Lix Hu Laj Enos

1 K’ehomaq reetal, kik’ulman naq laa’in, aj Enos, rik’in xnawb’al ru inyuwa’ naq a’an jun tiikil winq—xb’aan naq kinixtzol sa’ li raatinob’aal, ut jo’kan ajwi’ sa’ lix ch’olanihom ut lix tijom li Qaawa’—ut osob’tesinb’ilaq taxaq xk’ab’a’ lin Dios xb’aan a’in—

2 Ut tinye eere resil li yalok-u kinwan wi’ chiru li Dios, junxilaj naq kink’ul risinkil inmaak.

3 K’ehomaq reetal, xkohin chixyoob’aleb’ li xul sa’eb’ li k’iche’; ut li aatin li kok’ aj xsa’ kiwab’i chaq chixyeeb’al inyuwa’ chirix li junelik yu’am, ut lix sahileb’ xch’ool laj santil paab’anel, ki’ok sa’ xchamal inch’ool.

4 Ut kitz’okaak li waam; ut kinwiq’la chiru laj yiib’ahom we, ut kin’elajin chiru rik’in tijok ut tz’aamank rik’in nimla metz’ew choq’ re li waam laa’in; ut chiru chixjunil li kutan kin’elajin chiru; relik chi yaal, ut naq ki’ok q’ojyin toj kintaqsi xyaab’ inkux taqe’q, re naq toj sa’ choxa kiwulak.

5 Ut kichal jun xyaab’ kuxej wik’in, kixye: At Enos, kuyb’il aamaak, ut laa’at tat-osob’tesiiq.

6 Ut laa’in, aj Enos, kinnaw naq li Dios ink’a’ kiru chi tik’ti’ik; jo’kan naq oso’jenaq li maak sa’ inb’een.

7 Ut laa’in kinye: At Qaawa’, chan ru nab’aanuman?

8 Ut a’an kixye we: Sa’ xk’ab’a’ laa paab’aal chirix li Kristo, li maajun wa aawab’ihom chi moko aawilom. Ut toj taanume’q k’iila chihab’ rub’elaj naq tixk’utb’esi rib’ sa’ li tz’ejwalej; jo’kan ut, ayu, laa paab’aal xk’irtesink aawe.

9 Anajwan, kik’ulman naq chirix naq kiwab’i li aatin a’in kin’ok chireek’ankil watawom choq’ re lix chaab’ilaleb’ li was wiitz’in aj Nefita; jo’kan naq kinhoy x’anchalil li waam chiru li Dios choq’ reheb’.

10 Ut naq yookin chixyalb’al inmetz’ew chi jo’kan sa’ li musiq’ej, k’ehomaq reetal, kichal wi’chik sa’ ink’a’uxl lix yaab’ xkux li Qaawa’, ut kixye: Laa’in tinwula’aniheb’ laa was aawiitz’in a’ yaal jo’ chanru naq yalb’ileb’ xq’e sa’ xpaab’ankileb’ lin taqlahom. Kink’e reheb’ li ch’och’ a’in, ut a’an santil ch’och’; ut moko ninmajewa ta, ka’ajwi’ xb’aan maa’usilal; jo’kan naq tinwula’aniheb’ laa was aawiitz’in jo’ chanru kinye; ut li q’etok aatin reheb’ tink’am rik’in rahil ch’oolejil sa’ xb’een lix jolomeb’ a’an.

11 Ut chirix naq laa’in, aj Enos, kiwab’i li aatin a’in, lin paab’aal ki’ok chi wank chi ink’a’ na’eek’an chirix li Qaawa’, ut najt kintijok chiru rik’in k’iila yalok metz’ew chirixeb’ li was wiitz’in aj Lamanita.

12 Ut kik’ulman naq chirix naq kintijok ut kink’anjelak chi yalb’il anchal inq’e, li Qaawa’ kixye we: Laa’in tink’e aawe jo’ chanru aawajom, sa’ xk’ab’a’ laa paab’aal.

13 Anajwan ut k’ehomaq reetal, a’in li atawom li kiwaj wi’ rik’in—naq wi taa’uxq naq eb’ lin tenamit aj Nefita te’t’ane’q sa’ li q’etok aatin, ut te’sache’q chi yalaq chan ru, ut eb’ laj Lamanita ink’a’ te’sache’q, naq li Qaawa’ Dios tixk’uula jun tz’iib’anb’il esil re lin tenamit, a’eb’ laj Nefita; us ta taa’uxmanq rik’in xwankil lix santil tel, re naq taaruuq taak’ehe’q chi k’utmank sa’ junaq kutan chalel chiruheb’ laj Lamanita, re naq maare taaruuq te’k’ame’q sa’ li kolb’a-ib’—

14 Xb’aan naq sa’ li kutan a’in maak’a’ x’ok wi’ li yalok metz’ew kiqab’aanu re xk’ojob’ankileb’ wi’chik sa’ li tz’aqal paab’aal. Ut eb’ a’an ke’xxaqab’ aatin sa’ xjosq’ileb’ naq wi ta taaruuq, te’xsach raj eb’ li qatz’iib’anb’il esil qochb’een laa’o, ut jo’kan ajwi’ chixjunil li na’leb’ kanab’anb’il chaq xb’aaneb’ li qayuwa’.

15 Jo’kan naq laa’in, rik’in xnawb’al naq li Qaawa’ Dios naru chixk’uulankileb’ li qatz’iib’anb’il esil, ink’a’ kinkanab’ elajink chiru, xb’aan naq a’an kixye chaq we: Yalaq k’a’ re ru taapatz’ rik’in paab’aal, rik’in xpaab’ankil naq tatk’uluq sa’ lix k’ab’a’ li Kristo, a’an taak’ul.

16 Ut laa’in kiwan inpaab’aal, ut kin’elajin chiru li Dios naq tixk’uulaheb’ li tz’iib’anb’il esil; ut a’an ki’ok sa’ sumwank wik’in naq tixk’e chi k’ute’k chiruheb’ laj Lamanita sa’ li kutan k’oxlanb’il xb’aan.

17 Ut laa’in, aj Enos, kinnaw naq taawanq jo’ chanru li sumwank li kixk’uub’ chaq, jo’kan naq kihilan li waam.

18 Ut li Qaawa’ kixye we: Eb’ laa yuwa’ ke’xtz’aama ajwi’ li na’leb’ a’in chiwu; ut taab’aanumanq reheb’ jo’ chanru lix paab’aaleb; xb’aan naq lix paab’aaleb’ a’an chanchan ajwi’ chaq laa we.

19 Ut anajwan kik’ulman naq laa’in, aj Enos, xkohin sa’ xyanqeb’ lix tenamit laj Nefi, ut kin’aatinak jo’ profeet chirix li k’a’aq re ru taachalq, ut kinch’olob’ xyaalal li k’a’aq re ru wab’ihom ut wilom chaq.

20 Ut ninch’olob’ xyaalal naq lix tenamit laj Nefi yalb’ileb’ xq’e naq ke’xsik’ xk’ojob’ankileb’ wi’chik laj Lamanita sa’ li tz’aqal paab’aal re li Dios. A’b’anan maak’a’ ki’ok wi’ li qak’anjel; xaqxo lix kaqaleb’, ut k’amb’ileb’ xb’e xb’aan li maa’usilal li ak reheb’, jo’kan naq a’aneb’ jun tenamit xulo’jenaq, josq’eb’, ut aj rahom kik’, nujenaqeb’ rik’in loq’onink pak’b’il dios ut tz’ajnil; neke’xtzeka li xul aj yo; neke’wan rochoch sa’ muheb’aal t’ikr, ut neke’b’eek yalaq b’ar sa’ li yamyookil ch’och’ chi lanb’il xyiitoqeb’ rik’in jun aq’ej tz’um ka’ch’in roq ut chi b’esb’il xjolomeb’; ut lix seeb’aleb’ rik’in li tzimaj kiwan, ut rik’in li k’onk’ookil ch’iich’, ut li maal. Ut naab’aleb’ a’an maak’a’ chik neke’xk’ux, ka’ajwi’ li rax tib’; ut rajlal ke’xsik’ qasachb’al.

21 Ut kik’ulman naq eb’ lix tenamit laj Nefi ke’xk’anjela li ch’och’, ut ke’xk’iresi li k’iila paay chi iyaj nak’uxman, ut ru che’, ut li teep chi ketomq, ut xteepal li k’iila paay chi wakax, li jar raqal wan, ut li chib’aat, ut li yuk k’iche’, ut jo’kan ajwi’ k’iila kawaay.

22 Ut q’axal k’iheb’ li profeet ke’wan sa’ qayanq. Ut eb’ li tenamit a’aneb’ jun tenamit jipeb’ xk’a’uxl, ch’a’ajeb’ chi tawok xyaalal.

23 Ut maak’a’ kiwan, ka’ajwi’ li aatin q’axal kaw, rik’in jultikank aatin ut aatinak jo’ profeet chirix li pleet, ut li wech’ok-ib’, ut li sachok, ut junelik xjultikankil reheb’ li kamk, ut xnajtil ru li junelik q’e kutan, ut lix raqb’a-aatin ut lix wankilal li Dios, ut chixjunil li k’a’aq re ru a’in—rik’in reek’asinkileb’ xch’ool rajlal chixxuwankil ru li Dios. Ninye naq maak’a’ kiwan, ka’ajwi’ li k’a’aq re ru a’in, ut li aatinak chi q’axal saqen ru, li kiramokeb’ ru re ink’a’ sa’ junpaat te’kub’eeq sa’ li sache’k. Ut jo’ka’in naq nintz’iib’ak chirixeb’.

24 Ut kiwileb’ li pleet ke’wan wi’ laj Nefita rik’ineb’ laj Lamanita chiru xb’ehil lin kutan.

25 Ut kik’ulman naq kin’ok chi tixk, ut ak numenaq jun cient rik’in b’elelaju xkaak’al chihab’ relik chaq Jerusalen li qayuwa’ aj Lehi.

26 Ut kiwil naq sa’ junpaat tento tinkub’eeq sa’ lin muqleb’aal, chi ak eek’asinb’ilin chaq xb’aan lix wankilal li Dios naq tento tinjultikanq ut tin’aatinaq jo’ profeet chiru li tenamit a’in, ut tinch’olob’ li aatin jo’ chanru li yaal li wan rik’in li Kristo. Ut kinch’olob’ a’an chiru chixjunil lin kutan, ut kisaho’ wi’chik inch’ool rik’in a’an chiru li k’a’ru re li ruchich’och’.

27 Ut chi seeb’ tinxik sa’ xna’aj lin hilob’aal, a’an rik’in laj Tojol wix; xb’aan naq ninnaw naq rik’in a’an tinhilanq. Ut nasaho’ inch’ool rik’inaq li kutan naq li k’a’ru we li nakam tixk’e chirix li ink’a’ nakam, ut taaxaqliiq chiru a’an; toja’ naq tinwil li rilob’aal rik’in sahil ch’oolejil, ut a’an tixye we: Kim wik’in, at osob’tesinb’il, wan jun li na’ajej kawresinb’il choq’ aawe sa’eb’ li rochoch lin Yuwa’. Amen.