1 Chi yaal, jo’ka’in naxye li Qaawa’ eere laa’ex li kech’utub’ eerib’ chixk’ulb’al li rajom xch’ool cherix:

2 K’ehomaq reetal, a’in naxsahob’resi xch’ool lee Qaawa’, ut eb’ li anjel neke’saho’ sa’ xch’ool cherix; li lemoox re lee tij wulajenaq taqe’q sa’ xxik li Qaawa’ re Sabaot, ut tz’iib’anb’il sa’ xhuhil lix k’ab’a’eb’ li santob’resinb’ileb’, a’aneb’ ajwi’ li ani re li choxahil ruchich’och’.

3 Jo’kan ut, anajwan nintaqla sa’ eeb’een jun chik aj K’ojob’anel Ch’oolej, sa’ eeb’een laa’ex ajwi’ li raab’ilex inb’aan, re taakanaaq sa’ lee ch’ool, a’an li Loq’laj Musiq’ej re yeechi’ink; ut li jun chik chi K’ojob’anel Ch’oolej a’in, a’an ajwi’ li kinyeechi’i reheb’ lin tzolom, jo’ chanru tz’iib’anb’il sa’ lix ch’olob’ahom laj Jwan.

4 Laj K’ojob’anel Ch’oolej a’in, a’an naq yeechi’inb’il eere inb’aan li junelik yu’am, a’ lix loq’alil li choxahil awa’b’ejihom;

5 A’an ajwi’ xloq’alil li iglees re li Xb’een Yo’lajenaq, re ajwi’ li Dios, li q’axal sant re chixjunil, sa’ xk’ab’a’ li Jesukristo li Ralal—

6 A’an li kixtaqsi rib’ chi taqe’q, jo’ chanru ajwi’ kikub’e rub’el chixjunil li k’a’aq re ru, rik’in naq naxtaw ru chixjunil li k’a’aq re ru, re taawanq chi sa’ chixjunil ut chiru chixjunil li k’a’aq re ru, lix saqenkil li yaal;

7 A’ li yaal li nalemtz’un. A’in lix saqen li Kristo. Jo’ chanru ajwi’ wan a’an sa’ li saq’e, ut lix saqen li saq’e, ut lix wankilal a’an li kiyiib’aman wi’.

8 Jo’ chanru ajwi’ wan a’an sa’ li po, ut a’an lix saqen li po, ut lix wankilal a’an li kiyiib’aman wi’;

9 Jo’ ajwi’ lix saqenkileb’ li chahim, ut lix wankilaleb’ a’an li ke’yiib’aman wi’;

10 Ut li ruchich’och’ ajwi’, ut lix wankilal a’an, a’ li ruchich’och’ ajwi’ li xaqxookex wi’.

11 Ut li saqen li nalemtz’un, li naxk’e saqen eere, a’an sa’ xk’ab’a’ li ani nakutanob’resink re lix naq’ eeru, a’an ajwi’ li saqen li nak’ehok xyu’am lee k’a’uxl;

12 A’ li saqen li na’el chaq chiru li Dios re xnujob’resinkil xnimal ru li heelam—

13 Li saqen li wan sa’ chixjunil li k’a’aq re ru, li naxk’e xyu’am chixjunil li k’a’aq re ru, a’ li chaq’rab’ li jolominb’il wi’ chixjunil li k’a’aq re ru, a’an ajwi’ lix wankil li Dios li k’ojk’o sa’ xb’een lix k’ojarib’aal, li wan chire xch’ool li junelik q’e kutan, li wan sa’ xyi chixjunil li k’a’aq re ru.

14 Anajwan, chi yaal ninye eere, naq rik’in li tojb’al-ix li b’aanunb’il choq’ eere, k’amb’il chi uxmank li wakliik chi yo’yo sa’ xyanqeb’ chaq li kamenaq.

15 Ut li musiq’ej ut li tz’ejwalej a’aneb’ li raam li winq.

16 Ut li wakliik chi yo’yo sa’ xyanqeb’ chaq li kamenaq a’an lix tojb’al rix li aamej.

17 Ut lix tojb’al rix li aamej wan sa’ xk’ab’a’ a’an li nak’ehok xyu’am chixjunil li k’a’aq re ru, li taqlanb’il wi’ chire xch’ool a’an naq eb’ li neb’a’ ut li tuulan re li ruchich’och’ te’eechaninq re.

18 Jo’kan ut, tento naq taasantob’resiiq chaq li ruchich’och’ chiru chixjunil li maa’usilal, re naq kawresinb’ilaq choq’ re li choxahil loq’alil;

19 Xb’aan naq chirix naq xnujob’resi lix b’isb’al lix yo’ob’tesinkil, taak’ehe’q li loq’alil choq’ xkoroon, a’an naq taawanq aran li Dios Yuwa’b’ej;

20 Re naq eb’ li tz’ejwalej li b’arwan reheb’ li choxahil awa’b’ejihom te’reechani chi junelik q’e kutan, xb’aan naq choq’ re li ajom a’in naq kiyiib’aman ut kiyo’ob’tesiman, ut choq’ re li ajom a’in naq santob’resinb’ileb’ a’an.

21 Ut eb’ li ink’a’ santob’resinb’ileb’ rik’in li chaq’rab’ li kink’e eere, a’ lix chaq’rab’ li Kristo, tento te’reechani jalan chik awa’b’ejihom, a’ re jun terrestil awa’b’ejihom, malaj re jun teleestil awa’b’ejihom.

22 Xb’aan naq ani ink’a’ naru chixkuyb’al xpaab’ankil lix chaq’rab’il jun choxahil awa’b’ejihom ink’a’ naru chixkuyb’al jun choxahil loq’alil.

