Jekjōn 35
Revelesōn leļo̧k leļo̧k n̄an Josep Smith Rikanaan eo im Sidney Rigdon, ilo ak epaake Fayette, New York, Tijem̧ba 7, 1830. Ilo iien in, Rikanaan eo eaar poub enan̄in aolep raan ilo kōm̧m̧ane ukok eo an Baibōļ eo. Ukok in eaar ijjino itum̧aan in ļo̧k Juun 1830, im Oliver Cowdery im Jon Whitmer rekar jerbal āinwōt rijeje jim̧or. Kōnke kiiō kar kūr er n̄an bar jet jerbal, Sidney Rigdon kar kūri jān karōk an lan̄ n̄an jerbal āinwōt rijeje an Rikanaan eo ilo jerbal in (lale eon 20). Āinwōt juon ennaan im̧aan ļo̧o̧k eo an revelesōn in, bwebwenato an Josep Smith ej kwaļo̧k: “Ilo Tijem̧ba Sidney Rigdon eaar itok [jān Ohio] n̄an kajjitōk ippān Irooj, im ippāntok ekar itok Edward Partridge. … Ejjab etto ālikin tōpraktok eo an rein ruo jeiū im jatū, āindein Irooj Eaar ekkōnono.”
1–2, Ekōjkan an em̧m̧aan maron̄ erom m̧aan ro nejin Anij; 3–7, Sidney Rigdon kar kūri n̄an peptaiji im leļo̧k Jetōb Kwōjarjar; 8–12, Kakōļļe ko im mennin bwilōn̄ ko rej jerbali jān tōmak; 13–16, Ro karejeran Irooj renaaj kōjenolo̧k laļ ko jān kajoor eo an Jetōb; 17–19, Josep Smith ej kabwijer ki ko an mennin ittino ko; 20–21, Ro rikāālet renaaj mour ilo raan in itok eo an Irooj; 22–27, Israel naaj lo̧mo̧o̧ren.
1 Ron̄jake ainikien Irooj am Anij, em̧ool Alpa im Omega, jinoin im jem̧ļo̧kin, eo iaļ eo An ejjeļo̧k jem̧ļo̧kin, eo ejja juon wōt rainin āinwōt inne, im indeeo.
2 N̄a Jisōs Kraist, eo Nejin Anij, eo eaar debwāāl kōn jero̧wiwi ko an laļ, em̧ool jon̄an wōt eo enaaj tōmak ioon Eta, bwe ren maron̄ erom m̧aan ro nejin Anij, em̧ool juon ilo N̄a āinwōt N̄aij juon ilo Jemān, āinwōt Jemān ej juon ilo N̄a, bwe jen maron̄ juon.
3 Lo, em̧ool, em̧ool, Ij ba n̄an rikarejera Sidney, Iaar kalimjek eok im jerbal ko am. Iaar ron̄ jar ko am, im kar kōpooj eok n̄an juon jerbal eļapļo̧k.
4 Kwo jeraam̧m̧an, bwe kwo naaj kōm̧m̧ani men ko reļļap. Lo kwe em̧ōj kar jilkinļo̧k eok, em̧ool āinwōt Jon, n̄an kōpooj iaļ eo Im̧aō, im im̧aan Ilaija eo eaikuj itok, im kwaar jab jeļā men in.
5 Kwaar peptaij kōn dān n̄an ukeļo̧k, ak rekar jab bōk Jetōb Kwōjarjar;
6 Ak kiiō Ij lewōj n̄an eok juon kien, bwe kwōn peptaij kōn dān, im renaaj bōk Jetōb Kwōjarjar jān likūt pā ko ioon, em̧ool āinwōt rijjilōk ro etto.
7 Im enaaj waļo̧k bwe enaaj wōr juon jerbal eļap ilo āniin, em̧ool ilubwiljin ro riAelōn̄ ko, bwe aer bwebwe im mennin jōjō ko aer renaaj jedmatmat im̧aan mejān aolep armej.
8 Bwe N̄aij Anij, im Peiū ej jab kaduļo̧k; im Inaaj kwaļo̧k mennin bwilōn̄ ko, kakōļļe ko, im kabwilōn̄lōn̄ ko, n̄an aolep ro rej tōmak ioon Eta.
9 Im jabdewōt eo enaaj kajjitōke ilo Eta ilo tōmak, renaaj kadiwōjļo̧k devil raņ; renaaj kōmour rinan̄inmej; renaaj kōm̧m̧an bwe ripilo ren maron̄ loļo̧kjeņ, im rijarron̄ron̄ n̄an ron̄, im rijaje kōnono n̄an kōnono, im riakā n̄an etetal.
