1 Juon revelesōn an Jisōs Kraist n̄an rikarejeran Josep Smith, Jun., im jiljino elder ro, ke rekar kobaik burueer im kar kotak ainikier n̄an ijo eutiej.

2 Aaet, naan eo an Irooj kōn kabun̄ eo An, kajutake ilo raan ko āliktata n̄an jepļaaktok eo an armej ro An, āinwōt Eaar kōnono kōn lo̧n̄iin rikanaan ro An, im kōn ae tok eo an ro rekwōjarjar An n̄an jutak ioon Toļ Zaion, eo enaaj jikin kwelo̧k in Jerusalem Ekāāl.

3 Jikin kwelo̧k eo me enaaj ekkal, ijjino ilo ijo jikin tampeļ eo, eo kar jitōn̄e jān akkiin pein Irooj, ilo tōrerein ko iturilik in Bukwōn in Missouri, im ajeļo̧k jān pein Josep Smith, Jun., im ro jet ro im Irooj ebun̄-būruōn ippāer.

4 Em̧ool en̄in ej naan eo an Irooj, bwe jikin kwelo̧k Jerusalem Ekāāl enaaj ekkal jān ae tok eo an ro rekwōjarjar, ijjino ilo jikin in, em̧ool ijo jikin tampeļ eo, tampeļ eo me naaj kalōke ilo epepen in.

5 Bwe em̧ool epepen in ejamin jako m̧ae iien eo juon em̧ naaj ekkal n̄an Irooj, im juon kōdo̧ enaaj pād ioon, kōdo̧ eo me enaaj m̧ool ke ej aiboojoj eo an Irooj, eo enaaj kobrak m̧weo.

6 Im m̧aan ro nejin Moses, ekkar n̄an Priesthood eo Ekwōjarjar eo me eaar bōke ium̧win pein jelpān jemān, Jetro;

7 Im Jetro eaar bōk e ium̧win pein Kaleb;

8 Im Kaleb eaar bōk e ium̧win pein Eliu;

9 Im Eliu ium̧win pein Jeremy;

10 Im Jeremy ium̧win pein Gad;

11 Im Gad ium̧win pein Esaias;

12 Im Esaias eaar bōk e ium̧win pein Anij.

13 Esaias barāinwōt eaar mour ilo raan ko an Ebream, im ar bōk kōjeraam̧m̧an jān e—

14 Ebream eo me eaar bōk priesthood eo jān Melkizedek, eo eaar bōk e kōn menmenbwij eo an ro jemān, em̧ool m̧ae Noa;

15 Im jān Noa m̧ae Inok, kōn menmenbwij eo an ro jemāer;

16 Im jān Inok n̄an Ebel, eo kar m̧ane jān karōk nana eo an ļeo jein, eo eaar bōk priesthood jān kien ko an Anij, jān pein jemān Adam, eo eaar m̧aan eo m̧oktata—

17 Priesthood eo me ej wōnm̧aanļo̧k ilo kabun̄ eo an Anij ilo aolep epepen ko, im ejjeļo̧k jinoin raan ko ak jem̧ļo̧kin iiō ko an.

18 Im Irooj eaar kapen e priesthood eo barāinwōt ioon Aron im ineen, laļļo̧k ilo aolep epepen ko aer, priesthood eo barāinwōt ej wōnm̧aanļo̧k im pād indeeo ippān priesthood eo me ej ilo̧kan laajrak ekwōjarjar tata an Anij.

19 Im priesthood in eļapļo̧k ej kōm̧akūtkūti gospel eo im kabwijer ki in men ko rettino an aelōn̄ eo, em̧ool ki in jeļāļo̧kjeņ an Anij.

20 Kōn menin, ilo kain̄i ko ie, kajoor in āinwōt anij ej waļo̧k.

21 Im ijello̧kun kain̄i ko ie, im maron̄ eo an priesthood eo, kajoor in āinwōt anij ej jab waļo̧k n̄an armej raņ ilo kanniōk;

22 Bwe ijello̧kun men in ejjeļo̧k armej emaron̄ lo turin mejān Anij, em̧ool Jemān, im mour.

23 Kiiō men in Moses eaar kanooj alikkar ilo an katakin ro nejin Israel ilo āne jem̧aden, im niknik kappukot n̄an kokwōjarjar armej ro an bwe ren maron̄ lo turin mejān Anij;

24 Ak rekar kapen burueer im kar jab maron̄ pād ilo im̧aan Mejān; kōn menin, Irooj ilo An libabne, bwe An illu ar urur ņae er, Eaar kanejnej bwe reaikuj jab deļo̧n̄ ilo kakkije eo An ilo ke rekar pād ilo āne jem̧aden, kakkije eo me ej dipiio in aiboojoj eo An.