23 Ut ani ink’a’ naru chixkuyb’al xpaab’ankil lix chaq’rab’il jun terrestil awa’b’ejihom ink’a’ naru chixkuyb’al jun terrestil loq’alil.

24 Ut ani ink’a’ naru chixkuyb’al xpaab’ankil lix chaq’rab’il jun teleestil awa’b’ejihom ink’a’ naru chixkuyb’al jun teleestil loq’alil, jo’kan naq moko k’ulub’ej ta choq’ re jun awa’b’ejihom re loq’alil. Jo’kan naq tento tixkuy jun awa’b’ejihom li maawa’ awa’b’ejihom re loq’alil.

25 Ut jo’kan wi’chik, chi yaal ninye eere, li ruchich’och’ naxkuy xpaab’ankil lix chaq’rab’il jun li choxahil awa’b’ejihom, xb’aan naq naxnujob’resi xb’isb’al lix yo’ob’tesinkil, ut moko naxq’et ta li chaq’rab’—

26 Jo’kan ut, taasantob’resimanq; relik chi yaal, us ta taakamq, taak’ehe’q wi’chik xyu’am, ut tixkuy li wankilal li k’eeb’il wi’ xyu’am, ut eb’ li tiikeb’ xch’ool te’eechaninq re.

27 Xb’aan naq us ta neke’kam, te’wakliiq ajwi’ wi’chik, jun musiq’ejil tz’ejwalej.

28 Eb’ li ani reheb’ jun choxahil musiq’ej te’xk’ul ajwi’ li tz’ejwalej li kiwan choq’ ruchich’och’il tz’ejwalej; relik chi yaal, laa’ex ajwi’ teek’ul lee xaqalil, ut lee loq’al a’anaq li loq’alil li k’eeb’il wi’ xyu’am lee xaqalil.

29 Laa’ex li k’eeb’il eeyu’am rik’in jun raqal li choxahil loq’alil, teek’ul xkomon ajwi’ a’an, a’anaq lix tz’aqalil.

30 Ut eb’ li k’eeb’ileb’ xyu’am rik’in jun raqal li terrestil loq’alil te’xk’ul xkomon ajwi’ a’an, a’anaq lix tz’aqalil.

31 Ut eb’ li k’eeb’ileb’ xyu’am rik’in jun raqal li teleestil loq’alil te’xk’ul xkomon ajwi’ a’an, a’anaq lix tz’aqalil.

32 Ut eb’ li neke’kana te’k’ehe’q ajwi’ xyu’am; a’b’anan te’sutq’iiq wi’chik sa’ tz’aqal lix na’ajeb’, re xyalb’al li k’a’ru ke’wan xch’ool chixk’ulb’al, xb’aan naq moko ke’wan ta xch’ool chixyalb’al li k’a’ru ke’ru raj chixk’ulb’al.

33 Xb’aan naq k’a’ru tixra wi’ junaq winq wi k’eeb’il jun maatan re, ut moko naxk’ul ta li maatan? K’ehomaq reetal, moko nasaho’ ta sa’ xch’ool rik’in li k’a’ru k’eeb’il re, chi moko nasaho’ sa’ xch’ool rik’in li ani kik’ehok re li maatan.

34 Ut jo’kan wi’chik, chi yaal ninye eere, li k’a’ru jolominb’il xb’aan li chaq’rab’, kolb’il ajwi’ rix xb’aan li chaq’rab’, ut tz’aqob’resinb’il re ru ut santob’resinb’il xb’aan ajwi’ a’an.

35 Li k’a’ru naq’etok re junaq chaq’rab’, ut moko naxkuy ta wank sa’ li chaq’rab’, li naxsik’ b’an wank choq’ chaq’rab’ xjunes rib’, ut naraj kanaak sa’ li maak, ut nakana chi junajwa sa’ li maak, ink’a’ naru chi santob’resiik xb’aan li chaq’rab’, chi moko xb’aan li uxtaan, li tiik ruhil na’leb’, malaj li raqb’a-aatin. Jo’kan naq tento te’kanaaq chi toj tz’ajeb’ ru.

36 Sa’ chixjunileb’ li awa’b’ejihom wan jun chaq’rab’ k’eeb’il;

37 Ut k’iila awa’b’ejihom wan; xb’aan naq maak’a’ li na’ajej b’ar wi’ maak’a’ li awa’b’ejihom wan, ut maak’a’ li awa’b’ejihom b’ar wi’ maak’a’ li na’ajej, ma xnimal ru awa’b’ejihom malaj xka’ch’inal ru awa’b’ejihom.

38 Ut choq’ re li junjunq chi awa’b’ejihom k’eeb’il jun chaq’rab’; ut choq’ re li junjunq chi chaq’rab’ wank ajwi’ k’a’ru ramb’il ut k’a’ru teneb’anb’il.

39 Chixjunileb’ li ani ink’a’ neke’xkuy li k’a’ru teneb’anb’il moko tiikob’resinb’ileb’ ta ru.

40 Xb’aan naq li seeb’al k’a’uxlej najilok rik’in li seeb’al k’a’uxlej; li chaab’il na’leb’ naxk’ul li chaab’il na’leb’; li yaal naxq’alu li yaal; li saq ruhil na’leb’ naxra li saq ruhil na’leb’; li saqen najilok rik’in li saqen; li uxtaan naxtoq’ob’a ru li uxtaan ut nareechani li k’a’ru re; li tiik ruhil na’leb’ toj naxk’am lix b’e ut nareechani li k’a’ru re; li raqb’a-aatin naxik chiru li rilob’aal li ani k’ojk’o sa’ xb’een li k’ojarib’aal ut naxjolomi ut naxk’anjela chixjunil li k’a’aq re ru.

41 A’an naxtaw xyaalal chixjunil li k’a’aq re ru, ut chixjunil li k’a’aq re ru wan chiru, ut chixjunil li k’a’aq re ru wan sa’ xsutam; ut a’an wan chi taqenaq sa’ xb’een chixjunil li k’a’aq re ru, ut sa’ chixjunil li k’a’aq re ru, ut wan chiru chixjunil li k’a’aq re ru, ut wan sa’ xsutam chixjunil li k’a’aq re ru; ut chixjunil li k’a’aq re ru wan xb’aan a’an, ut chalen chaq a’an, a’ li Dios, chi junelik q’e kutan.

42 Ut jo’kan wi’chik, chi yaal ninye eere, a’an xk’e jun chaq’rab’ choq’ re chixjunil li k’a’aq re ru, li neke’xik wi’ sa’ xkutankileb’ ut xq’ehileb’;

43 Ut xaqxookeb’ lix b’ehileb’, lix b’ehil ajwi’ li choxa ut li ruchich’och’, wan wi’ li ruchich’och’ ut chixjunileb’ li t’ort’ookil chahim.

44 Ut neke’xk’e xsaqen chirib’ileb’ rib’ sa’ xkutankileb’ ut sa’ xq’ehileb’, sa’ xk’asaleb’, sa’ xhoonaleb’, sa’ xkutaneb’, sa’ xxamaaneb’, sa’ xpoheb’, sa’ xchihab’eb’—chixjunil a’in jun chihab’ rik’in li Dios, a’ut moko rik’in ta li winq.

45 Li ruchich’och’ nasututnak chiru lix xik’, ut li saq’e naxk’e xsaqen chi kutan, ut li po naxk’e xsaqen chi q’ojyin, ut eb’ li chahim neke’xk’e ajwi’ xsaqenkeb’, naq neke’xsututi rib’ chiru xxik’eb’ sa’ xloq’alileb’, sa’ xyi lix wankil li Dios.

46 K’a’ aj-ik’in tinjuntaq’eeta eb’ li awa’b’ejihom a’in, re teetaw ru?

47 K’ehomaq reetal, chixjunil a’in awa’b’ejihomeb’, ut yalaq winq li x’ilok re junaq malaj lix ka’ch’inal reheb’ a’in, xril li Dios chi xik rik’in xnimal ru ut xwankilal.

48 Ninye eere, xril a’an; a’b’anan, li ani kichal rik’ineb’ li re moko kitawe’ ta xyaalal.

49 Li saqen nalemtz’un sa’ li q’ojyin, ut li q’ojyin moko naxtaw ta ru; a’b’anan taachalq li kutan naq teetaw xyaalal li Dios ajwi’, chi k’eeb’il eeyu’am rik’in a’an ut xb’aan a’an.

50 Toja’ ut naq teenaw naq kineeril, naq wankin, ut naq laa’in li tz’aqal saqen li wan eerik’in, ut naq laa’ex wankex wik’in; wi ta ink’a’ jo’kan ink’a’ raj texruuq chi numtaak.

51 K’ehomaq reetal, tinjuntaq’eetaheb’ li awa’b’ejihom a’in rik’in jun winq li wan xch’och’, ut kixtaqlaheb’ lix moos sa’ li ch’och’ re b’ekok sa’ li ch’och’.

52 Ut kixye re li xb’een: Ayu ut k’anjelan sa’ li ch’och’, ut sa’ li xb’een hoonal tinchalq aawik’in, ut taawil xsahil xch’ool li wilob’aal.

53 Ut kixye re li xkab’: Ayu ajwi’ sa’ li ch’och’, ut sa’ li xkab’ hoonal tatwula’ani rik’in xsahil xch’ool li wilob’aal.

54 Ut jo’kan ajwi’ re li rox, ut kixye: Tatwula’ani;

55 Ut jo’kan ajwi’ re li xkaa, ut jo’kan toj reetal li xkab’laju.

56 Ut laj eechal re li awimq xko’o rik’in li xb’een sa’ li xb’een hoonal, ut kikana rik’in a’an chixjunil li hoonal a’an, ut kik’ehe’ xsahil xch’ool rik’in xsaqenkil li rilob’aal laj eechal re.

57 Toja’ ut naq kirisi rib’ rik’in li xb’een re taarula’ani ajwi’ li xkab’, ut li rox, ut li xkaa, ut jo’kan toj reetal li xkab’laju.

58 Ut chi jo’kan chixjunileb’ ke’xk’ul xsaqenkil li rilob’aal laj eechal reheb’, li junjunq chi winq sa’ xhoonal, ut sa’ xkutankil, ut sa’ xq’ehil—

59 Kitikla rik’in li xb’een, ut jo’kan toj reetal xraqikeb’, ut chalen chaq xraqikeb’ toj reetal li xb’eenil, ut chalen chaq xb’eenil toj reetal xraqikeb’;

60 Li junjunq chi winq sa’ tz’aqal lix tusulal, toj reetal naq choyb’il lix hoonal, jo’ chanru ajwi’ naq kixtaqla wi’ laj eechal re, re naq nimanb’ilaq xloq’al laj eechal re rik’in a’an, ut a’an rik’in laj eechal re, re naq nimanb’ilaq xloq’aleb’ chixjunileb’.

61 Jo’kan ut, rik’in li jaljookil ru aatin a’in tinjuntaq’eeta chixjunileb’ li awa’b’ejihom a’in, ut li ani wankeb’ chi sa’—li junjunq chi awa’b’ejihom sa’ xhoonal, ut sa’ xkutankil, ut sa’ xq’ehil, jo’ chanru ajwi’ li aatin kixtaqla li Dios.

62 Ut jo’kan wi’chik, chi yaal ninye eere, ex raab’ilex inb’aan, ninkanab’ li yehom a’in eerik’in re teetz’il rix sa’ eech’ool, rik’in li taqlahom a’in li nink’e eere, naq teepatz’ ink’ab’a’ naq nach’ wankin—

63 Jilonqex wik’in ut laa’in tinjiloq eerik’in; sik’omaqin chi yalb’il eeq’e ut tineetaw; chextz’aamanq, ut texk’uluq; chextoch’oq, ut taateemanq cheru.

64 Yalaq k’a’ru teetz’aama chiru li Yuwa’b’ej sa’ lin k’ab’a’ taak’eemanq eere, li na’ajman ru choq’ eere;

65 Ut wi neketz’aama k’a’ruhaq li moko aajel ta ru choq’ eere, taasutq’iiq choq’ eejitb’al.

66 K’ehomaq reetal, li k’a’ru nekerab’i, chanchan lix yaab’ xkux jun li najapok re sa’ li yamyookil ch’och’—sa’ li yamyookil ch’och’, xb’aan naq ink’a’ nekexru chirilb’al—lix yaab’ inkux, xb’aan naq lix yaab’ inkux a’an Musiq’ej, lin Musiq’ a’an li yaal; li yaal nakana ut maajun roso’jik wan; ut wi wan eerik’in taanumtaaq.

67 Ut wi junaj ru lix sa’ eeru sa’ inloq’al, chixjunil lee xaqalil nujenaqaq chi saqen, ut maak’a’aq q’ojyin eerik’in; ut li jun xaqalil li nujenaq chi saqen naxtaw xyaalal chixjunil li k’a’aq re ru.

68 Jo’kan ut, santob’resihomaq eerib’ re naq junajaq ru lee k’a’uxl rik’in li Dios, ut taachalq xkutankil naq teeril a’an; xb’aan naq taarisi xtz’apb’al ru li rilob’aal cheru, ut taawanq sa’ li kutan tixk’oxla a’an, ut chi uxb’il jo’ tixk’oxla a’an, ut jo’ chanru li rajom xch’ool a’an.

69 Chijultiko’q eere li xnimal ru ut roso’jikil yeechi’ihom li kink’e eere; tz’eqomaq lee jo’maajo’il k’oxlahom ut xnumtajik li se’ek chi najt eerik’in.

70 Chexkanaaq, chexkanaaq sa’ li na’ajej a’in, ut b’oqomaq jun ch’utlajik re tiik ruhil k’a’uxlej, reheb’ ajwi’ li wankeb’ choq’ xb’een aj k’anjeleb’ sa’ li xraqikil awa’b’ejihom a’in.

71 Ut eb’ li ani ke’xtij chaq sa’ xb’eenikeb’ che’xpatz’aq xk’ab’a’ li Qaawa’, ut che’xtz’il rix li tije’k sa’ xch’ooleb’, li xe’xk’ul, chiru jarub’aq kutan.

72 K’ehomaq reetal, ut ilomaq, laa’in tink’aak’aleheb’ lee teep chi karneer, ut tinwaklesiheb’ li xb’eenil ut teb’intaqla reheb’.

73 K’ehomaq reetal, laa’in tinseeb’a lin k’anjel sa’ xq’ehil.

74 Ut nink’e eere laa’ex, li wankex choq’ xb’een aj k’anjel sa’ li xraqikil awa’b’ejihom a’in, jun taqlahom naq teech’utub’ eerib’ ut teek’uub’ eerib’, ut teekawresi eerib’, ut teesantob’resi eerib’; relik chi yaal, saqob’resihomaq ru lee ch’ool, ut ch’ajob’resihomaq lee ruq’ ut lee roq chiwu, re naq texinch’ajb’ilob’resi;

75 Re naq tinch’olob’ xyaalal chiru lee Yuwa’, ut lee Dios, ut lin Dios laa’in, naq ch’ajb’ilex chirix lix kik’el li tasal tenamit a’in aj maak; re naq tintz’aqob’resi ru li yeechi’ihom a’in, li xnimal ru ut xraqikil yeechi’ihom a’in, li kink’e eere, jo’q’e nawaj.

76 Jo’kan ajwi’, nink’e eere jun taqlahom naq texkanaaq sa’ li tijok ut kuyuk sa’ chalen sa’ li hoonal a’in.

77 Ut nink’e eere jun taqlahom naq teek’ut li tzol’leb’ re li awa’b’ejihom cherib’il eerib’.

78 Chexk’utuq chi yalb’il eeq’e, ut li wusilal taa’ochb’eeninq eere, re textzole’q chi tz’aqalaq chik re ru sa’ xxe’ul li na’leb’ank, sa’ li jar raqal chi na’leb’, sa’ li tzol’leb’, sa’ li chaq’rab’ re li evangelio, sa’ chixjunil li k’a’aq re ru chirix lix awa’b’ejihom li Dios, li jo’ k’ihal na’ajman ru naq teetaw ru;

79 Chirix li k’a’aq re ru sa’ choxa jo’ ajwi’ sa’ li ruchich’och’, ut rub’el li ch’och’; li k’a’aq re ru wanjenaq, li k’a’aq re ru wan, li k’a’aq re ru tento taak’ulmanq chi seeb’, li k’a’aq re ru wan sa’ li ch’och’ wankex wi’, li k’a’aq re ru wan sa’ najtil ch’och’; li pleet ut lix nimal xk’a’uxleb’ li tenamit, ut eb’ li raqb’a-aatin li wankeb’ sa’ li ch’och’, ut jo’kan ajwi’ eenawom chirixeb’ li tenamit ut li awa’b’ejihom—

80 Re naq kawresinb’ilaqex sa’ chixjunil li k’a’aq re ru naq texintaqla wi’chik chixnimob’resinkil ru li b’oqok li kexinb’oq wi’, ut li taqlanb’il k’anjel li kink’e wi’ eetaqlankil.

81 K’ehomaq reetal, kexintaqla chi xik re xch’olob’ankil li yaal ut xtijb’aleb’ li tenamit, ut na’ajman ru choq’ re li junjunq chi winq li tijb’il naq tixtij li ras riitz’in.

82 Chi jo’kan, neke’kana chi maak’a’ k’a’ru te’xpatz’ wi’ xkuyb’aleb’, ut lix maakeb’ wan sa’ xb’een lix jolomeb’ a’an.

83 Ani ink’a’ naxb’ay rib’ chinsik’b’al, tinixtaw, ut ink’a’ taakanab’aaq xjunes.

84 Jo’kan ut, chexkanaaq, ut chexk’anjelaq chi yalb’il eeq’e, re taatz’aqloq eere eeru sa’ lee k’anjel re xik sa’ xyanqeb’ laj Gentil li jun sutaq chik, jo’ k’ihal eere yeeb’ilaqeb’ xk’ab’a’ xb’aan lix tz’uumal re li Qaawa’, re xb’ak’b’al chaq li chaq’rab’ ut xtz’apb’al chaq li yaal ch’olob’anb’il, ut re xkawresinkileb’ laj santil paab’anel choq’ re li hoonal re raqb’a-aatin li chalel;

85 Re taaruuq te’xkol rib’ li raameb’ chiru lix josq’il li Dios, li sache’k re tz’eqb’eetalil li na’oyb’enink reheb’ laj maak, sa’ li ruchich’och’ a’in jo’ ajwi’ sa’ li ruchich’och’ chalel. Chi yaal ninye eere, eb’ li maawa’eb’ xb’een li xb’eenil che’kanaaq sa’ li awimq toj reetal te’b’oqe’q xb’aan xtz’uumal re li Qaawa’, xb’aan naq maji’ nachal lix hoonaleb’; maji’ ch’ajb’il li raq’eb’ chirix lix kik’el li tasal tenamit a’in.

86 Chexkanaaq sa’ li ach’ab’aak li ach’ab’anb’ilex wi’; meekanab’ eerib’ chi b’ak’iik xb’aan li maak; ch’ajb’ilaq b’an eeruq’, toj reetal naq taak’ulunq li Qaawa’.

87 Xb’aan naq moko k’iila kutan ta chik ut li ruchich’och’ taachenchotq ut taasaalanq chi junpak’al ut chi junpak’al chik jo’ jun winq kalajenaq; ut li saq’e tixmuq li rilob’aal, ut ink’a’ taaraj xk’eeb’al saqen; ut li po atisinb’ilaq sa’ kik’; ut eb’ li chahim te’chalq xjosq’il chi numtajenaq, ut te’xkut rib’ taq’a jo’ jun ru li higo li nat’ane’ chaq chiru jun xtoonal li higo.

88 Ut chirix li yaal li teech’olob’ nachal li josq’il ut li xik’ eek’anb’il sa’ xb’een li tenamit.

89 Xb’aan naq chirix lee ch’olob’ahom nachal lix ch’olob’ahomeb’ li hiik, li taab’aanunq re li aakanak sa’ xyi li ch’och’, ut eb’ li winq te’t’ane’q chi ch’och’ ut ink’a’ te’ruuq chi xaqliik.

90 Ut nachal ajwi’ lix ch’olob’ahom lix yaab’ xkux li kaaq, ut lix yaab’ xkux li raq’ kaaq, ut lix yaab’ xkux li kaq-sut-iq’, ut lix yaab’eb’ xkux lix b’oolam li palaw li te’xkut rib’ chirix xnub’aaleb’.

91 Ut chixjunil li k’a’aq re ru taawanq chi choqinb’il; ut ch’olch’o naq eb’ li winq te’lajq xch’ooleb’; xb’aan naq taachalq li xiw sa’ xb’eeneb’ chixjunil li tenamit.

92 Ut eb’ li anjel te’xik’anq chiru xyi li choxa, japjooqeb’ re chi kaw xyaab’eb’ xkux, ut te’xyaab’asi lix trompeet li Dios, chixyeeb’al: Kawresihomaq eerib’, kawresihomaq eerib’, ex li wankex sa’ li ruchich’och’; xb’aan naq wulajenaq lix raqb’a-aatin li qaDios. K’ehomaq reetal, ut ilomaq, chalk re li B’eelomej; elenqex chixk’ulb’al.

93 Ut sa’ junpaat taak’utunq jun nimla eetalil sa’ choxa, ut chixjunileb’ li tenamit te’ril sa’ komonil.

94 Ut jun chik anjel tixyaab’asi lix trompeet, chixyeeb’al: Li nimla iglees a’an, lix na’ileb’ li tz’eqb’eetalil, li kiminok ruheb’ chixjunil li ninqi tenamit chiruk’b’al xviinul li josq’il xb’aan li yumb’eetak ko’b’eetak kixb’aanu, li narahob’tesink reheb’ laj santil paab’anel re li Dios, li xhoyok re lix kik’eleb’—li ixq a’an li k’ojk’o sa’ xb’een k’iila ha’, ut sa’ xb’eeneb’ li ch’och’ sa’ xyi palaw—k’ehomaq reetal, a’an li yib’ aj pim re li ruchich’och’; a’an b’ak’b’o chi joob’; k’eeb’il xkawil lix b’ak’leb’, maajun winq naru chi hitok re; jo’kan ut, kawresinb’il re taak’ate’q. Ut a’an tixyaab’asi li trompeet chi najtaq xyaab’ ut kawaq, ut chixjunileb’ li tenamit te’ab’inq re.

95 Ut taawanq ch’anch’ookilal sa’ choxa chiru xnumik xyijach jun hoonal; ut tikto chirix a’an taateeliiq lix t’ikrul li choxa, jo’ nateeliik jun b’otb’ookil hu chirix naq b’otob’anb’il, ut taa’isimanq chaq li tz’apleb’ t’ikr chiru li rilob’aal li Qaawa’;

96 Ut eb’ laj santil paab’anel li wankeb’ sa’ li ruchich’och’, li yo’yookeb’, te’k’ehe’q xyu’am ut te’xoke’q chixk’ulb’al.

97 Ut eb’ li ke’war sa’ xmuqleb’aal kamenaqeb’ te’elq chaq, xb’aan naq te’teeliiq lix muqleb’aaleb’; ut te’xoke’q ajwi’ chixk’ulb’al sa’ xyi li roqechal li choxa—

98 A’aneb’ re li Kristo, li xb’een ruuchinihom, eb’ li te’kub’eeq xb’een wa rochb’een, ut eb’ li te’wanq sa’ li ruchich’och’ ut sa’eb’ lix muqleb’aal, li te’xoke’q xb’een wa chixk’ulb’al; ut chixjunil a’in xb’aan xyaab’ xkux lix yaab’asinkil li trompeet xb’aan lix anjel li Dios.

99 Ut chirix a’in jun chik li anjel taayaab’asinq, a’an xkab’ li trompeet; toja’ ut nachal lix tojb’aleb’ rix li ani re li Kristo sa’ lix k’ulunik; li ke’tz’aqon sa’ li tz’alam a’an li kawresinb’il choq’ reheb’, re te’xk’ul li evangelio, ut taaraqe’q aatin chirixeb’ jo’ chanruheb’ li winq sa’ li tz’ejwalej.

100 Ut jo’kan wi’chik, jun chik trompeet taayaab’asimanq, a’an rox li trompeet; toja’ ut neke’chal lix musiq’eb’ li winq li te’raqe’q aatin chirixeb’, ut tawb’ileb’ rub’el li tojb’a-maak;

101 Ut a’aneb’ a’in li rela’eb’ li kamenaq; ut moko neke’wan ta wi’chik chi yo’yo toj reetal naq raqenaq li jun mil chihab’, chi moko chirix a’an, toj sa’ roso’jik li ruchich’och’.

102 Ut jun chik trompeet taayaab’asimanq, a’an li xkaa trompeet, ut tixye: Natawman sa’ xyanqeb’ li te’kanaaq toj sa’ li xnimal ru ut roso’jikil kutan a’an, a’ li roso’jik ajwi’, li toj tz’ajeb’ ru te’kanaaq.

103 Ut jun chik trompeet taayaab’asimanq, a’an ro’ li trompeet, a’an li ro’ anjel li naq’axtesink re li evangelio li junelik nakana—yoo chi xik’ank sa’ xyi li choxa, toj rik’ineb’ chixjunil li tenamit, junkab’al, aatinob’aal, ut teepal;

104 Ut a’inaq xyaab’ lix trompeet, tixye reheb’ chixjunil li tenamit, sa’ choxa jo’ ajwi’ sa’ ruchich’och’, ut li wankeb’ rub’el li ch’och’—xb’aan naq li junjunq xikej taa’ab’inq re, ut li junjunq xb’een aqej taab’asmanq, ut li junjunq ru’uj aq’ej tixch’olob’ xyaalal, naq neke’rab’i lix yaab’ li trompeet chixyeeb’al: Chexuwa ru li Dios, ut chek’e xloq’al li ani k’ojk’o sa’ xb’een li k’ojarib’aal, chi junelik q’e kutan, xb’aan naq wulajenaq xhoonal lix raqb’a-aatin.

105 Ut jo’kan wi’chik, jun chik anjel tixyaab’asi lix trompeet, a’an xwaq li anjel, chixyeeb’al: T’anenaq li ixq a’an li kiminok ruheb’ chixjunil li tenamit chiruk’b’al xviinul li josq’il xb’aan li ko’b’eetak yumb’eetak kixb’aanu; t’anenaq a’an, t’anenaq!

106 Ut jo’kan wi’chik, jun chik anjel tixyaab’asi lix trompeet, a’an xwuq li anjel, chixyeeb’al: Ak raqenaq; ak raqenaq! Lix Karneer li Dios xq’axok-u ut xyeq’i li yatz’leb’aal uva xjunes, a’ li yatz’leb’aal uva re lix nimal xjosq’il li Nimajwal Dios.

107 Toja’ ut naq eb’ li anjel te’k’ehe’q choq’ xkorooneb’ xloq’al lix nimal xmetz’ew a’an, ut eb’ laj santil paab’anel te’nujaq rik’in lix loq’al, ut te’xk’ul reechanihomeb’ ut te’k’ehe’q chi juntaq’eeteb’ xwankil rik’in a’an.

108 Toja’ ut naq li xb’een anjel tixyaab’asi wi’chik lix trompeet sa’ xxikeb’ chixjunil li yo’yookeb’, ut tixk’utb’esi lix muqmuukil b’aanuhomeb’ li winq, ut lix ninqal ru k’anjel li Dios sa’ li xb’een mil chihab’.

109 Toja’ ut naq li xkab’ anjel tixyaab’asi lix trompeet, ut tixk’utb’esi lix muqmuukil b’aanuhomeb’ li winq, ut lix k’oxlahom ut rajom lix ch’ooleb’, ut lix ninqal ru k’anjel li Dios sa’ li xkab’ mil chihab’—

110 Ut chi jo’kan, toj reetal naq li xwuq anjel tixyaab’asi lix trompeet; ut tixxaqab’ rib’ sa’ xb’een li ch’och’ ut sa’ xb’een li palaw, ut tixxaqab’ aatin sa’ lix k’ab’a’ li ani k’ojk’o sa’ xb’een li k’ojarib’aal, naq maak’a’aq chik xnumik li kutan; ut b’ak’b’ilaq laj Satanas, li najter aj k’anti’ a’an, aj tza li yeeb’il re, ut ink’a’ taahite’q chiru xnumik jun mil chihab’.

111 Ut chirix a’an taahite’q chiru jarub’aq kutan, re tixch’utub’eb’ lix teep aj pleet.

112 Ut laj Miguel, li xwuq anjel, a’ li taqenaqil anjel, tixch’utub’eb’ lix teep aj pleet, a’ lix teepal li choxa.

113 Ut laj tza tixch’utub’eb’ lix teep aj pleet; a’eb’ lix teepal li xb’alb’a, ut taataqe’q chixpleetinkil laj Miguel ut eb’ lix teep aj pleet.

114 Toja’ ut naq nachal lix pleet li nimla Dios; ut laj tza ut eb’ lix teep aj pleet te’tz’eqe’q toj sa’ tz’aqaleb’ lix na’aj, re naq maak’a’aqeb’ xwankil sa’ xb’eeneb’ laj santil paab’anel chi junajwa chik.

115 Xb’aan naq laj Miguel tixpleeti lix pleeteb’, ut taanumtaaq sa’ xb’een li ani nasik’ok re lix k’ojarib’aal li ani k’ojk’o sa’ xb’een li k’ojarib’aal, a’an li Karneer.

116 A’in lix loq’al li Dios, ut eb’ li santob’resinb’il; ut eb’ a’an ink’a’ chik te’ril li kamk.

117 Jo’kan ut, chi yaal ninye eere, ex raab’ilex inb’aan, b’oqomaq lee ch’utlajik re tiik ruhil k’a’uxlej, jo’ kexintaqla.

118 Ut rik’in naq moko chixjunileb’ ta wankeb’ xpaab’aal, chexsik’oq chi yalb’il eeq’e ut k’utumaq cherib’il eerib’ li aatin re chaab’il na’leb’; relik chi yaal, sik’omaq chaq sa’eb’ li hu q’axal chaab’il li aatin re chaab’il na’leb’; chesik’ xk’ulb’al eenawom, rik’in li tzolok ut rik’in ajwi’ li paab’aal.

119 K’uub’ahomaq eerib’; kawresihomaq chixjunil li k’a’ru na’ajman; ut xaqab’omaq jun ochoch, a’anaq ajwi’ rochochil li tijok, rochochil li kuyuk sa’, rochochil li paab’aal, rochochil li tzolok, rochochil li loq’alil, rochochil li tustuukilal, rochoch li Dios;

120 Re naq lee rokik taawanq sa’ lix k’ab’a’ li Qaawa’; re naq lee relik taawanq sa’ lix k’ab’a’ li Qaawa’; re naq chixjunil lee k’ehom sahil ch’oolejil taawanq sa’ lix k’ab’a’ li Qaawa’, chi taqsinb’il li uq’ej chiru li Q’axal Taqenaq Xwankil.

121 Jo’kan ut, kanab’omaq chixjunil lee jo’maajo’il aatin, chixjunil li se’ek, chixjunil lix rahihom ru lee ratawom, chixjunil lee q’etq’etil ut jo’maajo’il k’a’uxlej, ut chixjunil lee maa’us aj b’aanuhom.

122 Xaqab’omaq sa’ eeyanq jun aj tzolonel, ut me’wan chixjunileb’ choq’ aj aatinanel chi jun xikik; li junjunq b’an chi’aatinaq naq tixtz’aq ut chixjunileb’ che’rab’i lix yehom, re naq chirix naq xe’aatinak chixjunileb’, naq chixjunileb’ te’waklesiiq li raam xb’aan chixjunileb’, ut re naq li junjunq chi winq juntaq’eetaq li kanab’anb’ilaq chixb’aanunkil.

123 Cheril naq teera eerib’; chekanab’ li rahink-u; chetzol k’ehok li jun re li jun chik jo’ naxteneb’ li evangelio.

124 Chekanab’ wank choq’ aj q’em; chekanab’ wank chi tz’aj eeru; chekanab’ xsik’b’al li jun lix maak jalan; chekanab’ wark chi numtajenaq chiru li na’ajman; ayuqex sa’ lee ch’aat chi moko najt q’ojyin ta, re naq ink’a’ lub’jenaqaqex; waklinqex chi moko najt kutan ta, re naq taawanq chi seeb’ob’resinb’il lee junxaqalil ut lee k’a’uxl.

125 Ut sa’ xb’een chixjunil, tiqib’omaq eerib’ rik’in xb’ak’leb’ li rahok, chanchan rik’in jun b’atb’al, a’an xb’ak’leb’ li tz’aqalil re ru ut li tuqtuukilal.

126 Chextijoq junelik, re naq ink’a’ taach’inanq eech’ool, toj reetal naq tink’ulunq. K’ehomaq reetal, ut ilomaq, tink’ulunq sa’ junpaat, ut texink’ul wik’in. Amen.

127 Ut jo’kan wi’chik, lix k’anjelil li ochoch kawresinb’il choq’ re li awa’b’ejil re li tzoleb’aal reheb’ li profeet, xaqab’anb’il choq’ re xtzolb’aleb’ sa’ chixjunil li k’a’aq re ru na’ajman ru choq’ reheb’, choq’ reheb’ ajwi’ chixjunileb’ laj k’anjel sa’ li iglees, malaj sa’ jalan chik aatin, eb’ li b’oqb’ileb’ sa’ li k’anjel sa’ li iglees, chalen li taqenaqil aj tij, toj reetal eb’ laj tenq’anel—

128 Ut a’inaq lix k’anjelil li rochoch li awa’b’ejil re li tzoleb’aal: Li ani xaqab’anb’il chi wank choq’ awa’b’ej, malaj aj tzolonel, taatawmanq chi xaqxo sa’ xna’aj, sa’ li ochoch li kawresinb’ilaq choq’ re.

129 Jo’kan ut, a’an taawanq xb’een wa sa’ li rochoch li Dios, sa’ jun li na’ajej b’ar wi’ li ch’utam sa’ li ochoch te’ruuq chirab’inkil li raatin chi k’eeb’il reetal ut chi ch’olch’o, chi moko kaw ta xyaab’ xkux.

130 Ut naq taachalq sa’ li rochoch li Dios, xb’aan naq tento taawanq a’an xb’een wa sa’ li ochoch—k’ehomaq reetal, ch’ina-us a’in, re taaruuq taawanq choq’ aj k’utunel re li k’a’ru tento taa’uxq—

131 Chixq’axtesi rib’ sa’ tijok chi wiq’wo chiru li Dios, choq’ reetalil malaj re xjultikankil li sumwank li junelik nakana.

132 Ut naq taa’ok anihaq chik chirix, chiwakliiq laj tzolonel, ut chi taqsinb’il li ruq’ chiru choxa, relik chi yaal, chi tiik, chixk’ehaq xsahil xch’ool lix komon malaj eb’ lix komon rik’in li aatin a’in:

133 Ma laa’at inkomon, malaj ut, ma laa’ex inkomon? Nink’e xsahil eech’ool sa’ lix k’ab’a’ li Qaawa’ Jesukristo, choq’ reetalil malaj re xjultikankil li sumwank li junelik nakana, sa’ li sumwank wi’ nekexink’ul sa’ komonil, sa’ jun xk’eeb’al inch’ool li xaqxo, li ink’a’ na’eek’an, ut li ink’a’ naru xjalb’al, naq tinwanq choq’ aj rahol eere ut eekomon sa’ xk’ab’a’ li rusilal li Dios sa’ xb’ak’leb’ li rahok, re b’eek sa’ chixjunil lix taqlahom li Dios chi maak’a’ qajitb’al, rik’in b’antioxink, chi junelik q’e kutan. Amen.

134 Ut ani natawman chi moko k’ulub’ej ta choq’ re li k’ehok sahil ch’oolejil a’in maak’a’aq xna’aj sa’ eeyanq; xb’aan naq ink’a’ teekanab’ naq li wochoch tz’ajninb’ilaq xb’aan.

135 Ut ani na’ok ut tiik chi paab’ank chiwu, ut komon a’an, malaj wi komoneb’, te’xk’e xsahil xch’ool li awa’b’ej malaj aj tzolonel chi taqsinb’il li ruq’eb’ chiru choxa, rik’in ajwi’ li tijok ut sumwank a’in, malaj rik’in xyeeb’al Amen, choq’ reetalil ajwi’ a’an.

136 K’ehomaq reetal, chi yaal ninye eere, a’in jun k’utb’il na’leb’ choq’ eere re xk’eeb’al xsahil eech’ool cherib’il eerib’ sa’ li rochoch li Dios, sa’ li tzoleb’aal reheb’ li profeet.

137 Ut b’oqb’ilex chixb’aanunkil a’in rik’in tijok ut b’antioxink, jo’ chanru naq li Musiq’ej taak’ehoq re li aatin sa’ chixjunil lee b’aanuhom sa’ li rochoch li Qaawa’, sa’ li tzoleb’aal reheb’ li profeet, re naq taa’ok choq’ santil muheb’aal, jun xmuheb’aal li Loq’laj Musiq’ej choq’ re xwaklesinkil eeraam.

138 Ut ink’a’ teek’ul anihaq sa’ eeyanq sa’ li tzoleb’aal a’in, ka’ajwi’ wi ch’ajb’il chirix lix kik’el li tasal tenamit a’in;

139 Ut taak’ule’q rik’in li k’ojob’anb’il k’anjel re xch’ajb’al li oqej, xb’aan naq choq’ re a’in kitikib’aman li k’ojob’anb’il k’anjel re xch’ajb’al li oqej.

140 Ut jo’kan wi’chik, li k’ojob’anb’il k’anjel re xch’ajb’al li oqej tento naq k’anjelanb’ilaq xb’aan li awa’b’ej, malaj li xb’eenil aj jolominel re li iglees.

141 Tento taatikib’amanq rik’in tijok; ut chirix xk’ulb’al li kaxlan wa ut viin, tento tixb’ak’ li t’ikr chirix jo’ chanru li k’utb’il eetalil k’eeb’il sa’ li roxlaju ch’ool lix ch’olob’ahom laj Jwan chiwix. Amen.