10 Im iien em̧ōkaj an itok bwe men ko reļļap ren waļo̧ktok n̄an ro nejin armej;
11 Ak n̄e ejjeļo̧k tōmak ejjeļo̧k jabdewōt naaj kwaļo̧ktok ijello̧kun wōt kōlo̧urō ko ioon Babilon, ejja eo wōt eaar kōm̧m̧an bwe aolep laļ ko ren idaak jān wain in illu in an lejān.
12 Im ejjeļo̧k rej kōm̧m̧an em̧m̧an ijello̧kun wōt ro rej pojak n̄an bōk tarlep in gospel eo Aō, eo me Iaar jilkinļo̧k n̄an epepen in.
13 Kōn menin, Ij kūr ioon men ko rem̧ōjņo̧ an laļ, ro rej jab rijeļāļo̧kjeņ im ro dike er, n̄an kōjenolo̧k laļ ko jān kajoor in Jetōb eo Aō;
14 Im peier renaaj Peiū, im Inaaj aer kein tōrak im aer kein tōrak jidik ko; im Inaaj kan̄ōrn̄ōre ipier, im renaaj ire āinwōt lukkuun em̧m̧an n̄an Eō; im rikōjdat ro aer renaaj pād ium̧win neer; im Inaaj kawōtlo̧k jāje eo kōn wōt er, im jān kijeek in Aō libabne Inaaj kōjo̧o̧r er.
15 Im ro rijeram̧ōl im rittā naaj kwaļo̧k gospel eo n̄an er, im renaaj reim̧aanļo̧k n̄an iien itok eo Aō, bwe e kanooj epaaktok—
16 Im renaaj jeļā būrabōļ in wōjke fig eo, bwe em̧ool kiiō ej epaaktok kadede rak eo.
17 Im em̧ōj Aō jilkinļo̧k tarlep in gospel eo Aō kōn pein rikarejera Josep; im ilo m̧ōjņo̧ Iaar kōjeraam̧m̧an e;
18 Im Iaar leļo̧k n̄an e ki ko an mennin ittino ko me em̧ōj kar liāpe, em̧ool men ko me rekar jān pedped eo an laļ, im men ko me renaaj itok jān iien in m̧ae iien itok eo Aō, eļan̄n̄e e ej pād ilo N̄a, im eļan̄n̄e jaab, bar juon Inaaj likūti ilo ijo ikijjien.
19 Kōn menin, lale e bwe an tōmak en jab likjab, bwe naaj leļo̧k e jān Rikaenōm̧m̧an eo, Jetōb Kwōjarjar, eo ejeļā men otemjeļo̧k.
20 Im juon kien Ij lewōj n̄an eok—bwe kwōn jeje n̄an e; im jeje ko rekwōjarjar naaj liļo̧k, em̧ool āinwōt rej pād ilo Ubō make, n̄an lo̧mo̧o̧r eo an ro Aō make rikāālet;
21 Bwe renaaj ron̄ Ainikiō, im naaj lo Eō, im naaj jab kiki, im naaj mour ilo raan in itok eo Aō; bwe naaj karreoik er, em̧ool āinwōt N̄aij erreo.
22 Im kiiō Ij ba n̄an eok, kwōn pād wōt ippān, im enaaj ito-itak ippam̧; jab eļļo̧k jān e, im ekanooj m̧ool men kein renaaj kūrm̧ool.
23 Im toun wōt am jab jeje, lo, naaj leļo̧k n̄an e bwe en kanaan; im kwo naaj kwaļo̧k naan kōn gospel eo Aō im kūr ioon rikanaan ro rekwōjarjar n̄an kam̧ool naan ko an, āinwōt naaj liļo̧k n̄an e.
24 Kōjparok aolep kien ko im bujen ko kwōj aikuj in pokaki; im Inaaj kōm̧m̧an bwe lan̄ ko ren m̧akūtkūt kōn em̧m̧an eo am, im Setan enaaj wūdiddid im Zaion enaaj lan̄lōn̄ ioon toļ ko im uwa;
25 Im Israel naaj lo̧mo̧o̧ren ilo iien eo Aō make; im jān ki ko me em̧ōj Aō kar liļo̧k naaj tōl er, im jamin bar pok n̄an jidik.
26 Kotak būruōmi im m̧ōņōņō, ami pinmuur ej epaaktok.
27 Jab mijak, bwij edik, aelōn̄ eo ej ami m̧ae Ij itok. Lo, em̧ōkaj Aō itok. Em̧ool āindein. Amen.