1 Ut anajwan, at Jakob, nakatwaatina: Laa’at li xb’een yo’lajenaq chiwu sa’ xkutankil li rahilal xinnumsi sa’ li yamyookil ch’och’. Ut k’e reetal, sa’ aaka’ch’inal kanumsi li ch’a’ajkilal ut naab’al li rahil ch’oolejil, sa’ xk’ab’a’ lix yib’aleb’ ru laa was.

2 A’b’anan at Jakob, xb’een yo’lajenaq chiwu sa’ li yamyookil ch’och’, laa’at nakanaw ru lix nimal ru li Dios, ut a’an taarosob’tesi laa ch’a’ajkilal choq’ re laa chaab’ilal.

3 Jo’kan naq taa’osob’tesiiq laa waam, ut laa’at tatwanq sa’ xyaalalil aawochb’een laj Nefi, laa was; ut taanumsiiq laa kutan rik’in k’anjelak chiru laa Dios. Jo’kan ut, ninnaw naq tojb’il aawix, sa’ xk’ab’a’ lix tiikilal xch’ool laj Tojol aawix; xb’aan naq xak’e reetal naq sa’ xtz’aqalil ru li kutan a’an taachalq re xk’amb’al li kolb’a-ib’ reheb’ li winq.

4 Ut sa’ laa ch’ajomil xak’e reetal lix loq’alil; jo’kan ut, osob’tesinb’ilat jo’ chanru ajwi’ li ani chi aj-u taak’anjelaq a’an sa’ li tz’ejwalej; xb’aan naq li Musiq’ej juntaq’eet ewer, anajwan, ut chi junelik. Ut kawresinb’il li b’e chalen chaq xt’anik li winq, ut li kolb’a-ib’ yal siib’il.

5 Ut eb’ li winq k’eeb’ileb’ tz’aqal xna’leb’eb’ re te’xnaw b’ar wan li us ut li ink’a’ us. Ut li chaq’rab’ k’eeb’il reheb’ li winq. Ut rik’in li chaq’rab’ maajun tz’ejwalej natiikob’resiik ru; malaj rik’in li chaq’rab’ isinb’ileb’ chaq li winq. Relik chi yaal, rik’in li chaq’rab’ re li yu’am a’in ke’isiik chaq; ut jo’kan ajwi’, rik’in li chaq’rab’ re musiq’ej neke’oso’ chirix li k’a’ru chaab’il, ut neke’numta xrahileb’ xch’ool chi junelik.

6 Jo’kan ut, li tojb’al-ix nachal rik’in, ut sa’ xk’ab’a’ li Santil Mesias; xb’aan naq a’an nujenaq chi usilal ut chi yaal.

7 K’e reetal, a’an naxq’axtesi rib’ jo’ mayej choq’ re li maak, re xsumenkil ru li rajom li chaq’rab’, choq’ reheb’ chixjunil li yot’b’ileb’ xch’ool ut tuulaneb’ xmusiq’; ut maa’ani chik chi aj-ix taaruuq chi sumeek ru li rajom li chaq’rab’.

8 Jo’kan ut, k’a’jo’ xnimal ru xk’eeb’al chi nawmank li k’a’aq re ru a’in reheb’ li wankeb’ sa’ li ruchich’och’, re te’ruuq chixnawb’al naq maajun tz’ejwalej wan li taaruuq chi wank chiru li Dios, ka’ajwi’ sa’ xk’ab’a’ lix k’ulub’ejil, ut li ruxtaan, ut li rusilal li Santil Mesias, li naxq’axtesi lix yu’am jo’ chanru li tz’ejwalej, ut naxk’ul wi’chik rik’in lix wankil li Musiq’ej, re taaruuq tixk’e chi uxmank lix waklijikeb’ li kamenaq chi yo’yo, rik’in naq a’an ajwi’ li xb’een li taawakliiq.

9 Jo’kan naq a’an li xb’een uuchininb’il choq’ re li Dios, rik’in naq a’an taab’aanunq ruuchileb’ chixjunil li ralal xk’ajoleb’ li winq; ut eb’ li te’paab’anq re te’kole’q.

10 Ut sa’ xk’ab’a’ naq b’aanunb’il ruuchileb’ chixjunil, neke’chal chixjunil li winq rik’in li Dios; jo’kan ut, neke’xaqli chiru a’an, re taaraqe’q aatin chirixeb’ xb’aan a’an jo’ chanru li yaal ut li santilal li wan rik’in. Jo’kan ut, li rajom li chaq’rab’ li kixk’e li Santil Dios, re taak’eemanq li tojb’a-maak li xaqab’anb’il, ut a’ tojb’a-maak a’an li xaqab’anb’il, wan chixjunpak’alil li sahil ch’oolejil li xaqab’anb’il, re xsumenkil ru li rajom lix tojb’al rix li maak—