25 Kōn menin, Eaar bōk Moses jān ilubwiljier, im Priesthood Ekwōjarjar eo barāinwōt;

26 Im priesthood eo edikļo̧k ar wōnm̧aanļo̧k, priesthood eo edikļo̧k me ej kabwijer ki in jipan̄ ko an enjeļ raņ im ki in gospel in m̧aanjāppopo eo;

27 Gospel eo me ej gospel in ukeļo̧k im in peptaij, im in jeorļo̧k in jero̧wiwi ko, im kien eo an naan in jiron̄ ko an kanniōk, ko Irooj ilo an libabne Eaar kōm̧m̧an bwe ren wōnm̧aanļo̧k wōt ippān im̧weo im̧ōn Aron ilubwiljin ro nejin Israel m̧ae Jon, eo Anij eaar kotake e, eo eaar obrak kōn Jetōb Kwōjarjar jān lo̧jeen jinen.

28 Bwe e ekar peptaij ke eaar dik wōt, im kar kapit e jān enjeļ an Anij ilo iien ko ke eaar ruwalitōk raan rūttoun n̄an kajoor in, n̄an ukōjļo̧k aelōn̄ eo an riJu ro, im n̄an kōm̧m̧an bwe en jim̧we iaļ eo an Irooj im̧aan mejān armej ro An, n̄an kōpooj er n̄an itok eo an Irooj, eo ilo Pein em̧ōj leļo̧k aolep kajoor otemjeļo̧k.

29 Im bar juon alen, opij ko an elder im bisop rej ekkejeltok ko aikuji an priesthood eo eutiej.

30 Im bar juon alen, opij ko an rikaki im tikōn rej ekkejeltok ko aikuji an priesthood eo edikļo̧k, priesthood eo kar kapene ioon Aron im m̧aan ro nejin.

31 Kōn menin, āinwōt Iaar ba kōn m̧aan ro nejin Moses—bwe m̧aan ro nejin Moses im barāinwōt m̧aan ro nejin Aron renaaj ajeļo̧k juon aje ekkar im katok ilo m̧weo im̧ōn Irooj, m̧weo me naaj kalōke n̄an Irooj ilo epepen in, ioon jikin eo em̧ōj kōjenolo̧ke āinwōt Iaar jitōn̄e—

32 Im m̧aan ro nejin Moses im nejin Aron renaaj obrak kōn aiboojoj eo an Irooj, ioon Toļ Zaion ilo m̧weo im̧ōn Irooj, ro m̧aan ro nejier ej kom̧; im barāinwōt elōn̄ ro Iaar kūri im kar jilkinļo̧k n̄an kalōkļo̧k kabun̄ eo Aō.

33 Bwe jabdewōt eo ej tiljek n̄an bōki priesthood kein ruo ko me Iaar kōnono kaki, im kōļapļo̧k kūr eo aer, rej kokwōjarjar jān Jetōb n̄an kōkāāl in ānbwin ko ānbwinnier.

34 Rej erom m̧aan ro nejin Moses im nejin Aron im ineen Ebream, im kabun̄ in im aelōn̄ in, im rikāālet an Anij.

35 Im barāinwōt aolep ro rej bōk priesthood in rej bōk Eō, Irooj ej ba;

36 Bwe e eo ej bōk ro rikarejera ej bōk Eō;

37 Im e eo ej bōk Eō ej bōk Jema;

38 Im e eo ej bōk Jema ej bōk aelōn̄ eo an Jema; kōn menin aolep men ko an Jema naaj liļo̧k n̄an e.

39 Im men in ekkar n̄an kanejnej im bujen eo me ej an priesthood eo.

40 Kōn menin, aolep ro rej bōk priesthood eo, rej bōk kanejnej im bujen eo an Jema, eo Ej jab maron̄ rupe, im ej jab maron̄ em̧m̧akūt.

