En wehwehiong wehi koaros, keinek koaros, lokaia koaros, oh aramas koaros, ong me doadoahk wet pahn lellohng: Me sang ni kalahngan en Koht Sahmo, oh atail Kaun Sises Krais, se kilangehr pileit kan me audaudiki poadoapoad wet, me wia poadoapoad en aramas en Nihpai, oh pil Mehn Leimen kan, riarail kan, oh pil aramas en Sared kan, me kohdo sang ni douliko me koasoiepe wiawiher. Oh se pil ese me e kawehwehdahr sang ni kisakis oh manaman en Koht, pwe pein kepitie me mahsanihong kiht; eri se ese ni mehlel me doadoahko mehlel. Oh se pil kadehdehki me se kilangehr nting kan me mih pohn pileit kan; oh e kasansalohng kiht sang ni manaman en Koht, oh kaidehn aramas. Oh se kalohngki sang ni koasoi mehlel, me tohnleng en Koht patohdihdo sang nanleng, oh e patohwando oh pwilikihdi mwohn mesat kat, kahrehda se kilang oh kadehde pileit kan, oh nting kan powe; oh se ese me iei sang ni kalahngan en Koht Sahmo, oh atail Kaun Sises Krais, me se kilangki oh kadehdehki me mepwukat mehlel. Oh e wia mehkot kapwuriamwei nan masat. Ahpw, kepitien Kauno mahsanihong kiht me sen kadehdehki; eri, pwe sen peikiong sapwellimen Koht kosonned akan, se kadehdehki mepwukat. Oh se ese me ma se pahn loaloapwoatehng Krais, se pahn kamwakelsang ntahn aramas koaros pohn aht likou kan, oh dierek mwakelekel mwohn mwoalen kopwung en Krais, oh pahn mihmihla reh nanleng kohkohlahte. Oh wahu koaros ong Sahmo, oh Sapwellime Iehros, oh Ngehn Sarawi, me iei Kohtehmen. Ahmen.