Mataupu 10

Faalagolago ma le Lotomaulalo i le Atua

O le malosi moni lava e maua mai le faalagolago ma le lotomaulalo i le Atua.

Mai le Soifuaga o Wilford Woodruff

“Ena o le pau lava le mea ofoofogia i lo’u olaga atoa,” sa faapea mai ai Peresitene Wilford Woodruff, “o le valaauina lea o a’u e le Alii mo soo se mea, aemaise lava i le avea ma se Aposetolo ma se Peresitene. Ae o Lana lava fuafuaga lena; e le o sa’u [fuafuaga].”¹

E ui lava sa faateia Peresitene Woodruff i lona valaauga i le Ekalesia, ae sa ia iloaina le mafuaaga na valaau ai o ia e le Alii. Sa ia iloiloina: “Aisea na filifilia ai e le Alii se tagata faatauvaa e pei o a’u e pulefaamalumalu i Lana Ekalesia? Aisea na Ia filifilia ai Iosefa Samita—o se tamaitiiti e le iloa tusitusi pe faitau tusi, e pei ona valaau ai o ia? Aisea na Ia filifilia ai lena vaega o tagata? Aua e mafai Ona ia taulimaina i latou. Ua Ia filifilia tagata o e faailoaina atu le aao o le Atua.”²

E masani ona faailoaina e Peresitene Woodruff le aao o le Atua, i ona faamanuiaga faaletagata lava ia ma i le alualu i luma o le Ekalesia. I sana lauga sa faia i le Tapeneko i Sate Leki, sa ia saunoa mai ai: “Ou te faafetai i le Alii mo lo’u ola. Ou te faafetai ia te Ia mo Ana faamanuiaga ma lona alofa tunoa ia te a’u. O loo i ai le pogai ou te alaga fiafia ai i lenei mea, ma ua ia te a’u le tiute e tuuina atu i le Atua le mamalu mo mea uma ua ou maua. Afai ua ou faia se lelei; afai ua mafai ona ou talaiina le Talalelei ma tulimatai atu se ala e mafai ai ona faagaeetia o’u uso a tagata, i le aiga po o nuu ese, o le mana o le Atua na mafai ai. … O lenei mana ua ia i tatou. O le pogai lea ua tatou i ai iinei i lenei aso. O le pogai lena ua tu ai lenei Tapeneko iinei i le aso, i le faataunuuina o folafolaga a perofeta a le Atua i aso anamua. O le pogai lea ua totoina ai iinei i nei vanu o mauga le Siona a le Atua. Ua faia uma lava i le mana o le Atua, ae le o le tagata.”³

Aoaoga a Wilford Woodruff

Tatou te faalagolago i le Atua mo faamanuiaga uma lava faaleagaga ma le faaletino.

Ua ou faalagolago atoa lava i le Alii. Ua faapena lava i lo’u olaga, ma i a’u femalagaaiga i le galuega paia, ma talai atu le talalelei a Keriso i o’u uso a tagata.⁴

Ua tatau ona amata ona tatou malamalama o ala a le Atua e matua matautia lona maoae nai lo a tatou ala, ma o Ana fautuaga, e ui ina foliga mai o se valaau mo se osigataulaga, e avea pea ma ala sili ona lelei ma saogalemu mo i tatou e faaaoga ma faatinoina. E afe ma afe o i ai faatasi ma i tatou e mafai ona molimau i le upumoni mai lenei aafiaga e tasi. … E tatau foi ona tatou aoaoina lenei upumoni matautia, o le Atua e i ai uma le mamalu ma le viiga mo le faavaeina o Lana Ekalesia ma Lona malo i luga o le fogaeleele. E le mafai e le tagata ona avea i lenei po o se isi lava augatupulaga a le lalolagi. E leai se isi mea ua na o le mana o le Atua e mafai ona aumaia le atoatoaga o le Talalelei, faatulagaina le Ekalesia, faapotopotoina Lona nuu i Siona i le faataunuuina o faaaliga ma faatinoina le galuega ua mafai ona faataunuuina.⁵

