e ola i tulafono a le Alii—ua ia salamo faamaoni. O lenei faatulagaga na faatuina e le Alii: “Tou te iloa faapea se ua salamo i ana agasala—faauta, na te tautau atu ma lafoaia.” (MFF 58:43. Ua faatusilima mea e faamamafa.)

I se isi faaupuga, e le o le salamo faamaoni lea vagana ua lafoaia atoatoa e se tasi sese o lona tulaga, ma toe amata i se ala fou. … E le faalauteleina atu le mana faaola i le tagata e le o manao e suia lona olaga. O le salamo moni e uunaia ai se tagata e faataunuu.

E le tatau ona ofo se tasi ona o le moomia o se taumafaiga, ae le na o le manao i ai. O le mea moni, o le galue e atiina ae ai o tatou uiga mama e faapea foi i o tatou musele faaletino.¹²

E le mafai e se tasi ona na o le manao mo ni tulaga lelei i le matua lafoaia lea o le agasala. E tatau ia te ia ona faataunuu. E tatau ona oo ia te ia le lagona o le ita ma le inoino i le agasala. E tatau ona mautinoa lelei e ia e le gata ua ia lafoaia le agasala, ae ua faapea foi ona suia e ia tulaga o loo siosiomia ai le agasala. E tatau ona ia aloese mai nofoaga ma tulaga na tupu mai ai le agasala, aua e mafai foi ona toe tupu mai ai le agasala i ia mea. E tatau ia te ia ona lafoaia tagata o e na latou fai le agasala. E le tatau ia te ia ona ita i tagata na aafia ai, ae peitai e tatau ia te ia ona aloese mai ai faapea ma mea uma na pogai ai le agasala. E tatau ia te ia ona lafoaia tusi uma, o mea faatosina, atoa ma mea e toe faamanatu mai ai ia te ia mea na ia fai i “aso ua tuanai” ma “taimi ua mavae.” E tatau ia te ia ona faagalo ia tuatusi, numera o telefoni, o tagata, o nofoaga ma tulaga na tupu ai le agasala i le taimi ua tuanai, ma ia faapea ona fausia e ia se olaga fou. E tatau ia te ia ona lafoaia soo se mea lava e toe manatua ai mea na tutupu i aso ua tuanai.¹³

O le lafoaia o le tiapolo, suia atoatoa o olaga, suia o uiga ma amioga, faaleleia o tulaga o le tagata, ua faapea ona tatou manaomia ai le fesoasoani a le Alii, ma e mafai ona tatou mautinoa e maua pe afai e faia la tatou vaega. O le tagata e matua faalagolago i lona Alii e mafai ona maua e ia le loto pulea ma e mafai ona ia faataunuuina soo se mea lava e faamoemoe o ia e fai, pe o le fia mauaina o papatusi apamemea, fausia o se vaa, faatoilaloina o se uiga masani, po o le faatoilaloina foi o se solitulafono mamafa.¹⁴

O le tautau atu o agasala o se laasaga taua tele lea i le salamo faapea ma le mauaina o le faamagaloga. O se tasi lea o suega e iloa ai le salamo faamaoni, aua “Tou te iloa faapea se ua salamo i ana agasala—faauta, na te tautau atu ma lafoaia.” (MFF 58:43. Ua faatusilima mea e faamamafa.) …

Atonu o le ta’uta’u atu o agasala o se tasi lenei o faafitauli sili ona faigata ona taulimaina e le tagata agasala ua salamo. O lona matamuli ua fai lea ma mea ua faigata ai ia te ia ona faailoa atu lona nofosala, ma le mea sese ua ia faia. O nisi taimi ona o lona manatu e le lava lona faatuatuaina o tagata e tatau ona ia tautau atu i ai ana agasala, o lea ua tonu ai i lona mafaufau e teu pea i lona loto ana agasala. …