41 Ak jabdewōt eo ej rupe bujen in ālikin an kar bōk e, im lukkuun oktakļo̧k jān e, naaj ban wōr jeorļo̧k in jero̧wiwi ko an ilo laļ in ak ilo laļ eo ej itok.

42 Im wo n̄an aolep ro rej jab itok n̄an priesthood in eo me kom̧ ar bōk e, eo me N̄aij kiiō kapen ioomi ro repād ijin rainin, jān Ainikiō make jān ilo lan̄ ko; im em̧ool Iaar leļo̧k n̄an inelep ko ilan̄ im enjeļ ro Aō eddo kōn kom̧.

43 Im kiiō Ij lewōj n̄an kom̧ juon kien n̄an ekkōl kōn kom̧ make, n̄an tiljek eo̧ron̄e naan ko an mour indeeo.

44 Bwe kom̧ naaj mour ekkar n̄an naan otemjej ej diwōjtok jān lo̧n̄iin Anij.

45 Bwe naan eo an Irooj ej m̧ool, im jabdewōt men eo ej m̧ool ej meram, im jabdewōt men eo ej meram ej Jetōb, em̧ool Jitōbōn Jisōs Kraist.

46 Im Jetōb eo ej leļo̧k meram n̄an armej otemjej ej itok ilo laļ in; im Jetōb eo ej kōmeramļo̧k armej otemjej kōn laļ in, eo ej eo̧ron̄e ainikien Jetōb eo.

47 Im jabdewōt eo ej eo̧ron̄e ainikien Jetōb eo ej itok n̄an Anij, em̧ool eo Jemān.

48 Im Jemān ej katakin e kōn bujen eo me Eaar kōkāāle im kapene ioomi, eo me ej kapene ioomi kōn em̧m̧an eo ami, im jab kōn em̧m̧an eo ami wōt, ak kōn em̧m̧an eo an aolepān laļ.

49 Im aolepān laļ ej babu ilo jero̧wiwi, im n̄irļo̧k ium̧win marok jilōn̄lōn̄ im ium̧win lokjak an jero̧wiwi.

50 Im jān men in kom̧ maron̄ jeļā rej pād ium̧win lokjak an jero̧wiwi, kōnke rej jab itok n̄an Eō.

51 Bwe jabdewōt eo ej jab itok n̄an Eō ej pād ium̧win lokjak an jero̧wiwi.

52 Im jabdewōt eo ej jab bōk Ainikiō ej jab kile Ainikiō, im ej jab jān Eō.

53 Im jān men in kom̧ maron̄ jeļā ro rem̧m̧an jān ro renana, im bwe aolepān laļ ej n̄irļo̧k ium̧win jero̧wiwi im marok jilōn̄lōn̄ em̧ool kiiō.

54 Im ļōmņak ko ami ilo iien ko remootļo̧k rekar marok kōnke jab tōmak, im kōnke kom̧ ar watōk men bajjek men ko kom̧ ar bōki—

55 Juwa eo im jab tōmak eo rekar bōktok aolepān kabun̄ in ium̧win liaakeļo̧k.

56 Im liaakeļo̧k in ej pād ioon ro nejin Zaion, em̧ool aolep.

57 Im renaaj pād wōt ium̧win liaakeļo̧k in m̧ae rej ukeļo̧k im keememej bujen in ekāāl, em̧ool Bok in Mormon im kien ko m̧oktaļo̧k ko Iaar liļo̧k n̄an er, jab n̄an ba wōt, ak n̄an kōm̧m̧an ekkar n̄an men eo Iaar jeje—

58 Bwe ren maron̄ jebar kōn leen ko rekkar n̄an aelōn̄ eo an Jemāer; eļan̄n̄e jaab enaaj pād wōt kaen̄tanaan eo im ekajet eo n̄an lutōkleplepļo̧k ioon ro nejin Zaion.

59 Bwe ro nejin aelōn̄ eo renaaj ke kattoone āne eo ekwōjarjar Aō? Em̧ool, Ij ba n̄an kom̧, Jaab.

60 Em̧ool, em̧ool, Ij ba n̄an kom̧ ro rej kiiō ron̄jaki naan kein Aō, ko rej Ainikiō, em̧ōņōņō kom̧ toun wōt ami bōki men kein;

61 Bwe Inaaj jeorļo̧k jero̧wiwi ko ami jān kom̧ kōn kien in—bwe kom̧in dim wōt ilo ļōmņak ko ami ilo kejakļo̧kjeņ im ilo jitōbōn jar, ilo kwaļo̧k naan in kam̧ool n̄an aolepān laļ kōn men ko kar kōnono kaki n̄an kom̧.

62 Kōn menin, kom̧in ilo̧k ilo aolepān laļ; im n̄an jabdewōt jikin kom̧ij jab maron̄ ilo̧k kom̧ naaj jilkinļo̧k, bwe naan in kam̧ool eo en maron̄ etal jān kom̧ ilo aolepān laļ n̄an armej otemjeļo̧k.

63 Im āinwōt Iaar ba n̄an rijjilōk ro Aō, em̧ool āindein Ij ba n̄an kom̧, bwe kom̧ij rijjilōk ro Aō, em̧ool pris utiej ro an Anij; kom̧ij ro im Jema eaar letok n̄an Eō; kom̧ij ro jera;

64 Kōn menin, āinwōt Iaar ba n̄an rijjilōk ro Aō Ij ba n̄an kom̧ bar juon alen, bwe armej otemjej ej lōke ioon naan ko Aō, im ej peptaij jān dān kōn juļo̧k in jero̧wiwi ko, enaaj bōk Jetōb Kwōjarjar.

65 Im kakōļļe kein renaaj ļoore er ro rej lōke—

66 Ilo Eta renaaj kōm̧m̧an elōn̄ jerbal ko rekabwilōn̄lōn̄;

67 Ilo Eta renaaj kadiwōjļo̧k jetōb ettoon ko;

68 Ilo Eta renaaj kōmour rinan̄inmej;

69 Ilo Eta renaaj kōpeļļo̧k māj ko mejān ripilo, im jojān boņ in lo̧jiln̄in ro rijarron̄ron̄;

70 Im loōn riwūdeakeak enaaj kōnono;

71 Im eļan̄n̄e jabdewōt armej enaaj leļo̧k baijin n̄an er ej jamin naaj kōmetak er;

72 Im baijin in juon jedpānit ejamin wōr an kajoor n̄an ko̧kkure er.

73 Ak juon kien Ij leļo̧k n̄an er, bwe renaaj jab likōmjāje make kōn men kein, im jab ekkōnono kaki im̧aan laļ in; bwe men kein rej liwōj n̄an kom̧ n̄an ļapļo̧k eo ami im n̄an lo̧mo̧o̧r.

74 Em̧ool, em̧ool, Ij ba n̄an kom̧, er ro rej jab lōke ioon naan ko ami, im rej jab peptaij ilo dān ilo Eta, n̄an juļo̧k in jero̧wiwi ko aer, bwe ren maron̄ bōk Jetōb Kwōjarjar, renaaj jako, im jamin naaj itok ilo aelōn̄ eo an Jema ijo Jema im N̄a kōmij pād ie.

75 Im revelesōn in n̄an kom̧, im kien, ej jejjet kūtien jān lukkuun awa in ioon aolepān laļ, im gospel in ej n̄an aolep ro rejjan̄in kar bōk e.

76 Ak, em̧ool Ij ba n̄an aolep ro im aelōn̄ eo em̧ōj leļo̧k n̄an er—jān kom̧ eaikuj kwaļo̧k naan kake n̄an er, bwe ren maron̄ ukeļo̧k jān jerbal nana ko aer m̧oktaļo̧k; bwe reaikuj bōk kauwe kōn bōro nana in jab tōmak ko aer, im ro jeiūm̧ im jatūm ilo Zaion kōn jum̧ae eo aer ņae kom̧ ilo iien eo Iaar jilkinļo̧k kom̧.

77 Im bar juon alen Ij ba n̄an kom̧, ro jera, bwe jān iien in m̧aanļo̧k Inaaj kūr kom̧ ro jera, emennin aikuj bwe In lewōj n̄an kom̧ kien in, bwe kom̧in erom em̧ool āinwōt ro jera ilo raan ko ke Iaar pād ippāer, ito-itak n̄an kwaļo̧k naan kōn gospel eo ilo Aō kajoor.

78 Bwe Iaar kōtļo̧k er n̄an jab bōk bōjo̧ ak jāān, im jab ruo kopā.

79 Lo, Ij jilkinļo̧k kom̧ n̄an mālejjon̄e laļ, im rijerbal eo ej tōllo̧ke men eo wōņāān.

80 Im jabdewōt em̧m̧aan eo enaaj ilo̧k im kwaļo̧k naan kōn gospel in an aelōn̄ eo, im jab likjab ilo wōnm̧aanļo̧k ilo tiljek ilo aolep men ko otemjeļo̧k, e ban kijeļo̧k ilo ļōmņak, im jab marok, jab ilo ānbwin, ra, im jab mo̧kwōj; im wūdin juon kooļan bōran ejamin wōtlo̧k n̄an laļ im jab jeļā kake. Im reban naaj kwōle, ak maro.

81 Kōn menin, kom̧in bōk ejjeļo̧k ļōmņak kōn ilju, kōn ta kom̧ naaj m̧ōn̄ā, ak ta kom̧ naaj idaak, ak kōn ta kom̧ naaj balle.

82 Bwe, watōki wūt lilly ko in meļaaj, ewi wāween aer eddek, rej jab jerbal, im rej jab irap; im aelōn̄ in kiin̄ ko an laļ, ilo aolep aer aiboojoj, rej jab pālpel āinwōt juon ian rein.

83 Bwe Jemāmi, eo ej pād ilo lan̄, E jeļā bwe ewōr ami aikuj kōn aolep men kein.

84 Kōn menin, kōtļo̧k ilju bwe en ļōmņak kōn men ko an make.

85 Im kom̧in jab ļōmņak im̧aanļo̧k ta kom̧ naaj ba; ak ko̧koņi ilo ļōmņak ko ami iien otemjej naan ko in mour, im enaaj lewōj n̄an kom̧ ilo ejja awa eo wōt m̧ōttan eo naaj jon̄e n̄an armej otemjej.

86 Kōn menin, en ejjeļo̧k armej ilubwiljimi, bwe kien in ej n̄an aolep ro rej tiljek im kar kūr er jān Anij ilo kabun̄ eo n̄an jerbal in, jān awa in bōk ejjeļo̧k bōjo̧ ak jāān, eo ej etal n̄an kabun̄bun̄ļo̧k gospel in an aelōn̄ eo.

87 Lo, Ij jilkinļo̧k kom̧ n̄an kauweik laļ in n̄an aolep jerbal ko rebōd aer, im n̄an katakin er kōn juon ekajet eo me ej itok.

88 Im jabdewōt eo ej bōk kom̧, Inaaj pād ijo barāinwōt, bwe Inaaj etal im̧aanļo̧k in mājāmi. Inaaj pād ianbwijmaron̄imi im ianmiin̄imi, im Aō Jetōb enaaj pād ibūruōmi, im enjeļ ro Aō ipeļaakimi, n̄an kotak kom̧.

89 Jabdewōt eo ej bōk kom̧ ej bōk Eō; im ejja in wōt enaaj naajdik kom̧, im kanuknuk kom̧, im lewōj n̄an kom̧ m̧ani.

90 Im e eo ej naajdik kom̧, ak kanuknuk kom̧, ak lewōj n̄an kom̧ m̧ani, naaj ilo ejja wāween in jamin m̧wijkōk jān jinōkjej eo an.

91 Im e eo ej jab kōm̧m̧ani men kein ej jab rikaļoora; jān men in kom̧ maron̄ jeļā ro rikaļoora.

92 E eo ej jab bōk kom̧, kom̧in etal jān e kom̧ make, im karreoik neemi em̧ool kōn aebōj, aebōj erreo, men̄e ilo māāņāņ ak ilo m̧ōļo, im kwaļo̧k naan in kam̧ool kake e n̄an Jemāmi eo ej pād ilan̄, im jab bar ro̧o̧l n̄an armej en.

93 Im ilo jabdewōt jikin edik ak jikin kwelo̧k kom̧ij deļo̧n̄, kōm̧m̧an āinwōt.

94 Mekarta, kanooj etale im jab jenlik; im wo n̄an m̧weo, ak jikin in edik ak jikin kwelo̧k eo ej jab bōk kom̧, ak naan ko ami, ak naan in kam̧ool eo ami kōn Eō.

95 Wo, Ij ba bar juon alen, n̄an m̧weo, ak n̄an jikin in edik ak n̄an jikin kwelo̧k eo ej jab bōk kom̧, ak naan ko ami, ak naan in kam̧ool ko ami kōn Eō;

96 Bwe N̄a, eo Ekajoor Bōtata, Iaar likūt pā ko Peiū ioon laļ ko, n̄an kaen̄taan er kōn nana eo aer.

97 Im mennin kaen̄tanaan ko naaj ilo̧k, im naaj jamin bōki jān laļ m̧ae Aō naaj kar kadedeļo̧k jerbal eo Aō, eo me naaj kōm̧ōkajļo̧k ilo wānōk—

98 M̧ae aolep naaj jeļā N̄a, ro rej pād wōt, em̧ool jān eo ediktata n̄an eo eļaptata, im naaj obrak kōn jeļāļo̧kjeņ kōn Irooj, im naaj lo māj n̄an māj, im naaj kotakļo̧k ainikier, im kōn ainikien eo ippān doon al al in ekāāl, im ba:

99 Irooj eaar kōro̧o̧ltok Zaion;Irooj eaar bar lo̧mo̧o̧ren armej ro An, Israel,Ekkar n̄an kāālet an jouj,Eo kar kajejjete jān tōmak eoIm bujen eo an ro jemāer.

100 Im Irooj eaar lo̧mo̧o̧ren armej ro An;Im Setan ej lokjak im iien ej jab bar wōr.Irooj eaar aini aolep men ko ilo juon wōt.Irooj eaar bōklaļtak Zaion jān ijo ilan̄.Irooj eaar bōklōn̄tak Zaion jān ijo ilaļ.

101 Laļ ar n̄irļo̧k kōlwan im keotak kajoor eo an;Im m̧ool ej jutak ilo ilujeen lio;Im lan̄ ko kar ettōn̄dikdik ioon lio;Im lio ej nuknuk kōn aiboojoj eo an Anij eo an;Bwe Ej jutak ilo ilubwiljin armej ro An.

102 Aiboojoj, im wūjtak, im kajoor, im maron̄,Ren liļo̧k n̄an adwōj Anij; bwe E ej obrak kōn tūriam̧o,Jim̧we, jouj im m̧ool, im aenōm̧m̧an,Indeeo im indeeo, Amen.

103 Im bar juon alen, em̧ool, em̧ool, Ij ba n̄an kom̧, emennin aikuj bwe em̧m̧aan otemjej ro rej ilo̧k n̄an kabun̄bun̄ļo̧k gospel eo ejjeļo̧k jem̧ļo̧kin Aō, bwe toun wōt an wōr aer baam̧le, im bōk m̧ani jān mennin leļo̧k, bwe ren jilkinļo̧k e n̄an er ak kōjerbale n̄an em̧m̧anļo̧k eo aer, āinwōt Irooj enaaj tōl er, bwe āindein ej em̧m̧an n̄an Eō.

104 Im kōtļo̧k aolep ro ejjeļo̧k aer baam̧le, ro rej bōk m̧ani, bwe ren jilkinlōn̄ļo̧k n̄an bisop eo ilo Zaion, ak n̄an bisop eo ilo Ohio, bwe en maron̄ kōjenolo̧k e n̄an kadedeļo̧k revelesōn ko im likūti ilo bok, im n̄an kajutak eo an Zaion.

105 Im eļan̄n̄e jabdewōt armej enaaj leļo̧k n̄an jabdewōt iaami juon liboror, ak juon kopā, bōk eo em̧or im jakeļo̧k n̄an eo ejeram̧ōl, im ilo̧k im lan̄lōn̄ ilo iaļ eo am.

106 Im eļan̄n̄e jabdewōt armej ilubwiljimi ekajoor ilo Jetōb eo, kōtļo̧k bwe en bōk ippān e eo em̧ōjņo̧, bwe en maron̄ kōketake ilo aolep ettā, bwe en maron̄ kajoor barāinwōt.

107 Kōn menin, bōk ippemi ro im em̧ōj kapit er n̄an priesthood eo edikļo̧k, im jilkinļo̧k er im̧aami n̄an kōm̧m̧an iien iioon doon ko, im n̄an kōpooje iaļ eo, im n̄an etal n̄an iien iioon doon ko kom̧ make kom̧ij jab maron̄ etal n̄an i.

108 Lo, en̄in ej wāween eo rijjilōk ro Aō, ilo raan ko etto, rekar kalōkļo̧k kabun̄ eo Aō n̄an Eō.

109 Kōn menin, kajjojo em̧m̧aan en jutak ilo opij eo an make, im jerbal ilo kūr eo an make; im jab kōtļo̧k bwe bar en ba n̄an ne ejjeļo̧k an aikuj n̄an ne ko; bwe ijello̧kun ne ko ekōjkan an naaj ānbwin eo maron̄ in jutak?

110 Barāinwōt ānbwin eo ewōr an aikuji kajjojo uwaan, bwe aolep ren maron̄ ketak ippān doon, bwe aolepān ānbwin eo en weeppān.

111 Im lo, pris utiej ro ren ito-itak, im barāinwōt elder ro, im barāinwōt pris ro reddikļo̧k; ak tikōn ro im rikaki ro ren ijjitōn̄ n̄an lale kabun̄ in, n̄an minister ro n̄an kabun̄ in.

112 Im bisop eo, Newel K. Whitney, barāinwōt en ito-itak ipeļaakin jikin kein im ilubwiljin jarlepju in rijar ko, im kappukot ro rijeram̧ōl n̄an lali kōņaan ko aer jān kōttāik ro rim̧weiie im rijuwa.

113 En barāinwōt kōjerbale juon riņa ainikien n̄an bōk eddo im n̄an kōm̧m̧ani jerbal ko an ilo kanniōk āinwōt an naaj tōl e.

114 Mekarta, bisop eo en etal n̄an jikin kwelo̧k in New York, barāinwōt n̄an jikin kwelo̧k in Albany, im barāinwōt n̄an jikin kwelo̧k in Boston, im kakkōl armej ro ilo jikin kwelo̧k kaņ kōn juon ainikien gospel eo, kōn juon ainikien eļļaaj, in kōlo̧urō im ko̧kkure otem ko̧kkure eo ej kōttar er eļan̄n̄e rej jab bōki men kein.

115 Bwe eļan̄n̄e rej jab bōki men kein awa in ekajet eo aer ej epaak, im m̧weo im̧weer naaj likūt wōt n̄an er ilo kōlo̧urō.

116 E en lōke Eō im naaj ban kapok e; im juon wūdin kooļan bōran ej jamin wōtlo̧k n̄an laļ im jab jeļā kake.

117 Im em̧ool Ij ba n̄an kom̧, bwe eo in ro rikarejera, kom̧in ilo̧k āinwōt jekjek ko kom̧ij pād ie renaaj kōtļo̧k, ilo kūr ko wōj ami, n̄an jikin kwelo̧k ko reļļap im rebun̄bun̄ im jikin jidik ko, im kauweik laļ in ilo wānōk kōn aolep kōm̧m̧an ko aer rebōd im rej jab jim̧we, im jakem̧aanļo̧k ilo alikkar im meļeļe kōlo̧urō in mennin kajjōjō eo ilo raan ko āliktata.

118 Bwe, ippemi Irooj Ekajoor Bōtata ej ba, Inaaj kekōl aelōn̄ in kiin̄ ko aer; Ij jamin kōm̧akūtkūt laļ wōt, ak lan̄ ko reijuju renaaj wūdiddid.

119 Bwe N̄a, Irooj, em̧ōj Aō likūt Peiū n̄an kōjādeik kajoor ko an lan̄; kom̧ jab maron̄ lo e kiiō, ijoke jidik iien im kom̧ naaj lo e, im jeļā bwe N̄aij mour, im bwe Inaaj itok im irooj ippān armej ro Aō.

120 N̄aij Alpa im Omega, jinoin im jem̧ļo̧kin. Amen.