Tatou te mananao e manatua pea o lo tatou malosi, lo tatou faamoemoe ma lo tatou mana o loo i aao o le Atua, ae le o i tagata. O le Alii lava Ia sa faaloaloa mai Lona aao e faavaeina lenei Ekalesia, Lona malo, Lana galuega. … Ua le ia i tatou lava se mana. E lei i ai lava i le faatautaiina po o le taitaiina o lenei malo, ua na o le faatasi mai o le Atua Silisiliese o loo ui atu ai.⁶

O le mea moni lava faapea ua ia i tatou se nuu, ua ia i tatou se Siona, ua ia i tatou se malo, ua ia i tatou se ekalesia ma se perisitua lea e fesootai ma le lagi, ma lea e i ai le mana e faagaoioi ai le lagi, ma ua tatou iloa o loo fesootai mai le lagi ma i tatou, ma taitaiina le faatinoina o lenei galuega matautia o aso e gata ai lea o loo faafeagai ma le Au Paia o Aso e Gata Ai, na o le mea moni tonu lava lea e tatau ona faatumuina o tatou loto i le lotomaualalo i luma o le Alii lo tatou Atua, ma e tatau ona faifaipea ona faamanatu mai ia i tatou a o tatou tomanatu ma lagonaina le tiutetauave ua ia i tatou ia te Ia ma i le tasi i le isi, faapea ma lo tatou faalagolago ia te ia mo faamanuiaga uma faaleagaga ma faaletino ia o loo faafiafiaina ai i tatou.⁷

O o’u lagona ma manatu e faapea e le i i ai lava se nuu o le Alii mai ia Tama Atamu e oo mai i le taimi nei sa valaauina e fausiaina Lona Malo ma faavaeina Lana Siona i le lalolagi, pe talai atu le talalelei o le salamo i le fanauga a tagata, ae le faalagolago atoa lava i le Atua o le lagi mo se fesoasoani.⁸

Ua tatou iloa ma malamalama lelei lava o lo tatou taunuuga, o lo tatou tulaga, ma o tatou faamanuiaga e i ai uma lava i ona aao.⁹

Ou te fai atu i tagata uma—Sa Iutaia ma Tagata Nuuese, maualuluga ma le faatauvaa, mauoa ma mativa—o le Alii Silisiliese e i ai le mana i totonu ia te ia lava, ma e le faalagolago i se tagata, e tauaveina lana galuega; ae a valaauina e ia tagata e faia lana galuega e tatau ona latou faatuatuaina o ia.¹⁰

E filifilia e le Atua i latou e lotomaulalo e faia Lana galuega.

Ua filifilia e le Alii mea faatauvaa o le lalolagi e faia Lana galuega. Ae ua mafai e Ia ona aoao mai ia te a’u, po o soo se isi lava o la’u usoga, e pei lava ona Ia faia i soo se augatupulaga o le lalolagi. Ua ia filifilia pea lava pea mea faatauvaa. E pei o Mose i le taitaiina o le fanauga a Isaraelu. Sa fai mai Mose o ia e gese lana tautala, ma sa ia manatu e le mafai ona ia faia se mea e tasi. Ae sa fetalai atu le Alii o le a ia saunia mo ia se faamatala upu. Ina ua finagalo le Alii i se tupu mo Isaraelu, sa ia filifilia Tavita, le atalii o Iese, o le sa leoleo mamoe. O atalii uma o Iese, vagana ai Tavita, sa aumaia i luma o le Perofeta; ae sa lei faauuina e Samuelu se isi o i latou. Sa ia fesili atu ia Iese pe i ai nisi ona atalii. Sa fai ane Iese, Ioe; e i ai se alii laitiiti iinei o loo leoleoina mamoe. Sa fia vaai i ai le Perofeta. Ina ua sau o ia, sa faauuina o ia e Samuelu e avea ma tupu o Isaraelu. E faapena foi i aso o le Au Aposetolo. O ai i latou? O faifaiva [e lei aoaoina]. E faapena i aso nei. Amata mai ia Iosefa Samita ma i matou uma lava. O ai i matou? O matou o anufe matitiva, ma faatauvaa o le eleele. Ae ua filifilia i matou e le Alii ona ua Ia finagalo e mafai e Ia ona faataunuuina ni fuafuaga e ala ia i matou. Ou te faamoemoe o le a mafaia e Ia.