Talu ai ona e silafia lelei e le Alii loto o tagata, o o latou mafaufauga, atoa ma le malosi o ia te i latou e salamo ai ma toe faaleleia ai i latou lava, o le mea lea e le tuuina atu ai e ia le faamagaloga i tagata, sei vagana ua atoatoa lelei lo latou salamo. E tatau i le tagata solitulafono ona maua se “loto momomo ma le agaga salamo” ma ia i ai le loto malie e faamaualalo ai o ia lava ma faia mea uma e manaomia. O le tautauina atu o ana agasala matuia i taitai e tatau ai o le Ekalesia, o se tasi lena o tulaga manaomia na tuuina mai e le Alii. O nei agasala e aofia ai le mulilua, faitaaga, o isi solitulafono o feusuaiga, ma isi agasala e faapena le matuia. O lenei faiga o le ta’uta’u atu o agasala e mautinoa ai le maua o le taitaiga tatau ma le puipuiga mo le Ekalesia ma ona tagata ma taitaiina ai tagata solitulafono i le ala e tau atu i le salamo moni.

Ua faamalieina e le toatele o tagata solitulafono o latou lava loto i ni nai tatalo faalilolilo i le Alii ma tau atu i ai a latou agasala ma ua manatu ifo ai ua lava lea ta’uta’uina atu o a latou agasala. “Ua uma ona tautau atu au agasala i lou Tama Faalelagi,” latou te tausisi mai ai, “ma e na o le pau lena o le mea e manaomia.” E le sao lena tulaga pe afai ua aafia ai i se agasala matuia. O lona uiga la e lua ituaiga o faamagaloga e manaomia ina ia aumaia ai le filemu i le tagata solitulafono—o le tasi mai taitai e tatau ai o le Ekalesia a le Alii, a o le tasi e mai le Alii lava ia. [Tagai Mosaea 26:29.] …

… O le ta’uta’u atu o agasala o le faia lea e le tagata i lona lava lotofuatiaifo, ae le faamalosia. O se manatu lea e tatau ona tupu mai i le loto o le tagata lava ia ua agasala, ae ia le tupu mai le manatu faapea ona ua maua o loo fai le agasala. O le ta’uta’u atu faapea o agasala … o se faailoga lea e iloa ai le tuputupu ae o le salamo. O loo faailoa mai ai le tautinoga a le tagata agasala atoa ma lona manao e lafoai i uiga leaga. E sili atu ona talia i le silafga a le Alii le tautau atu o agasala ona o le lotofuatiaifo o le tagata lava ia nai lo le ta’uta’u atu o agasala ona ua faamalosia, e le o i ai le lotomaulalo, e tuuina mai ai e le tagata, ina ua fesiligia ma faamaonia le solitulafono. O tulaga faapea o le ta’uta’u atu o agasala ona ua faamalosia, e faamaonia mai ai e le o i ai i le tagata le lotomaulalo e mafai ai ona maua le faamagaloga mai le Alii: “… Aua o au, le Alii, e faamagaloina agasala, ma alofa mutimutivale i e ta’uta’u atu a latou agasala ma le lotomaulalo” (MFF 61:2. Ua faatusilima mea e faamamafa.)¹⁵

E ui o agasala matuia e pei o ia sa lisiina atu muamua … e manaomia ai le ta’uta’u atu i taitai e tatau ai o le Ekalesia, ua manino mai o le ta’uta’u atu faapea e le talafeagai ma e le manaomia mo agasala uma. O agasala e le matuia tele ae na afaina ai isi—e pei o eseesega faaleulugalii, ita i nai mea faatauvaa, o ni feeseeseaiga ma isi mea faapena—e tatau ona ta’uta’u atu i le tagata po o tagata o loo mafatia ai ma e tatau lava ona faaleleia le mataupu i le va o tagata na aafia ai, e masani lava, e le tau faaalia fua i se taitai o le Ekalesia.¹⁶

O le ta’uta’u atu o agasala e aumaia ai le filemu. … O le ta’uta’u atu o agasala e le gata i le faaali atu o sese i taitai e tatau ai o le Ekalesia, ae faapea foi i le fetufaai ai o avega, ina ia mama ai. E mafai e se tasi ona tuuina atu se vaega o lana avega i luga o tauau o isi o e e mafai ma ua i ai le loto malie e fesoasoani i le tauaveina o lena avega. Ma o le a faapea ona maua ai le lotomalie i le faia o le isi laasaga, o le faia lea o mea uma e mafai ona faia e aveesea ai le avega o le agasala mai le tagata lava ia.¹⁷

