Նեփիի երկրորդ գիրքը

1 Եվ եղավ այնպես, որ երբ ես՝ Նեփիս, վերջ դրեցի իմ եղբայրներին սովորեցնելուն, մեր հայրը՝ Լեքին, նույնպես շատ բաներ խոսեց նրանց հետ և կրկնեց նրանց, թե ինչ մեծ բաներ էր արել Տերը նրանց համար, դուրս բերելով նրանց Երուսաղեմի հողից:

2 Եվ նա խոսեց նրանց հետ ջրերի վրա իրենց ապստամբությունների և Աստծո ողորմությունների մասին, որը նրանց կյանքը խնայում էր, որպեսզի կուլ չգնային ծովին:

3 Եվ նա խոսեց նրանց հետ նաև խոստումի երկրի մասին, որը նրանք ձեռք էին բերել, որքան ողորմած էր Տերը եղել՝ նախազգուշացնելով մեզ, որ մենք պետք է դուրս փախչեինք Երուսաղեմի հողից:

4 Քանզի, ահա, ասաց նա, ես տեսիլք եմ տեսել, որով ես գիտեմ, որ Երուսաղեմը կործանվել է. և եթե մենք մնացած լինեինք Երուսաղեմում, մենք նույնպես կորած կլինեինք:

5 Բայց, ասաց նա, չնայած մեր չարչարանքներին, մենք ձեռք ենք բերել խոստումի երկիր, երկիր, որը բոլոր մյուս երկրներից ավելի ընտիր է. երկիր, որը Տեր Աստված ուխտել է ինձ հետ՝ լինելու մի երկիր իմ սերնդի ժառանգության համար: Այո, Տերը հավիտյան ուխտել է այս երկիրն ինձ և իմ զավակներին, և նաև բոլոր նրանց, ովքեր դուրս կառաջնորդվեն ուրիշ երկրներից Տիրոջ ձեռքով:

6 Ուստի, ես՝ Լեքիս, մարգարեանում եմ, համաձայն Հոգու ներգործումների, որն ինձանում է, որ ոչ ոք չի գա այս երկիրը, եթե նա չբերվի Տիրոջ ձեռքով:

7 Ուստի, այս երկիրը նվիրագործված է նրա համար, ում նա կբերի: Եվ եթե լինի այնպես, որ նրանք ծառայեն նրան, ըստ այն պատվիրանների, որոնք նա տվել է, այն կլինի ազատության երկիր նրանց համար. ուստի, նրանք երբեք չեն տարվի գերության. եթե այդպես լինի, դա կլինի անօրինության պատճառով. քանզի եթե անօրինությունը շատանա, երկիրը նրանց համար անիծված կլինի, իսկ արդարների համար այն օրհնված կլինի հավիտյան:

8 Եվ, ահա, դա իմաստություն է, որ այս երկիրը դեռ պետք է պահվի մյուս ազգերի իմացությունից. քանզի ահա, բազմաթիվ ազգեր կհեղեղեին երկիրը, այնպես որ ժառանգության համար տեղ չէր լինի:

9 Ուստի, ես՝ Լեքիս, ձեռք եմ բերել խոստում, որ որքան որ նրանք, ում Տեր Աստված դուրս կբերի Երուսաղեմի հողից, կպահեն նրա պատվիրանները, նրանք կբարգավաճեն այս երկրի երեսին. և նրանք կպահվեն բոլոր մյուս ազգերից, որ կարողանան տիրել այս երկրին՝ իրենց համար: Եվ եթե լինի այնպես, որ նրանք պահեն նրա պատվիրանները, նրանք կօրհնվեն այս երկրի երեսին և չի լինի մեկը, որ նեղություն պատճառի նրանց, ոչ էլ խլի նրանց ժառանգության հողը. և նրանք ապահով կբնակվեն հավիտյան:

10 Բայց ահա, երբ գա ժամանակը, որ նրանք անհավատության մեջ ընկնեն, Տիրոջ ձեռքից այնպիսի մեծ օրհնություններ ստանալուց հետո, գիտելիք ունենալով երկրի և բոլոր մարդկանց ստեղծման մասին, իմանալով Տիրոջ մեծ ու զարմանալի գործերն աշխարհի արարումից ի վեր. իրենց տրված զորություն ունենալով անելու բոլոր բաները հավատքով. սկզբից ի վեր ունենալով բոլոր պատվիրանները և նրա անսահման բարությամբ բերված լինելով այս ընտիր երկիրը խոստումի, ահա, ես ասում եմ, եթե գա այն օրը, որ նրանք մերժեն Սուրբին Իսրայելի՝ ճշմարիտ Մեսիային՝ իրենց Քավչին և իրենց Աստծուն, ահա, դատաստանները նրա, ով արդար է, կհանգչեն նրանց վրա:

11 Այո, նա ուրիշ ազգեր կբերի նրանց մոտ, և զորություն կտա նրանց, և կվերցնի նրանցից իրենց տոհմական հողերը և այնպես կանի, որ նրանք ցրվեն ու զարկվեն:

12 Այո, երբ մի սերունդը փոխվի մյուսով, կլինեն արյունահեղություններ և մեծ այցելություններ նրանց մեջ. ուստի, իմ որդինե՛ր, ես կկամենայի, որ դուք հիշեք. այո՛, ես կկամենայի, որ դուք ականջ դնեք իմ խոսքերին:

13 Ա՜խ, երանի թե դուք արթնանաք. արթնանաք խորը քնից, այո, այսինքն՝ դժոխքի քնից և թոթափեք ահավոր շղթաները, որոնցով դուք կապված եք, որոնք այն շղթաներն են, որ կապում են մարդկանց զավակներին, որպեսզի նրանք տարվեն գերության՝ ներքև, դեպի թշվառության ու վայի հավերժական անդունդը:

14 Զարթնեք և բարձրացեք փոշուց և լսեք խոսքերը դողահար ծնողի, որի ձեռքն ու ոտքը դուք շուտով պետք է սառը և լուռ գերեզմանը դնեք, որտեղից ոչ մի ճամփորդ չի կարող վերադառնալ. ևս մի քանի օր, և ես գնալու եմ երկրի ողջ ճանապարհը:

15 Բայց ահա, Տերը փրկագնել է իմ հոգին դժոխքից, և ես տեսել եմ նրա փառքը և ես հավերժորեն օղակված եմ նրա սիրո բազուկների մեջ:

16 Եվ ես փափագում եմ, որ դուք հիշեք պահել Տիրոջ կանոններն ու դատաստանները. ահա, սա է եղել իմ հոգու անհանգստությունը՝ սկզբից ի վեր:

17 Իմ սիրտը վշտից ծանրացած է եղել, ժամանակ առ ժամանակ, քանզի ես սարսափել եմ, որ չլինի թե ձեր սրտերի կարծրության համար Տերը՝ ձեր Աստվածը, դուրս գա ձեզ վրա իր լիակատար ցասման մեջ, այնպես որ դուք կտրվեք և կործանվեք հավիտյան.

18 Կամ, որ մի անեծք գա ձեզ վրա շատ սերունդների ընթացքում. և ձեզ այցելեն սրով ու սովով, և ատեն և առաջնորդեն համաձայն դևի կամքի ու գերության:

19 Ո՜վ իմ որդիներ, երանի այս բաները չգան ձեզ վրա, այլ որ դուք լինեք Տիրոջ ընտրյալ և արտոնյալ մի ժողովուրդ: Բայց, ահա, թող նրա կամքը կատարվի. քանզի նրա ճանապարհներն արդարություն են հավիտյան:

20 Եվ նա ասել է որ. Որքան որ դուք կպահեք իմ պատվիրանները, դուք կբարգավաճեք երկրի վրա. բայց որքան որ դուք չեք պահի իմ պատվիրանները, դուք կկտրվեք իմ ներկայությունից:

21 Եվ այժմ, որպեսզի իմ հոգին կարողանա ուրախություն ունենալ ձեզանում, և որպեսզի իմ սիրտը կարողանա ուրախությամբ թողնել այս աշխարհը շնորհիվ ձեզ, որպեսզի ես վայր չիջեցվեմ գերեզման կսկիծով ու վշտով, ելեք փոշուց, իմ որդինե՛ր, և տղամարդ եղեք, և եղեք վճռակամ, մտքով մեկ և սրտով մեկ՝ բոլոր բաներում միաբանված, որպեսզի դուք չգնաք ներքև՝ գերության.