Ou te manatu ua umi atu ona ou umiaina le Tofi Aposetolo nai lo se isi lava alii i luga o le fogaeleele i aso nei e gata ai. E tatau ea ona ou gugutu ai i lenei mea pe ou te mimita ma faaeaina ona ua umi tele ona ou umiaina le Perisitua? Afai na ou faia, o a’u lava o se tagata valea tele. O lo tatou tiute o le faamamalu o le Atua; o lo tatou tiute le faailoa o le aao o le Atua. O le tiapolo o loo saili e faaumatia a’u mai le aso na ou fanau mai ai e oo mai i le aso. Ae o loo i ai pea le Alii i lo’u itu taumatau ma laveai ia te au. E lua lava mana o loo taufai galulue—o le tasi e faaumatia a’u, a o le isi e laveai a’u. Ma o lea la ua ou i ai i le aso, o se meafaigaluega faatauvaa i le aao o le Atua. Ae, e pei ona o loo soifua le Atua, afai Na te ta’u maia ia te a’u lo’u tiute, o le a ou faia lea!

… Ou te tatalo i le Atua e tuuina mai ia i tatou le poto, ma ia fesoasoani mai ia i tatou e lotomaulalo, ma faatuatua, agamalu ma loto fuatiaifo.¹¹

Ua faafia ona ou faalogo i tagata i mea ou te alu i ai o fai mai— Aisea na filifili ai e le Atua Iosefa Samita, aisea na ia filifilia ai lena tamaitiiti e tatalaina lenei augatupulaga ma faataatia le faavae o lenei Ekalesia? Aisea na ia le filifiliaina ai se tagata maoae… ? E tasi lava la’u tali i lo’u olaga e tuuina atu i lea ituaiga fesili, o lea, e le mafai e le Alii Silisiliese ona faia se mea ma i latou, e na te le mafai ona faamaualaloina i latou. E le o i latou le vasega o alii sa filifilia mo se ituaiga galuega faapea i soo se augatupulaga o le lalolagi. Sa filifilia e le Alii Silisiliese mea faatauvaa o lenei lalolagi. E mafai ona Ia taulimaina i latou. O lea la sa ia filifilia Iosefa Samita aua e faatauvaa o ia, ma sa lava [ia Iosefa Samita] lona atamai na te iloaina ai.¹²

A oo ina faamaualuluga tagata taitoatasi, e pauu i latou.

Tou te lei vaai lava i se aso, ma o le a outou le vaai lava i se aso, i le ola nei po o le faavavau, o le a mafai ai e outou ona ola e aunoa ma le manaomia o le puipuiga ma le tausiga a le Atua. Tou te manaomiaina lava i le atoaga o o outou olaga. A lagona e a tatou alii talavou, po o o tatou alii matutua, po o o tatou tamaitai, ua latou taunuu i se tulaga ua latou tutoatasi mai le Alii, o le a latou iloaina e matautia lo latou sese.¹³

Afai e lagona e le Peresitene o le Ekalesia po o se isi o ona fesoasoani po o se isi o aposetolo po o se isi lava tagata i lona loto faapea e le mafaia e le Atua ona faia e aunoa ma ia, ma e faapitoa lona taua ina ia faataunuuina le galuega a le Alii, ua tu o ia i le tulaga o le liliuese. Sa ou faalogo ia Iosefa Samita o saunoa mai faapea sa fai atu Oliva Kaotui, o le sa avea ma aposetolo lona lua o lenei Ekalesia, ia te ia, “Afai ou te alu ese ma le Ekalesia lenei o le a pau.”

Sa fai atu i ai Iosefa, “Oliva, tago e fai.” Sa faia e Oliva. Sa pau o ia; ae e lei pau le malo o le Atua. Ua ou masani foi i isi aposetolo i o’u aso ma o’u taimi o e sa lagonaina e le mafai ona faia e le Atua [se mea] e aunoa ma i latou; ae sa mafai lava e le Atua lana galuega e aunoa ma i latou.¹⁴

Ua ou vaai ia Oliva Kaotui a o foliga o loo ia te ia le mana o le Atua. Ou te lei faalogo lava o tuuina atu e se tagata se molimau sili atu ona malosi nai lo ia a o i ai le uunaiga a le Agaga. Ae o le taimi lava na alu ese ai mai le malo o le Atua, o le taimi foi lena na le toe i ai se mana. … Sa aveeseina lona malosi, e pei o Samasoni i vae o Talila. Sa aveesea lona mana ma lana molimau lea sa faafiafiaina ai o ia, ma sa lei toe mauaina lava e ia i lona atoatoa a o i ai i la le tino, e ui ina maliu o ia [o se tasi o] le Ekalesia.¹⁵

O le tasi vae tolu o au a le lagi sa tulieseina ona o lo latou faatuiese. … O loo i ai i latou i aai uma ma nuu ia e nonofo ai tagata o le lalolagi, ma aemaise lava i mea o loo i ai nisi o le Au Paia o Aso e Gata Ai. … Tou te manatu ea o loo siomia i tatou e nei tiapolo e aunoa ma lo latou taumafai e faia se mea? O momoe ea i latou? E le i ai ea sa latou galuega e faatinoina? Ou te fai atu i la’u usoga o e umiaina le Perisitua, o loo i ai sa tatou taua maoae e tau ma nei agaga. E le mafai ona tatou sola ese mai ai. O le a la latou mea e faia ia te outou? O le a latou taumafai e faaosoosoina i tatou e faia soo se mea ma mea uma lava e le sa’o. O nei tiapolo o le a matua fiafia e faaosoosoina a’u ma la’u usoga e manatu o matou o alii sili, e popoto atu nai lo se isi lava; ina ia fevaevaeai ai le tasi o i tatou i le isi, ma faatupuina ia i tatou le saili e ta’u atu agasala a o tatou uso nai lo a tatou lava. E tatau ai la ia i tatou ona vaavaai lelei i tatou lava. E tatau ona ou faia lenei; e tatau i o’u Fesoasoani ma Aposetolo; e tatau ia i tatou uma lava. … Ma afai e tatalaina o tatou mata ina ia malamalama i mea a le Atua, e mafai ona tatou malamalama i o tatou tiutetauave; e mafai ona tatou malamalama i mana o le Perisitua Paia ma le sootaga lea tatou te tausia i le Atua. E matua tatau lava ona faamaualaloina i tatou lava i luma o le Alii.¹⁶

Ia lotomaulalo, ia mataala, ia nofo tatalo. Ia faaeteete i le faamaualuga, ina nei e pau e pei o isi.¹⁷

A tatou faalagolago ma le lotomaualalo i le Alii, o le a Ia puipuia ma faamalosia i tatou.

O uiga mama sili e lua … e tuuina atu i se tagata le mana o le lagi—o le faamaoni ma le mama o ona uiga. Ia umia e se tagata ia uiga, ia faamaoni lona loto ma le le femoumouai, ia mama lona ola, ma, afai tatou te tuufaatasia ia uiga ma le lotomaulalo, ua [puipuia] o ia mai le tele o vaivaiga ma o le a mafai ona tetee atu i le matautia o le tele o faaosoosoga. E i ai uma lava o tatou vaivaiga; ua faatagaina e le Atua ina ia aoaoina ai le lotomaulalo ia i tatou lava ma le alofa mama mo isi.