11 Xb’aan naq tento taa’uxq naq taawanq chixka’pak’alil chixjunil li k’a’aq re ru. Wi ta ink’a’ jo’kan, at xb’een yo’lajenaq chiwu sa’ li yamyookil ch’och’, ink’a’ raj taaruuq taak’ehe’q chi uxmank li tiikilal, chi moko li maa’usilal, chi moko li santilal chi moko li rahilal, chi moko li us chi moko li ink’a’ us. Jo’kan ut, chixjunil li k’a’aq re ru tento raj taawanq chi junajinb’il sa’ jun; jo’kan ut, wi ta junaj chi tz’ejwalej, tento raj taakanaaq chanchan naq kamenaq, moko taawanq ta raj xyu’am chi moko xkamik, chi moko li q’aak chi moko li ink’a’ naq’a, li sahil ch’oolejil chi moko li rahilal, chi moko li na’eek’aman chi moko li ink’a’ na’eek’aman.

12 Jo’kan naq tento raj naq kiyo’ob’tesiman raj chi yal jo’maajo’; jo’kan naq maak’a’ raj rajb’al lix yaalalil lix yo’ob’tesinkil. Jo’kan naq li na’leb’ a’in tento raj tixsach lix chaab’ilal xna’leb’ li Dios ut li rajom re junelik, ut jo’kan ajwi’ lix wankilal, ut li ruxtaan, ut lix tiik ruhil na’leb’ li Dios.

13 Ut wi teeye naq maak’a’ li chaq’rab’, teeye ajwi’ naq maak’a’ li maak. Wi teeye naq maak’a’ li maak, teeye ajwi’ naq maak’a’ li tiikilal. Ut wi maak’a’ li tiikilal, maak’a’ li sahil ch’oolejil. Ut wi maak’a’ li tiikilal chi moko li sahil ch’oolejil maak’a’ li tojb’a-maak ut li rahilal. Ut wi maak’a’ li k’a’aq re ru a’in, maak’a’ li Dios. Ut wi maak’a’ li Dios, maak’a’o laa’o, chi moko li ruchich’och’, xb’aan naq ink’a’ raj kiru chi wank xyo’ob’tesinkil li k’a’aq re ru, re taak’anjelaq, chi moko re k’anjelanb’ilaq; jo’kan naq chixjunil li k’a’aq re ru tento raj taa’oso’q.

14 Ut anajwan, ex walal, ninye eere li na’leb’ a’in choq’ re eechaab’ilob’resinkil ut eetzolb’al; xb’aan naq wan jun li Dios, ut a’an xyo’ob’tesink re chixjunil li k’a’aq re ru, li choxa jo’ ajwi’ li ch’och’, ut chixjunil li k’a’aq re ru wankeb’ chi sa’, li k’a’ru nak’anjelak jo’ ajwi’ li k’a’ru k’anjelanb’il.

15 Ut re taa’uxmanq li rajom re junelik choq’ re li winq, chirix naq kixyo’ob’tesi li xb’een qana’ qayuwa’, ut lix xulel li ch’och’ ut li xik’anel xul rub’el choxa, ut chixjunil b’i’ li k’a’aq re ru yo’ob’tesinb’il, ki’aje’ naq kiwan k’a’ruhaq chi junpak’al chik; wan li ru che’ xyehe’ naq ink’a’ taak’uxmanq, chixjunpak’alil li che’ re li yu’am; li jun ki’ ut li jun chik k’a.

16 Jo’kan ut, li Qaawa’ Dios kixk’e re li winq re tixb’aanu xjunes rib’ li naraj. Jo’kan ut, li winq ink’a’ raj taaruuq chixb’aanunkil xjunes li naraj wi ta ink’a’ taaq’unb’esiiq xch’ool chi junpak’al, malaj chi junpak’al chik.

17 Ut laa’in, aj Lehi, jo’ chanru li k’a’aq re ru wilom chi tz’iib’anb’il, tento tink’oxla naq jun lix anjel li Dios, jo’ chanru li k’a’ru tz’iib’anb’il, kit’ane’ chaq sa’ choxa; jo’kan naq a’an ki’ok choq’ aj tza, rik’in naq kixsik’ li k’a’ru ink’a’ us chaq chiru li Dios.

18 Ut xb’aan naq kit’ane’ chaq sa’ choxa, ut kiwan chi junelik sa’ rahilal, a’an kixsik’ ajwi’ lix rahilaleb’ chixjunil li winq. Jo’kan naq kixye re lix Eva, relik chi yaal, li najter aj k’anti’ a’an, a’an laj tza, a’an lix yuwa’il chixjunil li tik’ti’, jo’kan naq kixye: Chayal li ru che’ xyehe’ naq ink’a’ taak’uxmanq, ut ink’a’ texkamq, texwanq b’an chanchan li Dios, teenaw ru li us ut li ink’a’ us.

19 Ut chirix naq laj Adan ut lix Eva ke’xyal li ru che’ li xyehe’ naq ink’a’ taak’uxmanq ke’alinasiik chaq sa’ li awimq Eden, re te’xk’anjela li ch’och’.

