Tsir 13
Wɔbɔtwe Judah na Jerusalem hɔn aso wɔ hɔn asokyew ho—Ewuradze serɛ ma na obu No nkorɔfo atsɛn—Wɔadom Zion mbabaa wɔ hɔn ahopɛ ho—Fa to Isaiah 3 ho. Bɛyɛ mfe 559–545 Ansaana wɔbɔwo Christ.
1 Na hwɛ, Ewuradze, dɔm Ewuradze, otutu petua ɔnye dua fi Jerusalem na Judah, edziban petua nyina, na nsu petua nyina.
2 Ɔkatakyi, na ɔsabarimba; ɔtsɛmbuafo, na ɔkɔnhyɛnyi, ɔdzeyifo, na tsetsenyi;
3 Eduonum do safohen na onyimdzefo, na ɔpamfo, na edwindzi mu onyifirfo, na ɔdzeafo a adzea abra no.
4 Na mebɛma mbofraba ayɛ hɔn asafohemfo, na mbɔtoaba edzi hɔn do mpanyin.
5 Na nkorɔfo bɛhaw hɔnho, oyi na oyi, na obi na ne nyɛnko; akɔkowaba bɛhyehyɛ noho wɔ akɔdaa do, na atsetsekwaa so wɔ onyimnyamfo do.
6 Sɛ obi suo no nua a ɔwɔ n’egya fie mu na ɔse dɛ: Ɔwo ewɔ atar, bedzi hɛn ɔhwɛdofo, na mma odwuruw yi mmba w’abaw do—
7 Da no mu na ɔbɛma ne ndze do, dɛ: Merennyɛ ɔyarsafo; na edziban anaa atar bi nnyi me fie; mma hom nnyɛ me ɔmanpanyin.
8 Na Jerusalem edwuruw, na Judah ahwe ase, osiandɛ hɔn ngyirama na hɔn nyɛe tsia Ewuradze dɛ wɔdze riyi n’enyimnyam ehi.
9 Hɔn enyimsu dzi dase tsia hɔn; na wɔkã hɔn bɔn dɛ Sodomfo, wɔmmfa nnsuma. Hɔn kra ndue! na wɔdze hɔn bɔn etua hɔnho kaw.
10 Hom nka wɔ ɔtseneneenyi ho dɛ obesi no yie; na wobedzi hɔn ndɔdze.
11 Omumuyɛnyi ndue! obowie no mbusu; na ne nsaano akatua na wɔdze bɛma no.
12 Me man dze, mbofra nye hɔn ahyɛdofo, na mbaa dzi hɔn do panyin. O me man, hɔn a wogya wo kwan dze wo fom, na wɔsɛɛ w’akwan.
13 Ewuradze egyina reserɛ, na oegyina rubu aman atsɛn.
14 Ewuradze nye me man mu mpanyimfo na no mu asafohemfo bɔkɔ asɛndzii: Homara na hom edzi wenyin ture no; ehiafo asadze wɔ hom efiefi mu.
15 Ase nye dɛn na hom dwerew me man, na hom hyɛ ehiafo amen, Dɔm Ewuradze Nyankopɔn na ɔse.
16 Ewuradze see bio dɛ, Osiandɛ Zion mbabaa yɛ ahopɔw, na wɔtoto hɔn kɔn na wɔdedadeda hɔn eyi ekyir, na wɔnam dedadeda ma hɔn nansa nkaba gyegye—
17 Dɛm ntsi Ewuradze bɛma satwem egu Zion mbabaa etsifi, na Ewuradze bɛda hɔn adagyaw edzi.
18 Da no na Ewuradze beyi hɔn anantuadze fɛɛfɛw no, na itsiratena na adze korkorba dɛ bosoom;
19 Asowamuadze na nsakɔnadze, nkataenyim;
20 Abɔtsir, na anandze ntweaban, na abɔtsir, na nduhuam mpakyiwa, na asowamuadze;
21 Mpɛtsea, na hwenmuadze;
22 Afahyɛ ntar, na egudo, na nkatakɔnmu, na mbɔtowa;
23 Nhwehwɛmba, na ndwera pa, akyekyetsir na nkataenyim.
24 Na ɔbɛba dɛ, bɔnee bɛhyɛ huam ananmu; na atar gow ahyɛ abɔdo ananmu; na etsipaa ahyɛ takuwa a woesi no yie ananmu; na eyitam abɔdo ahyɛ abɔyamu ananmu; ɔhyewtua ahyɛ ahoɔfɛw ananmu.
25 Wo mbarimba bɔtotɔ afowa ano, na w’akatakyi atotɔ ɔsa mu.
26 Na n’aponkɛse botwa ewuo na oegyam; na ɔbɛda hɔ pan na ɔatsena famu.