E leai se isi o i tatou e atoatoa a o tatou ola i la le tino; ae o le tagata e faalagolago ma le lotomaulalo i le Atua e le mafai ona sese i le taua mo le mea tonu, e le femoumouai i lona faamaoni i le upumoni, ma tausisi lava e le faaleaogaina ana feagaiga, o se tasi lea e mafai ona tatou faaaloalogia, ma [tatou] tauivi, e ala i le fesoasoani a le lagi, e faataitai i ai.¹⁸

Ou te fia fai atu i le Au Paia o Aso e Gata Ai, pau lava le mea e tatau ona tatou faia o le faatuatua, tausi Ana poloaiga, lotomaulalo, saili ia te Ia i le tatalo mamana, ma o le a lelei mea uma ia i tatou.¹⁹

O loo i ai faatasi le Atua ma lenei nuu. Ae ua manaomia ina ia tatou faalogo i Lona siufofoga, usitai i Ana poloaiga, ma faamaulaloina i tatou lava i Ona luma. … O loo i ai se toafilemu i le lotolotoi o [tagata] Mamona—e pei ona valaau ai i tatou e isi tagata—o se mea matautia ma le ofoofogia lena i le lalolagi. … O le pogai o lenei toafilemu ona—o le Atua o la tatou uo, lo tatou faitulafono, lo tatou faaola. Afai e le mafai ona lagolagoina e le Alii Lana galuega, e mautinoa le le mafaia e i tatou. Ae e mafai e Ia. O loo faia pea lava e Ia, ma o le a faia e oo atu i le iuga. O le mea lea ou te fai atu ai i le Au Paia, aua le matata’u. Ia faatuatua i le Atua. Aua nei faavaivai o outou loto. Ia faaoo atu a outou tatalo i fofoga o le Alii o Sapaota i le ao ma le po. Fesili atu i soo se mea tou te mananao ai. A outou faia lena, o le a tali mai le Alii i a outou tatalo, pe afai tou te fesili atu mo mea tonu. O iina e i ai lo tatou malosi. O loo i ai i le Atua.²⁰

Fautuaga mo Suesuega ma le Aoaoina Atu

Mafaufau i manatu nei a o e suesueina le mataupu po o lou sauniuni foi e aoao atu. Mo fesoasoaniga faaopoopo, tagai i itulau v–ix.

Aisea e taua ai le faailoa o lo tatou faalagolago atu i le Atua? (Tagai itulau 108–109.) E faapefea e lou faailoa atu [o lou faalagolago i le Atua] ona uunaia le auala tatou te ola ai?
O ai sa faasino i ai saunoaga a Peresitene Woodruff o “mea faatauvaa o le lalolagi”? (Tagai i itulau 105–108–109); tagai foi i le 1 Korinito 1:25–28.) Aisea e filifili ai e le Alii ia ituaiga o tagata e faataunuuina Lana galuega? O anafea na e vaai ai o galue le Alii e ala i “mea faatauvaa o le lalolagi”?
Faitau atoa le parakalafa i le itulau e 107, ona manatunatu loloto lea i ai pe talanoaina foi po o le a le tulaga e oo i ai lou olaga e aunoa ma le puipuiga ma le tausiga a le Atua. O le a le mea ua e aoaoina mai i lenei tulaga e uiga i le faamaualuga? O a ni taunuuga o le faamaualuga?
O le a se mea e mafai ona tatou aoaoina mai i le tala e uiga ia Oliva Kaotui i le itulau 107?
Faitau atoa le parakalafa lona lua i le itulau 107. Aisea e manao ai Satani ma lana autau tatou te “manatu ua sili [ma] popoto atu i tatou nai lo se isi lava tagata”? Aisea latou te mananao ai tatou te “ta’u atu agasala a o tatou uso nai lo a tatou lava agasala”? E faapefea ona tatou tetee atu i nei faafitauli?
Toe faitau parakalafa mulimuli e fa o le mataupu, matau upu ma faaupuga ia e taua ia te oe (itulau 107–108). O a faamanuiaga tatou te maua pe a tatou faalagolago i le Alii?

Mau E Faatatau I Ai: Faataoto 3:5–7; Luka 18:9–14; Iakopo 2:13–21; Alema 36:3; Helamana 3:35; MFF112:10; 121:34–40