20 Ut ke’ralaheb’ li kok’al; relik chi yaal, lix junkab’alil chixjunil li ruchich’och’.

21 Ut ke’najtob’resiik ru lix kutaneb’ li ralal xk’ajoleb’ li winq, jo’ chanru li rajom li Dios, re naq te’ruuq chixjalb’al xk’a’uxl naq wankeb’ sa’ li tz’ejwalej; jo’kan naq lix wanjikeb’ ki’ok choq’ jun xyalb’aleb’ rix, ut kinajtob’resiik ru lix kutan, jo’ chanru eb’ li taqlahom kixk’e li Qaawa’ Dios reheb’ li ralal xk’ajoleb’ li winq. Xb’aan naq kixk’e xtaqlahom naq chixjunileb’ li winq tento te’xjal xk’a’uxl, xb’aan naq kixk’ut chiru chixjunileb’ li winq naq sachenaqeb’, sa’ xk’ab’a’ li q’etok aatin ke’xb’aanu lix na’ xyuwa’.

22 Ut anajwan, k’ehomaq reetal, wi ta ink’a’ kiq’etok aatin laj Adan, ink’a’ raj kit’ane’; kikana raj b’an sa’ li awimq Eden. Ut chixjunil li k’a’aq re ru yo’ob’tesinb’il kikana raj jo’ chanru naq kiyo’ob’tesiik; ut kikana raj chi junelik, ut maak’a’aq raj roso’jik.

23 Ut maak’a’aqeb’ raj xkok’al; jo’kan naq ke’kana raj chi maak’a’ neke’xnaw, ink’a’ raj ke’wan xsahileb’ xch’ool, xb’aan naq ink’a’ raj ke’xnaw ru li rahilal; maajun chaab’ilal raj ke’xb’aanu, xb’aan naq ink’a’ raj ke’xnaw ru li maak.

24 A’b’anan k’ehomaq reetal, xb’aanuman chixjunil li k’a’aq re ru sa’ lix chaab’ilal xna’leb’ li nanawok re chixjunil li k’a’aq re ru.

25 Laj Adan kit’ane’ re naq te’wanq li winq; ut neke’wan li winq re naq te’wanq xsahileb’ xch’ool.

26 Ut taachalq li Mesias sa’ xtz’aqalil ru li kutan, re taaruuq tixtojeb’ rix li ralal xk’ajoleb’ li winq chiru li t’ane’k. Ut rik’in naq tojb’ileb’ rix chiru li t’ane’k, ke’kana chi ach’ab’anb’il chi junelik, ut neke’xnaw b’ar wan li us ut li ink’a’ us, re te’k’anjelaq xjuneseb’ ut moko k’anjelanb’ilaqeb’ ta, ka’ajwi’ xb’aan li tojb’a-maak tixk’e li chaq’rab’ sa’ li xnimal ru ut roso’jikil kutan, jo’ chanruheb’ li taqlahom li kixk’e chaq li Dios.

27 Jo’kan ut, eb’ li winq ach’ab’anb’ileb’ jo’ chanru li tz’ejwalej; ut k’eeb’il reheb’ chixjunil li k’a’aq re ru li aajel ru choq’ re li winq. Ut kanab’anb’ileb’ chixsik’b’al ru li ach’ab’aak ut li junelik yu’am, sa’ xk’ab’a’ li nimla aj b’aanuhom ruuchileb’ chixjunil li winq, malaj re te’xsik’ ru li preexil ut li kamk, jo’ chanru lix preexil ut xwankilal laj tza; xb’aan naq a’an naxsik’ naq chixjunileb’ li winq te’wanq sa’ rahilal jo’ chanru ajwi’ a’an.

28 Ut anajwan, ex walal, nawaj naq tex’iloq wan wi’ li nimla aj B’aanunel uuchil, ut tex’ab’inq chiru lix ninqal ru taqlahom; ut tiikaqex chixpaab’ankil li raatin, ut teesik’ ru li junelik yu’am, jo’ chanru naraj lix Loq’laj Musiq’;

29 Ut ink’a’ teesik’ ru li kamk chi junelik, jo’ chanru li naraj li tz’ejwalej ut li ink’a’ us li wan chi sa’, li naxk’e xwankil lix musiq’ laj tza chi k’amok chi preexil, re eekub’sinkil sa’ xb’alb’a, re naq a’an taaruuq chi awa’b’ejink sa’ eeb’een sa’ tz’aqal li rawa’b’ejihom.

30 Kinye xka’ch’inal li aatin a’in eere chejunilex, ex walal, sa’ roso’jik lix kutankil lix yalb’al wix; ut laa’in kinsik’ ru li jun raqal chaab’il, jo’ chanru li raatin li profeet. Ut maajun chik wajom wan, ka’ajwi’ xchaab’ilal lee raam li maajo’q’e taa’oso’q. Amen.