Pe a oo ina iloa e se tasi le faanoanoa ma le lotomaulalo e maua mai i le iloa o le agasala; afai na te lafoaia le agasala ma ua tonu ia te ia o le a matuai inoino lava i ai; afai ua ia ta’uta’u atu ma le faamaulalo lana agasala i le Atua ma tagata e tatau ai i le lalolagi—afai na te iloaina ua uma ona faia nei mea, o loo i ai lava le tulaga manaomia o le toe faaleleia po o le toe faafoi. E tatau ona ia toe faaleleia le mea na ia faaleagaina, gaoia, po o se sese na faia.¹⁸

E moomia e le tagata agasala ua salamo ona faia le toe faaleleia i le tulaga e gata mai ai le mafai. Ua ou faapea atu e tusa ma le tulaga e “gata mai ai le mafai” aua e i ai nisi agasala e leai se toe faaleleia e talafeagai i ai e mafai ona faia, ae o isi e na o se vaega o le toe faaleleia po o le toe faafoi e mafai.

O se tagata gaoi po o le faomea e mafai ona ia toe faaleleia pe toe faafoi atu mea na ia gaoia. E mafai foi e se tagata pepelo ona faailoa atu le mea moni ma faasa’o ai le mea sese na faia ona o le pepelo. O le tagata faitala ua ia faaleagaina le igoa tauleleia o le tasi tagata, e mafai e ia ona faia se vaega o le toe faaleleia i le toe taumafai lea e tauleleia le igoa o le tagata lea na ia faaleagaina. Afai o le agasala po o le faatalale foi ua faaleagaina ai e se tasi se meatotino, e mafai ona ia toe faaleleia pe toe totogi le mea atoa po o se vaega.

Afai o mea ua faia e le tane ua aumaia ai le faanoanoa ma le faalumaina i lana ava ma le fanau, i lona toe faaleleia, e tatau ona ia faia taumafaiga uma ia toe maua ai lo latou talitonuga ma le alofa, e ala lea i le matuai faateleina o le … lotonaunau ma le faamaoni. E faapena foi i ava ma tina. E faapena foi i fanau ua sese i o latou matua, o se vaega … o lo latou salamo e tatau ona faasa’o na sese, ma ia ava i o latou matua.

E tusa ai ma le tulafono, o loo i ai le tele o mea e mafai ona faia e le tagata ua salamo, ina ia toe faia ai ni suiga. “O se loto momomo ma le agaga salamo” o le a faapea foi ona aoga tele i le tulaga o le toe faaleleia o mea ua faaleagaina. O le agaga moni o le salamo e matuai manaomia ai le tagata ua agasala, ina ia faia e ia o mea uma lava e tusa ma lona malosi ina ia faasa’oina ai le mea sese ua faia.¹⁹

I le gasologa o le salamo e tatau lava ona tatou totogi atu le atoatoa i le mea e mafai ona oo i ai, o lona uiga ia totogi atu i le mea sili e mafai ona faia e tusa ma le malosi e oo i ai. O na mea uma e tatau ai ia i tatou ona manatua o le tagata agasala ua augani mai, ona o le naunau ina ia toe faia se faaleleiga e tusa ma mea na ia faia, e tatau foi ia te ia ona faamagalo atu isi tagata e tusa ma mea sese uma na latou faia ia te ia. O le a le faamagaloina i tatou e le Alii, sei vagana ua faamamaina o tatou loto mai le inoino, ita, ma le tauleagaina o o tatou uso a tagata.²⁰

I lana fetalaiga tomua e tusa ai ma faaaliga i ona po nei, sa otooto mai ai e le Alii se tasi o tulaga manaomia sili ona faigata e tusa ai ma le mauaina o le salamo moni. O se vaega faigata lava lea o le salamo i nisi tagata, aua e nofo puipuia ai le tagata i le vaega o totoe o lona olaga. Ua fetalai mai le Alii:

“… O au le Alii e le mafai ona vaai atu i le agasala ma faatagaina sina mea itiiti lava;

“Ae ui i lea, o le e salamo ma faia poloaiga a le Alii o le a faamagaloina.” (MFF 1:31–32. Ua faaopoopo le faatusilima i mea e faamamafa.)

E matua tonu ma sa’o lenei lava mau. Muamua, e tatau i le tagata ona salamo. O le mauaina o lea tulaga e tatau ai ona ola o ia i poloaiga a le Alii, ina ia maua ai le tulaga e tatau ona i ai. O se mea matua tatau lea ina ia maua ai le faamagaloga atoatoa.…

Talu ai ona e agasala i tatou uma i se tulaga mamafa po o le mama foi, o lea ua tatau ai ia i tatou uma ona salamo e le aunoa, atoa ma le faatupulaia o lo tatou malamalama, ma a tatou mea e fai. E faigata lava i se tasi ona tausia poloaiga a le Alii i se aso e tasi, se vaiaso, se masina po o se tausaga. O se taumafaiga lea e tatau ona faia pea i tausaga o totoe o le olaga o se tagata. …

… O le salamo e tatau ona aofia ai le lafoaia atoatoa o sese, ma le matua gauai atu i le finagalo moni o le Alii. E lei salamo moni lena tagata solitulafono, pe afai e le totogiina lana sefuluai, e le auai i ana sauniga po o fonotaga, e solia le Sapati, e le faia ana tatalo faaleaiga, e le lagolagoina taitai o le Ekalesia, e solia le Upu o le Poto, e le alofa i le Alii po o ona uso a tagata. … E le mafai ona faamagaloina e le Atua le tagata solitulafono sei vagana ua faaalia e ia le salamo faamaoni, lea e oo atu ai i vaega uma o lona olaga. …

O le “tausia o poloaiga” e aofia ai le tele o galuega e faia e i latou o e faatuatua. … O galuega lelei e faia faapea ma le i ai o le loto faamaoni ma i ai faatasi ma lagona aoga, o le mea lena o loo manaomia. E le gata i lea, o se ala lelei e faaleaogaina ai tanuuga o le agasala e o’o i le olaga o se tagata, o le tuuina atu lea o le malamalama o le talalelei i isi e le o maua i le taimi nei. O lona uiga o lenei mea, o le galulue lea ma tagata e le toaaga o le Ekalesia, ma tagata lotu ese—aemaise lava o tagata lotu ese. Ia matauina le faatatauina e le Alii o le faamagaloina o agasala i le tuuina atu o le molimau e tusa ai ma le galuega i aso e gata ai:

“Aua o le a ou faamagalo a outou agasala i lenei poloaiga—ina ia outou tumau pea i o outou mafaufau i le paia ma le agaga o le tatalo, i le tautino atu o molimau i le lalolagi atoa e uiga i mea uma ua faaali atu ia te outou.” (MFF 84:61. Ua faatusilima mea e faamamafa.)²¹

Pe ua le mafai ea ona tatou malamalama i le mafuaaga ua aioi mai ai pea le Alii i le fanauga a tagata i lenei fia afe o tausaga ina ia o mai ia te ia? E mautinoa lava na fetalai mai le Alii e uiga i le faamagaloina e ala i le salamo, ma o le a mafai ona oo mai le faamama avega mai le mamafa o le tausalaina, pe a tatou mulimuli i lana tatalo maoa’e i lona Tama faatasi ai ma lenei olega faamaoni ma le folafolaga:

“Ia outou o mai ia te au, o outou uma o e tigaina ma mafatia i avega, o au foi e malolo ai outou.

“Ia outou amoina la’u amo, ma ia outou faaaoao ia te au, aua o au le agamalu ma le loto maualalo; ona maua lea e outou le malologa mo outou agaga.

“Aua e avegofie la’u amo, o la’u avega foi e mama ia.” (Mataio 11:28–30.)

O lo’u faamoemoega ma la’u tatalo lea ina ia mafai e alii ma tamaitai uma i soo se mea ona tali atu i lenei valaaulia agamalu ma ia faapea ona latou faaavanoaina le Matai e galueaiina i o latou olaga taitoatasi le vavega sili o le faamagalo atu.²²