22 Որպեսզի դուք չանիծվեք դառն անեծքով. և նաև, որպեսզի դուք ձեզ վրա չհրավիրեք արդար Աստծո դժգոհությունը՝ ի կործանումն, այո, երկուստեք՝ հոգու և մարմնի հավերժական կործանումը:

23 Զարթնեք, իմ որդինե՛ր. հագեք արդարության զենքերը: Թոթափեք շղթաները, որոնցով դուք կապված եք, և դուրս եկեք մթության միջից, և վեր ելեք փոշուց:

24 Այլևս մի ապստամբեք ձեր եղբոր դեմ, որի տեսիլքները փառավոր են, և որը պահել է պատվիրանները՝ այն ժամանակից ի վեր, որ մենք թողեցինք Երուսաղեմը. և որը Աստծո ձեռքում եղել է գործիք՝ բերելով մեզ առաջ, դեպի խոստումի երկիրը. քանզի եթե չլիներ նա, մենք անապատում սովից մեռած կլինեինք. սակայն դուք ջանում էիք խլել նրա կյանքը. այո, և նա շատ վիշտ տարավ ձեր պատճառով:

25 Եվ ես չափազանց վախենում և դողդողում եմ ձեզ համար, որ չլինի թե նա նորից տառապի. քանզի, ահա, դուք մեղադրում եք նրան, որ նա ձեզ վրա իշխանություն և իրավունք է փնտրում. բայց ես գիտեմ, որ նա չի փնտրել ո՛չ իշխանություն, ո՛չ էլ իրավունք ձեզ վրա, այլ փնտրել է Աստծո փառքը և ձեր սեփական հավերժական բարօրությունը:

26 Եվ դուք տրտնջացել եք, որովհետև նա շիտակ է եղել ձեր հանդեպ: Դուք ասում եք, որ նա խստություն է գործադրել. դուք ասում եք, որ նա բարկացել է ձեզ վրա. բայց ահա, նրա խստությունը Աստծո խոսքի զորության խստությունն էր, որը նրա մեջ էր. և այն, ինչը դուք կոչում եք բարկություն, ճշմարտությունն էր, համաձայն նրա, ինչը Աստծո մեջ է, որը նա չէր կարող զսպել՝ համարձակորեն բացահայտելով ձեր անօրինությունները:

27 Եվ դա անպայման պետք է լինի, որպեսզի Աստծո զորությունը լինի նրա հետ, մինչև իսկ պատվիրելու ձեզ, որպեսզի դուք հնազանդվեք: Բայց ահա, այդ նա չէր, այլ Տիրոջ Հոգին էր, որը նրա մեջ էր, որը բացեց նրա բերանը խոսելու համար, որ նա չկարողացավ փակել այն:

28 Եվ այժմ, որդի՛ս, Լաման, և նաև Լեմուել ու Սամ, և նաև իմ որդինե՛ր, որ Իսմայելի որդիներն եք, ահա, եթե դուք ականջ դնեք Նեփիի ձայնին, դուք չեք կորչի: Եվ եթե դուք կամենաք ականջ դնել նրան, ես ձեզ թողնում եմ օրհնություն, այո, նույնիսկ իմ առաջին օրհնությունը:

29 Բայց, եթե դուք չկամենաք ականջ դնել նրան, ես վերցնում եմ իմ առաջին օրհնությունը, այո, այսինքն՝ իմ օրհնությունը, և այն կհանգչի նրա վրա:

30 Եվ այժմ, Զորա՛մ, ես խոսում եմ քեզ հետ: Ահա, դու Լաբանի ծառան ես. սակայն դու դուրս ես բերվել Երուսաղեմի հողից, և ես գիտեմ, որ դու ճշմարիտ ընկեր ես՝ իմ որդի Նեփիի համար հավիտյան:

31 Ուստի, քանի որ դու հավատարիմ ես եղել, քո սերունդը կօրհնվի նրա սերնդի հետ, որ նրանք երկար բնակվեն այս երկրի երեսին բարեկեցության մեջ. և ոչինչ, բացի անօրինությունից նրանց մեջ, չի վնասի, կամ խանգարի նրանց բարեկեցությանը, այս երկրի երեսին, հավիտյան:

32 Ուստի, եթե դու պահես Տիրոջ պատվիրանները, Տերը նվիրագործել է այս երկիրը, քո սերնդի ապահովության համար, իմ որդու սերնդի հետ: